ဖံကီၢ်ခိၣ်(မ့တမ့ၢ်) ကညီတၢ်ပၢၢ်ဆၢအမိၢ်

တံနိ(သဝီတါ)
ကီၢ်ခိၣ်မုၣ်ဖံဖံလၣ်ဖိ, နမ့ၢ်တၢ်ပၢၢ်ဆၢအမိၢ်
ကီၢ်သူလ့ၤပိာ်မုၣ်သနၢၣ်, ကရၢခိၣ်လီၢ်အိၣ်ဆၢထၢၣ်
ဟံးစုနဲၣ်ကျဲဖီၣ်ဂၢၢ်ကျၢၤ, ပိာ်မုၣ်ကရၢတၢ်မၤနၢၤ
ခီဖျိကရၢတၢ်ပာ်ဖျါ, “ပယီၤတၢ်မူၤဆူၣ်မၤဆါ”
ကီၢ်သူလ့ၤပိာ်မုၣ်ကရၢ, ကစီၣ်ဟူတုၤဟီၣ်ခိၣ်ချၢ
နထူတကျာ်မီၤစိရိၤ, လၢယူၣ်အဲၣ်စီၢ်နီၤခိၣ်လိၤ
ကညီမုၣ်ဆဲထီၣ်အရု, န.အ.ဖ ဘၣ်အိၣ်ကစု
ထံရူၢ်ကီၢ်သဲးပတီၢ်ထီ, ဘီမုၢ်စၢဖှိၣ်ပာ်ပနီၣ်

ဖုကီၢ်ခိၣ်လဲၤပူၤလီၢ်ခံ, တၢ်ပလၢးဟဲဘၣ်ဖံဖံ
တံၤမသံးဟ့ၣ်ကူၣ်ဟ့ၣ်ဖး, ဒုးအိၣ်ထီၣ်ကရၢကီၣ်ကး
ကွဲန့ၢ်လွဲန့ၢ်ပဖံဖံ, လၢကကဲကရၢခိၣ်ခံ
တၢ်မုၣ်တၢ်ခုၣ်ပလိၣ်ဘၣ်, ဘၣ်ဆၣ်တဆဘၣ်မ့ၢ ်“အဘျၣ်”
နအဖ အသးတဘျၢ, တၢ်အံၤဖံဖံသ့ၣ်ညါဆၢ
မ့ၢ်ဒၣ်တၢ်ကျဲၤမၤလီၤဖး, တထုးန့ၢ်ဖံဖံအသး
မ့ၢ်နာ်အီၤဒုၣ်ဒါတၢ်ကျဲၤ, အထၢၣ်ပူၤပကလီၤတဲာ်
တၢ်အံၤတမ့ၢ်တၢ်ဘၣ်ကျဲ, ဖံဖံဆၢထၢၣ်ထီဒါဝဲ
အဲၣ်ကလုာ်သးစွံကတုၤ, အိၣ်ပှဲၤဆၢၣ်ဖံဖံသးပူၤ


ဒုၣ်ဒါကူၣ်ပှၤအါကပၤ, လၢကမၤလိၤဖးကွံာ်ပှၤ
ကူၣ်တရံးကျဲအဘိအါ, သူန့ၢ်ဃုာ်ပှၤလၢပကျါ
“ထံရူၢ်ကီၢ်သဲးမ့ၢ်တနၢၤ, ပယီၤဂဲၤပှၤပကလၢာ်
သ့ၣ်ထူၣ်အညၣ်မးဆံးအါ, နမ့ၢ်အဲၣ်ဒိးဃုသ့ၣ်ညါ
ဖျးကွၢ်နဲဒီးဃဲာ်ဒီးကွါ, မးထဲလဲၣ်နကသ့ၣ်ညါ
လ့ဘ့ၣ်ပှၢ်ညၣ်ကိၤဆံးအါ, နမ့ၢ်အဲၣ်ဒီးဃုသ့ၣ်ညါ
ဆုကွၢ်ဒီးခံၣ်ခူၣ်ထးနါ, ကိၤထဲလဲၣ်နကသ့ၣ်ညါ
ထးလဲအညၣ်ပှံၤဆံးအါ, နမ့ၢ်အဲၣ်ဒိးဃုသ့ၣ်ညါ
ပှံၢ်လၢမ့ၣ်အူကဖးကျါ, ပှံၤထဲလဲၣ်နကသ့ၣ်ညါ

ဒ်န့ၣ်အသိး...
ခိၣ်နၢ်စဲၤနီၢ်လၢပကျါ, နမ့ၢ်အဲၣ်ဒိးဃုသ့ၣ်ညါ
ကွၢ်လၢအတၢ်မၤအိၣ်ဖျါ, ဖဲလဲၣ်တဂၤနသ့ၣ်ညါ
ကီၣ်ခိၣ်မုၣ်ဖံဖံလၣ်ဖိ, နမ့ၢ်တၢ်ပၢၢ်ဆၢအမိ
ဖိလံၤနကဟုကယာ်, ဒုၣ်ဒါမဲာ်နထူတကျာ်
“အဲၣ်ကလုာ်” “သးတၢ်သ့ၣ်ညါ”, လၢနမဲာ်ချံပူၤအိၣ်ဖျါ
တၢ်ပၢၢ်ဆၢအဆၣ်ဃံလၤ, ခိၣ်သလုးထူြကၢးဒီးနၤ
ဆှိလီၤခိၣ်ယူးယီၣ်ယဲနၤ, တၢ်ပၢၢ်ဆၢအဆၣ်ဃံလၤ

၃၀.၄.၂၀၀၇
(ဟံးန့ၢ်အီၤလၢထိၣ်ဃူဘၣ်က့ၤသပၢၤခီဒီးထါယီၤလဲထီရီၤတဖၣ်)
http://www.piemmamure.org/2011/10/blog-post_6217.html