ပစံၣ်ဃဲၤပူလၢပျၢၤ ဘီၣ်သိၣ်အိၣ်ဝဲတဒုလီၤ. ဘီၣ်သိၣ်န့ၣ် ကူၣ်ထီၣ်ဝဲလၢ ကလဲၤအီၣ်ပှၤကညီ ဒီးလဲၤအိၣ်ဝဲလၢ ပနၢ်တဖၣ်အကျါလီၤ. ပနၢ်တဖၣ်ဘၣ်တၢ်စၢဃာ်ဝဲဖဲဟံၣ်ခီၣ်ဖးထီအဖီလာ်န့ၣ်လီၤ.ဟံၣ်ကစၢ်ပိာ်ခွါတဂၤ အိၣ်လၢဒၢးပူၤ ဟဲထီၣ်ဆူခိဒီး စံးဘၣ်အဖိအလံၤ ဒ်အံၤလီၤ.
“ ဖိသ့ၣ်လံၤသ့ၣ်ဧၢ မုၢ်ခံးမုၢ်နၤန့ၣ် ဟးတဂ့ၤ ဘီၣ်သိၣ်တၤကဝဲၤ ဂဲၤကတၢနးမး….ကအ့ၣ်ဘၣ်ဖုးသုလီၤ”
ဘီၣ်သိၣ်တဒုန့ၣ်နၢ်ဟူဒီး ဆိကမိၣ်လီၤအသး ဒီးစံးမးဝဲ……“ယမ့ၢ်ဘီၣ်သိၣ်နဲၣ် တၤကဝဲၤန့ၣ် မ့ၢ်ယကဘၣ်ပျံၤဒံးဧါ..” ဘီၣ်သိၣ်အံၤ ဆိကမိၣ်ဝဲ တၤကဝဲၤန့ၣ်ကမ့ၢ်တၢ်လၢ အလီၤ ပျံၤတမံၤမံၤလီၤ.
မုၢ်တနၤန့ၣ်ဘၣ်လၢပှၤတဂၤသါကလဲၤဟုၣ်ပနၢ်ဒီးလဲၤဝဲဆူပနၢ်တဂီၢ်အကျါကလၢၢ်ကွၢ်ဝဲတဒုဘၣ်တဒုဘၣ်
လၢ ဘီၣ်သိၣ်တဒုန့ၣ်ဒီး ဆိကမိၣ်ဝဲလၢ တဒုအံၤဒိၣ်ဒိၣ်ထီထီ ဘီၣ်ဘီၣ်သိသိဂ့ၤမး မိၤထီၣ်ဘီၣ်သိၣ်န့ၣ် ဆိကမိၣ်ဝဲလၢပနၢ်ဒီးဒိးထီၣ်ဝဲဒၣ်လီၤ. ဘီၣ်သိၣ်တခီ ဆိကမိၣ်လီၤ အသး…
“ တဘျီအံၤ ကမ့ၢ်မးတၤကဝဲၤဒိးထီၣ်အီၤ ဒီး ပျံၤဝဲနးနးကလဲာ်လီၤ. ပှၤတဂၤက့ၤဒိးထီၣ် ဘီၣ်သိၣ်တဒုန့ၣ်သီတနၤ ကျၢၤတသ့ၣ်ညါဝဲဘၣ် တုၤမုၢ်ဆ့ၣ်ဝါထီၣ် ကွၢ်ဝဲ တမ့ၢ်လၢ ပနၢ်ဘၣ် မ့ၢ်လၢဘီၣ်သိၣ်ဒီးစံၣ်လီၤ ဃ့ၢ်ထီၣ်ဆူ သ့ၣ်ဒၢကူတထံးအခံလီၤ.ဘီၣ်သိၣ်တဒုစ့ၣ်ကီး ပျံၤတၢ်ဃ့ၢ်ဃ့ၢ် ဘၣ်သဃိာ်လၢ တၤသူတဒုဒီး တၤသူသံကွၢ်အီၤ…
“ နဃ့ၢ်ဘၣ်မနုၤလဲၣ် ခွါစီဧၢ…”
“ အၢၣ်…တၤကဝဲၤက့ၤဒိးယၤ မနၤကၢာ် ယပျံၤတၢ်ယကသံတ့ၢ်မးလီၤ, ပျဲလီၤက့ၤယၤဖဲမုကၢာ်လီၤ”
စံးဆၢဝဲဒ်န့ၣ်ဝံၤ တၤသူတဒုန့ၣ်စံးဘၣ် ဘီၣ်သိၣ်လၢတၤကဝဲၤအဂ့ၢ်…
“ တၢ်လၢတၤကဝဲၤန့ၣ် ပအီၣ်ဝံၣ်မးလီၤ….လဲၤဒုးနဲၣ်ယၤတဘီမီၣ်…”
ဒီးဘီၣ်သိၣ်တဒုလဲၤဒုးနဲၣ်အီၤလီၤ. တၤသူတဒု လဲၤဃုတၢ်ဝးဝး ဒီး ပှၤတဂၤန့ၣ်စံၣ်လီၤဖိး တၤသူအကိာ် ဒီးတၤသူအကိာ်ဒီးတၤသူဃ့ၢ်ကဒီးလီၤ.တၤသူဃ့ၢ်ဝဲတုၤလၢသ့ၣ်ကအိပူၤတပူၤဒီးပှၤတဂၤန့ၣ်စံၣ်လီၤလဲၤ
နုာ်အိၣ်ကဒီးဝဲဖဲန့ၣ်လီၤ.တၤသူတဒုဃ့ၢ်ဝဲဒီး ဘၣ်တိနိၣ်ကဒီးလၢ တၤအုးတဒု ဒီးအတၢ်သံကွၢ်အီၤ…
“ ခွါစီဧၢ…နဃ့ၢ်ဘၣ်မနုၤလဲၣ်…”
“တၢ်စံၣ်လီၤဖိးယကိာ် မဟါတဒု ယကသံတ့ၢ်လီၤ….ပျဲကွံာ်ယၤဖဲမုကၢာ်လီၤ.”
စံးဆၢကဒီးဝဲဒ်န့ၣ်ဝံၤ တၤအုးတဒုန့ၣ်စံးဝဲဒၣ်….
“တၢ်စံၣ်လီၤဖိးနကိာ်န့ၣ် ပအီၣ်ဝံၣ်မးလီၤ …လဲၤနဲၣ်ယၤတဘီမီၣ်…”
တၤသူတဒု လဲၤနဲၣ်တၤအုးန့ၣ်ဝံၤဒီး ဟဲက့ၤဃ့ၢ်က့ၤဝဲလီၤ.တၤအုးတဒုလဲၤကွၢ် သ့ၣ်ကအိပူၤန့ၣ် ဘုးဝဲလၢအစုဧီၢ် တဘူၣ်ဘၣ် ဂိာ်လီၤကွၢ်ဝဲလၢအမဲၢ်သတးဒီး ပှၤတဂၤဖီၣ်န့ၢ် တၤအုးအမဲၢ် ဒီး ဆဲးဝဲအခံလၢဒီ ဒီးအတၢ်ကိးပသူဘူးလၢအကသံတ့ၢ် ဒီးပျၢ်ကွံာ်ဝဲလီၤ.လၢခံတၤအုးထံၣ်လိာ်အသးဒီး တၤသူဒီး စံးလိာ်အသးဒီး စံးဝဲဒၣ်…
“တၢ်ပျ့ၢ်ပမဲၢ်ဒီးဆဲးပခံန့ၣ် နစံးလၢတၢ်စံၣ်လီၤဒိးနကိာ်လဲၣ်…”
တၤသူစ့ၢ်ကီးထံၣ်လိာ်သးဒီး ဘီၣ်သိၣ်ဒီးစံး လိာ်အသးဒီးစံးဝဲဒၣ်…
“တၢ်စံၣ်လီၤဖိးနကိာ်န့ၣ် နစံးလၢတၤကဝဲၤလဲၣ်…”
တုၤနုၤတစု တၤအုး တၤသူဒီး ဘီၣ်သိၣ်ဂ့ၢ် လိာ်ဘှီလိာ်သးဒီးသူၣ်ဒိၣ်သးဖျိးလိာ်အသးဒိၣ်ဒိၣ် ကလဲာ် အဃိသတးဒီး အဝဲသ့ၣ်သၢဒုန့ၣ်အ့ၣ်ဖှီလိာ်အသးဒီး သံဝဲခဲလၢာ်လီၤ.
(ဟံးန့ၢ်အီၤလၢ “ပှၤကညီအပူတဖၣ်” အဘ့ၣ် တၢ ပီၢ်ရီမါမၢလ့မၠးကၠီၣ် ကွဲးဝဲန့ၣ်လီၤ.)
http://www.piemmamure.org/2011/06/blog-post_1594.html
Thai Baht Converter
Post a Comment
ပှၤတဂၤလၢ်လၢ် မ့ၢ်အဲၣ်ဒိးဟ့ၣ်၀ဲ ခီမဲၣ်မ့ၢ်ဂ့ၤ ကွဲးပဲာ်ထံနီၤဖးတၢ်တမံၤမံၤလၢ တၢ်ဂ့ၢ်တခါအံၤအဖီခိၣ် မ့ၢ်ဂ့ၤ ဟ့ၣ်ခီမဲၣ် ဒီး ပဲာ်ထံနီၤဖးသ့လီၤ. လၢနဂီၢ် ခီမဲၣ်လီၢ် လီၤဟိအိၣ်ထီဘိဒီးတူၢ်လိာ်နတၢ် ပဲာ်ထံနီၤဖးဒီး တၢ်ဟ့ၣ်ကူၣ်တဖၣ်လီၤ.