ထါဂံၢ်ထံး

၁. ဂ့ၢ်သူဖျဲးဒၢဃဲာ််လီၤလဲ, မိၢ်ထံးပၢ်ထံးအိၣ်ဖဲလဲၣ်

၂. မီၣ်ကၠၣ်ဖံဖုမီၣ်ကၠၣ်ဂီၤ, ဆီၣ်လီၤဃုာ်ထိးအကမီ

၃. နမ့ၢ်ဒွးလၢခီၣ်ဒုၣ်ဒၢ, ဒီပုၢ်၀ဲၢ်ခဲလၢာ်ခဲလၢာ်
လၢခီၣ်ဒုၣ်ဒၢနမ့ၢ်ဒွး, ဒီပုၢ်၀ဲၢ်ခဲလၢာ်ကိးဂၤ

၄. လၢပျၢၤမုၢ်ခံဘ့ၣ်ထီၣ်ဃုာ်, ဘုဒၢပိာ်ဖးဘီနီၢ်ဆူၣ်

၅. လၢပျၢၤမ့ၢ်ထံတဘိဃီ, လၢပျၢၤမ့ၢ်ဝၣ်တဘိဃီ

၆. လၢပျၢၤမ့ၢ်ဝၣ်တဘိဃီ, ခဲနံၣ်အံၤကဲဝၣ်ထိၣ်စီး

(ဂ့ၢ်သူ- ဂံၢ်သူ) မ့ၢ်ဂ့ၢ်တကလုာ်လၢညီနုၢ်ပှၤထံၣ်ဘၣ်အီၤလၢကစၢၢ်ကလိ, ပှၢ်ဒိၣ်ပှၢ်ယီၣ်အပူၤလီၤအဘိဒိၣ်
မး, ထီမး, အိၣ်ဒီးအဆှုၣ်အါမးဒီးပှၤဘၣ်မၤန့ၢ်အီၤကီကီခဲခဲလီၤ. ပှၤဘၣ်ဖျဲး, ကျီန့ၢ်အီၤလၢဃဲာ်န့ၣ်လီၤ.

မိၢ်ထံးပၢ်ထံးလၢအဂံၢ်ထံးန့ၣ် မ့ၢ်တၢ်တမံၤဃီဒီး ခဲအံၤစ့ၢ်ကီးမ့ၢ်တၢ်တမံၤလီၤ. တၢ်အံၤအိၣ်ဖျါလၢထါ.

“ထီး” တၢ်အီၣ်မုၢ်အီၣ်ဘှး” (တၢ်အခိၣ်သ့ၣ်, အဂံၢ်ထံး)
“မုၢ်ခံဘ့ၣ်, ထံတဘိဃီ, ဝၣ်တဘိဃီ, မ့ၢ်တၢ်တမံၤဃီလၢအဂံၢ်ထံး.

ရ. မိၢ်ပၢ်ဖံဖုတပူၤဃီ, ဆီၣ်လီၤဃုာ်ထိးအကမီ
ထိၣ်စံၣ်ကွဲၤအမဲၢ်ဖးဒ့, မ့ၢ်ပှိၢ်တဒ့စှီၤတဒ့
ထိၣ်က့ၤတဲာ်က့ၤပၢၤဟၢခီ, အတဲာ်အတီၤမ့ၢ်ဃူဃီၤ
နွံဒူၣ်ဖိကဲတဒူၣ်ဃီ.

၈. မိၢ်တူၢ်လၢပျၢၤလီၤနွံခီ, ပၢ်ကီၤလၢပျၢၤလီၤနွံခီ
လီၤလၢနီၢ်ဘီကျီၣ်တခီ, လီၤလၢစီၤပကူတခီ
လီၤဖးယုၢ်ဟဲဝၣ်ကလီၤ, ကီၢ်တမုာ်ယွၤထီၣ်ယွၤလီၤ

၉. လၢပျၢၤမိၢ်ဖိတဒူၣ်ဃီ, လၢပျၢၤပၢ်ဖိတဒူၣ်ဃီ
လီၤလၢနီၢ်ပဒဲးတဒူၣ်, လီၤလၢမီၤန့ၣ်ပှၤတဒူၣ်
လၢပျၢၤမှံၤဒီးပှၢ်စိာ်ဖး, အိၣ်ဂုၤဂီၢ်လၢအံၤလၢဘး

၁၀. မိၢ်စၢၤလၢပျၢၤတထၢဃီ, ပၢ်စၢၤလၢပျၢၤတထၢဃီ
လီၤလၢနီၢ်ပအၣ်တထၢ, လီၤလၢခၠဲၣ်ဝ့ၤဝီၤခံထၢ
ဝၣ်ကလီၤယုၢ်ဟဲလီၤဖး, ကီၢ်ဟးဂီၤလီၤမုၢ်လီၤဖး

၁၁. မိၢ်ဖိလၢပျၢၤအိၣ်နွံဂၤ, ပၢ်ဖိလၢပျၢၤအိၣ်နွံဂၤ
ထံတမုာ်လီၤမုၢ်လီၤဖး, ကီၢ်တမုာ်လီၤမုၢ်လီၤဖး
ထိၣ်က့ၤတဲာ်က့ၤထံတၢၢ်ခီ, နွံခီပဒွးတခီခီ

၁၂. မိၢ်တူၢ်လၢပျၢၤအိၣ်နွံခီ, ပၢ်ကီၤလၢပျၢၤအိၣ်နွံခီ
လီၤလၢပှိၢ်လၢစှီၤတနီၤ, လီၤလၢစှီၤလၢပှိၢ်တနီၤ
ထိၣ်က့ၤတဲာ်က့ၤပၢၤဟၢခီ, နွံခီပဒွးတခီခီ

၁၃. လၢပျၢၤပနွံဒူၣ်နွံခီ, နွံဒူၣ်နွံခီတခိၣ်ဃီ
ထိၣ်က့ၤတဲာ်က့ၤထံတၢၢ်ခီ, ထိၣ်က့ၤတဲာ်က့ၤပၢၤဟၢခီ
ထိၣ်က့ၤအဆၢမ့ၢ်ဘၣ်လံ, ပနွံခီဒ်ချၢၣ်ထီၣ်ဘံ

၁၄. ထီၣ်လၢမီမုၢ်လိာ်အကျိ, လီၤလၢမီမုၢ်လိာ်အကျိ
ကသ့ၣ်တံၢ်ဟဲအခိၣ်လိၤ, ကဆီကွီဟဲအခိၣ်လိၤ
ကသ့ၣ်တံၢ်ဟဲအကထီ, ကဆီကွီဟဲအကထိ
ထိးမဲပၢ်ကျီလီၤဝၣ်ဘိ, ဆဲးကၢၤပှၤနွံဒူၣ်အဖိ.

(ဟံးန့ၢ်အီၤလၢရံၣ်မဲဘၢၣ် (ရ့ၣ်ခိၣ်အ့, ဂံၢ်ခိၣ်အ့) လၢဖုချၢၣ်ဒိၣ်ထူလံာ်ပူၤ)
http://www.piemmamure.org/2011/10/blog-post_21.html