အိၣ်ဖျဲၣ်ခံစုတစု (ထွံၣ်မဲၢ်က့ၣ်… ဘျၢထီၣ် အကူာ် ၁၂)

စီၤက့ၣ်အသးအိၣ် အနံၣ်သၢဆံလံ. ဘၣ်ဖဲအဒိၣ်တုာ်ခိၣ်ပှဲၤ လီၤ. ဂဲၤပျုၢ်မၤဂ့ၤမၤစၢၤ ပှၤဖီၣ်ဖိယာ်ဖိ အိၣ်ဃုနံၣ် ဘျဲၣ်လံ. အတၢ်မၤကဲထီၣ် လိၣ်ထီၣ်န့ၢ်အီၤ ဖဲအြကၢးဒီး အတၢ်ကျဲးစၢး ကစီဒီ, သနာ်က့ တၢ်သးတမံ အီၣ်လီၤကလိၤဒံး တၢ်လၢအပူၤလီၤ. နၢ်တပၢၢ်လီၤက့ၤ အသးဘၣ်. တသ့ၣ်ညါ ဒံးဝဲ ဘၣ်လၢ ယွၤတ့လီၤ ပှၤကညီလၢ အဂီၤဒၣ်ဝဲ, ဒီးတချုးလၢ ပှၤတဂၤ ဒီးတဂၤ သ့ၣ်ညါဒီး တူၢ်လိာ်က့ၤဒံးဘၣ် ယွၤန့ၣ် သ့ၣ်ညါတၢ်မံသူၣ် မံသး, တၢ်ဃူတၢ်မုာ်တံၢ်နီၢ် တသ့နီတစုဘၣ်.

ြကၢးမးလၢ အသးခုသးမံဝဲလီၤ. သးစၢ်, တၢ်ထူးတၢ်တီၤအိၣ်, တံၤသကိးတဖၣ် အဲၣ်အီၤပာ်ကဲအီၤ, စီၤလိၣ်စီၤပၤ ဒၣ်လဲာ် သ့ၣ်ညါသ့ၣ်ခိး ကွဲအီၣ်သကိးအီၤလၢမ့ၤ, အိၣ်ဆူၣ်အိၣ်ချ့, မံၤဟူသၣ်ဖျါ ဝဲလီၤ. သနာ်က့ တၢ်တဃူတမုာ်, တၢ်သၣ်ဝံၤလီၤဒိ လၢသးတခီ တနံးဒၣ်အီၤလီၤ.

တဟါတခီၣ်စီၤက့ၣ်လဲၤဟးလၢ ဘီကီာ်, လဲၤအိၣ်သကိး သးပှၢ်တီဝူဝံၤ ဟဲက့ၤလၢသိလ့ၣ် ပူၤလၢကျဲ ဘၣ်ဖဲသရိာ်တဖျၢၣ်ကပၤလီၤ. တၢ်စိကမီၤခူသူၣ် တမံၤမၢန့ၢ်ဆီၣ်ခံအီၤ လၢကပာ်တီၢ်အသိလ့ၣ်လီၤ. အဝဲစံၣ်လီၤဒီး လဲၤနုာ်လီၤဆူ သရိာ်ပူၤလီၤ. သရိာ်ပူၤပှဲၤကတံာ်မးလီၤ. လၢတၢ်မဲာ်ညါ ပျဲၢ်စီၢ်ဖီခိၣ်တခီ, ပှၤကိၤလၤဝါဖိခံဂၤ, ဒီးပှၤကူသိးကီၢ်ပယီၤဖိ ကူသိး အိၣ်ဆံဆဲၣ်ဂၤလီၤ. စီၤက့ၣ်လဲၤနုာ် လီၤဆ့ၣ်နီၤလၢ တၢ်မဲာ်ညါ ဖဲပှၤခိးပဲြတီ တဂၤလဲၤချုန့ၢ် ပာ်လီၤအလီၢ် ကတံာ်ကတူာ် န့ၣ်လီၤ. ဘၣ်လၢ ပှၤသးပှၢ် တဂၤ ဆၢထၢၣ်လၢ တၢ်မဲာ်ညါ ကတိၤတၢ်လီၤ.

“ယမ့ၢ်ပှၤကညီ အိၣ်လၢ ကီၢ်ပယီၤတခီ တဂၤလီၤ. လၢယနီၢ်ဆံးအခါ ယအိၣ်လၢ ယဖံသကိးလီၤ. ယမိၢ်ယပၢ်ခံဂၤလိာ် ဘၣ်တၢ်မၤသံကွံာ် အီၤလၢ ပယီၤပှၤအၢတနီၤလီၤ. ယဖံသိၣ်လိယၤလၢ ယကသ့ၣ်နီၣ် တၢ်အံၤထီဘိဒီး မ့ၢ်ဒိၣ်ထီၣ် တခီ ယကဘၣ် မၤသံကွံာ် ပယီၤတစှၤန့ၢ်ဘၣ် အဂၤယဲၢ်ဆံ ဘၣ်. ယဘၣ်တၢ်လုၢ်ဒိၣ်ထီၣ်ယၤလၢ တၢ် သးဟ့အံၤ အပူၤလီၤ. ယဖိၣ်သၣ်ခွါထီၣ်တဘျီ ယလူၤတမျာ် ပယီၤတဖၣ် ဒီးမၤသံကွံာ်အီၤ ပှီၢ်ပှီၢ်လီၤ. ယမၤသံကွံာ် ပှဲၤထီၣ် လွံၢ်ဆံနွံဂၤ ဒီး ပဒိၣ်ဖီၣ်န့ၢ်ယၤလီၤ. တၢ်သမံသမိး ယတၢ်ဂ့ၢ်, ဒီးစံၣ်ညီၣ်ကွီၢ်ခါလီၤ အကလုၢ်လၢ ယကဘၣ်တၢ်စၢသံကွံာ် န့ၣ်လီၤ. တၢ်ပာ်လီၤဆီယၤ ထဲတဂၤဧိၤ လၢဒၢးတဖျၢၣ်အပူၤ လၢတၢ်ကမၤသံ ယၤအဂီၢ်လီၤ. ယပတံထီၣ် တၢ်ဆူ ရူအထီကတၢၢ်တဖျၢၣ်, ယဃ့ဘါထုကဖၣ် တၢ်လၢ ယွၤဒ်သိး ကမၤထူၣ်ဖျဲးယၤလီၤ. ယစံး, ယွၤမ့ၢ်မၤစၢၤယၤ ဒီးယကဘှီက့ၤ ယကျဲဒီး လူၤက့ၤအတၢ်ဘၣ်အသး လၢာ်လၢာ်ဆ့ဆ့လီၤ. ယလံာ်ပတံထီၣ် တၢ် မၤနၢၤတၢ် ဒီး တၢ်ပျၢ်လီၤကွံာ် ယၤလီၤ. ယပာ်တီယကလုၢ်ဒီး ယွၤတသ့ဖဲအသ့, ယညိကွံာ် တၢ်သးဟ့ ခဲလၢာ်လၢယပူၤ, ဒီးဟးစံၣ်ဘၣ်တဲဘၣ် က့ၤပှၤလၢ ယသးဟ့အီၤတဖၣ်လၢ ထူဂ့ၢ်ယွၤဂ့ၢ်, ဒီးယကျဲးစၢး ကဲထီၣ်က့ၤ တံၤသကိး အဂ့ၤတဂၤ လၢယဒုၣ်ယဒါ ခဲလၢာ်လီၤ. လၢညါ ယသးပူၤ တၢ်ဃူတၢ်မုာ်တအိၣ်ဘၣ်. ခဲအံၤ ယသ့ၣ်ညါက့ၤ တၢ်ဃူ တၢ်ဖိး တံၢ်နီၢ်လံ. တၢ်အံၤမ့ၢ် ယွၤအတၢ်ဟ့ၣ်သးကညီၤ ယၤလီၤ.

ယွၤအသးစီဆှံ ပၢဆှၢ တၢ်အိၣ်ဖှိၣ် တဘျီညါအံၤလီၤ. တၢ်ဘှ့ၣ်ြပံးကလာ်လီၤ. တမ့ၢ် တၢ်သံအတၢ်ဘှ့ၣ်ဘၣ်. မ့ၢ်တၢ်မူ အတၢ်ဘှ့ၣ်လၢ အပှဲၤဆၢၣ်ကလာ်မးဒီး တၢ်စိကမီၤခူသူၣ်လၢ အမ့ၢ်ဒၣ် ယွၤအနီၢ်ကစၢ် ဟဲမၤတၢ်လီၤ. စီၤက့ၣ်အသးဂဲၤမး လီၤ. သၣ်ဝံၤသၣ်စ့ၤထီၣ်တုၤ အအိၣ်သါတကဲ လၢၤဝဲန့ၣ်လီၤ. တုၤတၢ်အိၣ်ဖှိၣ်ဝံၤ ဒီးကီၤလၤသရၣ် ဂဲၤဆၢထၢၣ် ဒီးကွဲပှၤဒိကနၣ် တၢ်ကမျၢၢ် လၢကဂဲၤထၢၣ်ဒီး ဟဲဃီၤဆူ တၢ်မဲာ်ညါ လၢကအၢၣ်လီၤ တူၢ်လိာ်က့ၤ ကစၢ်ခရံာ် ဒီး စီၤက့ၣ်ဂဲၤထၢၣ် လၢညါကတၢၢ် ဒီးသဘျိၣ်ဃီၤဝဲ ဒီးပှၤ အါဂၤ ပိာ်ထီၣ်အခံလီၤ. ပှၤအိၣ်ဆၢထၢၣ် ယဲၢ်ဆံသၢဂၤ ညါလၢ သးအိၣ်ကဲထီၣ် က့ၤကစၢ်ခရံာ် အပျဲၢ်အဘီၣ် န့ၣ်လီၤ.

တၢ်အိၣ်ဖှိၣ်ပျၢ်ကွံာ်ဒီး ကမျၢၢ်အဂၤတဖၣ် က့ၤက့ၤဆူ တဂၤဟံၣ်တဂၤဟံၣ်လီၤ. မ့မ့ၢ် ပှၤယဲၢ်ဆံ သၢဂၤ တခီ အိၣ်တ့ၢ်ဒီး ဘၣ်တၢ်သိၣ်လိက့ၤအီၤ လၢထူဂ့ၢ်ယွၤဂ့ၢ်လၢ ပှၤဟဲစိာ် ခရံာ်တၢ်သးခုကစီၣ် တကရူၢ်အံၤ န့ၣ်လီၤ. အဆိကတၢၢ် စီၤက့ၣ်အိၣ်သကိးဝဲ ဒီး ပှၤကညီတမျာ်ခိၣ်လီၢ်လံၤ တဂၤန့ၣ် လီၤ. သးပှၢ်အံၤ ဃ့ဘါထုကဖၣ်လၢ စီၤက့ၣ်အဂီၢ် ဒီးစီၤက့ၣ် အသးမုာ်ထီၣ်က့ၤဝဲ ဖးဒိၣ်န့ၣ်လီၤ.

ဝံၤ, သးပှၢ်အံၤ လဲၤမၤသ့ၣ်ညါ စီၤက့ၣ်ဒီး ကီၤလၤသရၣ်လၢ အသးပှၢ်တဂၤ, လၢအမ့ၢ် အမဲရကၤဘျၢထံ ပှၤကညီလံာ်စီဆှံကၠိခိၣ်, ဒီးကထၢၣ်ဝဲးဘစထၢၣ် လၢဝ့ၢ်အ့စ့ၣ်, ကီၢ်ပယီၤ တခီန့ၣ်လီၤ. သရၣ်သးပှၢ်အံၤ ဒိးသိၣ်လိသးလၢ တၢ်မၤတၢ်သးခုကစီၣ် မဲာ်သကိးမဲာ်, လၢအမ့ၢ် ပှၤစံၣ်တဲၤတဲလီၤတၢ် တဂၤဧိၤ လၢပှၤဒိ ကနၣ်တၢ်ထဲ တဂၤဧိၤ အဘၢၣ်စၢၤ, ယံာ်လံအနံၣ် သၢဆံဘျဲၣ်လံလီၤ. အဝဲမၤစၢၤ စီၤက့ၣ်ဒိၣ်မးလီၤ.

“စီၤက့ၣ်ဧၢ, နမ့ၢ်နာ်စဲဃဲၤလၢ ယ့ၣ်ရှူးခရံာ်မ့ၢ် ယွၤအဖိခွါတံၢ်နီၢ်, ဒီးဒိးဘျၢနသး လၢအမံၤလၢ တၢ်ပာ်လီၤက့ၤ သးတီတီလိၤလိၤ လၢနကပိာ်က့ၤ အတၢ်ဘၣ်သးလၢာ်လၢာ်ဆ့ဆ့ ဒီး ယွၤအဖိခွါ ကလီၣ်ဖျါထီၣ် အတၢ်အုၣ်က့ၤခီၣ်က့ၤ အစိကမီၤ လၢနပူၤ ဒီးနကစးထီၣ် သ့ၣ်ညါအီၤလီၤ. အိၣ်ဒၣ်ထဲ လၢနစုပူၤလီၤ.”

သရၣ်သးပှၢ် ဃ့ဘါထုကဖၣ် တၢ်လၢ စီၤက့ၣ်အဂီၢ်ဝံၤ လဲၤဆှၢကဒီးအီၤဆူ ကီၤလၤသရၣ် အဂၤတဂၤ အအိၣ်လီၤ. သရၣ်သးစၢ်အဝဲတဂၤ အံၤကွၢ်တၢ်အိၣ်ဖှိၣ် ဖးဒိၣ်တဖုလၢ ဝ့ၢ်တကူၣ်ခၢၣ်သး, ဒီးဖဲအချုးန့ၣ် ဟးဝ့ၤဝီၤ စိာ်စ့ၢ်ကီး တၢ်သးခုကစီၣ်န့ၣ်လီၤ. အမံၤ မ့ၢ်ဝဲ ဒီးကထၢၣ် ဝဲလးလီၤ. ယွၤဆိၣ်ဂ့ၤ အတၢ်မၤလၢ တၢ်အိၣ်ဖှိၣ်အပူၤအါမး, ပှၤဟဲဒိကနၣ် အတၢ်စံၣ်တဲၤတဲလီၤ သရိာ်ကတံာ် ကိးနွံဒဲးလီၤ. လၢတၢ်ခဲလၢာ် အဖီခိၣ် အဝဲသ့ၣ်ဆှၢပှၤတဂၤဘၣ် တဂၤဆူ ကစၢ်ခရံာ် အအိၣ်ဂ့ၤမးလီၤ. ကတိၤလိာ်သးဒီး စီၤက့ၣ်ယံာ် မးခံနၣ်ရံၣ်ဘျဲၣ်လီၤ. ပၠးအီၤလံာ်စီဆှံ အါတီၤလီၤ.

“စီၤက့ၣ်ဧၢ, ကွၢ်ဆၢၣ်မဲာ်က့ၤ နတၢ်ကမၣ်ခဲလၢာ်, မၤဘၣ်က့ၤ အီၤခဲလၢာ်တသ့ဖဲအသ့, တူၢ်လိာ် ကစၢ်အသးမုာ်စီဆှံ လၢနပူၤဒီး ပျဲအဝဲဆှၢနၤ ကိးဆၢကတီၢ်ဒဲး တက့ၢ်.” ဝံၤသရၣ်အံၤ ဟ့ၣ်စီၤက့ၣ်လၢ လံာ်စီဆှံ အသီတကြတူၢ်တဘ့ၣ် ဒီးဟ့ၣ်ကူၣ် စီၤက့ၣ်လၢ ကဖးအီၤ ကိးနံၤဒဲး လၢတၢ်ဘါထုကဖၣ်အပူၤ ဒီးလဲၤတၢ်လၢ လံာ်အံၤ အတၢ်ကပီၤ အပူၤန့ၣ်လီၤ.

တုၤဃီၤဖးဖီမုၢ်ဒီး ပှၤခဲလၢာ် အိၣ်ဖှိၣ်သကိးက့ၤ, ဒီးပှၤတဘျုးဂၤ ဆှၢထီၣ် တၢ်ထုကဖၣ် လၢပှၤယဲၢ်ဆံ သၢဂၤလၢ သးအိၣ်ကဲထီၣ်ပှၤခရံာ်ဖိ အဂီၢ်လီၤ. သရိာ်အံၤ အခိၣ် ြဖဲးစဘ့ၣ်ထံရယၢၣ် သရၣ်ကွၢ်တၢ် ဒီးကထၢၣ် ဝ့လယၢၣ် ဟံးန့ၢ်ပှၤခဲလၢာ် အမံၤဒီး အတၢ်အိၣ်တၢ်ဆိး အလီၢ်အကျဲ လီၤ. ဝံၤပှၤတဖၣ်အံၤ နူးဆဲး က့ၤ စံးဘျုးက့ၤ ပှၤဟဲစိာ် တၢ်သးခုကစီၣ်တဖု အံၤလီၤ. ပှၤတဖုအံၤ လၢမုၢ်ဆ့ၣ်ထီၣ် ကဘၣ်က့ၤကဒါ က့ၤဝဲဆူ ဝ့ၢ်တကူၣ်လီၤ.

စီၤက့ၣ် က့ၤတုၤဟံၣ် ဘၣ်ဂီၤတနၣ်ရံၣ်လံ. ဘၣ်ဆၣ် မံဝဲ တန့ၢ်ဘၣ်. အဝဲအိးထီၣ် လံာ်စီဆှံ လၢဒီးကထၢၣ်ဝဲလ့း ဒုးနဲၣ်တ့ၢ်လံအီၤ န့ၣ်တဆၢလၢအစံးဝဲ, “ပမ့ၢ်တဲာ်လီၤကျဲၤလီၤ ပတၢ်ဒဲးဘးဒီး, အဝဲဒၣ် အကလုၢ်တီ, ဒီးတီဝဲလိၤဝဲ ဒ်သိး အကပျၢ်ကွံာ်ပတၢ်ဒဲးဘး, ဒီးသ့စီကွံာ် ပှၤလၢကယဲၢ်တၢ်အၢ တၢ်သီခဲလၢာ်လီၤ.”

လဲၤဃီၤဝဲဆူ စပွဲ ကပၤ ဆ့ၣ်နီၤဖီၣ်ထီၣ် စးခိဒီး ထိၣ်ဒံးဒီး စးထီၣ်ကွဲးလီၤ က့ၤအတၢ်ဒဲးဘး, တၢ်တကဆှီ, တၢ်တတီတလိၤ, တၢ်အဲၣ်လီၤသး, ၀ာ်ဟုးလာ်, ဒီးတၢ်တသ့ အဲၣ်တၢ်တဖၣ်, တဘီဘၣ်တဘီ တီတီလိၤလိၤ လီၤ. ကွဲးလီၤဝဲ ဒ်အါထီၣ်, သ့ၣ်နီၣ်ထီၣ်က့ၤဝဲ ဒ်အါထီၣ်လီၤ. သးစီဆှံ ကစၢ် မၤစၢၤအီၤလီၤ. တၢ်လၢ အဝဲတသ့ၣ်ညါလၢ အမ့ၢ်တၢ်ဒဲးဘး ဒ်တၢ်တၤကျိၣ်တၤစ့, တၢ်သးအ့န့, သးတမုာ်ဒီး မၤဒၢၣ်ပှၤဂၤ တပျုာ်တပျီၤ, တၢ်သးလီ မံၤလၤသၣ်ကပီၤ, တၢ်သးကတၢ, တၢ်စၢဃာ်ပှၤဂၤ အတၢ်ကမၣ်, တၢ်စံၣ်ညီၣ်ကွၢ်တလီၤ ပှၤဂၤ, တၢ်ပာ်တီပာ်လိၤအသး ဒီး တၢ်အါမံၤ ဒံးဘၣ်တၢ်လ့ကပီၤထီၣ်ဒီး ဒုးဖျါထီၣ်က့ၤအီၤ လၢအသးပူၤ လၢ အမ့ၢ် တၢ်လီၤသးဘၣ်အၢ ဒိၣ်မးတဖၣ်န့ၣ်လီၤ. စီၤက့ၣ်ကွဲး လံာ်လၢာ် မးစးခိဘျံး ကပၤခံဆံ ဘျဲၣ်လံ, တလၢာ်ဒံးဘၣ်. မၤဝဲတုၤဃီၤ မုၢ်ဆ့ၣ်ဝါထီၣ် လွံၢ်နၣ်ရံၣ် တခီတဘီ တသ့ၣ်နီၣ်က့ၤဝဲ နီတမံၤလၢၤဘၣ်.

စီၤက့ၣ်တီၤလီၤလၢ သ့ၣ်ဘၣ်ခိၣ် ချီၣ်လီၢ်ဒါလိၤ, ဒီးပာ်လီၤစးခိ သလၣ်လီၤအီၤ လၢတၢ်မဲာ်ညါ ဒီးစံး, “ကစၢ်ယွၤဧၢ, ယဟဲတဲလီၤကျဲၤလီၤ ယတၢ်ဒဲးဘးဖဲ ယသ့ၣ်ညါက့ၤ၀ဲ ခဲလၢာ်ခဲအံၤလၢ နမဲာ်ညါလီၤ. ယတူၢ်လိာ်နလံာ်စီဆှံ အတၢ်သိၣ်လိလၢ နကလုၢ်တီဒီး ပျၢ်ယၤလၢ အီၤခဲလၢာ် အမဲာ်ညါ သ့စီယၤခဲလၢာ် လၢကစၢ်ယ့ၣ်ရှူးအသွံၣ် အဃိန့ၣ်တက့ၢ်.” ဝံၤဂဲၤဆၢထၢၣ် ဆူးကွံာ်လံာ်က့လၢ အကွဲးလီၤအတၢ်ဒဲးဘး တဖၣ်လၢ တၢ်နာ်လၢ ယွၤပျၢ်လံအီၤ သးပ့ၤနီၣ်လံ အတၢ်ဒဲးဘး ခဲလၢာ်န့ၣ်လီၤ. အသးလၢ အဃၢန့ၣ် ဖှံထီၣ်က့ၤ မးဝဲသတူၢ်ကလာ်လီၤ.

စီၤက့ၣ်အိးထီၣ်ကဒီး အလံာ်စီဆှံ အဂၤတတီၤလၢအစံးဝဲ, “မၤသးဒ်န့ၣ်ဒီး သုဝဲဒၣ်လၢ အမ့ၢ်ပှၤအအၢအသီန့ၣ်, သုမ့ၢ်သ့ၣ်ညါ ဟ့ၣ်သုဖိသုလံၤ လၢတၢ်ဟ့ၣ်အဂ့ၤဒီး, သုပၢ်အိၣ်လၢ မူခိၣ်န့ၣ်, ကဟ့ၣ်ဘၣ်ပှၤလၢ အဃ့တၢ်လၢအီၤတဖၣ် လၢသးစီဆှံ န့ၣ်အါန့ၢ် အန့ၣ်တက့ၢ်ဆံးဒိၣ်လဲၣ်.”

စီၤက့ၣ်ဃ့ဘါထုကဖၣ်ကဒီးဝဲ, “ကစၢ်ယွၤဧၢ, ယနာ်နကလုၢ်ကထါ လၢယဖးအီၤအံၤလီၤ. ယသးလီလၢ နကသးကညီၤ ဟ့ၣ်ယၤ နသးစီဆှံ အံၤလီၤ. ယဟ့ၣ်လီၤ ယသးခဲလၢာ်ခဲဆ့ ဆူနစုပူၤလီၤ. နမ့ၢ်ထံၣ်လၢ အတလၢတပှဲၤဒီး တဲယၤတက့ၢ်. ယကမၤလၢမၤပှဲၤ အီၤလီၤ. သးကညီၤမၤစၢၤ ယၤဒ်သိး ယတၢ်ဟ့ၣ်လီၤ ယသးအံၤ ကလၢဝဲပှဲၤဝဲ ဒီး သးကညီၤ တူၢ်လိာ် ယၤဒီး ဒိကနၣ် ယတၢ်ဃ့ အံၤတက့ၢ်. လၢကစၢ်ခရံာ် အမံၤလီၤ.” စီၤက့ၣ်ဃ့ကညးယွၤ အိၣ်ဒီး တၢ်ကအုကစွါ, တၢ်သၣ်ဝံၤ သၣ်စ့ၤ လၢာ်သးလၢ ကန့ၢ်ဘၣ် တၢ်အုၣ်က့ၤခီၣ်က့ၤ အစိကမီၤအံၤလၢ အပူၤန့ၣ်လီၤ. ကနိမးဝဲ နီၢ်နီၢ် ဒ်စီၤယၤကိာ် ကနိဒီးယွၤ အကလူး ဖဲထံကျိယၤဘိး အသိးန့ၣ်လီၤ. ဂီၤဃုနၣ်ရံၣ်ဃၣ်ဃၣ် ဒီးယွၤစံးဆၢအီၤလီၤ. တၢ်အဲၣ်စီဆှံ ဟဲကးဘၢအီၤဖဲ အခိၣ်, အခိၣ်ကဖီထီၣ်နၢ်ကဖီထီၣ်, ဝံၤတၢ်အံၤ လဲၤလီၤဆူ အသးအကံၢ်အလဲအပူၤ, ကနိးထုရုၤ ဘၣ်မးသးလၢ မူခိၣ်အတၢ်အဲၣ် လုာ်ဘၢ အသး, သ့စီသ့ဆှံအသး, ဖှူအသးလၢ တၢ်ကဆှီ တၢ်စီတၢ်ဆှံ လၢထးန့ၣ်လီၤ. တၢ်အဲၣ်စီဆှံအံၤ ဆဲးအသးြပူာ်ြပူာ် ဒ်နးအါဘ့ၣ် အသိးတုၤဒၣ်လဲာ် စီၤက့ၣ်လီၤဃံၤ အီထီလာ် ဘၣ်အသးလၢ သ့ၣ်ဘၣ်ခိၣ်ဒီး ထွၣ်တလ့ၣ် အသးလၢအံၤလၢဘး လၢအတူၢ်ဝဲကီ အဃိန့ၣ်လီၤ. တၢ်အဲၣ်အလပီအံၤ မၤဟူးဝးဆှဲးဆှိးအီၤ ယံာ်မး မံမ့ၤတဖျၢၣ်ဝံၤ အိၣ်ဆိကတီၢ် က့ၤဝဲလီၤ.

စီၤက့ၣ်ဂဲၤထၢၣ် ဆ့ၣ်နီၤက့ၤ, ကနိးကစုာ်မးလီၤ. ဘၣ်ဆၣ် တၢ်ဃူတၢ်မုာ် လီၤဘၣ်အီၤလၢ ပှၤဟီၣ်ခိၣ်ဖိ တသ့ၣ်ညါဒံးဝဲ, တနၢ်ပၢၢ်ဒံးဝဲ ဟဲနုာ်လိၤက့ၤလၢ အသးပူၤလီၤ. မူခိၣ်စးထီၣ်မၤနၢၤလံ ဟီၣ်ခိၣ်လၢ အပူၤလံ.

ခၠူ၀ၣ်ဟဲနုာ်လီၤဆူ ဒၢးပူၤဒီးစံး, “သရၣ်ဧၢ, ယထံၣ်မ့ၣ်အူကပီၤ တဲာ်နၤမး လၢနဒၢးပူၤလဲၣ်. နအိၣ်တမုာ်ဧဲၢ်”

စီၤက့ၣ်မၢ ခၠူ၀ၣ် ဆ့ၣ်နီၤဝံၤ, ဃဲၤပၠးအီၤ တဆီဘၣ်တဆီ လၢတၢ်လၢ အမၤအသးဒီးအီၤ န့ၣ်လီၤ. ခၠူ၀ၣ် ကနၣ်အခိၣ်ဂၢၢ်မး, အသးဘၣ်ဒိ မးတုၤအကၢၤက့ၤ အမဲာ်ထံ တန့ၢ်ဘၣ်ဒီး မဲာ်ထံလီၤမး ြပုၢ်ြပုၢ်လီၤ.

“သရၣ်ဧၢ, ယသးလီ တၢ်အုၣ်က့ၤခီၣ်က့ၤအံၤ စ့ၢ်ကီးလီၤ. ဃ့ဘါထုကဖၣ်တၢ်လၢ ယဂီၢ်တဘီ.”
စီၤက့ၣ်ဒီး ခၠူ၀ၣ် ခံဂၤလိာ် တီၤလီၤလၢ သ့ၣ်ဘၣ်ခိၣ်ဝံၤ, စီၤက့ၣ်ဘါထုကဖၣ် ဖုၣ်ကိာ်ဒီးစံး, “အိ, ယွၤဧၢ, ဒ်နသးကညီၤဒီး ဟ့ၣ်လံယၤ တၢ်အုၣ်က့ၤခီၣ်က့ၤ အသိးန့ၣ်, သးကညီၤ ဒီးဟ့ၣ်စ့ၢ်ကီး ဘၣ်ယသကိး ခၠူ၀ၣ်အံၤ တက့ၢ်. လၢကစၢ် ယ့ၣ်ရှူးခရံာ်အမံၤ အဃိလီၤ.” တၢ်ထုကဖၣ်အံၤ ဖုၣ်လီၤ. သနာ်က့ မ့ၢ်တၢ်အဲၣ် အတၢ်ထုကဖၣ် လၢအဘၣ်ယွၤအသးအဃိ န့ၢ်ဝဲ တဘျီဃီလီၤ. ခၠူ၀ၣ် လ့ၣ်ကွၢ်ဘၣ် တၢ်အုၣ်က့ၤခီၣ်က့ၤ တဘျီဃီလီၤ. ထံၣ်လီၤက့ၤ အတၢ်အၢတၢ်သီ, သးဘၣ်အၢလီၤက့ၤအသး လၢာ်လၢာ်ဆ့ဆ့ ဒီးကိးပသူ ထီၣ်ဝဲ, “အုၣ်က့ၤခီၣ်က့ၤ လၢ်ယၤပှၤအၢပှၤသီ အဒိၣ်မး တဂၤတက့ၢ်.” ခၠူ၀ၣ် အိၣ်ဖျဲၣ်ထီၣ် ခံစုတစုလံ. တၢ်သးဖှံ အသီဟဲနုာ်လီၤက့ၤ လၢအသးပူၤ, ဂဲၤထၢၣ်ဖိးဟု စီၤက့ၣ်ဒီး တွံၢ်တရူာ်အီၤဒီး ဂဲၤကလံၣ်လၢ ဒၢးပူၤလီၤ.

“သရၣ်ဧၢ, ယသးအိၣ်ကဲထီၣ် ပှၤခရံာ်ဖိ တဂၤတံၢ်နီၢ်လီၤ. ယနာ်လံ လၢယ့ၣ်ရှူးမ့ၢ်ယွၤ နီၢ်နီၢ်လီၤ. ယဘၣ်မၤမနုၤလဲၣ်.”
စီၤက့ၣ်အိၣ်ဘှီၣ်ကလာ် တစိၢ်ဒီးစံး, “ပကမၤဒ်အံၤ ခၠူ၀ၣ်ဧၢ, ဟါခီခဲကၢာ် ပကလဲၤဆူ သရိာ်လၢ ယလဲၤမဟါန့ၣ် ဒီးလဲၤသံကွၢ် သံဒိးအါထီၣ် တၢ်လၢ ဒီးကထၢၣ်ဝ့လယၢၣ် န့ၣ်လီၤ.”

တနံၤန့ၣ် စီၤက့ၣ်ဒီးခၠူ၀ၣ် ခံဂၤလိာ် အိၣ်ဃိကလာ် လၢတဂၤအဒၢး တဂၤအဒၢးဒၣ်ဝဲ ဒီး ဂဲၤပျုၢ်ရ့ဒီးယွၤ လၢတၢ်ထုကဖၣ်အပူၤန့ၣ်လီၤ.

တုၤဃီၤလၢမုၢ်ထူၣ်တခီ စီၤက့ၣ်အသးဂဲၤ ဒိၣ်မး, မၢန့ၢ်ဆီၣ်ခံအီၤလၢ ကလဲၤအိၣ်သကိး စီၤပၤ ရၣ်မၣ်န့ၣ်လီၤ. ကတိၤတၢ်လၢ ထဲလ့ၣ်ဖိဆူ နီဒီး ဃ့အခွဲးလၢ စီၤပၤအပှၤခိး အသးသမူ တဂၤအအိၣ်လီၤ. အတၢ်မၢအအိၣ်ခိးတစိၢ်, သါကလဲၤသံကွၢ် စီၤပၤဒၣ်ကလိာ်လီၤ. အိၣ်တစိၢ်ဖိဒီး ထဲလ့ၣ်ဖိသီၣ်ထီၣ် ဒီးတၢ်စံးဆၢ ဟဲလၢ စီၤပၤ ကတူၢ်လိာ် စီၤက့ၣ် ဖဲဟါခီသၢနၣ်ရံၣ်ဒီး ကွဲစီၤက့ၣ် ကလဲၤအီသကိး လာ်ဖးထံ ဒီးအီၤလီၤ.

စီၤက့ၣ် ကူထီၣ်ကၤထီၣ် ဒီး နီၣ်ထီၣ်သိလ့ၣ်ဖဲ ခံနၣ်ရံၣ် တခီဒီး လဲၤဆူနီလီၤ. စီၤပၤ နီၢ်ပၤမုၣ် ဒီး စီၤပၤဖိမုၣ် သၢဂၤဒီး အီၤ အီသကိးလာ်ဖးထံ လီၤ.
“စီၤက့ၣ်ဧၢ, နသးအိၣ်တဲယၤမနုၤလဲၣ်.”
“ကစၢ်စီၤပၤဧၢ, အဆိကတၢၢ် န့ၣ်ယသးအိၣ် ဟဲတဲဖျါ ယတၢ်ကမၣ်လၢ နမဲာ်ညါ လီၤ. တၤဘီနၢၤကရၢ န့ၣ် ဘၣ်တၢ်ဒုးအိၣ်ထီၣ်လၢ ယၤလီၤ. ခဲအံၤ ယထံၣ်လၢ ပဂုာ်န့ၢ် ကစၢ်စီၤပၤ ဒီး အတၢ်ပၢတၢ်ြပး အစိကမီၤ လီၤ. ကွၢ်ဖဲ နကစံၣ်ညီၣ်ယၤလီၤ, ကစၢ်ဧၢ.”

စီၤပၤဒီး အပှၤဟံၣ်ဖိတဖၣ် နံၤဖးလဲၢ်မးလီၤ. စီၤပၤစံး, “စီၤက့ၣ်ဧၢ, ပတထံၣ်လၢ နမၤကမၣ်တၢ် မးလဲၣ်. ပဆၢလၢ တၤဘီနၢၤကရၢဖိ အသးကလီၤဘၣ်ကူဘၣ်ဂာ် ပပဒိၣ်ပပှၢ် ခဲလၢာ် အသးဒၣ်လဲာ် တခီဒံးလီၤ. နီၢ်နီၢ်န့ၣ် ဖါလ့ၣ်မဲးဘျီၣ်ဒိၣ် ဒၣ်လဲာ် အၢၣ်လီၤတူၢ်လိာ် တၢ်ဆှၢနုာ်တထံၣ်လၢ ကစံးဘျုး က့ၤဒါခီ တၤဘီနၢၤကရၢ ဒံးလီၤ. ယဖိမုၣ် တဂၤဒွးဝဲလ ၢကရၢအံၤ မ့ၢ်ဒၣ် နတၢ်ဖံးတၢ်မၤ လီၤ. ယမါဒီးယၤ ပဆိမိၣ် ဒ်န့ၣ် အသိးစ့ၢ်ကီး လီၤ. ပတထံၣ် နတၢ်ကမၣ် ဘၣ်. ပစံးဘျုး ဒါခီနၤလီၤ. ဆိကမိၣ် ကိၢ်ဂီၤ နသးနီတမံၤ တဂ့ၤ.”

“ကစၢ်စီၤပၤဧၢ, ယသးအိၣ်တဲနၤတၢ် အဂၤတမံၤဒံး.” ဝံၤစီၤက့ၣ် တဲပၠးစီၤပၤဒီး အဟံၣ်ဖိဃီဖိလၢ တၢ်မၤသးဒီးအီၤ မဟါကၢာ်တနံၤ န့ၣ်တဆီဘၣ်တဆီ လီၤ. “ကစၢ်စီၤပၤဧၢ, ယဆၢလၢ ကီၢ်ယူၣ်တရၣ် ဒီဘ့ၣ် ကမၤန့ၢ် တၢ်ဃူတၢ်မုာ် လၢယမၤန့ၢ်အံၤ ဃုာ်ဒီး ကစၢ်စီၤပၤ ဒီးအပှၤဟံၣ်ဖိဃီဖိ ခဲလၢာ်န့ၣ်လီၤ.”

စီၤပၤ ဆုးလီၤအခိၣ်, ထုးထီၣ်ပ၀ၣ်ဖိ ဒီးထွါအမဲာ်ထံလီၤ. “စီၤက့ၣ်ဧၢ, ယမဲာ်ဆှးလီၤက့ၤ ယသးမးလီၤ. ယတဒူဒ်သိးနၤဘၣ်. ယလဲၤမၤလိတၢ်လၢ ယူရပၤ ခံနံၣ်ဒီး ယဘၣ်တၢ်ကွဲယၤ အါဘျီလၢ ယကကဲထီၣ် ပှၤခရံာ်ဖိလီၤ. ယသ့ၣ်ညါလၢ ခရံာ်ဖိ အတၢ်ဘါ မ့ၢ်တၢ်ဘါအဂ့ၤ, ဒီးတၢ်မၤဂ့ၤ တၢ်အါတက့ၢ် စးထီၣ်ဒၣ်လၢ ပှၤခရံာ်ဖိ အအိၣ်လီၤ. ယသးအိၣ်ခံဖျၢၣ်, တဖျၢၣ်န့ၣ် အဲၣ်ဒိးတူၢ်လိာ် တၢ်ကွဲကစီဒီ, တဖျၢၣ်တခီ မၢဒၣ်ယဟံးဃာ် မိၢ်လုပၢ်လၢ်န့ၣ်လီၤ. ယူၣ်တရၣ် အသဲစး ပာ်ယၤလၢ ဘူးဒး တၢ်ဘါအခိၣ် လီၤ. ယဖံယဖု တဖၣ် မ့ၢ်တ့ၢ်လံ ပှၤဘူးဒး ဖိ, ဒီးယမ့ၢ်ကဲထီၣ် ပှၤခရံာ်ဖိ ဒီး တၢ်သဘံၣ်ဘုၣ် ကအိၣ်ထီၣ်ဝဲလီၤ. ယတဒူဒ် သိးနၤဘၣ်. စီၤက့ၣ်ဧၢ, ယဟ့ၣ်တၢ်အပှ့ၤ ဒ်သိးနၤတကဲဘၣ်. ဘၣ်ဆၣ် ယစံးဘျုးနၤလၢ နဟဲအိၣ်သကိး ယၤအဃိလီၤ. ယမၤစၢၤနၤမ့ၢ်သ့ တမံၤမံၤ ဒီး ယသးအိၣ် မၤစၢၤနၤ လီၤ.”

စီၤက့ၣ်အိၣ်သကိးဝံၤ ပာ်ဖျါထီၣ် တၢ်ယူးယီၣ်, နူးဆဲး စီၤပၤဝံၤ ဟးထီၣ်ကွံာ်လၢ ကက့ၤအဂီၢ်လီၤ. စီၤပၤဖိမုၣ် လဲၤဆှၢထီၣ်အီၤဆူ နီချၢ, ဒီးနူးဆဲးအီၤဝံၤ စံးဝဲ, “စီၤက့ၣ်ဧၢ, ယနၢ်ဟူ နတၢ်ကတိၤတဖၣ်ဒီး ယသးဂဲၤဒိၣ်မးလီၤ. ယလီၤဂာ်ဒီး ယပၢ်စ့ၢ်ကီး လၢယတဒူဒ်သိး နၤအဃိ ဘၣ်န့ၣ်လီၤ. ယလဲၤမၤလိတၢ်လၢ ကီၢ်အမဲရကၤ, ယသကိးအါဂၤ ကွဲယၤလၢ ယကတူၢ်လိာ် ကစၢ်ခရံာ်န့ၣ်လီၤ. ဘၣ်ဆၣ် ယမၤတဘူၣ်ဘၣ်. သ့ၣ်နီၣ်ဘါထုကဖၣ် လၢယဂီၢ်တက့ၢ်. ယတကဲထီၣ် ပှၤခရံာ်ဖိတဂၤ နီတစုလၢၤဘၣ်န့ၣ် မတၤစံး သ့တဂၤလဲၣ်.”

စီၤက့ၣ်ဒီး ခၠူ၀ၣ် လဲၤဘါတၢ်လၢ ြဖဲးစ်ဘ့ၣ်ထံရယၢၣ် သရိာ်လီၤ. တၢ်ဘါမ့ၢ် တၢ်ဃ့တၢ်လၢ ပှၤတူၢ်လိာ် သီကစၢ်ခရံာ် တဖၣ်အဂီၢ် ဒီး တၢ်သိၣ်လိ သီလိက့ၤအီၤလၢ တၢ်ကဲထီၣ်ခရံာ်ဖိ စံးတၢ်န့ၣ် မ့ၢ်တၢ်ဒ်လဲၣ် န့ၣ်လီၤ. ပှၤယဲၢ်ဆံသၢဂၤ အမဲာ်ညါ, ပှၤလၢ အသးဆူၣ် အဂၤအိၣ် တဘျုးဂၤဒံးလီၤ. ပှၤသးဆူၣ် တဖၣ်အံၤ ထံၣ်ဘၣ် အသကိးတဖၣ် န့ၢ်သူၣ်သီသးသီ, တၢ်သးဖှံအသီ, သံကွၢ်သံဒိး ဝဲဒီး သးဆူၣ်ထီၣ်ထွဲ အခံလီၤ. ခရံာ်အတၢ်သးခုကစီၣ် မ့ၢ်တၢ်လၢ အဘၣ်ကူဘၣ်ဂာ်ချ့မး ဝဲ ဒ်တၢ်ဆါလၢၢ်ဒီး ဖျ့းတဖၣ် အသိးန့ၣ်လီၤ.

တၢ်ဘါဝံၤ, စီၤက့ၣ်လဲၤမၤသ့ၣ်ညါ ခၠူ၀ၣ်လၢ ဒီးကထၢၣ်ဝ့လယၢၣ် လီၤ. ဒီးကထၢၣ် ဝ့လယၢၣ် က့ၤကိး အီၤခံဂၤလိာ်ဆူ အဟံၣ်လီၤ. ဖဲန့ၣ် သရၣ်မုၣ်ဝ့လယၢၣ် ဒုးအီၣ်အီၤလၢ ကမံဆၢ တၢ်အီၣ်တဆံးတက့ၢ်, ကိၣ်ဘ့စက့း ဒီး နွါနုၢ်ထံလီၤ. ဝံၤသရၣ် မုၣ်ဒ့ဖံၣ်အဲနိၣ်ဒီး သိၣ်လိအီၤ တကူၣ်သ့ၣ် လၢပှၤခရံာ်ဖိ အသကိး လီၤ.

စီၤက့ၣ်မၢ သရၣ်ဒုးဒ့ခၠူ၀ၣ် လၢဝါဧိၤလံန် တစိၢ်, ဒီးမၢ မးမးဒ့ “တၢ်အဲၣ်လၢညိကွံာ်ယၤတကဲ” န့ၣ်လီၤ. သရၣ်, မးမးဒီး စီၤက့ၣ်သးဝံၣ်တၢ်သးဝံၣ် အံၤ, ဒီးခၠူ၀ၣ် ဒ့လၢ ဝါဧိၤလံန်လီၤ. သရၣ်ဝ့လယၢၣ် ကမၢကမၣ် မး ဖဲအနၢ်ဟူဘၣ် ခၠူ၀ၣ် ထိဝါဧိၤလံန် အံၤန့ၣ်လီၤ.

“ခၠူ၀ၣ်ဧၢ, ကစၢ်ယွၤဟ့ၣ်နၤ တၤလၣ်တခါအံၤ ဒိၣ်မးလီၤ. သူအီၤလၢ အလၤကပီၤအဂီၢ် တက့ၢ်.”
“မးမးဝ့လယၢၣ်စံး, “ပမ့ၢ်မၤကဲထီၣ် ခွါယၢၣ်ဖိတဖုဒီး တၢ်ဒ့တၢ်အူဒ် တဟါအံၤအသိး, ကွဲအါထီၣ် ပှၤလၢ အတၤလၣ်အိၣ်တဖၣ် ပှီၢ်ပှီၢ်ဒီး သူခွါယၢၣ်အံၤ လၢတၢ်ဘါအဂီၢ်ဒီး တၢ်မၤတၢ်သးခု ကစီၣ်လၢ တၢ်လီၢ်ဂၤ အဂီၢ် တဂ့ၤဘၣ်ဧါ.”

ပှၤကတိၤ တၢၣ်ပီၣ်သကိးဒီး အၢၣ်လီၤဝဲလၢ ကသးဝံၣ် တၢ်ဒ့တၢ်ကိး ဟါဒဲးဖဲ တၢ်သိၣ်လိ အဟါတဖၣ်, ဃုာ်ဒီး တၢ်ဘါလၢ အိၣ်ဘှံးနံၤန့ၣ်လီၤ.
မးမး ဟ့ၣ်လီၤ ခၠူ၀ၣ်လၢ လံာ်စီဆှံ အသီတကြတူၢ် တဘ့ၣ်လၢ ယူၣ်တရၣ် ကျိာ်န့ၣ်လီၤ. ဒီးဟးဖး လိာ် အသးလၢ တနၤန့ၣ် အဂီၢ်လီၤ.

ကိးဂီၤဒဲး လၢဂီၤထၢၣ်သၢ စီၤက့ၣ်ဒီး ခၠူ၀ၣ် ဂဲၤထၢၣ်ဖးလံာ်စီဆှံ ဒီးဘါထု ကဖၣ်သကိး တၢ်လီၤ. စးထီၣ်ဃ့တၢ်သပှၢ်ပှၢ် လၢပှၤသးစၢ် အိၣ်ခံကယၤဘျဲၣ် လၢအအိၣ်လၢ အသကိးအဂီၢ် န့ၣ်လီၤ. တနံၤတခီၣ် စီၤက့ၣ်စံးဘၣ် ခၠူ၀ၣ်, “ခၠူ၀ၣ်ဧၢ, ယနာ်လၢ နၤဒီး ယၤပြကၢး ကိးဖှိၣ်ဖိသၣ်တဖၣ် ဒီးတဲပၠး အီၤလၢ တၢ်ဘျုးတၢ်ဖှိၣ်ဖးဒိၣ် လၢကစၢ်ခရံာ် မၤဘၣ်လံပှၤ န့ၣ်လီၤ. နဆိကမိၣ်နဲဒ်လဲၣ်.”
“သရၣ်ဧၢ, တၢ်ဆိကမိၣ်တမံၤဃီအံၤ မၤအသးလၢယပူၤ လီၤ.” ခၠူ၀ၣ် စံးဆၢက့ၤအီၤလီၤ.

တဟါန့ၣ် အဝဲသ့ၣ် ကိးဖှိၣ်ဖိသၣ်ခဲလၢာ် လၢဒၢးဖးဒိၣ် အိၣ်ဖှိၣ်အလီၢ် လီၤ. ဝံၤစီၤက့ၣ် တဲဘၣ်အီၤလၢ တၢ်လၢ ခရံာ်မၤလၢ အဂီၢ်ဒ်အံၤ လီၤ.
“သကိးသ့ၣ်ဧၢ, ပဝဲအါဂၤ ပအိၣ်ဃုာ်တပူၤဃီ ယံာ်ဃုနံၣ်ဘျဲၣ်လံ. သုတနၢ်ဟူ ယကတိၤတၢ် ဘၣ်ဃး ထူဂ့ၢ်ယွၤဂ့ၢ် နီတစုဘၣ်. ယတသ့ၣ်ညါ ယွၤအဃိ ယတဲသုတဘၣ်ဘၣ်. မ့မ့ၢ် ယစးထီၣ် သ့ၣ်ညါလံယွၤ အမ့ၢ်အတီတဂၤလံ. အဝဲမၤလံ တၢ်ဖးဒိၣ် တဖၣ်လၢ ယဂီၢ်လီၤ. သုသ့ၣ်ညါ ယဂ့ၢ် အဒိၣ်အဆံး ခဲလၢာ်လီၤ. လၢနီၢ်ခိ တခီ တၢ်ဖှီၣ်တၢ်ယာ်န့ၣ် တဘၣ်ယၤဒ် အဘၣ်တ့ၢ်သု န့ၣ်ဘၣ်. ယအိၣ်ဒီး မိၢ်ဂ့ၤပၢ်ဝါ, ယမၤလိ တၢ်ပၢၢ်လၢ ခီလ့ၣ်, တၢ်ထူးတၢ်တီၤဖဲ အြကၢးန့ၣ်အိၣ်ဒီးယၤ, ယအိၣ်ဒီးတံၤသကိးလၢ ယအဲၣ်အီၤ ဒီးအဲၣ်ယၤ, ဒီးယမၤတၢ်မၤလၢသုကျါ ဒ်ယသးလီဃုထၢမၤ အသိးလီၤ. ဘၣ်ဆၣ် တၢ်သးမံတံၢ်နီၢ်, သးအတၢ်ဃူ တၢ်မုာ်န့ၣ် တအိၣ်ဒီးယၤဘၣ်. တဟါတခီၣ် ယသါဟဲက့ၤလၢ ဘီကီာ်ဆူ ဟံၣ်အံၤ, ဒီးဖဲ ယဘူးထီၣ်ဒီး ပှၤခရံာ်ဖိ အသရိာ်တဖျၢၣ်န့ၣ်, တၢ်စိကမီၤခူသူၣ် တမံၤ မၢဆူၣ်ယပာ်တီၢ်သိလ့ၣ် ဒီးလဲၤနုာ်ဆူ သရိာ်ပူၤန့ၣ်လီၤ. ဖဲန့ၣ် ယနၢ်ဟူပှၤခရံာ်ဖိ အိၣ်လၢကီၢ်ပယီၤတဖၣ် အုၣ်အသး ဂၤမံၤဂၤမၠိလၢကစၢ်ခရံာ် မၤတၢ်လီၤလး လၢအဂီၢ် န့ၣ်လီၤ. ပှၤကညီသးပှၢ်တဂၤ, လၢတဘျီမ့ၢ်တမျာ်ခိၣ်, ပှၤဒိသံဝီသံ ပှၤတဂၤ အတၢ်အုၣ် အသး မၤဘၣ်ဒိယသးဒိၣ်မး လီၤ. ဒီးတဟါန့ၣ် ယဘၣ်တၢ်သိၣ်လိက့ၤယၤ လၢယလိၣ်ယွၤ အတၢ်အုၣ်က့ၤခီၣ်က့ၤလၢ အဖိခွါ ယ့ၣ်ရှူးခရံာ်ဟဲ မၤဝဲလၢ ပဂီၢ်န့ၣ်လီၤ. ဒီပုၢ်ဝဲၢ် သရၣ်တနီၤ ဘါတၢ်လၢယဂီၢ်, ဒီးတဂၤန့ၣ် ဟ့ၣ်လီၤယၤ လံာ်စီဆှံ တဘ့ၣ်လီၤ. ယဟဲက့ၤတုၤဟံၣ် ဖဲဖးဖီမုၢ် ဘျဲၣ်လီၤ. ယမံတန့ၢ်ဘၣ်. ယဖးလံာ် စီဆှံဒီး ဃ့ဘါထုကဖၣ်တၢ်, ယကွဲးလီၤ က့ၤယတၢ်သရူးကမၣ်တဖၣ် ဖဲယသ့ၣ်နီၣ်ထီၣ်က့ၤ ခဲလၢာ်, ယတဲလီၤကျဲၤလီၤ အီၤလၢယွၤမဲာ်ညါ, ဒီးလၢ တၢ်နာ်အပူၤ ယတူၢ်လိာ်ကစၢ်ခရံာ် အတၢ်ပျၢ် ယတၢ်ကမၣ် ဒီးသ့စီကွံာ် ယၤလၢအသွံၣ် န့ၣ်လီၤ. ယွၤသးကညီၤယၤဒီး ဟ့ၣ်က့ၤယၤ တၢ်အုၣ်က့ၤခီၣ်က့ၤ လီၤ. ယသ့ၣ်ညါ က့ၤသးအတၢ်ဃူတၢ်မုာ် တံၢ်နီၢ် လၢအဟဲသ့ ဒၣ်ထဲလၢ ကစၢ်ခရံာ်တဂၤဧိၤ အအိၣ်န့ၣ်လီၤ. လၢခံတဂီၤ ယသကိးခၠူ၀ၣ် ဟဲဆူယဒၢး ပူၤဒီး ယတဲပၠးအီၤလၢ တၢ်မၤအသး ဒီးယၤ တဖၣ်န့ၣ်လီၤ. အဝဲစ့ၢ်ကီး တူၢ်လိာ် က့ၤကစၢ်ခရံာ် ဒ်ယၤအသိးလံ. ဆူညါခံသီ န့ၣ်ခၠူ၀ၣ် ဒီးယၤ ပကဒိးဘျၢက့ၤ ပသးဒီး ကဲထီၣ်က့ၤ ပှၤခရံာ်ဖိလီၤ. ပသးအိၣ် ဟ့ၣ်သု တၢ်အဂ့ၤကတၢၢ်လၢ အမ့ၢ် ပကစၢ်ခရံာ် အတၢ်အုၣ် က့ၤခီၣ်က့ၤ န့ၣ်လီၤ. အဃိပတဲသု လၢအဂ့ၢ်လီၤ. ခဲအံၤ ခၠူ၀ၣ် ကကတိၤ တၢ်ဒီး သုလီၤ.”

ခၠူ၀ၣ်ကတိၤတၢ်,
“တံၤသကိးသ့ၣ်ဧၢ, စီၤက့ၣ် မ့ၢ်ယသရၣ်ဒီး ယပာ်ကဲအီၤ ဒ်ပၢ်တဂၤ အသိးလီၤ. တနၤအဝဲ ဟဲက့ၤ ဒီးဒီနၤ တမံဝဲဘၣ်. ဒွဲၣ်ကပီၤ မ့ၣ်အူ တဲာ်နၤလီၤ. လၢဂီၤဃုနၣ်ရံၣ် ယလဲၤဆူ အဒၢးပူၤဒီး ယထံၣ်လၢ အကဲထီၣ်လံ ပှၤအသီ တဂၤလီၤ. ယထံၣ်လၢ အမဲာ်သၣ် ပှဲၤမးဒီး တၢ်ဃူတၢ်မုာ် အသီန့ၣ်လီၤ. အဝဲတဲပၠး ယၤအဂ့ၢ်လီၤ. အတၢ်ကတိၤ မၤလီၤသဘှံး မးယသးလီၤ. ဒ်သုသ့ၣ်ညါအသိး ယတသ့ၣ်ညါ မိၢ်သ့ၣ်ညါ ပၢ်နီတစုဘၣ်. ယဒိၣ်ထီၣ် ဒၣ်လၢ ဘီကီာ်အကျဲ ဆူးကပိာ်တ့ၤလီၤ. တနၤ ယဟးထီၣ်သီလၢ ဃိာ်ပူၤ, ယတအီၣ်ဘၣ်မ့ၤ, ယလီၤဒိဒီး ယသါတမျာ် စီၤက့ၣ်ဒီး အသကိးတဂၤလီၤ. စီၤက့ၣ်မၤနၢၤ ကွံာ်ယၤလီၤ. တဟ့ၣ်လီၤကွံာ်ယၤဆူ ပၢၤကီၢ် အစုပူၤဘၣ်. က့ၤကိးယၤဒီး ကွၢ်လုၢ်က့ၤ ယၤလီၤ. အဝဲခဲအံၤ ဂဲၤပျုၢ် နဲၣ်ယၤကျဲကဒီး ဆူယွၤအအိၣ်န့ၣ်လီၤ. အဝဲဃ့ဘါထုကဖၣ် တၢ်လၢယဂီၢ်, လဲၤကိးယၤလၢ ပှၤခရံာ်ဖိ သရၣ်တဖၣ် အကျါဒီး ခဲအံၤ ယမၤန့ၢ်လံ တၢ်အုၣ်က့ၤ ခီၣ်က့ၤအတၢ်သးမုာ် သးမံ လၢကစၢ်ခရံာ် အပူၤန့ၣ်လံ. တၢ်လၢ ပမၤန့ၢ်အံၤ ပဆၢလၢ သုကမၤန့ၢ် စ့ၢ်ကီးလီၤ.”

တၢ်အုၣ်သး ယိယိဖိအံၤ ဘၣ်တၢ်ဆိၣ်ဂ့ၤ အဒိၣ်အအါလၢ ယွၤလီၤ. သးစီဆှံ ကစၢ်သူအီၤဒီး ဖိသၣ်ခဲလၢာ်, အစှၤဒီးအအါ, အသးဘၣ် တၢ်သိၣ်ဃီၣ်က့ၤလၢ အတၢ်အၢတၢ်သီ အဃိန့ၣ်လီၤ. စီၤက့ၣ်ဒီး ခၠူ၀ၣ် မၤဂ့ၤတၢ်လံအီၤအါမံၤ, အဝဲသ့ၣ် အဲၣ်ဆၢအီၤခံဂၤလိာ်, ပာ်ကဲအီၤဒီး ယွၤသူစ့ၢ်ကီး ဟီၣ်ခိၣ်ဖိ ကဒဲကဒဲ အတၢ်အဲၣ်အံၤ လၢကမၤစၢၤ ပာ်အီၤလၢ တၢ်အိၣ်ဖျဲၣ် ခံစုတစု အဂီၢ်န့ၣ်လီၤ. တနီၤကနိးကစုာ်မး, တနီၤ ဟီၣ်ဘၣ်အသးလီၤ. ပှၤခဲလၢာ် သးသယုၢ် သးလီထီၣ်ယွၤ ဒီး အတၢ်အုၣ်က့ၤခီၣ်က့ၤ လီၤ.

ဖိသၣ်အကျါ, နဲၣ်ဆွဲၣ်ဟီ, လၢညီနုၢ်တီခိၣ်ရိာ်မဲ တဂၤစံး, “သရၣ်စီၤက့ၣ်, ဒီးခၠူ၀ၣ် သ့ၣ်ဧၢ, ဝံသးစူၤ ဃ့ဘါထုကဖၣ်လၢ ပဂီၢ် လၢပဝဲစ့ၢ်ကီး ပကဒိးန့ၢ်ဘၣ် တၢ်အုၣ်က့ၤခီၣ်က့ၤ လၢသုစံးဘၣ်လံ ပှၤအံၤ န့ၣ်တက့ၢ်.”

စီၤက့ၣ်ဒီး ခၠူ၀ၣ် ဃ့တၢ်လၢ အဂီၢ်လီၤ. ယွၤဒိကနၣ် အီၤဒီး ဆှၢလီၤ တၢ်ဃူတၢ်မုာ် အသီအံၤ လၢဖိသၣ် ခဲလၢာ်အသးပူၤလီၤ. တၢ်ကနိးကစုာ် ဆိကတီၢ်ကွံာ်, တၢ်ဟီၣ်တၢ်ယၢၤ ဟါမၢ်ကွံာ်ဝဲလီၤ.

စီၤက့ၣ်ကတိၤလီၤတၢ် လၢထဲလ့ၣ်ဖိဆူ ဒီးကထၢၣ် ဝ့လယၢၣ် အအိၣ်ဒီး ဃ့အတၢ်ဟ့ၣ်ကူၣ်လီၤ. သရၣ်တၢၣ်ပီၣ်လၢ မးမးဒီး ဃ့တၢ်ဆိၣ်ဂ့ၤ လၢယွၤကနဲၣ်အီၤ ကျဲလီၤ. လၢခံက့ၤ, သရၣ်တဲစီၤက့ၣ်လၢ သါကဟဲကိး ပှၤဃ့ဒိးဘျၢအသး တဖၣ်ဆူ စီၤက့ၣ်အအိၣ် ဒီး သိၣ်လိ ပှၤခဲလၢာ်တဘျီဃီ န့ၣ်လီၤ. မၢစီၤက့ၣ် ကတဲာ်ကတီၤ တၢ်အိၣ်ဖှိၣ် အလီၢ်လၢ ပှၤခဲလၢာ်အဂီၢ်လီၤ.

သရၣ်ကိးဖှိၣ် တၢ်အိၣ်ဖှိၣ်သးပှၢ် တဖၣ်, ဃ့ဘါထုကဖၣ် ဝံၤသုးကျဲၤ ပာ်စၢၤ မီထိၣ်ဘၢးစ် တဖၣ် လၢကလဲၤဆှၢ ပှၤဟဲဘါတၢ်, မၤလိတၢ်တဖၣ် ခဲလၢာ်ဆူ စီၤက့ၣ်အဖိၣ်ဃဲ ဟံၣ်န့ၣ်လီၤ.

ဟါခီနွံနၣ်ရံၣ်ဒီး စီၤက့ၣ် အဒၢးဖးဒိၣ် တဖျၢၣ်ပှဲၤကတံာ် ကွံာ်ဝဲလီၤ. လီၢ်ဆ့ၣ်နီၤ တလၢ ပှၤဘၣ်ဆ့ၣ်နီၤ အါဂၤလၢ ချီၣ်ပူၤ သ့ၣ်ဘၣ်ခိၣ်လီၤ. ဖိၣ်ဃဲ ခံကယၤဘျဲၣ် ဃုာ်ဒီး ဒီးကထၢၣ်ဝ့လယၢၣ် အပှၤခဲလၢာ် အိၣ်မး ယဲၢ်ကယၤ လွံၢ်ဆံ ခံဂၤန့ၣ်လီၤ. သးစီဆှံ ကစၢ်အိၣ်မးဖဲ ဒၢးပူၤ န့ၣ်လီၤ. တၢ်ဘှ့ၣ်တၢ်ဘှီၣ် ဂ့ၤမး ဘၣ်ဆၣ် မ့ၢ်တၢ်ဘှီၣ်လၢ အလီၤကဟုလီၤကညီၢ်မး, ပှဲၤဆၢၣ်ကလာ်မး ဒီးယွၤ အတၢ်စိတၢ်ကမီၤ ခူသူၣ်န့ၣ်လီၤ.

မးမးဒ့ထီၣ်တၢ်သးဝံၣ်, “မ့ၢ်မနုၤသ့စီယၤသ့, ထဲကစၢ်ယ့ၣ်ရှူးအသွံၣ်န့ၣ်” ခၠူ၀ၣ်ဒ့တရီ, သရၣ်ဒီး အခွါယၢၣ် သးဝံၣ်အီၤ ဒီးတၢ်အိၣ်ဖှိၣ်သးပှၢ် ဒီးခရံာ်ဖိ ဟဲမၤသကိး တၢ်ခဲလၢာ် ဆုးလီၤခိၣ်, ဘါထုကဖၣ် တၢ်ကစုဒုလၢ အသးကံၢ်ပူၤ ဒ်သိး ယွၤကသးကညီၤ ဒီးသူ တၢ်သးဝံၣ် တဖၣ်လီၤ. ခွါယၢၣ် သးဝံၣ်ဒံးတၢ်သးဝံၣ် အဂၤတနီၤ ဘၣ်ဃး တၢ်အုၣ်က့ၤခီၣ်က့ၤ အဂ့ၢ်န့ၣ်လီၤ. ယွၤသူ တၢ်သးဝံၣ် ခဲလၢာ် အါအါဂီၢ်ဂီၢ် လီၤ. တၢ်ဃူတၢ်မုာ်ဖးဒိၣ် လၢမူခိၣ် ဟဲလီၤမၤပှဲၤ ပှၤကိးဂၤဒဲး အသးလီၤ.

ဝံၤဒီး သရၣ်သိၣ်လိ ပှၤခဲလၢာ်ဘၣ်ဃး တၢ်စံးပာ်, တၢ်နဲၣ်လိတၢ်အုၣ်က့ၤခီၣ်က့ၤ အကျဲတဖၣ် ဒ်လံာ်စီဆှံ ပာ်ဖျါဝဲအသိး န့ၣ်လီၤ. လၢခံကတၢၢ် သရၣ်အနီၢ်ကစၢ် အုၣ်အသးလၢ အဒိးန့ၢ်က့ၤ တၢ်အုၣ်က့ၤခီၣ်က့ၤလၢ အပူၤကွံာ် အနံၣ်သၢဆံ အဂ့ၢ်အကျိၤ န့ၣ်လီၤ. ဝံၤတၢ်အိၣ်ဖှိၣ်ဖိ မၤသကိးတၢ်ဒီး သရၣ်ဒီး အုၣ်စ့ၢ်ကီး အသးလၢ တၢ်ဂ့ၢ်ဖးဒိၣ် တမံၤအံၤ အဂ့ၢ်လီၤ. လၢခံက့ၤ သရၣ်မၢ ပှၤခဲလၢာ် လဲၤသကိးဆူ တၢ်ဘျုးတၢ်ဖှိၣ် အလီၢ်ပစိာ်မဲာ်ညါ ဒ်သိး ယွၤအနီၢ်ကစၢ် ကနဲၣ်လိပှၤတကဲ ဒံးပှၤခရံာ်ဖိ တဖၣ်အကျဲ ဆူတၢ်အုၣ်က့ၤခီၣ်က့ၤ အပူၤန့ၣ်လီၤ.

သရၣ်တၢၣ်ပီၣ်သကိးတၢ်ဒီး မးမး ဒီး သးပှၢ်တဖၣ် ဒီးအၢၣ်လီၤဝဲလၢ စီၤက့ၣ်အဖိၣ်ဃဲ ဖိတဖၣ်အံၤ မ့ၢ်သးအိၣ်ဒိးဘျၢ သကိးထံတဘျီဃီ ဒီးစီၤက့ၣ် ဒီးခၠူ၀ၣ် တဖၣ်ဒီး ဖျါလၢ အြကၢးဝဲ ကစီဒီလီၤ. အဝဲသ့ၣ် ထံၣ်ဘၣ်စဲဃဲၤ လၢယွၤမၤလီၤလး လံတၢ်ဖးဒိၣ် လၢစီၤက့ၣ် အဖိၣ်ဃဲ ကၠိအံၤန့ၣ်လံ.

တနၤန့ၣ် ပှၤသံကွၢ် သံဒိး သမံသမိး ဒီးဆဲးလီၤ ပှၤအမံၤခဲလၢာ် လၢကၠိအံၤ ခံကယၤ သၢဆံဃုဂၤညါ လၢကဒိးဘျၢဃုာ် သးဒီး စီၤက့ၣ်ဒီး ခၠူ၀ၣ် ဒီးပှၤဂၤတဖၣ် လၢခဲတဆ့ၣ် တနံၤန့ၣ်လီၤ. ဒီးပှၤလၢ ဝ့ၢ်ပူၤတခီ မ့ၢ်ဘၣ် တၢ်ဂံၢ်ဃုာ်တပူၤဃီဒီး အိၣ်မး ယဲၢ်ကယၤဃိးဆံသၢဂၤ န့ၣ်လီၤ.

တၢ်မူထီၣ် အဆိကတၢၢ်လၢ ဝ့ၢ်ဘီကီာ်အပူၤ လၢတၢ်အိၣ်ဖှိၣ်တဖုအံၤ အကျါန့ၣ် မၤသးခု ဒီးကထၢၣ် ဝ့လယၢၣ်ဒီး မးမး ဒီး တၢ်အိၣ်ဖှိၣ်ဖိ ခဲလၢာ် တဒိးကွဲ ဘၣ်. ပှၤခရံာ်ဖိ လီၢ်လံၤတဖၣ် ထံၣ်က့ၤ တၢ်ထံၣ်စိအသီ, ဟ့ၣ်လီၤက့ၤကဒီး အသးဆူ ကစၢ်ခရံာ် အစုပူၤ နီၢ်နီၢ် ဒ်သိး ကကဲထီၣ် ကစၢ်ခရံာ် အသုးမုၢ် တဖုလၢ ကဒုးန့ၢ်အါထီၣ် က့ၤသးသမူ အါဖျၢၣ် လၢခရံာ်အဘီ အမုၢ်အဂီၢ်န့ၣ်လီၤ.

သရၣ်ဝ့လယၢၣ် ကွဲးဘိးဘၣ် သ့ၣ်ညါက့ၤ တၢ်ဂ့ၢ်အံၤဆူ ကီၢ်အမဲရကၤ တခီဒီး တၢ်ကစီၣ်အံၤ မၤဆူၣ်ထီၣ်မး အမဲရကၤ ခရံာ်ဖိ တဖၣ်အသးလီၤ. ကွဲးတဲ စ့ၢ်ကီး ဒီးကထၢၣ် ဝဲးဘစထၢၣ် ဒီး ဝဲလ့း တဖၣ်လီၤ. ကီၢ်ပယီၤခရံာ်ဖိ တဖၣ် နၢ်ဟူဘၣ်က့ၤဝဲလၢ အခၢၣ်စးတဖု တၢ်ဆိၣ်ဂ့ၤ အတၢ်မၤလၢ ကီၢ်ယူၣ်တရၣ်အပူၤ အံၤဒီး သးခု စံးဘျုးယွၤ ဒိၣ်မးလီၤ.