“ထါ ဃူဖိး,ပှိၤပှီၢ်”

၁. ပဃူပပှိၤ, ပပှိၤပပှီၢ်

၂. ပမ့ၢ်ဒွးလၢခီၣ်ဒုၣ်ဒၢ, ဒီပုၢ်ဝဲၢ်ခဲလၢာ်ခဲလၢာ်
လၢခီၣ်ဒုၣ်ဒၢပမ့ၢ်ဒွး, ဒီပုၢ်ဝဲၢ်ခဲလၢာ်ကိးဂၤ

၃. ဆီဖိၣ်ဃဲထိးဖှိၣ်နနိး, ဖိၣ်ဃဲအဲၣ်မူအဲၣ်သကိး
ဆီဖှိၣ်ဃဲထိးဖှိၣ်အသး, ဖိၣ်ဃဲအဲၣ်မူသကိးမး

၄. ဒီပုၢ်ဝဲၢ်ခွါပမ့ၢ်ဟူ, မၤသံတၤသူဘျီၣ်ဒိၣ်ပူၤ
ဒီပုၢ်ဝဲၢ်ခွါပမ့ၢ်ပှိၤ, မၤသံတၤသူဘျီၣ်ဒိၣ်လိၤ

၅. လံာ်လူာ်ကိၣ်ဒီးလံာ်လူာ်နီ, လံာ််လူာ်ပသးတဖျၢၣ်ဃီ
လံာ်လူာ်ကိၣ်ဒီးလံာ်လူာ်ကး, လံာ်လူာ်ပသးတဖျၢၣ်မး

၆. ဒီပုၢ်ဝဲၢ်ဆီဟံၣ်မ့ၢ်ကျၢၤ, မူခိၣ်လီၤပှီၢ်ဆီၣ်ထီၣ်စၢၤ
ဒီပုၢ်ဝဲၢ်ဆီဟံၣ်မ့ၢ်ဝး, မူခိၣ်လီၤပှီၢ်ဆီၣ်ထီၣ်မး

ရ. ပဒီပုၢ်ဝဲၢ်ပမ့ၢ်ဃူ, ပိာ်ထီၣ်ဃီလဲၤထီၣ်ဆူမူ
ပမ့ၢ်ဃူဒီပုၢ်ဝဲၢ်ခွါ, ပိာ်ထီၣ်ဃီလဲၤထီၣ်ဆူထး

၈. ဒီပုၢ်ဝဲၢ်ခွါမ့ၢ်တဃူ, တၤသူအ့ၣ်သံဘျီၣ်ဒိၣ်ပူၤ
ဒီပုၢ်ဝဲၢ်ခွါမ့ၢ်တပှိၤ, တၤသူအ့ၣ်သံဘျီၣ်ဒိၣ်လိၤ

၉. ဒီပုၢ်ဝဲၢ်ပသးမ့ၢ်ဃူ, တၢ်ပှိၤအိၣ်လၢပစုပူၤ
ဒီပုၢ်ဝဲၢ်ပသးမ့ၢ်ပှိၤ, တၢ်ပှိၤအိၣ်လၢပစုလိၤ

၁၀. ဒီပုၢ်ဝဲၢ်ပသးမ့ၢ်တီ, တၢ်ပှိၤအိၣ်လၢပစုတီၤ
ဒီပုၢ်ဝဲၢ်ပသးမ့ၢ်လိၤ, အိၣ်ပှဲၤပစုမ့ၢ်တၢ်ပှိၤ

၁၁. ဒီပုၢ်ဝဲၢ်ဆီဟံၣ်မ့ၢ်သ့, မူခိၣ်လီၤပှီၢ်ဆီၣ်ထီၣ်က့ၤ
ဒီပုၢ်ဝဲၢ်ဆီဟံၣ်မ့ၢ်စး, မူခိၣ်လီၤပှီၢ်ဆီၣ်ထီၣ်မး

၁၂. ထိၣ်ဃူပသးယီၤဖုဒါ, သုတမၤမိၢ်ထါပၢ်ထါ
ယီၤဖုဒါထိၣ်ဃူပသး, စိၤပၤအပှၤထွၣ်တဝး

၁၃. ဒီပုၢ်ဝဲၢ်ပသးမ့ၢ်တီ, တၤအုးကွၢ်အမဲာ်ထံလီၤ
ဒီပုၢ်ဝဲၢ်ပသးမ့ၢ်ဃူ, ဘၢၣ်ထီၣ်ဃီလဲၤထီၣ်ဆူမူ

၁၄. ဒ့ၣ်ဒိၣ်လီၤက့ၤဘုထွဲဘီ, ညၣ်ဒိၣ်လီၤဘုထွဲဘီ
သၣ်ပစုၢ်မံလဲၤဘီဘီ, သၣ်ကပၢၤမံလဲၤဘီဘီ
ကီၤဝ့ၤအီၣ်သူလ့ၤကွံၢ်လီၤ, သူလ့ၤအီၣ်ကီၤဝ့ၤကွံၢ်လီၤ
ကံွာ်န့ၢ်လိာ်အသးယၢ်ခီ, ကီၢ်မုာ်လီၤက့ၤမုာ်လီၤမီ

(စံး ဒ့ၣ်ညၣ်လဲၤဒ်သိးအီၣ်ဒံးသိး, ကီၤဝ့ၤသူလ့ၤလဲၤအီၣ်ညၣ်ပစူၢ်, သၣ်ကပၢၤအသၣ်တပူၤ
ဃီအသိး, ပမ့ၢ်အိၣ်ဃူအိၣ်ဖိးန့ၣ်, ထံကီၢ်တၢ်ြပၢတၢ်ြပးကမုာ်ဝဲဒၣ်န့ၣ်လီၤ.

၁၅. ဒ့ၣ်သူၣ်ထီတဖုတဖု, ညၣ်သူၣ်ထီတဖုတဖု
မ့ၢ်ထီလၢကွံအီၣ်ဝီၤဃုာ်, မ့ၢ်ထီလၢစှဲၤအီၣ်ဝီၤဃုာ်
ဒီတခွါဟံးလိာ်ပစု, သဘုၣ်ဒ်သဲးကၢ်အလုၤ

၁၆. ဖိလံၤဧၢ, သုသးဘၣ်ဃူ, ဝံၣ်ထီၣ်သကိးဟံၣ်ထူၣ်ထူ
သုဆီဟံၣ်လၢၢ်ထူၣ်မ့ၢ်ကျၢၤ, မူခိၣ်လီၤပှီၢ်ဆီၣ်ထီၣ်နၢၤ
ဖိလံၤသးအံၤမ့ၢ်ဒ်သိး, ဘၢလၢၢ်မံဒ်နွဲၣ်အသိး

၁ရ. တဖုတဖုထိၣ်သံၣ်ပူၤ, တဒူၣ်တဒူၣ်ထိၣ်သံၣ်ပူၤ
မ့ၢ်ယူၤထီၣ်ယူၤထီၣ်သံြပူၤ, မ့ၢ်စီၢ်လီၤစီၢ်လီၤသံြပူၤ
မ့ၢ်စီၢ်လီၤစိးအီၣ်ပအူး, လံာ်မိၢ်လီၤအသးတကူာ်

၁၈. ၀ဲၢ်မ့ၢ်ခံပုၢ်ဒ့မ့ၢ်ပှၤ, ဝဲၢ်ကညီၤပုၢ်ဒ့ကိာ်ဃး
ပုၢ်ဒ့မ့ၢ်ခ့ဝဲၢ်မ့ၢ်လီ, ဝဲၢ်ကညီၤပုၢ်ဒ့ကိာ်လီၤ
ဒီပုၢ်ဝဲၢ်ပသးမ့ၢ်ဃူ, တၢ်ပှိၤအိၣ်လၢပစုပူၤ.

(ဟံးန့ၢ်အီၤလၢ “ရံၣ်မဲဘၢၣ်” ရ့ၣ်ခိၣ်အ့-ဂံၢ်ခိၣ်အ့, လၢဖုချၢၣ်ဒိၣ်ထူလံာ်ပူၤ)
http://www.piemmamure.org/2011/09/blog-post_8346.html