တၤဘီနၢၤဖးဒိၣ်တဒု လၢခရံာ်အဂီၢ် (ထွံၣ်မဲၢ်က့ၣ်… ဘျၢထီၣ် အကူာ် ၁၃)

တနံၤတခီၣ် စီၤက့ၣ်မၤန့ၢ်လံာ်ပရၢဖုၣ်ကိာ်ဖိ တဘ့ၣ်လၢ ဘီကီာ်ပလံး မ့ကၠံ အအိၣ်ဒ်အံၤလီၤ.

“စီၤက့ၣ်ဧၢ,
ယဃုသံကွၢ်န့ၢ်နၤ ဘၣ်ဃး နဲၣ်ဘူနး အဂ့ၢ်ဒီး တၢ်စံးဆၢ ဟဲက့ၤဝဲလၢ အဝဲက့ၤအိၣ်က့ၤလၢ ဝ့ၢ် ဖံၣ်နဲ, မၤက့ၤ ရၢးဘၢၢ် တၢ်သူၣ်တၢ်ဖျး ဘူးတလံးဒီး ဝ့ၢ်လီၤ”

စီၤက့ၣ်ဘါထုကဖၣ်သကိးဒီး ခၠူ၀ၣ်ခံဂၤလၢ ဘူနးအဂီၢ် ယံာ်တစဲးလံ. ထဲသိး တဘျီသးဆူၣ် ခးန့ၢ် ဆၣ်ဖိကီၢ်ဖိ အဒူအဃိၤတဖၣ်လၢ အမံၤလၤသၣ်ကပီၤ ဒၣ်ဝဲအဂီၢ်န့ၣ်, အဝဲအသးဆူၣ် ခးန့ၢ် ဆၣ်ဖိကီၢ်ဖိ ပှၤကညီ တဂၤဘၣ်တဂၤလၢ ကစၢ်ခရံာ် အဂီၢ်လီၤ. တဟါန့ၣ် အဝဲတဲပၠး သရၣ်ဝ့လယၢၣ် ဒီးမးမး ဒီး ဒီပုၢ်ဝဲၢ် ခဲလၢာ်လၢ သရၣ်အသရိာ်ပူၤ ဖဲကိးဟါဒဲး ပှၤဟဲဃ့ဘါထုကဖၣ် သကိးဝဲန့ၣ်လီၤ. တၢ်ဆှၢထီၣ် တၢ်ဂ့ၢ်အံၤဆူ ယွၤအအိၣ် လၢတၢ်သး တဖျၢၣ်ဃီအပူၤလီၤ. ပှၤခဲလၢာ် ဘၣ်အသးလၢ စီၤက့ၣ်ဒီး ခၠူ၀ၣ် ခံဂၤလိာ် ကလဲၤဆူ ဖံၣ်နဲ ဒီးလဲၤအိၣ်သကိး နဲၣ်ဘူနး ဒီး ကွဲက့ၤ အီၤဆူ ကစၢ်ခရံာ် အအိၣ်န့ၣ်လီၤ. တၢ်အိၣ်ဖှိၣ် အၢၣ်လီၤ စ့ၢ်ကီးဝဲလၢ သရၣ်ဝ့လယၢၣ် ကဟ့ၣ်ယုၢ်လီၤ စီၤက့ၣ်လၢ လံာ်ပရၢတဘ့ၣ် လၢကမၤသ့ၣ်ညါ စီၤက့ၣ်ဒီး ခၠူ၀ၣ် လၢတၢ်အိၣ်ဖှိၣ်လၢ ဖံၣ်နဲ တခီန့ၣ်လီၤ.

မုၢ်ဆ့ၣ်ထီၣ်တနံၤဒီး စီၤက့ၣ်ဒီး ခၠူ၀ၣ် လဲၤသကိးဝဲဆူ ဖံၣ်နဲလီၤ. အးတီၢ်ကၠိအတၢ်ဖံး တၢ်မၤလၢ ဖိသၣ် နဲၣ်ဆွဲၣ်ဟီ အစုပူၤ ဒီး ယွၤအစုပူၤလီၤ. သရၣ်ဝ့လယၢၣ် သါကမၤစၢၤ ဆွဲၣ်ဟီ စ့ၢ်ကီးလီၤ. အအံၤတဘျီ သရၣ်ဟဲ သိၣ်လိ ဖိၣ်ဃဲဖိတဖၣ်လၢ လံာ်စီဆှံ တနံၤတနၣ်ရံၣ် လၢဂီၤခီလီၤ.

စီၤက့ၣ်ဒီး ခၠူ၀ၣ် လဲၤတုၤဖံၣ်နဲဒီး လဲၤတဘျီဃီ ဆူသရၣ် ကွၢ်တၢ်ဒီးကထၢၣ် ဖဲရ့ၣ်အဟံၣ်လီၤ. သရၣ်အိးထီၣ် ဖးဒီးကထၢၣ် ဝ့လယၢၣ် အလံာ်ပရၢဒီး တူၢ်လိာ်အီၤလၢ အဟံၣ် လၢတၢ်သးခု အပူၤလီၤ. သရၣ် ဖဲရ့ၣ်မ့ၢ်သရၣ်သးစၢ် ဖိၣ်သၣ်ခွါ လီၤ. ဟဲတုၤဖဲ ဖံၣ်နဲ အိၣ်ဒံးဒၣ် ဃုလါဘဲျၣ်လီၤ. တၢ်အိၣ်ဖှိၣ်ဖဲ ဝ့ၢ်ဖံၣ်နဲ အံၤ အဂံၢ်အဘါ စၢ်ဒိၣ်မးလီၤ. တၢ်အိၣ်ဖှိၣ်ဖိ အနီၣ်ဂံၢ်စှၤ, အိၣ်ယဲၢ်ဆံဘျဲၣ် ဧိၤအမဲာ်ညါ, တၢ်လီၤရၢၢ်ဒိၣ်မး လၢသူၣ်သး တခီန့ၣ်လီၤ. သရၣ်ဟဲထံၣ် တၢ်အံၤဒီး ကျဲးစၢးဝဲ နးနးကလဲာ် ဒ်သိး တၢ်ကမူထီၣ်က့ၤဝဲ န့ၣ်လီၤ. စီၤက့ၣ်ဒီး ခၠူ၀ၣ် အတၢ်ဟဲအံၤ လၢကျဲတဘိ မ့ၢ်ဒၣ်ယွၤ သုးကျဲၤ တၢ်လၢ တၢ်အိၣ်ဖှိၣ် တဖုအံၤ အတၢ်ဂ့ၤ အဂီၢ်လီၤ.

မ့ၢ်မုၢ်ဃုနံၤဟါခီဒီး သရၣ်ကွဲစီၤက့ၣ်ဒီး ခၠူ၀ၣ် လၢကဘါသကိးတၢ်ဖဲ န့ၣ်လၢ ဂီၤခီန့ၣ်လီၤ. တနၤန့ၣ် သရၣ်ဒီး အပှၤတမံှၤခံဂၤ ဟ့ၣ်လီၤသး လၢတၢ်ဘါထုကဖၣ် အပူၤအါမးလီၤ. သရၣ်တဲပၠးအီၤ တကူၣ်သ့ၣ် လၢတၢ်အိၣ်ဖှိၣ်အဂ့ၢ်အကျိၤ ဒီးစီၤက့ၣ် ဒီးခၠူ၀ၣ် ခံဂၤလိာ် ပာ်လီၤသးတဖျၢၣ်ဃီဒီး သရၣ်ဒီး ဃ့လၢယွၤ ကမၤမူထီၣ်က့ၤ အတၢ်အိၣ်ဖှိၣ် တဖုအံၤန့ၣ်လီၤ. စီၤက့ၣ်ကနိဒီး မုၣ်ကီၤလံၢ် လၢယွၤ အလီၢ်ပစိာ် မဲာ်ညါ လၢာ်သူၣ်လၢာ်သးလီၤ. ကအုကစွါ လၢသးဒီဖျၢၣ်ညါ, ဂၢ်လီၤမဲာ်ထံမဲာ်နိ တဖၣ်ဒီး တုၤလီၤလၢ ဖးဖီမုၢ် ဘျဲၣ်ခံနၣ်ရံၣ်ဒီး သးစီဆှံ မၤခုၣ်လီၤက့ၤသး လၢအကိၢ်အူ ကိၢ်ကဖး မးအံၤ လီၤ. သးစီဆှံ ကစၢ်ဒုးသ့ၣ်ညါအီၤ လၢယွၤဒိကနၣ်လံ အတၢ်ဃ့အံၤလံ. စီၤက့ၣ်မံဘၣ်က့ၤ စှၤနၣ်ရံၣ်ဝံၤ မုၢ်ဆ့ၣ်ထီၣ်လီၤ.

သရၣ်ဖဲရ့ၣ် တခီဒိးထီၣ် အသိလ့ၣ် ဒီးလူၤအိၣ်သကိး ပျဲၢ်ဖိတဂၤဘၣ်တဂၤ ဒီးကွဲအီၤလၢကဟဲထီၣ် ဘူၣ်ထီၣ်ဘါ တၢ်တဂီၤန့ၣ် မ့ၢ်လၢ ပှၤတမှံၤလၢ ဘီကီာ်ခံဂၤ ကကတိၤတၢ်အဃိန့ၣ်လီၤ. လၢအမ့ၢ်တၢ်လီၤဆီ တမံၤ, ဒီးမ့ၢ်လၢ ယွၤဒိကနၣ် အဖိသၢဂၤအံၤ အတၢ်သးတဖျၢၣ်ဃီ အတၢ်ဃ့ကညး ကဒီးတမံၤအဃိ တၢ်အိၣ်ဖှိၣ် ဖိယဲၢ်ဆံသၢဂၤလိာ် ဟဲထီၣ်ဘါ တၢ်လၢ သရိာ်ပူၤလီၤ.

သရၣ်ဖဲရ့ၣ်ဒ့အီကၢၢ်, ခၠူ၀ၣ်ထိ တရီဒီး စီၤက့ၣ်တခီ သးဝံၣ်တၢ်လီၤ. တၢ်သးဝံၣ်တဖၣ် မ့ၢ်ဒၣ် တၢ်သးဝံၣ် လီၢ်လံၤဒ် “တံၤသကိးသးဘိမ့ၢ်ယ့ၣ်ရှူး” “လ့ဖးထီအထူအယိာ်” ဒီး “တၢ်အဲၣ်လၢညိကွံာ်ယၤတကဲ” အသိးတဖၣ်လီၤ. ဘၣ်ဆၣ် သးစီဆှံကစၢ် မၤသီထီၣ် က့ၤအီၤ လၢ ပှၤဒိကနၣ်တၢ်ခဲလၢာ် အသးပူၤ, ဒီးပှၤဒ့ တၢ်သးဝံၣ် တၢ်သၢဂၤ လၢကျဲတဘိဘိ ပျဲသးစီဆှံ ကစၢ်သးဝံၣ်တၢ်ခီဖျိ အတၢ်ဒ့ ဒီးသးဝံၣ်တၢ်အဃိ, တၢ်အိၣ်ဖှိၣ် ဖိခဲလၢာ် အသးဘၣ်ဒိ ဘၣ်ထံး တဒိးကွဲဘၣ်.

ဝံၤသရၣ်ဃ့ဘါထုကဖၣ် ဒ်ညီနုၢ်အသိးဒီး ဖးထီာ်လံာ်စီဆှံ, ဟံးန့ၢ် စံၣ်တဲၤတဲလီၤ တၢ်ဂ့ၢ်, “ပတၢ်ဒဲးဘးပျၤထီခရံာ်” စံၣ်တဲၤတဲလီၤဖုၣ်ဖုၣ်ဝံၤ ကွဲစီၤက့ၣ်လၢ ကဂဲၤထၢၣ် ကတိၤတၢ်လီၤ. စီၤက့ၣ်ဂဲၤထၢၣ် အုၣ်အသးလၢ ကစၢ်ခရံာ်မၤလံ တၢ်လၢအဂီၢ်ဒ်လဲၣ်, ထဲလဲၣ်ဒီး တဲပၠးအီၤ လၢယွၤမၤစ့ၢ်ကီး တၢ်အသီလၢ အဖိၣ်ဃဲကၠိဖိ အဂီၢ်ဒ်လဲၣ်န့ၣ်လီၤ. ခၠူ၀ၣ် ပိာ်ထီၣ် စီၤက့ၣ်အခံဒီး အုၣ်စ့ၢ်ကီးအသး ယိယိဖိ လၢကစၢ်ခရံာ် အဂီၢ်လီၤ. သးစီဆှံ သူအတၢ်အုၣ်အသး ခံဂၤလိာ်လီၤ. ပှၤခဲလၢာ် အသးဘၣ်ဒိ ဒိၣ်မးလီၤ.

သရၣ်မၢ ပှၤခဲလၢာ် ဆုးလီၤအခိၣ်ဒီး ဃ့ဘါထုကဖၣ် တၢ်ကစုဒုန့ၣ်လီၤ. ယံာ်ယဲၢ်မံးနံး ဒီးယွၤဂၢ်လီၤ တၢ်စိတၢ်ကမီၤ လၢထးတခီလီၤ. တရူးသဲၣ်ထီးသးပှၢ် တဂၤလၢ ပှၤပာ်ကဲအီၤလၢ အမ့ၢ်ပှၤဂ့ၤပှၤဝါ တဂၤ ဂဲၤထၢၣ်ဒီး ဘါထုကဖၣ် တၢ်ဒီး တဲလီၤကျဲၤလီၤ အတၢ်ဒဲးဘး ခူသူၣ်, အတၢ်အဲၣ်ဘၢ အမါဒီး တၢ်တတီ တလိၤတဖၣ်န့ၣ်လီၤ. ပှၤဂၤတဖၣ် အိၣ်တကဲလၢၤဘၣ်. တဂၤဘၣ်တဂၤ ဂဲၤထၢၣ်ဒီး မၤတၢ်တမံၤဃီ လီၤ. တၢ်ဒဲးဘး လၢအဘၣ်တၢ်ပာ်ခူသူၣ် လံအီၤ လၢတဘျုးနံၣ် တဘျုးလါ အတီၢ်ပူၤခဲလၢာ် တဲဖျါထီၣ် က့ၤလၢ ယွၤအစိကမီၤ အဃိန့ၣ်လီၤ.

တနၤန့ၣ် ယွၤမၤကဒီး တၢ်အဒိၣ်အမုၢ်လၢ အတၢ်အိၣ်ဖှိၣ်ဖဲ ဖံၣ်နဲ တဖု အံၤအပူၤန့ၣ်လီၤ. သးစီဆှံ အမ့ၣ်လၣ် အီၣ်ကွံာ် တၢ်ဘၣ်အၢဘၣ်သီ တဖၣ်, မၤစီဆှံ ထီၣ်က့ၤ အဖိအလံၤတဖၣ်အသး, ဒီးဖှူက့ၤအီၤ လၢမူခိၣ် အတၢ်သးဖှံ, တၢ်အဲၣ်, တၢ်ဃူတၢ်မုာ် အသီန့ၣ်ကဒီးလီၤ.

သဲၣ်ထီးသးပှၢ် ဆှၢနုာ်ဝဲလၢ ဖံၣ်နဲ အတၢ်အိၣ်ဖှိၣ် ကဒုးအိၣ်ထီၣ်က့ၤ တၢ်ဘါထုကဖၣ် အတၢ်ဘါ ကိးဟါဒဲး လၢသရိာ်ပူၤဒီး တၢ်ဘါထုကဖၣ် အဂ့ၢ်မိၢ်ပှၢ်တခီ ကမ့ၢ်ဝဲ, “ဝ့ၢ်ဖံၣ်နဲ လၢကစၢ်ခရံာ်အဂီၢ်” န့ၣ်လီၤ. ပှၤခဲလၢာ်တူၢ်လိာ် တၢ်ဆှၢနုာ်အံၤလၢ တၢ်သးခုအပူၤလီၤ. ဒီးတနၤန့ၣ် တၢ်ထုကဖၣ် ဘၣ်တၢ်စးထီၣ် က့ၤအီၤလၢ တၢ်သးဆူၣ်, တၢ်သူၣ်တီသးရၤအပူၤ လၢတၢ်အိၣ်ဖှိၣ် တဖုအံၤ လၢအခုၣ်လီၤကဘးလီၤယံာ်တ့ၢ် မးလၢ တၢ်အဲၣ်ဟီၣ်ခိၣ် အဃိန့ၣ်လီၤ. ယွၤအတၢ်လုၢ်ဟံၣ် အမ့ၣ်အူဒၢဘၣ်တၢ် ဒွဲၣ်ကပီၤထီၣ်က့ၤ အီၤကဒီးလံ.

စီၤက့ၣ်တဲဖျါထီၣ် အတၢ်ဟဲဆူ ဖံၣ်နဲ အဂ့ၢ်မိၢ်ပှၢ် လၢအမ့ၢ် တၢ်ဟဲကွဲ က့ၤသးပှၢ် နဲၣ်ဘူနး န့ၣ်လီၤ. ဃ့ကညးလၢဒီပုၢ်ဝဲၢ်တဖၣ် ကဃ့ဘါထုကဖၣ်လၢ သးပှၢ် တဂၤအံၤအဂီၢ်လီၤ. ဒီးတၢ်ထုကဖၣ် လဲၤထီၣ်ဆူ ယွၤအအိၣ် လၢပှၤတဘျုးဂၤညါလီၤ. ဝံၤသဲၣ်ထီး သးပှၢ်လၢအမ့ၢ် တရူးသထ့ ဟီခဘၠၢ် အံၤစံးဝဲလၢ ယွၤအသး ဒုးနၢ်ပၢၢ် သါလၢ သါကဘၣ်လဲၤပိာ် စီၤက့ၣ်ဒီး ခၠူ၀ၣ်အခံန့ၣ်လီၤ. တၢ်အိၣ်ဖှိၣ် သးခုမးဒီး ဆီၣ်ထွဲ ကဒီးပှၤကလဲၤ တၢ်သၢဂၤအံၤ လၢတၢ်ထုကဖၣ် ကဒီးတဘျီန့ၣ်ဝံၤ အၢၣ်လီၤဝဲလၢ ကသ့ၣ်နီၣ်အီၤ တဘိယူၢ်ဃီ န့ၣ်လီၤ.

မုၢ်ဆ့ၣ်ထီၣ် ဃုနၣ်ရံၣ်, သးပှၢ်ဟီးခဘၠၢ် ဟဲလၢအသိလ့ၣ်ဒၣ်ဝဲဆူ သရၣ်ဖဲရ့ၣ် အဟံၣ်လီၤ. ဝီၣ်လီၤဘါသကိး တၢ်ဒီး သရၣ်ဒီး တံၤသကိးလၢ ဘီကီာ်တခီဝံၤ အီၣ်သကိး ဂီၤတၢ်အီၣ်ဝံၤမး ဒီး ဒိးထီၣ်သိလ့ၣ် ဒီး စီၤက့ၣ်ဒီးခၠူ၀ၣ်န့ၣ်လီၤ. တၢ်ဒ့ၣ်စၢၤ ယံာ်ဒၣ်ထဲ ယဲၢ်မံးလာ်ဆူ နဲၣ်ဘူနး အရၢးဘၢၣ် ကျိး ဒီးယံာ်ထဲ တဆံယဲၢ်မံးနံး ဒီးလဲၤတုၤဝဲလီၤ. သးပှၢ်ဟီခဘၠၢ် သ့ၣ်ညါကျဲဒီး သ့ၣ်ညါစ့ၢ်ကီး နဲၣ်ဘူနးလီၤ. လဲၤနုာ်လီၤကျိးပူၤဒီး ထံၣ်ဘၣ် သီခါဖၠၣ် တဖျၢၣ်ဖဲ ပှၤဖိသၣ် အါဂၤ ဟဲမၤလိတၢ်န့ၣ်လီၤ.

သးပှၢ်ဟီးခဘၠၢ် စံးဘၣ်စီၤက့ၣ်, “အဝဲအံၤမ့ၢ် သီခါဖၠၣ်လၢ နဲၣ်ဘူနး ဘှီထီၣ်ဝဲ လီၤ. ဒီးဖိသၣ်တဖၣ်အံၤ မ့ၢ်အပှၤမၤတၢ်လၢ အကျိးပူၤ တဖၣ်အဖိအလံၤ လၢသီခါ သးပှၢ်သိၣ်လိအီၤ လၢတၢ်ကွဲးလံာ်ဖးလံာ် ဒီး ဘူးဒး အတၢ်ဘါန့ၣ်လီၤ.”

တမျာ်ခိၣ်, ပှၤဘုးထၢၣ်အခိၣ်, ပှၤဆါကသံၣ်သူ, ဃဲသဲခွါ ဒ်သိး နဲၣ်ဘူနး အသိးတဂၤ ကမၤတၢ်ဒ်အံၤန့ၣ် ကဲထီၣ်မး တၢ်ကမၢကမၣ်အလီၢ် ဖးဒိၣ်တမံၤ လၢစီၤက့ၣ်ဒီး ခၠူ၀ၣ် ခံဂၤလိာ် အဂီၢ်လီၤ. ဘၣ်ဆၣ် တစံး တၢ်နီတမံၤဘၣ်.

လဲၤတုၤလၢနဲၣ်ဘူနး အဟံၣ် တၢးတဒိၣ်တဆံး တဖျၢၣ်ဒီး စံၣ်လီၤလၢ အသိလ့ၣ်လိၤလီၤ. ဘူနး နၢ်ဟူသိလ့ၣ် ကလုၢ်, ဟဲထီၣ်လၢအနီၢ်ကစၢ်, နူးဆဲး သးပှၢ် ဟီးခဘၠၢ် လီၤ.
“နဲၣ်ဘူနးဧၢ, အဝဲအံၤ မ့ၢ်ယသကိး ခံဂၤလၢ ဘီကီာ်တခီ, စီၤက့ၣ်ဒီး ခၠူ၀ၣ်လီၤ. သးအိၣ်ဟဲအိၣ်သကိးနၤ အဃိ ယဟဲဆှၢအီၤလီၤ.”
“အီၣ်, စီၤက့ၣ်, ပယူၣ်တရၣ် ခၠဲပယဲၣ် ကျီနးန့ၣ်ဧါ, ဟဲနုာ်” ဘူနးနူးဆဲး အီၤဒီး မိၤအီၤဆူ အီၣ်တၢ်အဒၢး ပူၤလီၤ. ဘၣ်ဖဲ ကအီၣ်ဂီၤတၢ်အီၣ်အခါလီၤ. မၢတၢ်ခ့တၢ်ပှၤတဂၤ ဟဲစိာ် တၢ်အီၣ်တၢ်အီ, သ့ၣ်သူ၀ၣ်သၣ် တဖၣ်လၢ တမှံၤတဖၣ်အဂီၢ်ဒီး မၢဆူၣ်အအီၣ်တၢ်လီၤ.

ဘူနးစံးဘၣ်စီၤက့ၣ်, “နကျီဒံးနးဒံးဧါ, ယသ့ၣ်နီၣ်ထီၣ်ဒံးလၢ နကဲထီၣ်ခၠဲပယဲၣ် အနံၤန့ၣ်, ယတၤစ့ နၢၤလွံၢ်ကလီၢ် လၢနဖီခိၣ်ညါဒံးထ့ၣ်ဧၢ.”
“ဖါတံၢ်ဧၢ, ယတကျီလၢၤနးယံာ်လွံၢ်နံၣ်လံ. မ့မ့ၢ် ယကျီသးအနး တခီဒီး ယအဲၣ်ဒိး ဟဲတဲနၤ လၢအဂ့ၢ်လီၤ. ယအဲၣ်ဒိး ဟဲဃ့ကညး က့ၤစ့ၢ်ကီးနၤ လီၤ.”

ဘူနးကမၢကမၣ် မးဝဲလီၤ. စီၤက့ၣ်တဲပၠးအီၤဘၣ်ဃး “တၤဘီနၢၤကရ” အဂ့ၢ်တဆီတဆီဒီး အတၢ်ကဲထီၣ် က့ၤပှၤခရံာ်ဖိ န့ၣ်လီၤ. စီၤက့ၣ်ဃ့ကညး နူးဆဲး က့ၤဘူနးလီၤ. ဘူနးဆုးလီၤခိၣ် ကနၣ်တၢ်လီၤ. အဝဲဝံၢ်ထီၣ်က့ၤအခိၣ်, ဖီၣ်နူးဆဲး စီၤက့ၣ်ဒီး ခၠူ၀ၣ် ခံ၈ၤလိာ်လီၤ.
ဘူနးစံး, “ယပျၢ်နၤဒီး ခၠူ၀ၣ် အတၢ်ကမၣ်အလီၢ် တအိၣ်ဘၣ်. ယဘၣ်စံးဘျုး ကဒါခီသုလီၤ. စးထီၣ်လၢ “တၤဘီနၢၤကရၢ” စံၣ်ညီၣ်ယၤဝံၤ န့ၣ်, ယတၢၤကွံာ် ယတၢ်အၢတၢ်သီတဖၣ်, ဟဲက့ၤအိၣ်က့ၤဖဲအံၤ ကစုဒုဒီး ကျဲးစၢးမၤတၢ်ဂ့ၤန့ၣ်လီၤ. ယတၢ်သးမုာ် ဟဲအါထီၣ်က့ၤ, သနာ်က့ သးအတၢ်မံသူၣ်မံသး တံၢ်နီၢ် လၢသုတဲယၤလၢ အဂ့ၢ်အံၤဒု တအိၣ်ဒံးဒီးယၤဘၣ်.”

ခၠူ၀ၣ်ဒီး သးပှၢ် ဟီးခဘၠၢ် အုၣ်စ့ၢ်ကီး သးဒူဒူဖျါဖျါ လၢခရံာ်အဂီၢ်လီၤ. နဲၣ်ဘူနး ကနၣ်မးဝဲလၢ တၢ်သးအိၣ် အပူၤဝံၤ, ကတိၤထီၣ်တၢ်ဒီးစံး, “ဃ့ဘါထုကဖၣ် လၢယွၤကထုးကွံာ် တၢ်ဒဲးဘး အစုၣ်အပျၢ် လၢယသးပူၤ ဒီးဟ့ၣ်ယၤ တၢ်ဃူတၢ်မုာ်တဘီ”
ပှၤကိးဂၤဒဲး တီၤလီၤ လၢသ့ၣ်ဘၣ်ခိၣ်ဒီး ဃ့တၢ်လၢ နဲၣ်ဘူနး အဂီၢ်လီၤ. လၢခံကတၢၢ် ဘူနး အကစၢ်ဒၣ်ဝဲ ဃ့တၢ်ဒီးစံး, “ကစၢ်ယ့ၣ်ရှူးခရံာ်ဧၢ, ယသကိးသၢဂၤအံၤ ဟဲတဲယၤလၢ နမ့ၢ်ယွၤနီၢ်နီၢ်လီၤ. ယသးအိၣ် နာ်နၤလီၤ. ယသးအိၣ် လၢနကအုၣ်က့ၤခီၣ်က့ၤ ယၤလီၤ. မၤစၢၤ ဘၣ်ယၤတဘီမီၤ.”
ယွၤစံးဆၢ အတၢ်ထုကဖၣ် အံၤတဘျီဃီလီၤ. အိၣ်အိၣ် ဘူနး ဂဲၤထၢၣ် ြဖါကနာ်, “အါ, ယွၤမူဝဲဒီး အဲၣ်ယၤလီၤ. ယ့ၣ်ရှူးခရံာ် သံလၢယဂီၢ်စ့ၢ်ကီးလီၤ. ယမ့ၢ်လံအတၢ်လံ.”
စီၤက့ၣ်ကွဲ ဘူနးဒီးစံး, “ဖါတံၢ်ဧၢ, ဟဲပိာ်ယခံဆူ ဖံၣ်နဲ ဒီး ဟဲဘၣ်တိနိၣ် ဒီးပှၤခရံာ်ဖိ အတၢ်အိၣ်ဖှိၣ် ဖဲန့ၣ်မီၣ်.”

ဘူနး အိၣ်ဖျဲၣ်ထီၣ် ခံစုတစုလံ. သ့ၣ်ညါလီၤအသးလၢ အလိၣ်ဘၣ် ဒံးတၢ်သိၣ်လိ မၤယုၤအါမံၤ ဒံး, ဒ်ဖိသၣ်ဆံးတဂၤအသိး, ဆီၣ်လီၤအသး ဒီးလဲၤပိာ်ထွဲ အတံၤသကိး သၢဂၤအံၤအခံဆူ ဖံၣ်နဲ ဒီးလဲၤအိၣ် လၢသရၣ်ဖဲရ့ၣ် အဟံၣ်လၢ စီၤက့ၣ်ဒီး ခၠူ၀ၣ် တပူၤဃီလီၤ. သရၣ်ဖဲရ့ၣ် သးခုဒိၣ်မးလီၤ. ဒီးသိၣ်လိ နၢ်ပၢၢ်အါထီၣ် ဘူနးလၢ လံာ်စီဆှံ အတၢ်ကတိၤဘၣ်ဃး တၢ်အုၣ်က့ၤခီၣ်က့ၤ န့ၣ်လီၤ.

ဘူနးကနၣ်တၢ်ဝံၤစံး, “သရၣ်ဧၢ, ယသးအိၣ် ဒိးဘျၢယသးလီၤ.”
သရၣ်တၢၣ်ပီၣ်လိာ်သး ဒီးသဲၣ်ထီး ဟီးခဘၠၢ် ဒီးစီၤက့ၣ် ခၠူ၀ၣ် တဖၣ်လီၤ. ကွၢ်ဆိကမိၣ်ဝဲဒီး နာ်ဝဲလၢ တၢ်အံၤမ့ၢ် တၢ်ဟဲလၢယွၤ အဃိ သုးကျဲၤဝဲလၢ ခဲဂီၤတနံၤ နဲၣ်ဘူနး ကဒိးဘျၢဘၣ်အသးဒီး ဘၣ်တၢ်တူၢ်လိာ် က့ၤအီၤ ဆူဖံၣ်နဲ အတၢ်အိၣ်ဖှိၣ် အပူၤန့ၣ်လီၤ.

စီၤက့ၣ်ဒိလီၤလီပျံၤ ပရၢဆူ ဘီကီာ်ဒီး ဘိးဘၣ်သ့ၣ်ညါတၢ်အိၣ်ဖှိၣ် ဖဲန့ၣ်လၢ တၢ်လီၤလး ဖးဒိၣ်တဖၣ် လၢအမၤအသးဖဲ ဖံၣ်နဲအံၤ ဒီး မၢဘီကီာ် တၢ်အိၣ်ဖှိၣ်သ့ၣ်နီၣ်အီၤ လၢတၢ်ထုကဖၣ်လီၤ.

တဟါအံၤ တၢ်ဘါထုကဖၣ်လၢ ဖံၣ်နဲ သရိာ်ပူၤပှဲၤမးဒီး တၢ်စံးဘျုးစံးဖှိၣ် အသးန့ၣ်လီၤ. သရၣ်ဖဲရ့ၣ် မၢနဲၣ်ဘူနး အုၣ်အသးလီၤ. ဘူနးဂဲၤထၢၣ်ဒီး တဲပၠးပှၤခဲလၢာ်လၢ တၢ်လၢအမၤအသးဒီး အီၤတမံၤဘၣ်တမံၤ လီၤ. တပာ်ခူသူၣ် အတၢ်အၢတၢ်သီ နီတမံၤဘၣ်. ပှၤဟဲအိၣ်ဖှိၣ်အကျါ, ပှၤလၢ အတဒိးဘျၢဘၣ် ဒံးသး, လၢပှၤခရံာ်ဖိ လီၢ်လံၤတဖၣ် ဂဲၤပျုၢ်သဆၣ်ထီၣ်လံအခံ အိၣ်ခံဆံဃုဂၤလီၤ. နၢ်ဟူဘၣ် ဘူနး အတၢ်အုၣ်အသးတဘျီ, ပှၤခံဆံဃုဂၤအံၤ စ့ၢ်ကီး ဘျုးလီၤအသးလၢာ်လၢာ်ဆ့ဆ့ ဒီးဃ့ဒိးဘျၢက့ၤ အသးလီၤ.

မုၢ်ဆ့ၣ်ထီၣ်တနံၤ, ဘူနးဒီး အဂိၤမီၣ် ခံဆံဃုဂၤ ဒိးဘျၢသးဝံၤ ဘၣ်တၢ်တူၢ်လိာ် က့ၤအီၤဆူ ဖံၣ်နဲ တၢ်အိၣ်ဖှိၣ်ပူၤလီၤ. သဲၣ်ထီး ဟီးခဘၠၢ် ကွဲတၢ်အိၣ်ဖှိၣ်ဒီဖုဆူ အဟံၣ် လၢကဟဲအီသကိး လာ်ဖးထံ န့ၣ်လီၤ. ဒီးဖဲ ဟါသၢနၣ်ရံၣ်န့ၣ်, ပှၤခဲလၢာ် လဲၤဝဲဒီး မုာ်လၤသးခု လၢ တၢ်ရ့လိာ် မုာ်လိာ် အပူၤလီၤ.

အီလာ်ဖးထံဝံၤဒီး သဲၣ်ထီး ဟီခဘၠၢ် ဂဲၤထၢၣ်ဒီးစံး, “သရၣ်ဖဲရ့ၣ်ဒီး ဒီပုၢ်ဝဲၢ်သးဘိ ခဲလၢာ်သ့ၣ်ဧၢ, ယသးခုမး လၢသုတူၢ်လိာ် ပတၢ်ကွဲဒီး ဟဲဃူဃူဖိးဖိးန့ၣ်လီၤ. ခဲအံၤ ယမါဒီး ယဖိခွါ ဒီ ဖိမုၣ် အဲၣ်ဒိး စံးဘျုး စ့ၢ်ကီးသုလီၤ.”

သးပှၢ်ဟီးခဘၠၢ် အမါဂဲၤထၢၣ်, “သရၣ်ဒီး ဒီပုၢ်ဝဲၢ်သ့ၣ်ဧၢ, ပစံးဘျုးက့ၤသုဒိၣ်မး လၢသုတူၢ်လိာ် ပတၢ်ကွဲအံၤ လီၤ. ဒီးပသးအိၣ် စံးဘျုးက့ၤပဒီပုၢ်ဝဲၢ် လၢဘီကီာ်ခံဂၤလီၤဆီ ဒၣ်တၢ်လီၤ. စးထီၣ်လၢ အဝဲသ့ၣ် ဟဲတုၤဝံၤ န့ၣ်တၢ်လဲလိာ်ဖးဒိၣ် မၤအသး အဆိလၢ ယ၀ၤ ဟံၣ်ခိၣ်တဂၤ အပူၤဝံၤ, လၢယပူၤ, ကဒီးလၢ ပဖိမုၣ်ဒီး ဖိခွါခံဂၤလိာ်အပူၤ, ဒီးလၢ တၢ်ခ့တၢ်ပှၤခဲလၢာ် အကျါန့ၣ်လီၤ. ပဝဲခဲလၢာ် ပအိၣ်က့ၤကဒီး ဒီးဟံၣ်ဖိဃီဖိတဖၣ် အတၢ်ဘါသကိး, ကိးဂီၤကိးဟါ ဒဲးပၣ်ဃုာ်ဒီး တၢ်ခ့တၢ်ပှၤ ခဲလၢာ် အမဲာ်ညါ, ပအိၣ်က့ၤဒီး တဂၤဒီးတဂၤ အတၢ်ဖးလံာ်စီဆှံ ကိးနံၤဒဲးလံ. တၢ်ဃူတၢ်ဖိးအကစၢ်, ပကစၢ်ယ့ၣ်ရှူးခရံာ် န့ၢ်ဘၣ်က့ၤ အခွဲးလၢ ကကဲထီၣ် က့ၤဟံၣ်အဝဲအံၤ အကစၢ်လံ. တၢ်ဘျုးဒိၣ်မးလီၤ. မ်ယွၤဆိၣ်ဂ့ၤ သုအါအါ ဒ်ပသိး ခဲလၢာ် တက့ၢ်.”

ဖိခွါ ဟဲနရ့ၣ်ဒီးဖိမုၣ် လူစ့ၣ် တဖၣ်စ့ၢ်ကီး စံးဘျုးက့ၤ တၢ်အိၣ်ဖှိၣ်ဒီး စီၤက့ၣ်ဒီး ခၠူ၀ၣ် တဖၣ်လီၤ. သးစၢ်ခံဂၤအံၤ လၢညါဒ်အမ့ၢ် သထ့အဖိတဖၣ် အသိး ဟးမၤမုာ်ဒၣ်သးလၢ ချၢးဘ် တဖၣ်, ဟးလိာ်ခိၣ်လိာ်ကွဲ, မၤလၢာ်ဂီၤ ကွံာ်စ့ဒီး ဆၢကတီၢ်လၢ တၢ်ဂဲၤကလံၣ် ဒီးတၢ်အိတၢ်အီၣ် ဒီးတၢ်တၤကျိၣ် တၤစ့န့ၣ်လီၤ. တဘျီအံၤ အဝဲသ့ၣ် တၢၤကွံာ် တၢ်သ့ၣ်တဖၣ်အံၤ ခဲလၢာ်, ထံၣ်က့ၤ တၢ်သးဖှံအသီလၢ ပကစၢ်ခရံာ်အပူၤလံ ဒီးပာ်လီၤ စ့ၢ်ကီးသးလၢ ကသူက့ၤ အဂံၢ်အဘါ ဒီးဆၢကတီၢ် တဖၣ်ခဲလၢာ် လၢတၢ်မၤသကိး က့ၤတၢ်ဒီး တၢ်အိၣ်ဖှိၣ် လၢခရံာ်အဘီအမုၢ်အဂီၢ်န့ၣ်လီၤ.

ဝံၤတၢ်မၤသးဖှံလိာ်သး လၢတၢ်သးဝံၣ် ထူကလုၢ်ယွၤကထါတဖၣ် လီၤ. လူစ့ၣ် ဒ့န့ၢ်ပှၤလၢ ဖံၣ်အဲနိၣ်, ဟဲနရ့ၣ်ဒ့ကံၢ်ထါ, ခၠူ၀ၣ်ဒ့ဝါဧိၤလံန် လီၤ. လၢခံပှၤယဲၢ်ဂၤ ဃ့တၢ်ဆိၣ်ဂ့ၤ လၢယွၤဝံၤ တၢ်အိၣ်ဖှိၣ် မုာ်သး မး တဘျီအံၤ ဆိကတီၢ်ကွံာ်ဝဲဒၣ်လီၤ.

တနၤန့ၣ် လၢသရိာ်ပူၤတခီ, စီၤက့ၣ်တၢၣ်ပီၣ်လိာ်သး ဒီးဖံၣ်နဲ ခရံာ်ဖိ တဖၣ်ဒီးစံးဝဲ, “ဒီပုၢ်ဝဲၢ်သးဘိသ့ၣ်ဧၢ, ခဲမုၢ်ဆ့ၣ် ဟါခီလ့ၣ်မ့ၣ်အူ န့ၣ်, ခၠူ၀ၣ်ဒီး ယၤ ပဘၣ်က့ၤဆူဘီကီာ်လီၤ. ပသးအိၣ်လၢ ဒီပုၢ်ဝဲၢ်လၢ သုကျါတနီၤ လဲၤပိာ်ယခံဒီး ဘိးဘၣ်သ့ၣ်ညါ ဘီကီာ် ဒီပုၢ်ဝဲၢ်တဖၣ်လၢ တၢ်လၢကစၢ်ခရံာ် မၤလံလၢ သုဂီၢ် တဖၣ်န့ၣ်လီၤ.”

သရၣ်ဖဲရ့ၣ်မၢပှၤခဲလၢာ် ဆုးလီၤခိၣ်လၢ တၢ်ထုကဖၣ် ကသွံဒံ အပူၤဒီး ပျဲသးစီဆှံ ကစၢ်ဃုထၢထီၣ် ပှၤတဖု အံၤလၢ ကလဲၤတၢ်အဂီၢ် န့ၣ်လီၤ. ပှၤမၤ ဝဲဒ်န့ၣ် ယံာ်ယဲၢ်မံးနံးဝံၤ, နဲၣ်ဘူနး သးပှၢ် ဟီးခဘၠၢ်, လူစ့ၣ် ဒီး ဟဲနရ့ၣ် တဖၣ် မၤဖျါဝဲလၢ သါနာ်ယွၤမၢ သါလဲၤဝဲလီၤ. တၢ်အိၣ်ဖှိၣ် ဒီဖုညါ အၢၣ်လီၤ တၢ်ဃုထၢအံၤလၢ သးတဖျၢၣ်ဃီ ဒီးဆီၣ်ထွဲ ပှၤတဖုအံၤ အခံလၢ တၢ်ထုကဖၣ် အါအပူၤလီၤ.

လၢဂီၤတခီ စီၤက့ၣ်ဒိလီၤန့ၢ် သရၣ်ဝ့လယၢၣ် အလီပျံၤ ပရၢဒ်အံၤလီၤ.
“ဖံၣ်နဲ ခရံာ်ဖိတၢ်အိၣ်ဖှိၣ် ပျၢ်လီၤဒီပုၢ်ဝဲၢ် လွံၢ်ဂၤ လၢကဟဲအိၣ်သကိးပှၤ, ကတုၤတဟါအံၤ, တဲဘၣ်ဒီပုၢ်ဝၢ်တဖၣ်, ကျဲၤလၢကကွဲတံၤသကိး တမ့ၢ်ခရံာ်ဖိဒံး ဖဲယွၤဒုးနဲၣ်ကျဲ, တၢ်အဲၣ်အါမး.”

ဒီပုၢ်ဝဲၢ်အါဂၤ လဲၤဆှၢ လီၤစီၤက့ၣ်ဒီး တံၤသကိးလၢ ကလဲၤသကိးဒီး အီၤတဖၣ်လၢ လ့ၣ်မ့ၣ်သန့လီၤ. သးပှၢ် ဟီးခဘၠၢ် ငါန့ၢ် ဒၢးတီၤထီ တဒၢးဒီဖျၢၣ်ညါ, ဒီးပှၤခဲလၢာ် သူၣ်ဝံၣ်သးဆၢ ထူကလုၢ်ယွၤကထါလၢ တၢ်သးဖှံ အပူၤဝံၤ တီၤလီၤဘါထုကဖၣ် တၢ်လၢ, လ့ၣ်မ့ၣ်ဒၢးပူၤအံၤလီၤ. ပှၤအိၣ်ဖဲသန့ပူၤတဖၣ် ကွၢ်ကီအီၤ, တနီၤနံၤဘၣ်ဖၣ်လဲ အီၤသနာ်က့ တမဲာ်ဆှးနီတဂၤ လၢအတၢ်မၤအံၤ အဃိဘၣ်.

လ့ၣ်မ့ၣ် ဟးထီၣ်လံ, ဒီပုၢ်ဝဲၢ် အိၣ်တီၢ်တဖၣ် သးဝံၣ်ထွဲ အခံလၢ တၢ်သးဝံၣ်, “တုၤလီၤလၢ ပထံၣ်ကဒီးပသး” န့ၣ်လီၤ.

ဟါခီ လွံၢ်နၣ်ရံၣ်ဒီး တုၤဘီကီာ်လီၤ. သရၣ်ဒီး မးမးဝ့လယၢၣ် ဟဲခိးအခိၣ်လၢ လ့ၣ်မ့ၣ်သန့လီၤ. ဟံးစုကွၢ်မဲာ် နူးဆဲးပှၤခဲလၢာ်ဝံၤ က့ၤကိးဝဲဆူဟံၣ် လီၤ. သရၣ်ကျဲၤဝဲလၢ ဒီပုၢ်ဝဲၢ်လၢ ဖံၣ်နဲ လွံၢ်ဂၤအံၤ ကအိၣ်တမှံၤ ဖဲအဟံၣ်လီၤ.

“စီၤက့ၣ်ဧၢ, နဖိၣ်ဃဲဖိတဖၣ် အိၣ်ဆူၣ်ဂ့ၤမး, ဒီးကိးဂၤဒဲး သ့ၣ်နီၤနၤဒီး ခၠူ၀ၣ်လီၤ. ဆွဲၣ်ဟီမၤတၢ်ဂ့ၤမးလီၤ.”

လုၣ်ထံလုၣ်နိဝံၤ အဝဲသ့ၣ် တၢၣ်ပီၣ်လၢ တဟါညါအံၤ တၢ်ထုကဖၣ် အတၢ်ဘါအဂ့ၢ်လီၤ. သရၣ်ဝ့လယၢၣ် ကျဲၤပာ်ဝဲလၢ စီၤက့ၣ်အပှၤဖိသၣ် ခဲလၢာ် ကဟဲဘါသကိးတၢ်လီၤ. သရၣ်နာ်ဝဲလၢ ပှၤတမ့ၢ် ပှၤခရံာ်ဖိ ကဟဲတဘျုးဂၤ ဒီး ပာ်ပာ်စၢၤ လီၢ်ဆ့ၣ်နီၤ အပိၣ်အါဖျၢၣ် လၢတဟါညါအံၤ အဂီၢ် လီၤ.

စီၤက့ၣ် ကတိၤလီၤတၢ်ဆူ အကၠိဒီး တဲဘၣ် ဆွဲၣ်ဟီလၢ ဟါဟဲက့ၤတုၤလံအဂ့ၢ် ဒီးသါကထံၣ်လိာ် သးဒီး ကၠိဖိခဲလၢာ်လၢ သရိာ်ပူၤ တဟါအံၤန့ၣ်လီၤ. မၢပှၤကၠိဖိခဲလၢာ် ဃ့ဘါထုကဖၣ် အါအါလီၤ. ဝံၤစီၤက့ၣ် ကတိၤလီၤကဒီး တၢ်လၢ ထဲလ့ၣ်ဖိ ဆူသးပှၢ် တီဝူ အအိၣ်လီၤ.

“ဟဲလိၣ်, သးပှၢ်တီဝူဧါ, ယၤ, စီၤက့ၣ်လီၤ. မ့ၢ်, ယဟဲသုအိၣ် တတုၤယံာ်လံ. ယတၢ်မၤအါတစဲး, ယဟဲက့ၤလၢ ဖံၣ်နဲ တုၤတဟါအံၤလီၤ. ယသးအိၣ်ကွဲနၤဒီး မ့ရ့ၣ် ဒီဖိမိၢ်, ဒီးယီၣ်စွါ တဖၣ်လၢ သုကဟဲ ဒိကနၣ် ယတံၤသကိး လၢဖံၣ်နဲ လွံၢ်ဂၤ ကကတိၤတၢ်ဘၣ်ဃး ကစၢ်ခရံာ် အဂ့ၢ်လီၤ … နသါဟဲ. တၢ်ဘျုးလီၤ. ြဖဲးစဘ့ၣ်ထံရယၢၣ် သရိာ်နီၣ်ဂံၢ်တၢ, တၢ်ဘျုး.”

စီၤက့ၣ်ကွဲကဒီး ဒီးကထၢၣ်ခၠါလ့ၣ်ဝူ, ြဖိၣ်ဖဲစၢၣ် ဘၣ်ဃး တၢ်ဂံၢ်တၢ်ဒွး နဲၣ်ကူၢ်မဲ, စီၤပၤရၣ်မၣ်, နီၢ်ပၤမုၣ် ဒီးစီၤပၤဖိမုၣ် တဖၣ်လီၤ. စီၤက့ၣ်ထံၣ်ဘၣ်ဝဲလၢ အအိၣ်ဒ့ၣ်အိၣ်ကမၢ် ဒီး ပှၤခဲလၢာ်, လီၤဆီဒၣ်တၢ် တံၤသကိးဒီး ဖံးဘူးညၣ်တံၢ် တဖၣ်လီၤ. ပှၤလၢ အကွဲဝဲတဖၣ် အၢၣ်လီၤအီၤခဲလၢာ်လၢ ကဟဲဝဲလီၤ.

စီၤပၤတခီစံးဘၣ်စီၤက့ၣ် လၢသါဝဲ ဒီးသါဟံၣ်ဖိတဖၣ် သါကဟဲ ဒၣ်ဒ်သိး ကမျၢၢ်ပတီၢ်မုၣ်တဖၣ် ဒီး စီၤက့ၣ် တဘၣ်မၤဖျါထီၣ် လၢကမျၢၢ်ကျါလၢ စီၤပၤကဟဲဝဲ န့ၣ်ဘၣ်လီၤ. ဒီးစီၤက့ၣ်တဲကသွံ ဒၣ်ထဲ ဒီးကထၢၣ် ဝ့လယၢၣ်ဒီး တံၤသကိး ဖဲသရၣ်အဟံၣ်ပူၤဧိၤန့ၣ်လီၤ.

တဟါညါန့ၣ် ဒီပုၢ်ဝဲၢ်တဖၣ် ကတဲာ်ကတီၤဒီး ရဲၣ်လီၤကျဲၤလီၤ တၢ်ဘါ တဘျီအံၤ လၢကမ့ၢ်တၢ်အုၣ် သးလၢ ခရံာ်အဂီၢ် အတၢ်ဘါ တဘျီလီၤ. မးမးဝ့လယၢၣ်, လူစ့ၣ်, ဟဲနရ့ၣ်, စီၤက့ၣ်, ခၠူ၀ၣ်, ဒီးကထၢၣ်ဝ့လယၢၣ် တဖၣ်ကၠီးပာ်စၢၤ တၢ်သးဝံၣ် စှၤယုၢ်လၢ တၢ်ဘါန့ၣ် အဂီၢ်လီၤ. ခၠူ၀ၣ် ဃ့ကညးဝဲလၢ ပှၤကဒ့ဒီး သးဝံၣ်, “တၢ်အဲၣ်လၢညိကွံာ်ယၤတကဲ” န့ၣ်လၢ ညါကတၢၢ်လီၤ. ဒီပုၢ်ဝဲၢ်တဖၣ် ဟ့ၣ်လီၤကဒီးသးလၢ တၢ်ထုကဖၣ် အပူၤ တုၤတၢ်ဘါ အဆၢကတီၢ် ဟဲတုၤတစုဒီး လဲၤဆူသရိာ်ပူၤလီၤ.

သရိာ်ပှဲၤကတံာ်မးလီၤ. လီၢ်ဆ့ၣ်နီၤ အပိၣ်လၢ သရၣ်ဝ့လယၢၣ် ကတဲာ်ကတီၤ ပာ်စၢၤတဖၣ် တလၢဘၣ်. စီၤက့ၣ်မၢ ခၠူ၀ၣ် ကျဲၤလၢ ဖိၣ်ဃဲဖိ တဖၣ် ကပျဲဆ့ၣ်နီၤသးပှၢ် တဖၣ်ဒီး အဝဲသ့ၣ် ကဃုအလီၢ်လၢ အံၤလၢဘး, လၢပဲြတီဒူၣ်လိၤ, လၢပျဲၢ်စီၢ်ဖီခိၣ်, ဖဲတၢ်လီၢ်လီၤဟိ တဆံးတက့ၢ် န့ၣ်လီၤ. စီၤက့ၣ်လဲၤဆှၢစီၤပၤ ဒီး အတံၤသကိး တဖၣ်ဆူ တၢ်မဲာ်ညါ လီၢ်ဆ့ၣ်နီၤ တဖၣ်လီၤ. မ့ရ့ၣ်တဂၤ ဟဲဒီး အမဲာ်ပှဲၤမး ဒီး တၢ်မုၢ်လၢ် ဖးဒိၣ်န့ၣ်လီၤ. အဝဲလဲၤလၢစီၤက့ၣ် ဖိၣ်ဃဲကၠိ, ဒီးထံၣ်ဘၣ် တၢ်လဲလိာ် အါမးလၢ ဖိသၣ် တဖၣ်အကျါလီၤ. လံာ်စီဆှံ လၢတၢ်သိၣ်လိ တ့ၢ်လံအီၤတဖၣ် ဖဲအနီၢ်ဆံးဒံး ဒီးမၤလိတၢ်လဲ အဲကလံးခရံာ်ဖိကၠိ တဖၣ် ဟဲက့ၤမူထီၣ် က့ၤလၢအပူၤ တတီၤဘၣ်တတီၤလီၤ. စးထီၣ် ဖးက့ၤ ကစၢ်ခရံာ် အဂ့ၢ်ဒီး အိၣ်ဘူးတလံးမး မူခိၣ်ဘီမုၢ်န့ၣ်လီၤ. ယွၤအသး ပှဲၤဆၢၣ်ကလာ် ယွၤအဟံၣ်ပူၤအံၤလီၤ. တၢ်ထုကဖၣ် အါမး ပာ်ဟိပာ်စၢၤ ကျဲလၢ သးစီဆှံ ကစၢ်ကမၤ အတၢ်မၤအဂီၢ်လီၤ.

လၢပျဲၢ်စီၤခိၣ်တခီ လူစ့ၣ်ဒ့အီကၢၢ်, ခၠူ၀ၣ်ထိ ဝါဧိၤလံန်, ဒီးဟဲနရ့ၣ်ဒ့ ကံၢ်ထါ, ဒ့ဝဲကဖီလီဒီး ကယီလီဖိလီၤ. ခရံာ်ဖိ အတၢ်သးဝံၣ်တဖၣ်လၢ ပှၤစီဆှံ လၢပျၢၤတဖၣ် ကွဲးဝဲလၢ သးစီဆှံ အတၢ်မၢန့ၢ်ဆီၣ်ခံအီၤ အဃိန့ၣ် သီၣ်ထီၣ်မးဝဲသယုၢ်သညိ ဒီး ကတဲာ်ကတီၤ ပှၤကမျၢၢ် တဖၣ်အသး လၢကအိးထီၣ် အသးအြတဲၤ လၢတၢ်သးခု ကစီၣ်လၢ အဘၣ်တၢ်ဒုးနဲၣ်အီၤလၢ ထးခိၣ်န့ၣ်လီၤ. နၣ်ရံၣ်ဘၣ်ဒီး မးမးဝ့လယၢၣ် အခွါယၢၣ် စးထီၣ် သးဝံၣ် “တၢ်အဲၣ်လၢညိကွံာ်ယၤတကဲ” န့ၣ်လီၤ. ပှၤဒိကနၣ် အိၣ်ဘှီၣ်ကလာ် လီၤ. ခရံာ်ဖိ လီၢ်လံၤတနီၤ အမဲာ်ထံလီၤ ဘၣ်မးသးလီၤ. မ့ရ့ၣ်ဒီး စီၤပၤဖိ မုၣ်ပၣ်ဃုာ်လၢ ပှၤမဲာ်ထံလီၤ အကျါန့ၣ်လီၤ. ယွၤအသးစးထီၣ် အတၢ်မၤလံ.

ဒီးကထၢၣ် ဝ့လယၢၣ် စံၣ်တဲၤတဲလီၤ တၢ်ဖုၣ်ကိာ်ဘၣ်ဃး “ယွၤအတၢ်အဲၣ်ပှၤဟီၣ်ခိၣ်ဖိ” လီၤ. သးစီဆှံ ဂၢ်လီၤ တၢ်စံၣ်တဲၤတဲလီၤ တယုၢ်အံၤခီဖျိ သရၣ်အသး ဒီးအထးခိၣ်လီၤ. တမ့ၢ်သရၣ် ကတိၤတၢ်ဘၣ်. မ့ၢ်ယွၤကတိၤတၢ်ခီဖျိ အီၤတခီလီၤ. ကမျၢၢ်ခဲလၢာ် အသးပှဲၤလီၤပှံၢ်လီၤ ကွံာ်လၢ တၢ်အဲၣ်အံၤ အဃိလီၤ.

ဝံၤစီၤက့ၣ် ဒီးခၠူ၀ၣ် အုၣ်အသး ဂၤစဲးဂၤစဲး ဘၣ်ဃး ယွၤအတၢ်အဲၣ်အံၤ အဂ့ၢ် ဃုာ်ဒီး အတၢ်လဲၤဆူ ဖံၣ်နဲ အဂ့ၢ်လီၤ. သးပှၢ်ဟီးခဘၠၢ်, လူစ့ၣ်ဒီး ဟဲနရ့ၣ် တဖၣ်တဲပၠး ကမျၢၢ်လၢယွၤ အတၢ်အဲၣ်မၤတၢ်လၢ အဟံၣ်ပူၤဃီပူၤ အဂ့ၢ်လီၤ.လၢခံကတၢၢ် နဲၣ်ဘူနး ဂဲၤထၢၣ်, ဒီးတုၤသရၣ်ဝ့လယၢၣ် ဒုးသ့ၣ်ညါအီၤလၢ ကမျၢၢ်ဒီး စီၤပၤဒီး ပှၤခဲလၢာ် ကမၢကမၣ် မးဝဲလီၤ. ဘူနးစံး,
“ဒီပုၢ်ဝဲၢ်ခဲလၢာ်သ့ၣ်ဧၢ, ယကဲထီၣ် ပှၤခရံာ်ဖိ ယံာ်ထဲခံသီဧိၤဒံးလီၤ. ယမ့ၢ်ပှၤ အအၢကတၢၢ် တဂၤလီၤ. ဘၣ်ဆၣ် ယွၤအတၢ်အဲၣ် လူၤယၤ, ဘှီက့ၤယၤဒီး ဟ့ၣ်က့ၤယၤ တၢ်အုၣ်က့ၤခီၣ်က့ၤလံ. ယွၤအတၢ်ဃူ တၢ်မုာ် လီၤလးမး လၢစီၤက့ၣ် ဒီးဒီပုၢ်ဝဲၢ် အဂၤတဖၣ် တဲသုလၢ အဂ့ၢ်န့ၣ် ကဲထီၣ်စ့ၢ်ကီး ယတၢ်န့ၢ်သါ လံ, ယွၤအသးမၢယဟဲက့ၤ ဆူဘီကီာ် အံၤလီၤ. ယကတဲာ်ကတီၤယသးလ ၢယကကွၢ်ဆၢၣ်မဲာ် က့ၤ ယတၢ်ဒဲးဘး ခဲလၢာ် ဒီး တူၢ်က့ၤအီၤ အမဲာ်ညါ, ဖဲယမုၢ်နံၤ အိၣ်ဒံးလၢ ဟီၣ်ခိၣ်ချၢအံၤ ယကဘှီဂ့ၤထီၣ်စၢၤ က့ၤ ပှၤခူဖိဝ့ၢ်ဖိ တဖၣ်လၢ ယမၤကမၣ် မးအီၤ အဒိၣ်အမုၢ်အံၤလီၤ. ၀ံသးစူၤ သ့ၣ်နီၣ်ယၤလၢ သုတၢ်ထုကဖၣ် အပူၤတက့ၢ်.”

ပှၤခဲလၢာ် ကွၢ်စူၣ်မးဘူနးလီၤ. အမဲာ်ဖျါ ကြတ့ၣ်ကြတိၣ်, ပှဲၤမးဒီး တၢ်အဲၣ်တၢ်ကွံ, တၢ်သးခု သးမံလၢ မူခိၣ်တခီ န့ၣ်လီၤ. ဘူနး ကဲထီၣ်မး ယွၤအတၢ်အုၣ်က့ၤခီၣ်က့ၤ အဒိအတဲာ် အိၣ်ဒီး ဖံးဒီးညၣ် လၢပှၤခဲလၢာ် အမဲာ်ညါန့ၣ်လီၤ.

တၢ်လဲလိာ်သး ဒ်အံၤ တကလုာ်အံၤ တမၤညီနုၢ်အသးလၢ ဘီကီာ် ဝ့ၢ်လၢခံလၢပျၢၤ နီတစုဘၣ်. “ထွံၣ်မဲၢ်က့ၣ် နဘိးဘျၢထီၣ်က့ၤ တန့ၢ်နီတစုဘၣ်.” မ့ၢ်တၢ်တီတၢ်လိၤ တဝာ်လၢ ပှၤဘီကီာ်ဖိသ့ၣ်ညါ ဝဲန့ၣ်လီၤ. ခဲအံၤ ထံၣ်ဘၣ်ဝဲလၢ ကစၢ်ခရံာ် မၤဘျၢထီၣ် က့ၤအီၤသ့မးလဲၣ်.

ဒီးကထၢၣ် ဝ့လယၢၣ် မၢကဒီး ကမျၢၢ်ခဲလၢာ် အိၣ်ဘှီၣ်ကစုဒု လၢတၢ်ထုကဖၣ် အပူၤလီၤ. ၀ံၤမၢဒီပုၢ်ဝဲၢ် တနီၤ ဃ့ကညးယွၤလၢ ကမၤက့ၤ အတၢ်အုၣ်က့ၤ ခီၣ်က့ၤ အတၢ်မၤ, ဒီးကူးဒီး ထၢဖှိၣ် က့ၤဘုကဒိၣ် တဖၣ်လီၤ. တုၤသရၣ်ကွဲ ကမျၢၢ် လၢကဂဲၤထၢၣ်ဒီး တူၢ်လိာ်က့ၤ တၢ်အုၣ်က့ၤခီၣ်က့ၤ တစု, ပှၤလၢအတဂဲၤထၢၣ်အိၣ်ဒၣ်ထဲစှၤဂၤ, ပၣ်ဃုာ်ဒီး စီၤပၤဒီး နီၢ်ပၤမုၣ် ဒီးအဖိ မုၣ်န့ၣ်လီၤ. မ့ရ့ၣ်, ယီၣ်စွါ, သးပှၢ်တီဝူဒီး အမါ, ခၠါလ့ၣ်, နဲၣ်ကူၢ်မဲ ဒီးပှၤခဲလၢာ် အိၣ်ယဲၢ်ကယၤဃုဆံခွံဂၤ တူၢ်လိာ်က့ၤ ပကစၢ်ခရံာ် န့ၣ်လီၤ.

စီၤက့ၣ်အသးခုမးဝဲလီၤ. အသးခုမး ဝဲ တုၤအမဲာ်ထံယွၤလီၤဝဲလီၤ. တမဲာ်ဆှးလၢ မဲာ်ထံအံၤ အဃိလၢၤ စ့ၢ်ကီးဘၣ်. တမ့ၢ်တၢ်မဲာ်ဆှး အမဲာ်ထံ ဘၣ်.

စီၤပၤဝံၢ်အစုဒီး စီၤက့ၣ်လဲၤဆူအအိၣ်လီၤ.
“စီၤက့ၣ်ဧၢ, ယသးဘၣ်ဒိဒိၣ်မး လီၤ. ခဲဂီၤဃိးနၣ်ရံၣ်, ဝံသးစူၤ ဟဲကီး ဒီးကထၢၣ်ဝ့လယၢၣ် ဒီး နဲၣ်ဘူနးဆူ နီဒီး ဟဲအီၣ်ဂီၤတၢ်အီၣ် ဒီးပှၤတက့ၢ်.”