မုၢ်ဆ့ၣ်ထီၣ်တဂီၤ, သရၣ်ဝ့လယၢၣ်, နဲၣ်ဘူနးဒီး စီၤက့ၣ်လဲၤဆူ နီဒီး အီၣ်သကိးဂီၤတၢ်အီၣ်ဒီး စီၤပၤ နီၢ်ပၤမုၣ်ဒီး စီၤပၤဖိမုၣ်တဖၣ်န့ၣ်လီၤ.
စီၤပၤစံး, “နဲၣ်ဘူနးဧၢ, ယနၢ်ဟူနတၢ်ကတိၤ မဟါကၢာ်တနံၤဒီး ယသးမုာ်အါမးလီၤ. ယပဒိၣ်တဖၣ် တပာ်တၢ်ကမၣ်လၢ နဖီခိၣ် နီတမံၤလၢၤဘၣ်. ဟဲက့ၤအိၣ်က့ၤ နဲလၢဘီကီာ် ပူၤခုၣ်ခုၣ် မုာ်မုာ် တခီတက့ၢ်. စီၤက့ၣ်ဒီး ယမါဒီး ယဖိမုၣ် တဖၣ် ကတဲပၠး နၤလၢ အသူစ့ ယဲၢ်ကလီၢ် လၢနပာ်တီၢ်လၢ ယစုပူၤ အဂ့ၢ်န့ၣ်လီၤ. ယဲယအဲၣ်ဒိး ကတိၤသကိးတၢ်ဒီး ဒီးကထၢၣ်ဝ့လယၢၣ် ခံဂၤဧိၤ ဘၣ်ဃး ဒီးကစၢ်ခရံာ် အဂ့ၢ်န့ၣ်လီၤ.”
စီၤပၤဖိမုၣ်စံး, “ပၢ်ဧၢ, ယကလဲၤဆူ တၢ်အံးက့ၤကွၢ်က့ၤ ပိာ်မုၣ်တဖၣ် အဟံၣ်ဒီး ပာ်တီၢ်နၤဒီး သရၣ်ဧိၤလီၤ.” စီၤပၤကျၢၢ်ကျာ်လီၤခိၣ်ဝံၤ ပှၤဂၤတဖၣ် ဟးထီၣ်လၢ နီပူၤဒီး လဲၤတၢ်လီၤ.
စီၤပၤသံကွၢ် သရၣ်အတၢ်အါမံၤ ဒီးလၢခံကတၢၢ် စံးဘၣ်သရၣ်, “ဒီးကထၢၣ် ဝ့လယၢၣ်ဧၢ, ယနာ်လၢ ယ့ၣ်ရှူးခရံာ်န့ၣ်မ့ၢ် ယွၤအဖိခွါလၢ အဟဲလီၤ အုၣ်က့ၤခီၣ်က့ၤ ပှၤဟီၣ်ခိၣ်ဖိ လီၤ. ယလိၣ်ဘၣ် နတၢ်ဟ့ၣ်ကူၣ် ဟ့ၣ်ဖး လီၤ. ယမ့ၢ်ကဲထီၣ်ပှၤခရံာ်ဖိ ဖျါဖျါဒီး ယဘၣ်စံၣ်လီၤလၢ စီၤပၤ အလီၢ်လီၤ. ယဘၣ်မၤဒ်လဲၣ်.”
“စီၤပၤဧၢ, နတၢ်သံကွၢ်အံၤ မ့ၢ်တၢ်အကီလီၤ. ဒီးယစံးဆၢနၤ သ့ဒ်အံၤလီၤ. ဃ့ဘါထုကဖၣ် တၢ်လၢယွၤ ကဒုးနဲၣ်နကျဲတက့ၢ်. အိၣ်ခိး အတၢ်စံးဆၢ တက့ၢ်. ဒီးတုၤ နဒိးန့ၢ်အီၤဒီး ဘျုးနသး လၢအတၢ်ဘၣ်အသး အပူၤတက့ၢ်.”
စီၤပၤမၢ သရၣ်ဃ့ဘါထုကဖၣ် တၢ်လၢအဂီၢ်လီၤ. ခံဂၤလိာ် တီၤလီၤ လၢချီၣ်ဒါကပုာ် လိၤဝံၤ သရၣ်ဃ့ တၢ်လၢယွၤ ဒ်သိး ကဒုးနဲၣ် စီၤပၤလၢ ကျဲန့ၣ်လီၤ.
စီၤပၤစံးဘၣ်သရၣ်, “နဟဲဘါသကိးတၢ်ဒီးယၤ တနံၤတခီနၣ်ရံၣ် မ့ၢ်ချုးဒီး ဝံသးစူၤ ဟဲမီၣ်.” သရၣ်ဝ့လယၢၣ် အၢၣ်လီၤအီၤလၢ ကဟဲဝဲလၢ တၢ်သးခုအပူၤန့ၣ်လီၤ.
စီၤက့ၣ်ဒီး အသကိးတဖၣ် ဟဲက့ၤတုၤက့ၤလီၤ. နဲၣ်ဘူနး တဂၤ အသးခုမးလၢ အလဲၤထံၣ်ဘၣ် တၢ်မၤစၢၤက့ၤ ပိာ်မုၣ်လၢ အဝဲမၤဟးဂီၤ ဘၣ်ဝဲ တဖၣ်န့ၣ်လီၤ.
ဘူနးစံးဘၣ် စီၤပၤ, “ကစၢ်စီၤပၤဧၢ, ယလိၣ်ကဒီး နတၢ်မၤစၢၤလီၤ. ယနၢ်ပၢၢ်လၢ ဘီကီာ်ကိးနံၤဒဲး တၢ်ပရၢတဘ့ၣ်အံၤ, မ့ၢ်နဖိဒိၣ် လၢအသံလံ တဂၤ အတၢ်ပရၢလီၤ. ဒီးခဲအံၤ အိၣ်က့ၤလၢ နတၢ်အံးတၢ်ကွၢ် အဖီလာ် လီၤ. ယသးအိၣ် ဃ့ကညး နၤလၢ နကဆါန့ၢ်ယၤလီၤ. ယသးအိၣ်ဒုးကဲထီၣ်က့ၤအီၤလၢ ခရံာ်ဖိ အတၢ်ပရၢ တဘ့ၣ်လီၤ.”
စီၤပၤကတိၤလီၤတၢ်လၢ ထဲလ့ၣ်ဖိ ဒီးယံာ်ထဲတဆံယဲၢ် မံးနံးဒီး နဲၣ်စူဧၢ် လၢအမ့ၢ်တၢ်ပရၢတဘ့ၣ်အံၤ အအဲးဒံးထၢၣ် ဟဲတုၤဃီၤဝဲလီၤ.
“နဲၣ်စူးဧၢ်ဧၢ, အဝဲအံၤမ့ၢ်ယတံၤသကိး တဖၣ်လီၤ. ဒီးသးပှၢ်ဘူနး တဂၤအံၤ နကသ့ၣ်နီၣ်က့ၤကီးသၢၣ်. ပာ်တီၢ်န့ၢ်ယၤ စ့ယဲၢ်ကလီၢ် လၢနစုပူၤ န့ၣ်ဘီၣ်. ဒီးအစ့အံၤ ကဲထီၣ်လံ တၢ်မၤစၢၤလၢ ပိာ်မုၣ်ဖိသၣ် တဖၣ်အဂီၢ် အါမးန့ၣ် နသ့ၣ်ညါစ့ၢ်ကီးသၢၣ်. ခဲအံၤ အဝဲဃ့ပှ့ၤ ယၤလၢ ဘီကီာ် ကိးနံၤဒဲး တၢ်ပရၢလီၤ. နသါကစံးဒ်လဲၣ်.”
စူးဧၢ်စံးဆၢ, “ကွၢ်ဖဲကစၢ်အသးလီၤ.”
စီၤပၤတဲပၠးအီၤလၢ နဲၣ်ဘူနး အတၢ်ကဲထီၣ်က့ၤ ပှၤခရံာ်ဖိအဂ့ၢ်ဒီး အတၢ်သးအိၣ် ဒုးကဲထီၣ် က့ၤတၢ်ပရၢ တဘ့ၣ်အံၤလၢ ခရံာ်ဖိ အတၢ်ပရၢ တဘ့ၣ်န့ၣ်လီၤ. စူဧၢ်ကမၢကမၣ် ဝဲလီၤ.
ဘူနးစံး, “ကစၢ်စီၤပၤဧၢ, တၢ်ပရၢအံၤ နမ့ၢ်ဆါန့ၢ်ယၤဒီး ယပာ်လီၤသးလၢ ယကဟံးဃာ်ဒၣ် အဲးဒံးထၢၣ် တဂၤဃီ စူဧၢ အံၤလီၤ. ပသ့ၣ်ညါအဝဲအဂ့ၢ်လီၤ. ပသ့ၣ်ညါလၢ အဝဲမၤအဲးဒံးထၢၣ် အတၢ်မၤအံၤ လၢကသိၣ်လိ ကမျၢၢ်လၢ တၢ်မ့ၢ်တၢ်တီ ဒီး တပျံၤ ကမျၢၢ်န့ၣ်ဘၣ်. တၢ်လၢယသးအိၣ်မၤတခီ မ့ၢ်တၢ်အံၤ, ကဘျံးပၤတၢန့ၣ် ယကပာ်လီၤဆီအီၤလၢ ကဟ့ၣ်တၢ်ကစီၣ်လၢ ကစၢ်ခရံာ်အဂီၢ်, ဘၣ်ဃးလၢ ကီၢ်ယူၣ်တရၣ် ဒီးထံယံၤကီၢ်ယံၤ ခဲလၢာ်န့ၣ်လီၤ.”
စူဧၢ်မ့ၢ်ပှၤဖျိ ခီလ့ၣ်ကၠိလၢ ကီၢ်အဲကလံး, အီးကစဖီး တခီလီၤ. အဝဲအဲၣ် အတၢ်မၤဒီး ကျဲးစၢးမၤဝဲလၢ တၢ်သးတီ ဒီးသးဒူအပူၤ, တကွၢ်မဲာ် ပှၤနီတဂၤဘၣ် န့ၣ်လီၤ. အဝဲထံၣ်ညီနုၢ် ပှၤခရံာ်ဖိ လၢကီၢ်မုၢ်နုာ် တခီအ တၢ်အိၣ်မူအိၣ်ဂဲၤ ဒီး အဲၣ်ခရံာ်ဖိ တံၢ်နီၢ် တဖၣ်အသကဲာ်ပဝး ဒိၣ်မးဒီး ကျဲးစၢးကွၢ်လိအီၤလီၤ. အဝဲကွၢ် ဆိကမိၣ် တၢ်ကၠၢၢ်ကၠၢၢ်ဝံၤ စံးဘၣ်စီၤပၤ,
“ယဟ့ၣ်ကူၣ်လၢ ကစၢ်စီၤပၤကဆါန့ၢ် နဲၣ်ဘူနး လၢတၢ်ပရၢအံၤလီၤ.”
တၢ်အၢၣ်လီၤလၢ တၢ်ကပာ်တၢ်ပရၢအံၤ အပှ့ၤစ့ခံကလီၢ် ထ့းကီၣ်, နဲၣ်စူဧၢ် ကမ့ၢ်ဒၣ် တၢ်အဲးဒံးထၢၣ်, ဒီးတၢ်ကပာ် တၢ်ပရၢ ကဘျံးပၤတၢ လၢတၢ်သးခုကစီၣ် အဂီၢ်န့ၣ်လီၤ. ဝံၤဒီး တံၤသကိးတဖၣ် ပာ်ဖျါထီၣ် တၢ်ယူးယီၣ် စီၤပၤဝံၤ ဟးထီၣ်ကွံာ်လၢနီပူၤလီၤ.
လၢခံ တနံၤဘီကီာ် ကိးနံၤဒဲး တၢ်ပရၢ ကဘျံးပၤတၢ အိၣ်ဒီးတၢ်ကစီၣ် ခိၣ်တီဖးဒိၣ်ဒ်အံၤလီၤ.
“ယွၤမၤတၢ်လီၤလး ဖးဒိၣ် လၢဘီကီာ်ဝ့ၢ်ခၢၣ်သး”
“နဲၣ်ဘူနးကဲထီၣ်က့ၤခရံာ်ဖိ” “ယူၣ်တရၣ်လိၣ်ဘၣ်သးသီဒ်သိးအံၤ နီၢ်မး”
ဒီးကထၢၣ်ဝ့လယၢၣ် တခီ အတၢ်မၤအါထီၣ်ကးလံ. ဘၣ်လဲၤဘါယုၤစီၤပၤ အတၢ်ကိးနံၤဒဲး, လဲၤသိၣ်လိစီၤက့ၣ် အဖိၣ်ဃဲ, လဲၤသိၣ်လိ ပိာ်မုၣ် လၢအဘၣ်တၢ်ကဟုကယာ် က့ၤအီၤလၢ ဘီကီာ်ပူၤဒီး ခဲအံၤ ဘၣ်ကွၢ်ထွဲ ကဒီး တၢ်ကစီၣ်လၢ နဲၣ်ဘူနး အတၢ်ပရၢ အသီတဘ့ၣ်အံၤ အဂီၢ်လီၤ. မးမးမၤစၢၤအီၤ တသ့ဖဲအသ့, ဒီးဟံးထီၣ်ကွံာ် တၢ်သိလိ စီၤက့ၣ်အပှၤဖိၣ်ဃဲတဖၣ် လၢသရၣ်အစုပူၤ ဒီးကွၢ်ထွဲက့ၤအီၤလီၤ.
သရၣ်ကွဲးလံာ်ပရၢဆူ ကီၢ်အမဲရကၤ, ပာ်ဖျါထီၣ် တၢ်မၤအသးတဖၣ် ဒီးဃ့ဝဲလၢ တၢ်ခိၣ်တၢ်နၢ်တဖၣ် ကဆှၢန့ၢ်အီၤ မံးရှၢၣ် နရ့ၣ်အသီတဒူၣ် လၢကဟဲမၤစၢၤအီၤန့ၣ်လီၤ. သရၣ်ဒီး မးမး တၢၣ်ပီၣ်ဘၣ်ဃး စီၤက့ၣ်အဂ့ၢ် ဒီး ထံၣ်ဝဲလၢ စီၤက့ၣ် ြကၢးလဲၤမၤလိ တၢ်လၢ လံာ်စီဆှံကၠိ အစှၤကတၢၢ်တနံၣ် ဝံၤ ဟဲက့ၤဖီၣ်ထီၣ်က့ၤ မံးရှၢၣ် အတၢ်မၤန့ၣ်လီၤ.
တနံၤတခီၣ် သရၣ်စံးဘၣ်စီၤက့ၣ်, “စီၤက့ၣ်ဧၢ, တၢ်စူၤလီၤခဲကိာ်လၢ လါယူၤအပူၤန့ၣ် နတသးအိၣ် လဲၤမၤလိ လံာ်စီဆှံလၢ ကီၢ်ပယီၤ ဘျၢထံလံာ်စီဆှံကၠိဧဲၢ်.”
စီၤက့ၣ် ကွၢ်ဆိကမိၣ် တၢ်ဂ့ၢ်အံၤဝံၤ စံးဝဲ လၢ သါကလဲၤမၤလိတၢ်ဒီး ခၠူ၀ၣ် ခံဂၤလၢ တနံၣ်တီၢ်ပူၤလီၤ. သရၣ် သးခုဒိၣ်မး ဒီးကွဲးလီၤလံာ်ဆူ ကၠိခိၣ်ဒီးကထၢၣ် ဝဲးဘစထၢၣ် အအိၣ်တဘျီဃီ ဒီး သုးကျဲၤတၢ်လၢ စီၤက့ၣ် ဒီးခၠူဝၣ် အဂီၢ်လီၤ. မ့ၢ်တၢ်ယီၤခါဒီး တၢ်ဆၢကတီၢ် အိၣ်တ့ၢ်ဒံးဝဲ လွံၢ်လါ လၢတၢ်ဘၢၣ်စၢၤ န့ၣ်လီၤ.
နဲၣ်ဘူနး တဂၤဆါကွံာ် အရၢးဘၢၣ်ကျိး လၢဖံၣ်နဲ, သုးကျဲၤ တီၢ်တၢ်လၢ အစီၤသီ တဂၤကအီၣ်ဘၣ်အဂီၢ် ဝံၤ ဟဲက့ၤပှ့ၤန့ၢ် ဟံၣ်ဘူးဒီး သရၣ်ဝ့လယၢၣ် အဟံၣ်တဖျၢၣ် ဒီးပာ်အီၤလၢ တၢ်သးခုကစီၣ် အဟံၣ်လီၤ. စီၤက့ၣ်ဒီး ခၠူ၀ၣ် အါဘျီ ဟဲမံဟဲအီၣ်ဖဲ ဟံၣ်အံၤလီၤ.
ဘူနးတချုး ဟးဖးဒီး အစီၤသီ အူသံၣ်လး လၢဖံၣ်နဲဒံးဘၣ်န့ၣ်, တဲပၠးအီၤလၢ အဂ့ၢ်လီၢ်လံၤ ခဲလၢာ်, ကဲထီၣ်က့ၤ ပှၤခရံာ်ဖိအဂ့ၢ်, ဒီးအတၢ်ပာ် လီၤသးအသီ အဂ့ၢ်တဖၣ်လီၤ. သီခါသးပှၢ် အံၤမ့ၢ်ပှၤဃု တၢ်မ့ၢ်တၢ်တီ တဂၤဒီး လဲၤအိၣ်သကိး သရၣ်ဖဲရ့ၣ် ခဲအံၤခဲအံၤ, သံကွၢ်သံဒိး ခရံာ်အတၢ်သးခုကစီၣ်အဂ့ၢ် ဒီးလၢ ခံလါ အတီၢ်ပူၤ ဒိးဘျၢက့ၤအသးဒီး ကဲထီၣ်က့ၤ ပှၤဟးစံၣ်တဲၤတဲလီၤ တၢ်လၢ ဖံၣ်နဲအဝ့ၢ်ပူၤ, မၤသကိး က့ၤတၢ်ဒီး ဖံၣ်နဲ အတၢ်အိၣ်ဖှိၣ်လီၤ. ဘၣ်တၢ်နးတၢ်ဖှီၣ်အါမံၤ, ပှၤကွံာ်အီၤလၢလၢၢ်, ပှၤဒိပှၤတီၢ်အီၤ, ပှၤထူးပှဲာ်ထူးဖှံအီၤ သနာ်က့ အသးတဟးဂီၤဘၣ်. လၢအတၢ်ဟ့ၣ်လီၤသး တံၢ်နီၢ်အဃိ, သီခါ အဂၤတဘျုးဂၤ ဘ့ၣ်လီၤကွံာ် သီၣ်ကီ ဒီးကဲထီၣ်က့ၤ ပှၤခရံာ်ဖိ န့ၣ်လီၤ.
သရၣ်ဖဲရ့ၣ် တဂၤအသးမုာ် သးခုဒိၣ်မးလီၤ. အတၢ်အိၣ်ဖှိၣ် ဂုၤထီၣ်ပသီထီၣ် ဆူညါဆူညါလီၤ. သရိာ်ပူၤ ပှၤဘါတၢ်ကတံာ်မးလီၤ. ကိးဟါဒဲး တၢ်ထုကဖၣ် အတၢ်ဘါ ဘၣ်တၢ်မၤအီၤ ဒီးလၢ တၢ်အံၤအဃိ ယွၤလီၣ်ဖျါထီၣ် အတၢ်အုၣ်က့ၤခီၣ်က့ၤ အစိကမီၤ ကွ့ၢ်ကွ့ၢ်လီၤ. တၢ်အိၣ်ဖှိၣ် ဖိအနီၣ်ဂံၢ် အိၣ်ယဲၢ်ကယၤ ဘျဲၣ်လံ. ဒီးသရၣ် သိၣ်လိအပျဲၢ် ကိးဂၤဒဲးလၢ ကဘၣ်မ့ၢ် ပှၤရၤလီၤ တၢ်သးခုကစီၣ်လီၤ.
သးပှၢ်ဟီးခဘၠၢ်, အမါ, လူစ့ၣ်ဒီး ဟဲနရ့ၣ်တဖၣ် တအိၣ်ကလီဘၣ်. သးပှၢ်အံၤ ဒီးအပှၤဟံၣ်ဖိ ခဲလၢာ် လဲၤဟးလိာ်ကွဲဆူ စ့ကၢၢ်ဖူ ဒီးအိၣ်လၢအတခွါ သထ့စူၣ်အ့ၣ်တၣ် အဟံၣ်ပူၤ ယံာ်ခံနွံလီၤ. အုၣ်အသး လၢကိာ်ပူၤ, အုၣ်အသးလၢ သကဲာ်ပဝးအပူၤ, ဒီးလၢတၢ်ခူသူၣ်တခီ ဘါထုကဖၣ် တၢ်ဆူၣ်ဆူၣ် လၢအတခွါ ဒီးအမါ ဒီးအဖိလွံၢ်ဂၤ အဂီၢ်လီၤ. အသီတဆံအတီၢ်ပူၤအံၤ ယွၤမၤတၢ်လီၤလး ဒီးသးပှၢ် စူၣ်အ့တၣ် ဒီးအဟံၣ် ဖိဃီဖိခဲလၢာ် ပၣ်ဃုာ်ဒီး တၢ်ခ့တၢ်ပှၤ တဖၣ်ကဲထီၣ်က့ၤ ပှၤခရံာ်ဖိလီၤ.
သးပှၢ် ဟီခဘၠၢ် မၤသကိးတၢ်ဒီး စ့ကၢၢ်ဖူ ြဖဲးစဘ့ၣ်ထံရယၢၣ် သရၣ်ကွၢ် တၢ် ဒီးကထၢၣ် စ့မစၢၣ် ဂ့ၤမးလီၤ. လၢခံကတၢၢ် တဟါ, သရၣ်ကျဲၤန့ၢ် တၢ်အုၣ်သး တၢ်ဘါတဘျီလၢ အသရိာ်ပူၤ, ဒီးကွဲပှၤတမ့ၢ် ပှၤခရံာ်ဖိ တဖၣ်အါမးလီၤ. သးပှၢ် ဟီးခဘၠၢ်ဒီး စူၣ်အ့တၣ် ဒီးအဟံၣ်ဖိဃီဖိခဲလၢာ် ဂဲၤထၢၣ် အုၣ်အသးလၢ ကစၢ်ခရံာ် မၤတၢ်လီၤလး လၢအဂီၢ်တဂၤတမံၤ တဂၤတမၠိ န့ၣ်လီၤ. တဟါန့ၣ် ပှၤတူၢ်လိာ် အၢၣ်လီၤက့ၤ ကစၢ်ခရံာ် အိၣ်ခံကယၤ ယဲၢ်ဆံညါလီၤ. လၢအကျါ တရူးသးစၢ် တဂၤလၢ အမ့ၢ်တမျာ်ခိၣ် တဂၤ ပၣ်ဃုာ် စ့ၢ်ကီးဝဲလီၤ. ပှၤအံၤတမျာ်တၢ် နာ်သက့ ပၢၤကီၢ်ဖီၣ်အီၤ တန့ၢ်နီတဘျီဘၣ်. ဟဲနရ့ၣ် တိနိၣ်ဒီးအီၤလၢ တရူးအချၢးဘ် တခီ, အုၣ်အသးလၢ အမဲာ်ညါ, ဝံၤဟဲက့ၤ ကွဲအီၤလၢ ကဟဲထီၣ်သရိာ် တဟါန့ၣ်လီၤ. အမံၤမ့ၢ် လ့ၣ်ယၣ်ဟိ လီၤ. လ့ၣ်ယၣ်ဟိ လဲၤဆူပၢၤကီၢ် ခိၣ်စိ အအိၣ်ဒီး တဲဖျါထီၣ် အတၢ်ကမၣ်ခဲလၢာ်လီၤ. ပၢၢ်ကီၢ်ခိၣ်စိ မၤတဘၣ်ဘၣ်. မ့မ့ၢ်လဲၤကိးဝဲဆူ ကီၢ်၀ၢၢ်နၢၣ် အအိၣ်လီၤ. ကီၢ်၀ၢၣ်နၢၣ် မၤလိာ်ဒီးကထၢၣ် စ့မစၢၣ် ဒီး သရၣ်ဟ့ၣ်ကူၣ်ကီၢ်၀ၢၣ်နၢၣ် လၢကအးလီၤက့ၤ ပှၤသးစၢ် တဂၤအံၤ လၢသါစုပူၤလီၤ. ဒီးပဒိၣ် ဖးဒိၣ်မၤဝဲဒ်န့ၣ်လီၤ. လ့ၣ်ယၣ်ဟိ ကဲထီၣ်က့ၤပှၤခရံာ်ဖိ လၢအဂ့ၤမး တဂၤ, ဒီးကွဲန့ၢ်က့ၤ တံၤသကိး အါဂၤဆူ ခရံာ်အအိၣ်လီၤ. ကီၢ်၀ၢၣ်နၢၣ် စီၤသံကွၢ် က့ၤအဂ့ၢ်ခဲအံၤ ခဲအံၤလၢ ပၢၤကီၢ်ခိၣ်စိ ဒီးသရၣ် စ့မစၢၣ်အအိၣ် ဒီးသးခုဝဲဒိၣ်မးလၢ အထံၣ်ဘၣ် ဝဲလၢအသးလဲလိာ် သးတံၢ်နီၣ်န့ၣ်လီၤ.
ကီၢ်၀ၢၣ်နၢၣ် ကိးလ့ၣ်ယၣ်ဟိ တနံၤဒီး ဃ့အတၢ်ဟ့ၣ်ကူၣ်ဘၣ်ဃး တၢ်ကမၤစၢၤ ပှၤအၢပှၤသီ လၢအဟဲလီၤ ဘၣ်ခဲအံၤခဲအံၤလၢ ဃိာ်ပူၤ တဖၣ်အဂီၢ်လီၤ. လ့ၣ်ယၣ်ဟိ ဃ့န့ၢ် လဲးမးတဘ့ၣ် လၢကီၢ်၀ၢၣ်နၢၣ် အအိၣ်ဒ်သိး အဝဲဒီး အတံၤသကိးတဖၣ် ကန့ၢ်ဘၣ် အခွဲးလၢ ကလဲၤနုာ်ဟးထီၣ် ဘၣ်ဃိာ်ပူၤဖဲ အလီၢ်အိၣ်န့ၣ်လီၤ. တၢ်အိၣ်ဖှိၣ် စးထီၣ်ဘါထုကဖၣ် တၢ်လၢ ပှၤဃိာ်ဖိ တဖၣ်အဂီၢ်လီၤ. လ့ၣ်ယၣ်ဟိ အခီ ကိးထီၣ် အသကိးပှၤခရံာ်ဖိ သးစၢ်တဖၣ် ကိးဟါဒဲး လဲၤအုၣ်သး လၢဃိာ်ပူၤ, ဘါယုၤပှၤဃိာ်ဖိ အတၢ်လီၤ. ပှၤအၢပှၤသီ တဂၤဘၣ်တဂၤ အသးလဲလိာ်က့ၤ အသးဒီး ကဲထီၣ်က့ၤ ပှၤခရံာ်ဖိလီၤ. ကီၢ်၀ၢၣ်နၢၣ် ကိးဃိာ်ဒိၣ် ဒီးသံကွၢ် သံဒိးအီၤလၢ တၢ်ဂ့ၢ်တၢ်ကျိၤ လီၤ. ဃိာ်ဒိၣ် အုၣ်အသး လၢအထံၣ်ဘၣ် တၢ်လဲလိာ် မၤအသး အါမံၤ ဒီးသါပၢၤ က့ၤပှၤဃိာ်ဖိ တဖၣ်ညီထီၣ်အါမး န့ၣ်လီၤ. တၢ်ကစီၣ်တဖၣ်အံၤ ဖျါထီၣ်ခဲလၢာ်လၢ “ဘီကီာ်ကိးနံၤဒဲး တၢ်ပရၢ” အပူၤန့ၣ်လီၤ.
စီၤက့ၣ်, ခၠူ၀ၣ်ဒီး အဖိၣ်ဃဲဖိတနီၤ, ဃုာ်ဒီး နဲၣ်ဘူနး တဖၣ်လဲၤဆူ စ့ကၢၢ်ဖူ ဒီးလဲၤမၤသကိး တၢ်ဒီး လ့ၣ်ယၣ်ဟိ ဒီးအတံၤသကိး တဖၣ်လီၤ. ယွၤမၤ လီၤလး အါထီၣ်တၢ်ဒီး ဃိာ်ဖိအမဲာ်ညါ ဃိာ်ဒိၣ် တဂၤ ဘၣ်တဂၤ စူၢ်က့ၤနာ်က့ၤ ကစၢ်ခရံာ် န့ၣ်လီၤ. ဒီး တၢ်အဲၣ်တၢ်ကွံ အသီလၢ ထး တခီပၢၤက့ၤ တၢ်လၢဃိာ် ဖိဒီး ဃိာ်ဒိၣ် တဖၣ်အဘၢၣ်စၢၤ န့ၣ်လီၤ. ဃိာ်ဒိၣ်တဖၣ် ပတံထီၣ် တၢ်လၢ ဃိာ်ဖိ အဂီၢ်ဒ်သိး တကူဘၣ်သိးဘၣ် လၢၤဃိာ်ကူကၤ တိၤပျ့လၢၤတဂ့ၤ. သုတဘၣ်လူၤ လၢၤအခိၣ် ကျိကျိ တဂ့ၤ. ဒီးတၢ်ဂၤ တဖၣ်လၢ ကမၤဘီၣ်ထီၣ်ညီထီၣ် ပှၤဃိာ်ဖိ တဖၣ် အတၢ်အိၣ်လၢ ဃိာ်ပူၤလီၤ. ကီၢ်၀ၢၣ်နၢၣ် အၢၣ်လီၤ တၢ်ဃ့တဖၣ် အမဲာ်ညါ, မၢဃိာ်ဒိၣ် တၢၣ်ပီၣ်တၢ်ဒီး လ့ၣ်ယၣ်ဟိ လၢကဃုထၢထီၣ်ပှၤဃိာ်ဖိ လၢလီၤနာ်န့ၢ်တဖၣ် လၢတၢ်ကထုး ထီၣ်ကွံာ်လၢဃိာ်ပူၤ ဒီးက့ၤအးလီၤက့ၤအီၤလၢ ဒီးကထၢၣ် စ့မစၢၣ် အတၢ်အံးတၢ်ကွၢ် အဖီလာ်န့ၣ်လီၤ.
တၢ်ကစီၣ်တဖၣ်အံၤ ဘၣ်တၢ်ဆှၢလီၤအီၤဆူ ဘီကီာ်ကိးနံၤတၢ်ပရၢ လီၤ. ဒီးတနံၤတခီၣ် တၢ်ပရၢ ခိၣ်တီလၢ ကဘျံးပၤတၢ ပာ်ဖျါထီၣ်ဝဲ ,
“စ့ကၢၢ်ဖူ ဃိာ်ဖိတဖၣ် ဒိးန့ၢ် နီၢ်ခိနီၢ်သး တၢ်သဘျ့”
“ပှၤယူၣ်တရၣ်ဖိ နဲၣ်ဘူနး, ခၠူ၀ၣ် ဒီးစီၤက့ၣ် လဲၤမၤစၢၤတၢ်”
စီၤက့ၣ်မၤစၢၤ တၢ်ဖဲ စ့ကၢၢ်ဖူ အခါ ဒိးန့ၢ်လီပျံၤတၢ်ပရၢလၢ သရၣ်ဝ့လယၢၣ် အအိၣ်လၢ ဘီကီာ်တခီ ဒ်အံၤလီၤ.
“စီၤပၤအဲၣ်ဒိး နဟဲက့ၤကိး လ့ၣ်ယၣ်ဟိ ဒီးအသကိး တဖၣ်ဒီး မၤတၢ်လၢ ဘီကီာ်ဃိာ်ဖိကျါ, ဘီကီာ်ဒီပုၢ်ဝဲၢ် တဖၣ်အၢၢ်လီၤလၢြကၢးမး, အိၣ်ဆူၣ် ပဝဲခဲလၢာ်, မ်ယွၤ ဆိၣ်ဂ့ၤ နၤအါအါတၢ်အဲၣ်.”
တနံၤဃီန့ၣ် န့ၢ်ဘၣ်စ့ၢ်ကီး ဟဲနရ့ၣ် အလီပျံၤလၢ ဖံၣ်နဲတခီဒ်အံၤ.
“သးခုမးလၢ နၤဒီး လ့ၣ်ယၣ်ဟိ မၤသကိးတၢ် ဘၣ်ဆိၣ်ဂ့ၤအါမး. ဖံၣ်နဲ ဒီပုၢ်ဝဲၢ် ဃ့ကညးသု, ဟဲက့ၤမၤတၢ် ဖဲအံၤ, တၢ်အဲၣ်အါ.”
တဟါန့ၣ် စ့ကၢၢ်ဖူ တၢ်အိၣ်ဖှိၣ် တၢၣ်ပီၣ်တၢ်ဂ့ၢ်အံၤ, ဃ့ဘါထုကဖၣ်ဝံၤ, ဖျါဘၣ်အီၤ ြကၢးတူၢ်လိာ် တၢ်ကွဲခ့ခိၣ်အံၤ, ဒီးဃုထၢ လ့ၣ်ယၣ်ဟိ ဒီး တံၤသကိး တဆံယဲၢ်ဂၤ လၢကလဲၤပိာ်စီၤက့ၣ် အခံဆူ ဖံၣ်နဲ, မၤတၢ်ဖဲန့ၣ်ဝံၤ လဲၤမၤကဒီးဆူ ဘီကီာ်လီၤ. သရၣ်စ့မစၢၣ် ကဘၣ်ကွၢ်ထွဲက့ၤ တၢ်သးခကစီၣ်လၢ စ့ကၢၢ်ဖူ ဃိာ်ပူၤ တခီလီၤ.
လၢခံသၢနွံ, တနံၤတခီၣ် ဘီကီာ် ကိးနံၤဒဲး တၢ်ပရၢ ကဘျံးပၤတၢ ပာ်ဖျါထီၣ်
“ခရံာ်ဖိ အတၢ်ဟူးတၢ်ဂဲၤရၤလီၤသးလၢ စ့ကၢၢ်ဖူ ဆူဖံၣ်နဲ”
“ဖံၣ်နဲဃိာ်ဒီဖျၢၣ်ညါ ဃၣ်ဃၣ် ကဲထီၣ်က့ၤခရံာ်ဖိ”
“ဃဲသဲဟံၣ်တအိၣ်လၢၤ, သံးတၢးဟါမၢ်ကွံာ်လၢ ဖံၣ်နဲ”
လၢခံတနွံတၢ်ပရၢခိၣ်တီတဲဖျါကဒီး
“ခရံာ်အသုးဖိလၢ စ့ကၢၢ်ဖူဒီးလၢဘီကီာ်ဒီး လၢဖံၣ်နဲတခီ ဟဲတုၤဘီကီာ်”
“စီၤပၤရၣ်မၣ် ကွဲတူၢ်လိာ် အီၤလၢ တၢ်အီလာ်ဖးထံလၢနီပူၤ”
ကီၢ်ပယီၤ
မုၢ်ဆ့ၣ်ထီၣ်တနံၤ န့ၣ် စီၤက့ၣ်ဒီးခၠူ၀ၣ် ကလဲၤဆူကီၢ်ပယီၤ လီၤ. တဟါညါအံၤ အဝဲသ့ၣ် ဒ်အညီနုၢ်အသိး စူးရိအိၣ်ဖှိၣ် သကိးဒီး ဒီပုၢ်ဝဲၢ် တဖၣ် လၢဘီကီာ်သရိာ်ပူၤ လၢတၢ်ထုကဖၣ် အဂီၢ်လီၤ. ဒီပုၢ်ဝဲၢ် တဘျုးဂၤ ဆှၢထီၣ်တၢ်အဲၣ် တၢ်ထုကဖၣ်လၢ ပှၤခံဂၤအံၤ အဂီၢ် ဒ်သိးယွၤ ကအံးထွဲကွၢ်ထွဲ အခံန့ၣ်လီၤ. တၢ်ဘဝံၤ ဒီးဒီပုၢ်ဝဲၢ် ခဲလၢာ် ဟဲနူးဆဲးအီၤ တဂၤဘၣ်တဂၤ လီၤ. စီၤက့ၣ်ဒီး ခၠူ၀ၣ် ခံဂၤလိာ် အသးအုးမးလၢ ကဘၣ်လီၤဖးဒီး ပှၤလၢအ အဲၣ်ဝဲ ဒီး မၤသကိးဃုာ်တ့ၢ်လံ တၢ်တဖၣ်အံၤ န့ၣ်လီၤ. ဘၣ်ဆၣ် မၤမုာ်လီၤ က့ၤအသးလၢ တၢ်လီၤဖးအံၤ မ့ၢ်ဒၣ် တစိၢ်တလီၢ်အဃိ န့ၣ်လီၤ.
မ့ရ့ၣ်ဒီး ယီၣ်စွါ လဲၤပိာ်အခံတဟါန့ၣ် ဆူဖိၣ်ဃဲကၠိလီၤ. ဖဲန့ၣ် အီၣ်သကိးမုၢ်နၤ အတၢ်အီၣ် တစဲးလၢခံ ကတၢၢ် တဘျီလီၤ. ဝံၤစီၤက့ၣ်တဲပၠး ဖိၣ်ဃဲဖိခဲလၢာ် လၢခၠူ၀ၣ် ဒီးသါတအိၣ်ဘၣ်အခါ, မ့ရ့ၣ်ဒီး ယီၣ်စွါ ကဟဲအိၣ်ဖဲန့ၣ် ဒီးမၤစၢၤအီၤလီၤ. ဖိၣ်ဃဲဖိတဖၣ် သးအုးမးလၢ ဘၣ်လီၤဖးဒီး အသရၣ်ခံဂၤ အံၤလီၤ. ဘၣ်ဆၣ် မ့ရ့ၣ်ဒီး ယီၣ်စွါခံဂၤအံၤ မ့ၢ်စ့ၢ်ကီး သရၣ်ဒီး တံၤသကိး လၢအအဲၣ်ဝဲအဃိ အသးမုာ်ထီၣ်က့ၤ တစဲးလီၤ.
ယီၣ်စွါ ပာ်တ့ၢ်လံ သရၣ်အတၢ်မၤလၢ ခီလ့ၣ်တခီဒီး ပာ်လီၤသးလၢ ကဘျုးလီၤသးလၢ ခရံာ်ဘီမုၢ် အဂီၢ်န့ၣ်လီၤ. ဒီပုၢ်ဝဲၢ်တဖၣ် ကွၢ်ဆိကမိၣ်ဒီး ဘါထုကဖၣ် လၢပှၤဒီမါ၀ၤ သးစၢ်ခံဂၤအံၤအဂီၢ် ဒီးပှၤခဲလၢာ် ထံၣ်လၢ အမ့ၢ်ပှၤလၢ အြကၢးကတၢၢ် လၢကဖီၣ်ထီၣ်က့ၤ စီၤက့ၣ်ဒီး ခၠူ၀ၣ် အတၢ်မၤန့ၣ်လီၤ.
မုၢ်ဆ့ၣ်ထီၣ်နွံနၣ်ရံၣ် တခီဒီး စီၤက့ၣ်ဒီး ခၠူ၀ၣ် လဲၤတုၤလၢ ကဘီယူၤသန့ လီၤ. စီၤကွၢ် အသးဒီး အတၢ်ဖိတၢ်လံၤ တဖၣ်ဝံၤလံ. ဒီပုၢ်ဝဲၢ် အါဂၤ ဟဲဆှၢ လီၤအီၤလီၤ. နဲၣ်ဘူနးတဂၤ ဟဲတုၤလၢခံကတၢၢ် သါဟဲၤသါဟီၤ မးလီၤ. ဟ့ၣ်လီၤစီၤက့ၣ်လၢ လံာ်ဒၢတဖျၢၣ်, လၢအပူၤအိၣ်စ့ တၢးလဲးမး တဘ့ၣ်, (ခၠဲးခ်) လၢကီၢ်ပယီၤ စ့တကလး အဂီၢ်လီၤ. ကွဲးဃုာ်လံာ်ဖိ တက့ဒီးစံးဝဲ လၢစ့အံၤ ကွၢ်ဖဲစီၤက့ၣ် ကသူဝဲ အဂီၢ်လီၤ. ဒၢလွဲဖိ သီၣ်ထီၣ် အခီၣ်ထံးတဘျီလံ. စီၤက့ၣ်မၢ နဲၣ်ဘူနး ဆှၢအီၤခံဂၤလိာ် လၢတၢ်ထုကဖၣ် လီၤ. ဒီပုၢ်ဝဲၢ်ခဲလၢာ် တီၤလီၤလၢ ကဘီယူၤသန့ ဒၢးအိၣ်ခိး တၢ်အံၤအပူၤဒီး နဲၣ်ဘူနး ဃ့တၢ်ဆိၣ်ဂ့ၤလီၤ. ဘူနး မၤတၢ်အၢ အမဲာ်တဆှးဘၣ်. ဒ်န့ၣ်အသိး ခဲအံၤ မၤတၢ်ဂ့ၤစ့ၢ်ကီး တမဲာ်ဆှးဝဲဒၣ် နီတစဲးဘၣ်. ကမျၢၢ်တဖၣ် ကွၢ်မး တၢ်ကအီကအီၣ် န့ၣ်လီၤ. တထံၣ်ညီနုၢ် ပှၤခရံာ်ဖိ ဘါတၢ်ဒ်သိးအံၤ နီတဘျီဘၣ်.
တစိၢ်ဖိဒီး ဒၢလွဲဖိ သီၣ်ထီၣ် ခံစုတစုဝံၤ စီၤက့ၣ်ဒီး ခၠူ၀ၣ် ဘၣ်လဲၤထီၣ်ဆူ ကဘီယူၤပူၤလီၤ. ဒီပုၢ်ဝဲၢ် တဖၣ် အိၣ်ခိး ကွၢ်ထွဲ အခံတုၤ ကဘီယူၤဟးထီၣ် တစုလီၤ. တဆံနၣ်ရံၣ် တခီဒီး ကဘီယူၤ စီၢ်လီၤဝဲလၢ ဝ့ၢ်တကူၣ် သန့ပူၤလီၤ. ဖဲန့ၣ် သရၣ် ဝဲးဘစထၢၣ်ဒီး ဝဲလ့းစ် ခံဂၤလိာ်ဟဲအိၣ်ခိးအီၤလီၤ. စီၤက့ၣ်မၤသ့ၣ်ညါ ခၠူ၀ၣ် ဒီးသရၣ် ခံဂၤအံၤဝံၤ ဒီးပှၤခဲလၢာ် ဒိးထီၣ်သရၣ်ဝဲးဘစထၢၣ် အကါ ဒီးလဲၤဆူ အ့စ့ၣ်လီၤ. မးမး ဝဲးဘစထၢၣ် ဒီး ဝဲလ့းစ် ခံဂၤလိာ် အိၣ်ခိးအီၤဖဲန့ၣ် ဒီး အီၣ်သကိးဂီၤတၢ်အီၣ်လီၤ. စီၤက့ၣ်ဒီး ခၠူ၀ၣ် တဲယုၤသရၣ်မးမး တဖၣ်လၢ အတၢ်လဲၤမၤတၢ် ထဲတနွံဧိၤ လၢဘီကီာ်ဝ့ၢ်ပူၤ အံၤ ဒိၣ်ထီၣ်လံဝဲ, ဘၣ်ဘျုးလံဝဲ လၢယွၤထဲလဲၣ် န့ၣ်လီၤ. သရၣ်မးမး တဖၣ် ကနၣ်တၢ်ကစီၣ် တဖၣ်ဒီး အသးမုာ်အဒိၣ်ကတၢၢ် လီၤ.
သရၣ်ဝဲးဘစထၢၣ် ဒ်ပှၤကညီ ကျါမံးရှၢၣ် နရ့ၣ်တဂၤအသိး နၢ်ဟူ တၢ်မူထီၣ်လၢ ပှၤကညီအကျါ စးထီၣ်လံ လၢစံာ်ဖးလဲၢ်, ဝ့နးနး, မဲၣ်ကနဲ ဒီး မဲၣ်နမီ တခီဒီး သးဂဲၤလီၤဆီ ဒီး သံကွၢ်စီၤက့ၣ် တၢ်အါမံၤ ဘၣ်ဃး ပှၤကညီဖိအိၣ်လၢ ကီၢ်ယူၣ်တရၣ် အပူၤန့ၣ်လီၤ.
စီၤက့ၣ်သ့ၣ်ညါ ဘၣ်ဝဲလၢ ပှၤကညီဘျၢထံခဝ့ရှၢၣ် လၢကီၢ်ပယီၤ တခီ လဲၤမၤတၢ်လၢ ယူၣ်တရၣ်ကီၢ်ပူၤ, လၢကံၢ်မဲ, မုၢ်ယူၣ်, ဒီး မဲၣ်ဆီး တဖၣ်ဒီး ကမၢကမၣ်မးဝဲလီၤ.
“သရၣ်ဝဲးဘစထၢၣ်ဧၢ, ယဆိမိၣ်တၢ်ကိၢ်ခါ ကၠိပျၢ်ခဲကိာ် နၤဒီး သရၣ်ဝဲလ့းစ် သုမ့ၢ်လဲၤပိာ်ကဒီး ယခံဆူ စံာ်ဖးလဲၢ်, ဟးဝ့ၤဝီၤလၢ ပှၤကညီကျါ, တၢၣ်ပီၣ်သကိးဒီး ြဖဲးစဘ့ထံရယၢၣ် မံးရှၢၣ် လၢ, တၢ်မၤလၢ ပှၤကညီကျါဒီး ဟ့ၣ်ကူၣ်ဟ့ၣ်ဖး က့ၤပှၤဒီး ကဂ့ၤကတၢၢ်လီၤ.”
လၢခံက့ၤ ဒီးသရၣ် ဝဲးဘစထၢၣ် ဟ့ၣ်ကူၣ်လၢ စီၤက့ၣ် ကမၤလိတၢ်လၢ အဲကလံးကျိာ် လံာ်စီဆှံကၠိ, ဒီး ခၠူ၀ၣ်တခီ လၢပှၤကညီကၠိလီၤ. ခၠူ၀ၣ် ကတိၤပှၤကညီကျိာ် ဘၣ်ထဲသိး ပှၤကညီတဂၤဒၣ်လဲာ်လံ. ကတိၤသကိး တၢ်အိၣ်ဃုနံၣ် နွံနံၣ်လၢ ပှၤကညီကျိာ် ကိးနံၤဒဲးလီၤ. ဖးတခီ တဘၣ်နီတဖျၢၣ်ဘၣ်. တထံၣ်ဒံး ပှၤကညီ လံာ်နီတဘ့ၣ်ဘၣ်. ဘၣ်ဆၣ် သးဆူၣ်ဒီး နာ်ဝဲလၢ စှၤနွံဖးဝဲကဘၣ် ကွဲးဝဲကဘၣ်န့ၣ်လီၤ. ခၠူ၀ၣ် နာ်ဝဲဒ် ပှၤမုၢ်နုာ်ဖိ အသိးလၢ “ဖဲပသးအိၣ်န့ၣ်ကျဲအိၣ်ဝဲလီၤ.”
စီၤက့ၣ်သံကွၢ် သရၣ်ဝဲးဘစထၢၣ်, “သရၣ်ဧၢ, တဘၣ်နၢ်ပၢၢ်ကမၣ်ယၤတဂ့ၤ. လံာ်စီဆှံကၠိဖဲအံၤ ဘၣ်ကီဘၣ်ခဲ ဘၣ်ဃး စ့တခီ တမံၤမံၤဧါ.”
“အၢၣ်, တၢ်အိၣ်တမံၤဒ်အံၤလီၤ. ပဘှီထီၣ်ပကၠိ တၢ်ဆါဟံၣ်ဒီး အီၣ်မ့ၤလီၢ်သီ, ဒီးယဘၣ်လိၢ်န့ၢ် တၢ်ဟးမၤ တၢ်သးခုကစီၣ် အစ့တကလး ဘးလီၤ. ပတဲကစၢ်ယွၤ ပတၢ်ကီတၢ်ခဲ ဝံၤလံ. အဝဲကမၤပှဲၤ ပတၢ်လိၣ် သပှၢ်ကတၢၢ်လီၤ.” သရၣ်ကွၢ်ထွဲ ကၠိအံၤလၢ တၢ်ကီတၢ်ခဲအပူၤ ယံာ်အနံၣ်ခံဆံ ဘျဲၣ်လံ. ထံၣ်ဘၣ်ဝဲလၢ မ့ၢ်ပာ်ဒိၣ်ယွၤ အဘီအမုၢ်ဒီး ယွၤမၤပှဲၤအတၢ်လိၣ် လၢစ့တခီထီဘိ န့ၣ်လီၤ.
စီၤက့ၣ်ကတိၤထီၣ်တၢ် လၢကလုၢ်ဖးဒိၣ်, “သရၣ်ဧၢ, တၢ်ဘျုးလီၤ. ယထံၣ်အါထီၣ်ယွၤမၤတၢ် အကျဲတမံၤ ကဒီးလံ. နလိၣ်စ့ တကလးန့ၣ် အိၣ်လၢယအိၣ်ဧဲၢ်.” ဝံၤဒီး တဲပၠးသရၣ်ခံဂၤအံၤ လၢ ဘူနး အခၠဲးခ် စ့တကလး တဘ့ၣ်အဂ့ၢ်လီၤ. ဒီးပှၤကိးဂၤဒဲး စံးပြတၢၤမးယွၤ လၢအကလုၢ်တီတဂၤ အံၤအမံၤန့ၣ်လီၤ.
ကၠိစးထီၣ်ဒီး စီၤက့ၣ်ဒီး ခၠူ၀ၣ် ဘျုးလီၤသးဆူ တၢ်မၤလိအပူၤ န့ၣ်လီၤ. စီၤက့ၣ်မၤလိ ကစၢ်ခရံာ်အသးသမူ, စီၤပီလူး အသးသမူ, တၢ်အိၣ်ဖှိၣ်အတၢ်စံၣ်စိၤတဲစိၤ, တၢ်မၤတၢ်သးခုကစီၣ် တဖၣ်မုာ်လီၤဆီလီၤ. ခၠူ၀ၣ်တဂၤ ဒုဘျုးလီၤသးလီၤဆီလၢ တၢ်မၤလိဖးဒီး ကွဲးပှၤကညီလံာ်ဒီး လၢတလါအတီၢ်ပူၤ ဖးဝဲသ့ၣ် ဖးဒိၣ်လီၤ. စီၤက့ၣ်စ့ၢ်ကီး မၤလိဝဲလီၤ.
ဘျုးလီၤသးလၢ တၢ်မၤလိ, လၢတၢ်လိာ်ကွဲ, လၢတၢ်သူၣ်ဝံၣ်သးဆၢ, ဒီးစးထီၣ် မၤလိစ့ၢ်ကီး တၢ်အူပံ (ကီၤလၤအဘဲ) တဖၣ်လီၤ. ကၠိဖိတဖၣ် ဒိးသိၣ်လိသးလၢ အီၤဘၣ်ဃး တၢ်ကျီနး, ဒီးတၢ်ထိလီၤ. စီၤက့ၣ်ဒီး ခၠူ၀ၣ် သ့ၣ်ညါပှၤကၠိဖိခဲလၢာ်, သရၣ်မးမးခဲလၢာ်, ဒီးပှၤကညီ သရၣ်ဒီး ဟ့ၣ်ဖိဃီဖိ ခဲလၢာ်ဒီး ဒီတံၤဒီသကိး ဒီးအီၤလီၤ.
ဖဲကၠိအိးထီၣ်သီ အနွံ တၢ်ထုကဖၣ် အနံၤန့ၣ်, ပှၤဒီသိၣ်ခံဂၤအံၤ အတၢ်အုၣ်အသးတဖၣ် မၤဂဲၤမၤဟူး ထီၣ်တၢ်အါမးလီၤ. စီၤက့ၣ် စးထီၣ်သိၣ်လိ သးလၢ တၢ်မၤတၢ်သးခု ကစီၣ်မဲာ်သကိးမဲာ် တခါအံၤလီၤ. သိၣ်လိဝဲလၢ ကၠိဒၢးပူၤ, ဟဲက့ၤလီၤ လၢဟံၣ်ဒီး မၤအီၤ တနံၤဘၣ်တနံၤ လီၤ. ကၠိဖိဂံၢ်စၢ်ဘါစၢ်အါဂၤ ဘၣ်ဘျုးဒိၣ်မး ခီဖျိအီၤလီၤ. ခၠူ၀ၣ် စ့ၢ်ကီး မၤတၢ်တမံၤအံၤ လီၤ. တံၤဖိသကိးဖိ အါဂၤ ဟဲရ့ဒီးအီၤ တကူၢ်သ့ၣ် မုာ်မး ပၠီၣ်မးလီၤ.
ပှၤကၠိဖိတဖၣ် အီၣ်ဘၣ်တဝံၣ်တဘဲ အါအါဘၣ်. တၢ်အီၣ်တဘဲ နာ်သက့ စီၤက့ၣ်ဒီးခၠူ၀ၣ် ဘျုးလီၤဒၣ်သးဒီး ပှၤကၠိဖိတဖၣ်, အီၣ်ဃုာ်တပူၤဃီ ဒီးအီၤလီၤ. မ့ၢ်သးအိၣ်ဒီး ဟးဃုငါအီၣ်မ့ၤလၢ တၢ်ချၢသ့ သနာ်က့ တမၤဝဲဘၣ်. လဲၤကျဲၤခူသူၣ်တၢ်ဒီး ကၠိသရၣ် ကွၢ်ထွဲတၢ်အီၣ်တဂၤ ဒ်သိး ကၠိဖိတဖၣ် ကအီၣ် အါထီၣ်ဘၣ် ကသူဟီၣ်ဘီၣ် န့ၣ်လီၤ.
ကိးမုၢ်အိၣ်ဘှံးနံၤ အဝဲဂုာ်ကျဲးစၢး ဟးဆူ သဝီအဘူးအတံၢ် တဖၣ်ဒီး ဂုာ်ကျဲးစၢး အုၣ်အသးလၢ ကစၢ်ခရံာ် အဂ့ၢ်အကျိၤ လီၤ. မ့ၢ်တဟးဒီး အဝဲ ကျဲးစၢးမၤသကိး တၢ်လၢ အိၣ်ဘှံးနံၤ တၢ်မၤလိအပူၤလီၤ.
တနွံမုၢ်အိၣ်ဘှံးနံၤဟါခီ တၢ်ဘါ, သရၣ်ဝဲလ့းစ် ကွဲစီၤက့ၣ်ဒီး ခၠူ၀ၣ်လၢ ကလဲၤစံးဘၣ် သရၣ်အတၢ်အိၣ်ဖှိၣ် လၢဝ့ၢ်ပူၤတဖၣ်လၢ တၢ်မူထီၣ်ဂဲၤထီၣ်လၢ ကီၢ်ယူၣ်တရၣ် ပူၤအဂ့ၢ်လီၤ. အဝဲသ့ၣ် အတၢ်စံးတၢ်ကတိၤတဖၣ် မၤဂဲၤထီၣ် ပှၤအသးဒိၣ်မးလီၤ. လီၤဆီဒၣ်တၢ် ပှၤကညီခရံာ်ဖိတဖၣ် နၢ်ဟူဘၣ်အီၤဒီး အသးမုာ်မးလၢ အပှၤကလုာ်အိၣ်လၢ ကီၢ်ယူၣ်တရၣ် ပူၤတဖၣ် စးထီၣ်တူၢ်လိာ် လံတၢ်သးခုကစီၣ်လံန့ၣ်လီၤ.
လၢကၠိသရၣ်အကျါ သရၣ်စီၤစ့အိၣ်တဂၤလီၤ. အဝဲကတိၤသကိး တၢ်ဒီး စီၤက့ၣ်အါဘျီလံ ဘၣ်ဃး တၢ်သးခုကစီၣ်အဂ့ၢ်လၢ ပှၤကညီကျါန့ၣ်လီၤ. သရၣ်အံၤ ဖျိကီၤလၤ ကျိာ်လံာ်စီဆှံကၠိ အိၣ်ယဲၢ်နံၣ်လံ. ဒီးသိၣ်လိက့ၤတၢ်ဖဲ ပှၤကညီကၠိအံၤလီၤ. အသရၣ်မုၣ်နီၢ်ဖဲထူ လၢအမ့ၢ် သရၣ်မုၣ်ဖျိ ပှၤကွၢ်ပှၤဆါတဂၤစ့ၢ်ကီး သးဂဲၤဒိၣ်မးလၢ အပှၤကလုာ် လၢယူၣ်တရၣ် တခီအဂီၢ်လီၤ. စီၤက့ၣ်ဒီး ခၠူ၀ၣ် လဲၤအိၣ်သကိး အီၤမုာ်မး, ဒီး ဘါထုကဖၣ်သကိး ခဲအံၤခဲအံၤ လၢကီၢ်ယူၣ်တရၣ် အဂီၢ်လီၤ. စီၤက့ၣ်ကွဲမုာ် သရၣ်ဒီးသရၣ်မုၣ် လၢကက့ၤပိာ်အခံဒီး မၤစၢၤအီၤလၢ စံာ်ဖးလဲၢ်လီၤ. သရၣ်ဒီး သရၣ်မုၣ်တဖၣ် ဘါထုကဖၣ် လၢယွၤကဒုးနဲၣ်အကျဲ လၢတၢ်ဂ့ၢ်အံၤန့ၣ်လီၤ.
တလါတဘျီ စီၤက့ၣ်ဒီး ခၠူ၀ၣ် ဟးပိာ်သရၣ်ဒီး ကၠိဖိတဖၣ်အခံ လၢတၢ်မၤတၢ်သးခုကစီၣ် အဂီၢ်လီၤ. ဟးထံၣ်ဘၣ် ဘျၢထံအတၢ်အိၣ်ဖှိၣ် လၢခိ ,လၢဝ့ၢ်ဒီး သးမုာ်ဝဲလၢ အထံၣ်ဘၣ် အမဲရကၤဘျၢထံမံးရှၢၣ် အတၢ်မၤ လၢအပှၤကလုာ် အကျါဒီး လဲၤထီၣ် ဝဲဂ့ၤမး အဃိ န့ၣ်လီၤ. အဝဲအသးဆူၣ် ထံၣ်ဘၣ် တၢ်ဘျုးတၢ်ဖှိၣ် တမံၤဃီ ဘၣ်စ့ၢ်ကီး ပှၤကညီလၢ ယူၣ်တရၣ် တရၣ်ကီၢ်တခီလီၤ.
နံၣ်ဖးဖီ ကၠိပျၢ် ခါစီၤက့ၣ် လဲၤမၤလိတၢ်မၤလိ အသီတဆံ လၢ အမဲရကၤဘျၢထံတၢ်သူၣ် တၢ်ဖျးအကၠိ လီၤ. စီၤက့ၣ် အသးဂဲၤဒိၣ်မးလၢ အထံၣ်ကၠိအံၤ အတၢ်ဖံးတၢ်မၤ ဒီးလဲၤတၢၣ်ပီၣ်တၢ်ဒီှ ကၠိခိၣ် သရၣ်ခါဖဲထၢၣ် တဂၤကိးဟါဒဲးလီၤ.
ဝံၤစီၤက့ၣ် လဲၤကဒီးဆူ ဘျၢထံ တၢ်ဆါဟံၣ် လၢကခၠ့ၣ်ကီၢ် အိၣ်လၢ နါမခါ တခီ, အိၣ်ဝဲဖဲန့ၣ် ခံနွံဒီး မၤနၢ်ပၢၢ်သးဘၣ်ဃး တၢ်ကူစါ ဒီးအံးက့ၤကွၢ်က့ၤ ပှၤဘၣ်တၢ်ညၣ်ဂိၢ်ဒီး တၢ်လိၤသး တဖၣ်လီၤ. လီၤဆီဒၣ်တၢ် အဝဲဂုာ်ဃုနၢ်ပၢၢ် တၢ်ြတီဃာ်တၢ်ဆါတဖၣ် အံၤအကျဲလီၤ. တၢ်ဆါဟံၣ်အခိၣ် ဒီးကထၢၣ် ဟးဖၢၣ် ဟ့ၣ်လီၤအီၤ လံာ်နီၤနီၤ အါဘ့ၣ် ဘၣ်ဃး တၢ်ြတီဃာ် တၢ်ဆူးတၢ်ဆါ, ဒီးတၢ်အံးက့ၤကွၢ်က့ၤ ပှၤဆါတဖၣ်လီၤ.
လၢပၠ့မနါ ကၠိတခီ, ပှၤကညီသရၣ် သးပှၢ်သိၣ်လိတၢ်သူၣ်တၢ်ဖျး, သရၣ်ဖိဂ့ၤတဂၤ နၢ်ဟူစီၤက့ၣ် အတၢ်စံးတၢ်ကတိၤတဖၣ် ဒီးလ ၢတၢ်သးဂဲၤအပူၤ ကွဲးန့ၢ်စီၤက့ၣ် အလံာ်ဒီးစံးဝဲ သါသးပှၢ်သနာ်က့, စီၤက့ၣ်မ့ၢ်လိၣ်သါ တၢ်မၤစၢၤလၢ ယူၣ်တရၣ် ပှၤကညီကျါဒီး သါကလဲၤမၤစၢၤ တၢ်လီၤ. စီၤက့ၣ်ကွဲးဆၢတူၢ်လိာ် အတၢ်ဟ့ၣ်လီၤသးအံၤလီၤ.
တၢ်ကစီၣ်ဟဲကိးနွံဒဲးလၢ ဘီကီာ်တခီလီၤ. ပှၤစူၢ်က့ၤနာ်က့ၤတၢ် အါထီၣ်ဒၣ်ပှီၢ်ပှီၢ်လီၤ. တၢ်ကီပၢၢ်ထီၣ် တမံၤ မ့ၢ်လၢ သရၣ်ကွၢ်က့ၤ အပျဲၢ်အဘီၣ်အသီတခီ တကူတလၢဝဲ အဃိလီၤ. တသ့ဖဲအသ့, ပှၤခရံာ်ဖိ လီၢ်လံၤ မုၣ်ဒီးခွါ တဖၣ် ဟ့ၣ်လီၤသးဒီး ဂုာ်မၤစၢၤ တၢ်လီၤ. ဒီးကထၢၣ်ဝ့လယၢၣ် တဲဘၣ်စီၤက့ၣ်လၢ ြဖဲးစဘ့ၣ်ထံရယၢၣ် မံးရှၢၣ်အၢၣ်လီၤဝဲလၢ ကအိးထီၣ် လံာ်စီဆှံကၠိတဖျၢၣ် လၢဘီကီာ် တခီလၢ ယူၣ်တရၣ် ကျိာ်လီၤ. သရၣ်ဝ့လယၢၣ် မၢစီၤက့ၣ် တၢၣ်ပီၣ်တၢ်ဒီး အမဲရကၤ ဘျၢထံမံးရှၢၣ် လၢကီၢ်ပယီၤတခီ ဘၣ်ဃး တၢ်မၤလၢ ပှၤကညီ ကျါအဂ့ၢ်လီၤ. သရၣ်လိၣ်အါမးလၢ ကကွၢ်က့ၤ ပှၤကညီတဖၣ် န့ၣ်လီၤ.
စီၤက့ၣ်လဲၤဆူ ဒီးကထၢၣ်ဝဲးဘစထၢၣ် အအိၣ်, ဒီးကထၢၣ်လဲၤကိးအီၤဆူ စရ့ဖးဒိၣ် ဒီးကထၢၣ် စဲခ့ၣ် အအိၣ်တဆီလီၤ. သရၣ်စဲခ့ၣ် ကွဲးတၢ်ဆူ ကီၢ်အမဲရကၤ ဒီးတၢၣ်ပီၣ် တၢ်ဒီး ြဖဲးစဘံၣ်ထံရယၢၣ် ဒီးဘျၢထံ အခိၣ်အနၢ်တဖၣ် လီၤ. ပှၤခံဖုလိာ်အၢၣ်လီၤ က့ၤဝဲလၢ ကအးလီၤက့ၤ တၢ်မၤလၢ ပှၤကညီကျါလၢ အမဲရကၤ ဘျၢထံမံးရှၢၣ် အစုပူၤလီၤ. ြဖဲးစဘံၣ်ထံရယၢၣ် ကဖီၣ်ဝဲထဲလၢ ပှၤယူၣ်တရၣ် အကျါလီၤ. သရၣ်စဲခ့ၣ် တၢၣ်ပီၣ်ကဒီး တၢ်ဂ့ၢ်အံၤ ဒီးပှၤကညီဘျၢထံ ခဝ့ရှၢၣ် အခိၣ်အနၢ်တဖၣ် ဒီးပှၤကညီဘျၢထံ ခဝ့ရှၢၣ် အၢၣ်လီၤလၢ သါကမၤစၢၤ လီၤသရၣ်ခံဂၤ လၢကလဲၤမၤစၢၤ တၢ်အိးထီၣ် လံာ်စီဆှံကၠိလၢ ပှၤကညီအဂီၢ် ဒီး ဟ့ၣ်အဘူးအလဲလၢ ယဲၢ်နံၣ် အတီၢ်ပူၤလီၤ. စီၤက့ၣ် တဲဘၣ်ပှၤခိၣ်ပှၤနၢ်တဖၣ် လၢသရၣ်စီၤစ့ လၢပှၤကညီ လံာ်စီဆှံကၠိ အ့စ့ၣ် ဒီးသရၣ်ဖိဂ့ၤ လၢပၠ့မနါ တၢ်သူၣ်တၢ်ဖျး ကၠိတခီ အတၢ်သးအိၣ် လဲၤမၤစၢၤတၢ် အဂ့ၢ်လီၤ. ဒီးခဝ့ရှၢၣ် ပာ်လီၤသရၣ်ခံဂၤအံၤလၢ အတၢ်မၢဖိဆူ ယူၣ်တရၣ် ကီၢ်တခီန့ၣ်လီၤ.
သရၣ်စဲခ့ၣ် စံးဘၣ်စီၤက့ၣ် လၢကၠိပျၢ်, သါဝဲဒီး ဒီးကထၢၣ်ဝဲးဘစထၢၣ် ဒီး ဒီးကထၢၣ် ဝဲလ့းစ် တဖၣ် သါကလဲၤပိာ်စီၤက့ၣ်အခံဒီး သုးကျဲၤတၢ်လၢ လံာ်စီဆှံကၠိအဂီၢ်လီၤ. စီၤက့ၣ်သးခုမး ဒီးဒိန့ၢ် ဒီးကထၢၣ် ဝ့လယၢၣ် လၢလီပျံၤတၢ်ပရၢ, ဒီးကွဲးန့ၢ်အဖါတံၢ် ဒီးအပၢ်အလံာ် ဒီးမၢအကွၢ် သုးပာ်ကျဲၤပာ် တၢ်တသ့ဖဲအသ့လီၤ.
ဘူးကၠိကပျၢ်တနံၤ စီၤက့ၣ်မၤန့ၢ်လီပျံၤ တဘ့ၣ်လၢ မ့ရ့ၣ်အအိၣ်ဒ်အံၤလီၤ.
“နတံၤသကိး ယီၣ်စွါ စူးကွံာ်သးတဂီၤအံၤ နွံနၣ်ရံၣ်. ဘၣ်ဒိလၢသိလ့ၣ်, သ့ၣ်နီၣ် နီၢ်ထူဖိ စီၤက့ၣ်ဖိ ဒီးယၤလၢ နတၢ်ထုကဖၣ် အပူၤတက့ၢ်.”
စီၤက့ၣ်ဒီး ခၠူ၀ၣ် ဟီၣ်ဘၣ်မးသးလီၤ. ဝံၤတဲဘၣ် ကၠိခိၣ်ဒီး ကၠိခိၣ်မၤ တၢ်ဘါထုကဖၣ် လီၤဆီလၢ ယီၣ်စွါ အမါဒီး အဖိတဖၣ် အဂီၢ်ဝံၤ ပျၢ်ကၠိနံၤ တ၀ာ်လီၤ. လၢခံသၢသီဒီး စီၤက့ၣ်ဒိးန့ၢ် တၢ်ပရၢလၢ ကဘီယူၤ လၢမ့ရ့ၣ်အအိၣ်လီၤ.
“ယီၣ်စွါ နီၣ်သိလ့ၣ် ဒီးပဒ့ၣ်ပှၤဖိသၣ် လၢကျဲခိၣ်တဂၤ အခါ, ဘျၢၣ်ဘၣ် သ့ၣ်ဒီး လီၤတကူၢ်ဝဲလီၤ. အသွံၣ်ကျိၤတဲာ်လၢအပူၤ, တသ့ၣ်ညါတၢ်ဆါ အါအါဘၣ်. တူၢ်ဘၣ်ဝဲထဲ တဆံဃုနၣ်ရံၣ် ဧိၤဒီး အပၢ်လၢ မူခိၣ် ကိးက့ၤအီၤလီၤ. ပအၢၣ်လီၤတူၢ်လိာ် ယွၤအတၢ်ဘၣ်အသးလီၤ.”
စီၤက့ၣ်လဲၤတၢၣ်ပီၣ်တၢ်အံၤဒီး ဒီးကထၢၣ်ဝဲးဘစထၢၣ် ဒီးမးမးလီၤ. တံၤသကိးခံဂၤအံၤ ဃ့ဘါထုကဖၣ်လၢ တၢ်ဂ့ၢ်အံၤ, ကွၢ်ထံကွၢ်ဆးဝဲ ကိးကပၤဒီး ဟ့ၣ်ကူၣ်လၢ လံာ်စီဆှံကၠိ လၢပှၤကညီကျါ ကလိၣ်ဘၣ် သရၣ်သိၣ်လိတၢ်သးဝံၣ် ဒီး အဲကလံးကျိာ် တဂၤဒီး ဂ့ၤကတၢၢ် မ့ရ့ၣ် ကမၤတၢ်အံၤ လီၤ. စီၤက့ၣ်ကွဲး တဲက့ၤမ့ရ့ၣ် လၢတၢ်သုးတၢ်ကျဲၤ အံၤဒီး မ့ရ့ၣ်စံးဆၢ လၢသါတူၢ်လိာ် ဝဲကစီဒီ, ဘၣ်ဆၣ် မတၤ ကကွၢ်က့ၤ ဖိၣ်ဃဲ ကၠိလဲၣ်. သံကွၢ်လီၤဝဲလီၤ. လၢခံတနံၤ စီၤက့ၣ်န့ၢ်ဘၣ် ခၠါလ့ၣ် အတၢ်ပရၢတဘ့ၣ်လီၤ. ခၠါလ့ၣ်စံးဝဲ လၢ ယီၣ်စွါအလီၢ်န့ၣ် သါသးအိၣ် မၤက့ၤတၢ်လီၤ. စီၤက့ၣ် မ့ၢ်ဘၣ်အသးဒီး သါကဟးထီၣ် ကွံာ်လၢ စီၤပၤဖိ ခီလ့ၣ်တခီ တဘျီဃီလီၤ. စီၤက့ၣ်လဲၤတၢၣ်ပီၣ် ကဒီးတၢ်ဒီး သရၣ်ဒီး မးမးတဖၣ် ဒီး ဃ့ဘါထုကဖၣ်လၢ ယွၤကဒုးနဲၣ်အီၤကျဲလီၤ. ဖျါဘၣ်အီၤ သၢဂၤလိာ်လၢ ြကၢးတူၢ်လိာ် ခၠါလ့ၣ် လၢယီၣ်စွါ အလီၢ်န့ၣ်လီၤ. ဒီးစီၤက့ၣ် ဒိလီၤလီပျံၤ တၢ်ပရၢ ဒ်န့ၣ်လီၤ.
ကၠိပျၢ် မုၢ်ဆ့ၣ်ထီၣ်တနံၤ ဒီးခၠူ၀ၣ် က့ၤကိးသရၣ်စီၤစ့, သရၣ်မုၣ် စီၤစ့ ဒီးသရၣ် သးပှၢ်ဖိဂ့ၤတဖၣ်ဆူ လၢၢ်ဟ့, ခီဖျိ ဘီကီာ်လီၤ. က့ၤစိာ် ပှၤကညီကျိာ် လံာ်လဲၢ်လၢ အလိၣ်ဝဲ အါမး, ထိး, ဆီ ဒီး တၢ်ချံ အါကလုာ်လၢ တၢ်သူၣ်တၢ်ဖျး ကၠိတခီ န့ၣ်လီၤ. အဝဲသ့ၣ် ဘၣ်က့ၤခိးပာ်စၢၤ စီၤက့ၣ်ဒီး မံးရှၢၣ် နရ့ၣ်တဖၣ် အခိၣ်ဖဲ စံာ်ဖးလဲၢ်လီၤ.
ဒီးကထၢၣ် စဲခ့ၣ်ဒီး ဝဲးဘစထၢၣ် ဒီး ဝဲလ့းစ် တဖၣ်တခီ လဲၤထီၣ်ဆူ ကၠဲတိၣ် ကံၢ်မဲ ဒီး က့ၤလီၤခီဖျိ မုၢ်ယူၢ် မဲၣ်ဆီး တဖၣ်လၢ ကကွၢ်ဟုၣ်ကွၢ်စုး ပှၤကညီ တၢ်အိၣ်တၢ်ဆိး အလီၢ်တဖၣ်, အိၣ်သကိး ပှၤကညီခရံာ်ဖိ တနီၤလၢကျဲ, မၤဆူၣ်ထီၣ်အသးဒီး တဲဘၣ် အီၤလၢ လံာ်စီဆှံ ကၠိအသီ အဂ့ၢ်လီၤ.
ယံာ်တလါဒီး က့ၤလီၤတုၤဆူ လၢၢ်ဟ့ ဖဲဒီးကထၢၣ် ဝ့လယၢၣ်ဒီး သရၣ်ခ့ရ့ၣ် တဖၣ် အိၣ်ခိးပာ်စၢၤ အခိၣ်လီၤ. သရၣ်တဖၣ်ဒီး ြဖၣ်သူဝါ ဒီးကီၢ်ပဒိၣ် တဖၣ် တၢၣ်ပီၣ်သကိးတၢ်, ကွၢ်ပဒိၣ် အဟီၣ်ခိၣ်ဂီၤတဖၣ် ဒီးပှၤခဲလၢာ် အၢၣ်လီၤဝဲလၢ စံာ်ဖးလဲၢ် မ့ၢ်တၢ်လီၢ်လၢ အဘၣ်ကတၢၢ်လၢ တၢ်ကသူၣ်လီၤ ဖျးလီၤ ကၠိတဖျၢၣ် အံၤအဂီၢ်လီၤ.
လၢခံတနံၤ သရၣ်ခဲလၢာ်, ြဖၣ်သူဝါ ဒီးစီၤက့ၣ်က့ၤလီၤဝဲဆူ စံာ်ဖးလဲၢ် လီၤ. စကီၤစီၤဝါ တူၢ်လိာ်အီၤလၢ တၢ်သးခုအပူၤ, ဘှီပာ်န့ၢ်အီၤ ဒဲတဖျၢၣ် လၢသ့ၣ်ကဒု ကျါဖဲ တၢ်မၤတ့ၢ်လံ တၢ်သးခုကစီၣ် အလီၢ်လၢ အပူၤကွံာ် တနံၣ်န့ၣ်လီၤ. သရၣ်လၢ ကီၢ်ပယီၤသၢဂၤ လဲၤကွၢ်ကီ တၢ်သ့ၣ်နီၣ်စကီၤမုၣ် နီၢ်ထူ အတၢ်ဆါဟံၣ်, သံကွၢ်ဝဲ အဂ့ၢ်အါမံၤဒီး မုာ်သးဒိၣ်မး လီၤ. ယူၣ်တရၣ် ကသံၣ်သရၣ် ခံဂၤလိာ် ဃုာ်ဒီး သရၣ်မုၣ် ကွၢ်ပှၤဆါ လွံၢ်ဂၤလိာ် ကဲထီၣ်က့ၤပှၤခရံာ်ဖိ ခဲလၢာ်, ဒီးကသံၣ်သရၣ် အဒူၣ်ဖိထၢဖိ ခဲလၢာ် ခံဒူၣ်လိာ်လီၤ. သရၣ် နဲၣ်ဟိၣ်နါ ဒီးသရၣ်မုၣ် ခံဂၤ တအိၣ်ဘၣ်. ဟးဝ့ၤဝီၤ လၢကစၢၢ်ခိၣ် မၤစၢၤတၢ်လီၤ. သရၣ်အိၣ်တီၢ်တဂၤ မ့ၢ်သရၣ်အီၣ်ဝူ လီၤ. အဝဲအမဲာ်မုာ်နါဆၢမး, ပုာ်ထီၣ်ယွၤလီၤ မးဒီး ခရံာ်အတၢ်အဲၣ်လီၤ.
အဝဲတဲဘၣ်သရၣ်ဝါတဖၣ် “လၢညါ ယမၤတၢ်မၤ မ့ၢ်လၢ ယဘၣ်မၤ တၢ်လီၤဘၣ်ယၤ အဃိလီၤ. ခဲအံၤ ကစၢ်ခရံာ် ဟ့ၣ်က့ၤယၤ တၢ်အဲၣ်အသီဒီး ယမၤတၢ်လၢ တၢ်အဲၣ်ခရံာ်ဒီး တၢ်အဲၣ်ပှၤကညီ တဖၣ်အဃိလီၤ. ယအဲၣ်ပှၤကညီ တဖၣ်ဒ် ယပှၤကလုာ် ဒၣ်ယဲအသိး ,ယသ့ထီၣ် အကျိာ်လီၤတံၢ်လီၤဆဲး, ယဆိမိၣ် တၢ်ဒၣ်လဲာ်လၢ ပှၤကညီကျိာ်လီၤ. ယပာ်လီၤယသးလၢ ယကအိၣ်လၢ ပှၤကညီကျါ တုၤယသံတစု ဒီးပာ်ယသွၣ်ခိၣ် လၢအကျါလီၤ.”
တၢ်ကတိၤအံၤ မၤမုာ် ပှၤခဲလၢာ် အသးဒီး ဒုးစံးထီၣ်ပြတၢၤ အီၤလၢ ယွၤလီၤ. ခရံာ်မၤလီၤပှီၢ်ကွံာ် ပှၤကလုာ်လီၤဆီ အတၢ်ဒူၣ် တၢ်ဆၢ သ့မးလဲၣ်. ြဖၣ်သူဝါ အသးမုာ်ကတၢၢ်လီၤ. အဝဲဃုထၢ ထီၣ်သရၣ်ဒီး သရၣ်မုၣ် ခဲလၢာ်အဃိ တနီၤန့ၣ်လီၤ.
Thai Baht Converter
Post a Comment
ပှၤတဂၤလၢ်လၢ် မ့ၢ်အဲၣ်ဒိးဟ့ၣ်၀ဲ ခီမဲၣ်မ့ၢ်ဂ့ၤ ကွဲးပဲာ်ထံနီၤဖးတၢ်တမံၤမံၤလၢ တၢ်ဂ့ၢ်တခါအံၤအဖီခိၣ် မ့ၢ်ဂ့ၤ ဟ့ၣ်ခီမဲၣ် ဒီး ပဲာ်ထံနီၤဖးသ့လီၤ. လၢနဂီၢ် ခီမဲၣ်လီၢ် လီၤဟိအိၣ်ထီဘိဒီးတူၢ်လိာ်နတၢ် ပဲာ်ထံနီၤဖးဒီး တၢ်ဟ့ၣ်ကူၣ်တဖၣ်လီၤ.