ဒီးတမ့ၢ်ပှၤလၢအတကါဒိၣ်တလၢလၢ်ကဲၣ်ဆိးတဖၣ်ဘၣ်မ့ၢ်ပှၤတဖၣ်လၢအဲၣ်တၢ်တီၤတုၤသိးထဲသိး ဒီးတအဲၣ်တၢ်ဒိၣ်ဆံးအါစှၤလၢကဒဲကဒဲအသိးအကျါဘၣ်,ဒီးတမ့ၢ်စ့ၢ်ကီးပှၤတဖၣ်လၢအဲၣ်ဒိးမၤနၢၤ မၤပဲၤပှၤဂုာ်ပှၤဂၤဒီးဒိၣ်စိလၢပှၤဂၤအဖီခိၣ်ဘၣ်,လၢကညီဖိကဒဲဒဲအဖီခိၣ်မ့ၢ်ဂ့ၤလၢကလုာ်ဂၤအဖီ ခိၣ်မ့ၢ်ဂ့ၤမ့ၢ်တၢ်ဒ်သိးသိးလီၤ.
ဘၣ်ဆၣ်ပယီၤပဒိၣ်လၢအဖီၣ်စှီၤတံၢ်ဃာ်၀ဲပယီၤကလုာ်ဒိၣ်စိသနူတစိၤဘၣ်တစိၤတဖုဘၣ်တဖုတ ဖၣ်မ့ၢ်ပှၤတဖၣ်လၢအတကါဒိၣ်၀ဲလၢတၢ်ကိးမံၤဒဲးအဲၣ်ဒိးဒိၣ်စိ၀ဲဒၣ်လၢပ၀ဲဒၣ်ကညီကလုာ်အဖီခိၣ်ဒီးကလုာ်ဒူၣ်လၢထံလီၢ်ကီၢ်ပူၤတဖၣ်အဖီခိၣ်ခဲလၢာ်န့ၣ်လီၤ.ဒီးတၢ်ထူးတၢ်တီၤတၢ်အိၣ်တၢ်ယၢၤလၢအိၣ်လၢကညီကီၢ်ပူၤဒီးကလုာ်ဒူၣ်အဂုာ်အဂၤကီၢ်ပူၤတဖၣ်န့ၣ်အဲၣ်ဒိးဂုာ်န့ၢ်ပၢ၀ဲတဂၤဃီခဲလၢာ်စ့ၢ်ကီးန့ၣ်လီၤ.
အဲၣ်ဒိး၀ဲလၢကညီဖိဒီးကလုာ်ဒူၣ်ဖိအဂၤခဲလၢာ်လၢထံလီၢ်ကီၢ်ပူၤအံၤကဘၣ်အိၣ်လၢအဖီလာ်ခဲလၢာ်ဒီးဒ်အ၀ဲသ့ၣ်လိၣ်ဘၣ်၀ဲအသိးကဘၣ်ဒိကနၣ်လူၤပိာ်ထွဲမၤထွဲ၀ဲဒ်အတၢ်လိၣ်ဘၣ်အသိးခဲလၢာ်န့ၣ် လီၤ.
ဒီးဒ်သိးမၤလၢပှဲၤ၀ဲအတၢ်လိၣ်ဘၣ်သးလီတဖၣ်ကန့ၢ်အဂီၢ်ပာ်လီၤ၀ဲတၢ်ဒုးရဲၣ်ကျဲၤကျဲလၢကညီဖိဒီးကလုာ်ဒူၣ်အဂၤလၢထံလီၢ်ကီၢ်ပူၤတဖၣ်အဖီခိၣ်ကလုာ်ကလုာ်တခါ၀ံၤတခါတပတီၢ်၀ံၤတပတီၢ်,တကမဲၤ၀ံၤတကမဲၤဒီးလၢတၢ်ဆၢကတီၢ်တၢ်အိၣ်သးအဖီခိၣ်ဆီတလဲ၀ဲအတၢ်ဒုးရဲၣ်ကျဲၤအကျဲတဖၣ်ကွ့ၢ်ကွ့ၢ်ဘၣ်ဃးတၢ်ကူၣ်တရံးကျဲခူသူၣ်သ့ၣ်တဖၣ်န့ၣ်လီၤ.မ့မ့ၢ်တၢ်စုဆူၣ်ခီၣ်တကးအကျဲတၢ်စုက၀ဲၤတၢ်ဒုးအကျဲတခီလ့ၤတက့ၤတဆီတလဲ၀ဲဘၣ်.အိၣ်ဒၣ်မၤဆူၣ်ထီၣ်၀ဲတဘျီဘျီမၤစၢ်လီၤ၀ဲတဘျီဘျီလၢကမၤစၢၤ၀ဲတၢ်ဒုးခူသူၣ်တၢ်ကူၣ်တရံးခူသူၣ်ကျဲတဖၣ်အဂီၢ်ဒ်သိးအတၢ်ဒုးရဲၣ်ကျဲၤအကျဲခူသူၣ်တဖၣ်မၤတၢ်ကသ့ဒီးမိၢ်လံၤမိၢ်ပှၢ်ကအိၣ်ဖျါထီၣ်လၢအဂီၢ်န့ၣ်လီၤ.
လၢအတၢ်ဒုးရဲၣ်ကျဲၤတၢ်ကူၣ်တရံးကဲစ့ၢ်ကီးအိၣ်၀ဲတဘျုးကလုာ်လၢအမ့ၢ်တၢ်ဘူၣ် တၢ်ဘါတၢ်ဒုးကလုာ်ဂ့ၢ်၀ီ,တၢ်ဒုးထူသနူတၢ်ဆဲးတၢ်လၤကျိာ်လံာ်လဲၢ်တၢ်ဒုးသးသဟီၣ်,သးဂ့ၢ်ပီညါ တၢ်ဒုးဒီးမုၢ်ကျိၤ၀ဲၤကွာ်တၢ်ဒုးဒီးအဂုာ်အဂၤတဖၣ်န့ၣ်လီၤ .လၢအတၢ်ဒုးပှၤန့ၣ်သူ၀ဲတၢ်ဒုးရဲၣ်ကျဲၤ တၢ်ကူၣ်တရံးအကျဲခူသူၣ်တဖၣ်အံၤခဲလၢာ်လၢအလီၢ်အကျဲဒီးတၢ်ဆၢကတီၢ်အဖီခိၣ်န့ၣ်လီၤ.
လၢပ၀ဲကညီဖိအတၢ်ဂ့ၤတၢ်၀ါတၢ်တူၢ်ခီၣ်ပာ်သးလၢအဂ့ၤဒီးဘၣ်လိာ်ဖိးမံဒီးကလုာ်ဂၤတဖၣ်န့ၣ်အ၀ဲပာ်၀ဲဒ်အမ့ၢ်ပတၢ်ဂံၢ်စၢ်တခါစုာ်ဒီးဒုးပှၤလၢတၢ်ဒုးကူၣ်တရံးပှၤအကျဲတခါ၀ံၤတခါလၢတၢ်ဆၢကတီၢ်တၢ်အိၣ်သးအဖီခိၣ်ဒီးတဘျီဘျီသူ၀ဲကိးခါဒဲးလၢတၢ်လီၢ်ကိးတီၤဒဲးဒီးတဘျီဘျီသူ၀ဲတခါခံခါဒီးတဘျီဘျီသူ၀ဲတနီၤပာ်ဃာ်မၤလီၤကဒုဃာ်၀ဲတနီၤထီဘိလၢပမ့ၢ်ကွၢ်ထံပဲာ်ထံနီၤဖးအီၤလီၤတံၢ်လီၤဆဲး န့ၣ်လီၤ.
ပကွၢ်က့ၤလၢပကီၢ်ရ့ၣ်မုာ်ြတီၤပူၤန့ၣ် လၢအတၢ်ထီၣ်ဒုးပှၤလၢတၢ်ဒုးတၢ်ယၤ တၢ်စုက၀ဲၤ တၢ် စုဆူၣ်ခီၣ်တကးအကျဲတပယူာ်ဃီအပူၤသူ၀ဲတၢ်ဒုးရဲၣ်ကျဲၤတၢ်ကူၣ်တရံးခူသူၣ်တၢ်အကျဲတဖၣ်ခဲ လၢာ်ဒီးတဘျီဘျီမၤဆူၣ်၀ဲတခါမၤစၢ်၀ဲတခါတဘျီဘျီမၤလီၤကဒုဃာ်၀ဲဒီးတဘျီဘျီမၤဆူၣ်၀ဲကိးခါဒဲးအိၣ်၀ဲဒၣ်န့ၣ်လီၤ.
ပကကွၢ်ဖဲ ၁၉၈၉ တုၤ၁၉၉၅ထီၣ်ဒုးပှၤလၢတၢ်စုက၀ဲၤ ဆူၣ်ဆူၣ်ကိၤကိၤ ပၢၢ်တုၤ လၢ သူ၀ဲကဘီယူၤဒုးသုးအါအါဂီၢ်ဂီၢ် အသုးမုၢ် သံၣ်ဘိလၢဟီၣ်ခိၣ်မဲာ်ဖံးခိၣ် တဖၣ်အါအါဂီၢ်ဂီၢ် ဒီးသူ ၀ဲစုက၀ဲၤဒိၣ်တဖၣ်လၢအမ့ၢ် ၈၁/၈၂ MM /၁၀၀/၁၂၀ MM /၇၅/၇၆ ဒီး၁၅၀ MM တဖၣ်အါအါဂီၢ်ဂီၢ် အမဲာ် ညါသူဃုာ်၀ဲတၢ်ဆဲးတၢ်လၤကျိာ်လံာ်လဲၢ်, တၢ်ဘူၣ်တၢ်ဘါတၢ်စူၢ်တၢ်နာ် ဃုာ်ဒီးသးသဟီၣ် သး ဂ့ၢ်ပီညါတၢ်ဒုးတဖၣ်တဘျီဃီဒီးထီၣ်ဒုးမၤန့ၢ်ကွံာ်၀ဲကညီဒီကလုာ်စၢဖှိၣ်ကရၢ၀ဲၤလီၢ်ခိၣ်သ့ၣ်လၢအမ့ၢ်မၤနၢၤပျီန့ၣ်လီၤ.
လၢအတၢ်ဒုးရဲၣ်ကျဲၤတဖၣ်အံၤခဲအံၤတဆိကတီၢ်ြတူၣ်ကွံာ်ဝဲဒံးဘၣ် မၤဒံးဝဲတပယူၣ်ဃီ အ ဖၢဒံးလီၤ. ခဲအံၤဆၢကတီၢ်တခီမၤဆူၣ်ထီၣ်အါထီၣ်ကဒီးဝဲ လၢမုၢ်ကျိၤဝဲၤကွာ် တၢ်ဖံးတၢ်မၤ တၢ်ရဲၣ် တၢ်ကျဲၤ တၢ်ဂုၤထီၣ်ပသီထီၣ်တၢ်ဖံးတၢ်မၤတကပၤန့ၣ်လီၤ.
ပထံၣ်နၢ်ဟူသ့ၣ်ညါဘၣ်လၢပျဲထီၣ်ဝဲၭအခီပနံၣ်တဖၣ်လၢအမ့ၢ်တၢ်သ့တၢ်ဘှီခီပနံၣ်တၢ်ထုးထီၣ်သ့ၣ်ပှၢတၢ်ထူးတၢ်တီၤတၢ်အိၣ်ယၢၤအခီပနံၣ်ထုးထီၣ်ဟီၣ်လၣ်တၢ်ထူးတၢ်တီၤတၢ်အိၣ်ယၢၤတဖၣ်အခီပနံၣ်ဒီးတၢ်သူၣ်တၢ်ဖျးအခီပနံၣ်တဖၣ်အပှၤလၢအမၤလဲၢ်အီၣ်ကီၢ်ထုးထီၣ်ကွံာ်တၢ်ထူးတၢ်တီၤလၢကလုာ်ဒူၣ်တဖၣ်ဒီးပဝဲကညီကကလုာ်အဟီၣ်က၀ီၤပူၤတကးဘၣ် လၢတၢ်သူၣ်လီၤ ဘျၢလီၤတၢ်အဂီၢ် ကဟံကွံာ် ပဟီၣ်ခိၣ် ကပံာ်စံာ်လီၢ်ပှဲၤလီၢ်,ကျီးကရၢၢ်လီၢ်,တၢ်သူၣ်တၢ်ဖျးအကလုာ်ကလုာ်အလီၢ် ဃုာ်ဒီးပဟံၣ်လီၢ်ဃီလီၢ်တဖၣ် န့ၣ်လီၤ.
အတၢ် ရဲၣ်တၢ်ကျဲၤအံၤ မၤတ့ၢ်လံ၀ဲ ကယီကယီလံ လၢနံၣ်လၢ အပူၤကွံာ်တဖၣ်ဒီး ခဲအံၤဒီးဆူညါကမၤဆူၣ်ထီၣ်၀ဲကွ့ၢ်ကွ့ၢ်န့ၣ်လီၤ.ဒီပုၢ်၀ဲၢ်ပှၤဖးတၢ်ဖိပှၤဒိကနၣ်တၢ်ဖိခဲလၢာ်သ့ၣ်သုဧၢပယီၤပဒိၣ်လၢ အကူၣ်တရံးပှၤလၢတၢ်ကူၣ်သ့အကျဲ လၢသူ၀ဲခီပနံၣ်အပှၤမ့ၢ်ဂ့ၤအကမျၢၢ်လၢအဘုၣ် ဃာ်၀ဲဒီးနာ်အီၣ်၀ဲတဖၣ်မ့ၢ်ဂ့ၤလၢအတၢ်မၤလဲၢ်အီၣ်ကီၢ်တၢ်ရဲၣ်တၢ်ကျဲၤအပူၤတမ့ၢ်ကသူ၀ဲတၢ်စုဆူၣ်ခီၣ်တကးအကျဲဘၣ်ကမၤ၀ဲလၢတၢ်ကူၣ်သ့အကျဲအိၣ်ဃုာ်ဒီးတၢ်တူၢ်လၢာ်ကျိၣ်စ့လၢအတၢ်ရဲၣ်တၢ်ကျဲၤအဂီၢ်ဒ်အြကၢးဘၣ်၀ဲအသိးတဆံးတက့ၢ်လၢကကွဲန့ၢ်လွဲန့ၢ်တၢ်အဂီၢ်န့ၣ်လီၤ.
လၢကမၤန့ၢ်၀ဲကပံာ်ဟီၣ်ခိၣ်တၢ်လီၢ်တၢ်ကျဲမ့ၢ်ဂ့ၤ,ဟီၣ်လာ်တၢ်ထူးတၢ်တီၤအိၣ်အလီၢ်ဒီးဟီၣ်က၀ီၤတဖၣမ့ၢ်ဂ့ၤကန့ၢ်ဘၣ်၀ဲအဂီၢ်ကတူၢ်လၢာ်ကျိၣ်စ့လၢကပှ့ၤ၀ဲအဂီၢ်ဒ်အြကၢးအဘၣ်၀ဲအသိးဒီးတဘျီတခီၣ်ဘၣ်သ့ၣ်သ့ၣ်ကတူၢ်လၢာ်၀ဲအါန့ၢ်ဒံးတၢ်မၤညီနုၢ်အသးဒၣ်လဲာ်ကအိၣ်၀ဲလီၤ.
ဘၣ်ဆၣ်မ်ပသုတကဒံကဒါတဂ့ၤ,ပသုတဆါန့ၢ်အ၀ဲသ့ၣ်တဂ့ၤပမ့ၢ်ဆါန့ၢ်အီၤန့ၣ်အ၀ဲသ့ၣ်ကဟံဃာ်ဟီၣ်က၀ီၤတၢ်လီၢ်လၢပဆါန့ၢ်အီၤတဖၣ်ဒီးကစဲၤလီၤအဂံၢ်ကွဲနုာ်အါထီၣ်လိာ်အသးအါထီၣ်အါထီၣ်ယံာ်ထီၣ်တဘျီပတၢ်စုလီၢ်ခီၣ်ခိၣ်ကပံာ်ဟီၣ်ခိၣ်တဖၣ်ကလၢာ်န့ၢ်ပှၤကကဲထီၣ်အ၀ဲသ့ၣ်အတၢ်ခဲလၢာ်တဘျီကမၤထီၣ်တၢ်သူၣ်တၢ်ဖျးအလီၢ်အါအါဂီၢ်ဂီၢ်,ကမၤထီၣ်စဲးဖီကဟၣ်ဖးဒိၣ်တဖၣ်အလီၢ်အကျဲကခူၣ်ထုးထီၣ်ကွံာ်တၢ်ထူးတၢ်တီၤတၢ်အိၣ်တၢ်ယၢၤတဖၣ်ခဲလၢာ်,ကမၤထီၣ်တၢ်ဘုၣ်ဆၣ်ဖိကီၢ်ဖိအလီၢ်အကျဲလဲၢ်လဲၢ်ထီထီဒီးပ၀ဲသ့ၣ်တခီပဟီၣ်ခိၣ်ကပံာ်တအိၣ်လၢာ်ပနီၢ်ကစၢ်တၢ်မၤလီၢ်တအိၣ်လၢာ်ဘၣ်အဃိပကဘၣ်ကဲထီၣ်ပှၤဒိးလဲမၤငါအီၣ်တၢ်လၢအ၀ဲသ့ၣ်အတၢ်မၤပူၤလၢတမၤန့ၢ်ဒံးဘၣ်အဘူးအလဲလၢပကပှ့ၤအီၣ်တၢ်အီၣ်အဂီၢ်လၢတလါအဂီၢ်,တနွံအဂီၢ်,တနံၤအဂီၢ်,တသီအဂီၢ်,ဒီးဒံးအ၀ဲသ့ၣ်ကမၢပှၤပဘၣ်မၤကတဲပှၤပဘၣ်ကနၣ်ဒီးဖဲကပာ်ပှၤပကဘၣ်အိၣ်န့ၣ်လီၤ.
တဘျီအံၤပကဲထီၣ်အ၀ဲသ့ၣ်အကုၢ်အပှၤဒီးကမၤလီၤမၢ်ပှၤအဂီၢ်တၢ်ကီတၢ်ခဲတအိၣ်လၢာ်လၢအ၀ဲ သ့ၣ်အဂီၢ်နီတစဲးဘၣ်.ပထံၣ်ဘၣ်,နၢ်ဟူဘၣ်ဒီးသ့ၣ်ညါဘၣ်စ့ၢ်ကီးလၢ ပပှၤကလုာ်ကမျၢၢ် ထံဖိကီၢ်ဖိ လၢကီၢ်ရ့ၣ်မုာ်ြတီၤဟီၣ်က၀ီၤပူၤအိၣ်လံ၀ဲတနီၤလၢဆါလီၤန့ၢ်၀ဲခီပနံၣ်ဟဲမၤတၢ်တဖၣ်လၢအတၢ်စုလီၢ်ခီၣ်ခိၣ်လၢအမ့ၢ်စံာ်,ကျီး,ကရၢၢ်အိၣ်၀ဲဒၣ်ဒီးတနီၤအကျါတမ့ၢ်ဆာန့ၢ်၀ဲခီပနံၣ်ဒီးအပှၤဘၣ်သနာ်က့ဆာန့ၢ်၀ဲပှၤလၢတထံၣ်သ့ၣ်ညါ၀ဲဒၣ်အထံးအလာ်ဘၣ်တဖၣ်လၢအိၣ်လၢတၢ်လီၢ်အယံာ်ခူတိာ်၀့ၢ်တိၤတဖၣ်န့ၣ်လီၤ.
အ၀ဲအံၤမ့ၢ်တၢ်လီၤပျံၤလီၤဖုးလီၤဘၣ်ယိၣ်ဒိၣ်မးလၢပ၀ဲကညီဖိလၢအအိၣ်လၢခိခိၣ်,ကစၢၢ် ကျါတၢ်လီၢ်တဖၣ်အဂီၢ်ဒိၣ်မးန့ၣ်လီၤ.ဒီပုၢ်၀ဲၢ်ပှၤဖးတၢ်ဖိပှၤဒိကနၣ်တၢ်ဖိခဲလၢာ်သ့ၣ်ဧၢပှၤလၢအဟဲနုာ်လၢပဟီၣ်က၀ီၤပူဒီးဃ့ပှ့ၤ၀ဲတၢ်လီၢ်တၢ်ကျဲကပံာ်ဟီၣ်ခိၣ်တဖၣ်အံၤခီပနံၣ်မ့ၢ်ဂ့ၤ,ကမျၢၢ်မ့ၢ်ဂ့ၤ,မ့ၢ်ပှၤတဖၣ်လၢပယီၤပဒိၣ်ဃုထၢခၢၣ်စးအ၀ဲသ့ၣ်လၢကမၤန့ၢ်အ၀ဲသ့ၣ်အတၢ်အဂီၢ်န့ၣ်လီၤ.တနီၤအကျါမ့တမ့ၢ်ခီပနံၣ်အပှၤ,ပဒိၣ်အပှၤဒၣ်လဲာ်မ့ၢ်ပှၤတဖၣ်လၢတပူၤဒီးပယီၤပဒိၣ်ဘၣ်ဒီးမၤတၢ်လၢတၢ်ကဲဘျုးပယီၤပဒိၣ်လၢကျဲတဘိဘိန့ၣ်လီၤ.
အဃိဒီပုၢ်၀ဲၢ်ပှၤဖးတၢ်ဖိ/ပှၤဒိကနၣ်တၢ်ဖိခဲလၢာ်သ့ၣ်သုဧၢမ်ပသုတမ့ၢ်ပှၤတဖၣ်လၢအနာ်ညီတၢ်ဒီး ဆါညီပဟီၣ်ခိၣ်ကပံာ်,ပတၢ်စုလီၢ်ခီၣ်ခိၣ်တဂ့ၤမ့ၢကဆာအီၤန့ၣ်ပကကွၢ်လၢပပှၤကလုာ်ဒၣ်၀ဲဒီးပကဃ့န့ၢ်တၢ်ဟ့ၣ်ကူၣ်ဟ့ၣ်ဖးဟံးစုနဲၣ်ကျဲလၢပခိၣ်ပနၢ်တက့ၢ်မ့တမ့ၢ်ဘၣ်ဒီးပဟီၣ်ခိၣ်ကကဲပှၤအဟီၣ်ခိၣ်,ပကီၢ်ကကဲပှၤအကီၢ်ဒီးပတၢ်အိၣ်တၢ်ဆိးတၢ်ဖံးအီၣ်မၤအီၣ်အလီၢ်အကျဲကကဲပှၤအတၢ်န့ၣ်လီၤ.
ဒီးပကကဲထီၣ်ဘၣ်ဖုးပှၤလၢအစုဟံခီၣ်တၢ်ဖံးတၢ်မၤတအိၣ်လၢာ်ဘၣ်ဒီးကဲထီၣ်က့ၤဘၣ်ဖုးပယီၤပဒိၣ်အပှၤဒိးလဲဖိဘၣ်ဖုး.မ်ပကအိၣ်ဒီး တၢ်စီၣ်မဲာ်စီၣ်နါ ဃုသ့ၣ်ညါပဒုၣ်ပဒါပယီၤပဒိၣ်အတၢ်ကူၣ်တရံးပှၤ လၢကျဲအအၢအသီတဖၣ်ခဲလၢာ်ဒီးဒီသဒၢပၢၢ်ဆၢထီဒါသကိးဃူဃူတုၤလၢပပှၤကလုာ်ကညီကလုာ်တုၤက့ၤဆူတၢ်စံၣ်ညီၣ်ပၢသးခွဲးယာ်အလၢအပှဲၤတစုတက့ၢ်.
လၢ
ဖုဂၢၢ်ကျၢၤ
ဟံးန့ၢ်က့ၤအီၤလၢ လူၤသီဖီဒ့ ပှာ်ယဲၤသန့အပူၤ
Thai Baht Converter
Post a Comment
ပှၤတဂၤလၢ်လၢ် မ့ၢ်အဲၣ်ဒိးဟ့ၣ်၀ဲ ခီမဲၣ်မ့ၢ်ဂ့ၤ ကွဲးပဲာ်ထံနီၤဖးတၢ်တမံၤမံၤလၢ တၢ်ဂ့ၢ်တခါအံၤအဖီခိၣ် မ့ၢ်ဂ့ၤ ဟ့ၣ်ခီမဲၣ် ဒီး ပဲာ်ထံနီၤဖးသ့လီၤ. လၢနဂီၢ် ခီမဲၣ်လီၢ် လီၤဟိအိၣ်ထီဘိဒီးတူၢ်လိာ်နတၢ် ပဲာ်ထံနီၤဖးဒီး တၢ်ဟ့ၣ်ကူၣ်တဖၣ်လီၤ.