တၤဘီနၢၤကရၢ (ထွံၣ်မဲၢ်က့ၣ်… ဘျၢထီၣ် အကူာ် ၁၁)

တဟါတခီၣ် စီၤက့ၣ်ဒီး ခၠူ၀ၣ် အိၣ်ထဲခံဂၤ ဧိၤလၢ စီၤက့ၣ် မံဒၢးပူၤလီၤ.
“သရၣ်ဧၢ, ပပှၤဖိသၣ်ကျါ, ပှၤလၢပနာ်န့ၢ် အဒိၣ်ကတၢၢ်လၢ သးတီ, သးဆူၣ်ဒ် နၤယၤအသိး, ဒီးသ့ပၢၤ ကိာ်ပူၤအိၣ် တဆံနွံဂၤဒီး ယကွဲအီၤတဂၤဘၣ်တဂၤ ကစုဒု, နၢ်ပၢၢ်ပတၢ်ပညိၣ်ဒီး တၢ်ကရၢကရိ အဂ့ၢ် လီၤတံၢ်လီၤဆဲး ဒီးအၢၣ်လီၤနုာ်လီၤ လံပတၤဘီနၢၤကရၢလံ. ဒီးယကျဲၤ ကစုပာ်စၢၤ တၢ်ကူတၢ်ကၤဒ် နမၤလိာ်ယၤ အစူၣ်တကယၤ ဝံၤစ့ၢ်ကီးလံ.”

စီၤက့ၣ်စံးဘျုးက့ၤခၠူ၀ၣ် ဒီးစံးကဒီး, “ဂ့ၤမးခၠူ၀ၣ်ဧၢ, နမ့ၢ်တအိၣ်မၤစၢၤယၤ တၢ်ကကီ ဘၣ်ယၤကစီဒီလီၤ. တနၤအံၤ ယကလဲၤကျဲၤ လီၤတံၢ် တၢ်အိၣ်ဖှိၣ် အဆိကတၢၢ် တဘျီအလီၢ်ဝံၤ တဲဘၣ်က့ၤနၤလီၤ.”

တနၤန့ၣ် စီၤက့ၣ်အိၣ်သကိး ဒီးြဖိၣ်ဖဲးစၢၣ် ဒီးကထၢၣ်ခၠါလ့ၣ်ဝူ လၢြဖိၣ်ဖဲးစၢၣ် အဟံၣ်လၢခီလ့ၣ် ကရၢၢ်ပူၤ လီၤ. ခၠါလ့ၣ်စံးဘၣ် စီၤက့ၣ်, “စီၤက့ၣ်ဧၢ, နသးစၢ်န့ၢ်ယၤ ဘၣ်ဆၣ် ယပာ်ကဲနၤဒီး နတၢ်နာ်အဃိ ယအၢၣ်လီၤ လၢယကနုာ်လီၤ ကရၢအံၤလီၤ. တၢ်သိၣ်လိယၤလၢ ြဖၣ်စ့ၣ်ကီၢ်လၢ ယကရၤလီၤ ခီၣ်မၠူနံး အတၢ်ဟူးတၢ်ဂဲၤ တခီလီၤ. သနာ်က့ ယကပာ်တီၢ် အီၤဒီး ဘျုးယသးလၢနၤလီၤ. ယအိၣ်သကိး ခီလ့ၣ်ကၠိဖိဒီး ပှၤလၢပနာ် န့ၢ်အီၤလၢအသးတီ ဒီးပၢၤအထးခိၣ် န့ၢ်လၢ အသးဆူၣ်နုာ်လီၤ ကရၢအံၤ အိၣ်အဂၤ သၢဆံလံ.”

စီၤက့ၣ်သးခုမး ဒီး ဖီၣ်နူးဆဲး ခၠါလ့ၣ် တဘျီဃီ လၢတၢ်သးခုအပူၤလီၤ.
ကတိၤသကိးတၢ်ဆူညါ ယံာ်ဒီ နၣ်ရံၣ် ညါလီၤ. ဒီးခဲဂီၤ တနံၤမုၢ်ဃုနံၤ မုၢ်နၤခီ ကျဲၤဝဲလၢ ပှၤနုာ်လီၤ ကရၢခဲလၢာ် ကဟဲအိၣ်ဖှိၣ်သကိး လၢတၢ်ခူသူၣ် အပူၤလ ၢဟံၣ်လီၢ်လံၤ အိၣ်တယံၤတဘူးဒီး ဘီကီာ်ဝ့ၢ်ဒီး စီၤက့ၣ်အတၢ်မၤ အလီၢ် လၢတၢ်ဖးဖီ အိၣ်လၢ ပှၢ်ဖိတပှၢ် အခၢၣ်သး န့ၣ်လီၤ. ပှၤခဲလၢာ် ကဘၣ်လဲၤတုၤ ဝဲ တဆံခံနၣ်ရံၣ် တီတီလီၤ.

တဆံခံနၣ်ရံၣ်ဒိလံ, ပှၤခဲလၢာ်ဟဲတုၤလံ, ပှၤအိၣ်ဖှိၣ်လၢဟံၣ်ပူၤ အိၣ်လွံၢ်ဆံဃုဂၤ လီၤ. အဂၤလွံၢ်ဂၤ ဘၣ်ခိး ခူသူၣ်တၢ်အိၣ်ဖှိၣ် အလီၢ်လၢ တၢ်ချၢတခီဒ် သိး ပှၤသုတဟဲထံၣ်ဒီး မၤတံာ်တာ် တၢ်အိၣ်ဖှိၣ် တဘျီအံၤ တဂ့ၤန့ၣ်လီၤ. တၢ်အိၣ်ဖှိၣ်လၢဟံၣ်ပူၤ ဒၢးခၢၣ်သး ဖးဒိၣ် တဖျၢၣ်အပူၤ, ချီၣ်တဖၣ် ဘၣ်တၢ်ဒါလီၤအီၤ လၢအီကတဲာ်ဖီခိၣ်, ပှၤဒွဲၣ်ကပီၤ ပနဲတၢၣ်ဖိတဖၣ် ကပီၤဖဲအြကၢး လီၤ. ပဲြတီခဲလၢာ် ဘၣ်တၢ်ကးတံာ်အီၤ ဂ့ၤဂ့ၤဒီး တၢ်ကပီၤ တဟးထီၣ်ဆူခိ နီတစဲးဘၣ်. ပှၤခဲလၢာ် ကူသိးဆ့ထီလါ, ခိၣ်ဖျီၣ်လါ, အိၣ်ဖျါထီၣ်ထဲ မဲာ်ချံခံတိၣ် ဧိၤလီၤ. နကွၢ်တဂၤဒီး တဂၤ အလီၤဆီလိာ်သး ဘၣ်. ထဲတမံၤဧိၤ န့ၣ်အိၣ်ဒီး နီၣ်ဂံၢ်တၢ ပၢၢ်တုၤယဲၢ်ဆံန့ၣ်လီၤ.

တၤဘီနၢၤ နီၣ်ဂံၢ်တၢ ကတိၤထီၣ်တၢ်ဒီးစံး, “ကရၢအံၤ အိၣ်ဒီး တၢ်ဘျၢထဲ သၢဘီဧိၤ.
၁. ပှၤခဲလၢာ် ကဘၣ်ဒိကနၣ် မၤထွဲကရၢအတၢ်စံၣ်ညီၣ်
၂. ပှၤခဲလၢာ် ကဆိၣ်လီၤသး အိသွံၣ်လၢကတီဒီး ကရၢတုၤအကတၢၢ်
၃. ကရၢဖိ မ့ၢ်အၢၣ်လီၤသၢပူ ခံပူဒီး ကရၢအံၤ ကဘၣ်တၢ်မၤဟးဂီၤ ကွံာ်လီၤ.
ပှၤခဲလၢာ် မ့ၢ်အၢၣ်လီၤဝဲ ဒီး ယူာ်ထီၣ်စု,” ဒီးတၤဘီနၢၤ ခဲလၢာ် ယူာ်ထီၣ်စုလီၤ.

“ခဲအံၤကရၢကအိသွံၣ်လီၤ.” ဝံၤ တၤဘီနၢၤနီၣ်ဂံၢ်တၢ ကူးလီၤအစုစ့ၣ် အသွံၣ်ဆူ မဲာ်ထံကလၤ သရာ်တဖျၢၣ်အပူၤ, ဒီးပှၤဂၤခဲလၢာ် မၤထွဲအခံ တဂၤဝံၤတဂၤလီၤ. ပှၤလွံၢ်ဂၤ လၢအခိးတၢ်လၢ တၢ်ချၢ ဟဲက့ၤနုာ်လီၤ မၤဝဲ စ့ၢ်ကီးလီၤ. ဝံၤတၤဘီနၢၤနီၣ်ဂံၢ်တၢ် ကျဲကျီသွံၣ် လၢသရာ်ပူၤအံၤ ဒီးကသံၣ်ထံတမံၤလၢ အမၤပှံၢ်လီၤဒီး ဆှံထီၣ်သွံၣ်အံၤ ဒီးလူလီၤဝဲလၢ လီခီလၢစုစ့ၣ်, ယူၣ်ထီၣ်စုထွဲဆူ ထးဒီးရူး, “ပကတီဒီး ပကရၢအံၤ တစိၤသးလီၤ. ပမ့ၢ်တတီဒီး မီၤဟီၣ်ခိၣ်ဒီဘ့ၣ် အကစၢ်ဆိၣ်ဃီၣ်ပှၤ အအၢကတၢၢ်ဖဲ အသးဒီး မၤပှၤ ဖဲအသးတက့ၢ်.” ဝံၤဒီး ပာ်လီၤက့ၤစုထွဲ, အီလီၤ လီခီတဘျီဃီ တုၤအလၢာ်ဝဲလီၤ.

နီၣ်ဂံၢ်တၢ စံးကဒီး, “ခဲအံၤ နီၣ်ဂံၢ်ခံ, ကဆှၢနုာ်တၢ်တဘီ.”
နီၣ်ဂံၢ်ခံ ဂဲၤထၢၣ်ဒီးစံး, ယဆှၢနုာ်လ ၢတၤဘီနၢၤ နီၣ်ဂံၢ် ၅, ၂၀, ၃၁, ဒီး ၄၀ ဘၣ်တၢ်ဟ့ၣ်လီၤ တၢ်မၤ အဆိကတၢၢ် တမံၤလၢ ကလဲၤဖီၣ်န့ၢ် နဲၣ်ဘူနး ဒီး ဟဲက့ၤစိာ်အီၤ ဖဲတၢ်လီၢ်အံၤ, တုၤအတုၤတချုး တဆံခံ နၣ်ရံၣ် ဘၣ်ခဲမုၢ်ဆ့ၣ် အိၣ်ဘှံးနံၤ မုၢ်နၤခီလီၤ.” ကရၢအၢၣ်လီၤ တၢ်ဆှၢနုာ် အံၤဃူဃူဖိးဖိး လီၤ.

နီၣ်ဂံၢ်တၢ, “ခဲအံၤ နီၣ်ဂံၢ် ၂ ကဟ့ၣ်လီၤ နီၣ်ဂံၢ် ၅, ၂၀, ၃၁ ဒီး ၄၀ တဖၣ်လၢ လံာ်ဘိးဘၣ် အီၤတကူၢ်သ့ၣ်လၢ ကဘၣ်မၤအတၢ်မၤ ဒ်လဲၣ်န့ၣ်လီၤ. ဖးလံာ်အံၤဝံၤ ဒွဲၣ်ကွံာ်အီၤတက့ၢ်.”
နီၣ်ဂံၢ် ၂ ဟ့ၣ်လီၤ လံာ်ဖိတက့, ဒီးနီၣ်ဂံၢ် ၅, ၂၀, ၃၁ ဒီး ၄၀ တဖၣ် ဖးဝဲ ကယီကယီဝံၤ ဆူးထီၣ်ကွံာ်ဝဲလၢ မ့ၣ်အူလီၤ.

အိၣ်ဘှံးနံၤဟါခီခွံနၣ်ရံၣ်ဘျဲၣ်တစဲး, ဒ်အလုၢ်အလၢ်အသိး, နဲၣ်ဘူနး ဟဲက့ၤဟးထီၣ်လၢ ဃဲသဲဟံၣ်ဖးဒိၣ် တဖျၢၣ်လီၤ. တုၤဃီၤကျဲခိၣ်ဖဲ သ့ၣ်ကဒုဖီလာ်, “တၤဘီနၢၤ” လွံၢ်ဂၤ ဒိတီၢ်အီၤလၢ နီၣ်တီၢ် ထး မၤကပုာ်ဝဲလၢ တၢ်ဖံးဒီး လီၤဃံၤ သံတယူာ်ဝဲလီၤ. ပှၤလွံၢ်ဂၤ စိာ်နုာ်အီၤလၢ သိလ့ၣ်ဖါသူ တဆိအပူၤဒီး ဟးထီၣ်ကွံာ်ဝဲလီၤ.

တဆံခံနၣ်ရံၣ် ဒိဒီး လၢတၤဘီနၢၤ အိၣ်ဖှိၣ်လီၢ်တခီ တၤဘီနၢၤတဖၣ် စးထီၣ်အတၢ်မၤ လီၤ. နဲၣ်ဘူနး ဘၣ်တၢ်စၢ စုစၢခီၣ်ဒုးမံနီၤ အီၤလၢ သ့ၣ်ဘၣ်ခိၣ်လီၤ.

နီၣ်ဂံၢ်တၢ, “ခဲအံၤ မ်ကရၢကဃုထၢထီၣ် စံၣ်ညီၣ်ကွီၢ်တဂၤလၢ ကစံၣ်ညီၣ်နဲၣ်ဘူနး အံၤတက့ၢ်.” နီၣ်ဂံၢ်တဆံ, “မ်ပဖီၣ်တၢ်ဖးတက့ၢ်.” ဒီးပှၤခဲလၢာ် ဖီၣ်တၢ်ဖးဒီး နီၣ်ဂံၢ်သၢ ဘၣ်တၢ်ပာ်ထီၣ်အီၤလၢ စံၣ်ညီၣ်ကွီၢ် လီၤ.

နီၣ်ဂံၢ်သၢ, “မတၤကအုၣ်အသး ထီဒါပှၤဘၣ် တၢ်ပာ်တၢ်ကမၣ် လၢအလိၤတဂၤအံၤ န့ၣ်လဲၣ်.”
နီၣ်ဂံၢ် ၂, “စံၣ်ညီၣ်ကွီၢ်ဒိၣ်ဧၢ, ယၤလီၤ. ယသ့ၣ်ညါ အဂ့ၢ်လီၤတံၢ် လီၤဆဲးလီၤ. ဘူနးအံၤ မ့ၢ်သ့တဂၤ လၢအမၤဟးဂီၤ မုၣ်လိၣ်ဘိအါဂၤဒီး ဆါလီၤကွံာ် အီၤဆူ ဃဲသဲ အလီၢ်လီၤ. မ့ၢ်ပှၤအီၣ်စ့လၢ ဃဲသဲမုၣ် တဖၣ်အဖီခိၣ်, လၢတၢ်ပှ့ၤဆါကသံၣ်သူ အဖီခိၣ်, မ့ၢ်ပှၤဘုးထၢၣ် အခိၣ်, တမျာ်အခိၣ်ဒီး တၢ်ဂၤအါမံၤလီၤ.”
နီၣ်ဂံၢ် ၃, “ပှၤအုၣ်အသးအဂၤ အိၣ်ဒံးစ့ၢ်ကီးဧါ.”
နီၣ်ဂံၢ် တဆံ, “စံၣ်ညီၣ်ကွီၢ်ဒိၣ်ဧၢ, ယၤလီၤ. ယအၢၣ်လီၤ ထွဲနီၣ်ဂံၢ်ခံ အတၢ်အုၣ်အသး ခဲလၢာ်လီၤ.”
နီၣ်ဂံၢ် ခွံ, “စံၣ်ညီၣ်ကွီၢ်ဒိၣ်ဧၢ, ယဲစ့ၢ်ကီး ယအုၣ်ယသး တမံၤဃီလီၤ.”
နီၣ်ဂံၢ်သၢ, “လၢပှဲၤလံ. ဃ့ၣ်လီၤကွံာ် ပှၤဘၣ်တၢ်ပာ် တၢ်ကမၣ်လၢ အလိၤတက့ၢ်.” ဒီးပှၤဃ့ၣ်လီၤကွံာ် ပျံၤခဲလၢာ်လီၤ. “ဘူနးဧၢ, ဆၢထၢၣ်တက့ၢ်.” ဘူနး ဆၢထၢၣ်ဝဲ ဒီးကနိးမးရၤရၤ ဒ်ပှၤတၢ်ညၣ်ဂိၢ် ထီၣ်အီၤ အသိးလီၤ. “ခဲအံၤ နအၢၣ်လီၤ နတၢ်ကမၣ် တဖၣ်စ့ၢ်ကီးဧါ.” ကနိးနးထီၣ်, တၢ်စံးဆၢ တအိၣ်ဘၣ်. ဘူနး သ့ၣ်ညါလၢ အလီ တၤဘီနၢၤ တဖၣ်အံၤ တသ့ဘၣ်. အၢၣ်လီၤ တဘူၣ်စ့ၢ်ကီးဘၣ်.

နီၣ်ဂံၢ်သၢ, “တၢ်စံးဆၢတအိၣ်ဘၣ်. ဂ့ၤလံ. ယတူၢ်လိာ် တၤဘီနၢၤ ၂, ၁၀ ဒီး ၉ တဖၣ် အတၢ်အုၣ်အသး ထီဒါနၤလီၤ. ယစံၣ်ညီၣ်လၢ တၤဘီနၢၤ ကရၢ ကအုၣ်နဖံးဒ် ပှၤအုၣ်ဂုၢ်သ့ၣ်ဖံး အသိး, ဒီးတ့ၢ်လီၤ ကွံာ်နၤလၢ ယူၣ်တရၣ် ပီၣ်လဲၣ်က့ၣ်ကျီၤ အပူၤန့ၣ်လီၤ. (ဘူနးလီၤဃံၤထၢၣ်ကလာ်) ဘၣ်ဆၣ် ဒ်တၤဘီနၢၤ ကရၢဖိတဂၤ အသိး ယသးကညီၤနၤအဃိ, ယစံၣ်ညီၣ်လၢ တၢ်ကပျၢ်ဖျဲးနၤ (ဘူနး ယိာ်ထီၣ်ခိၣ်) လၢနကက့ၤဆူဟံၣ်, ထၢဖှိၣ်စ့ ယဲၢ်ကလီၢ်, လဲၤဆူ “ဘီကီာ်ကိးနံၤဒဲးတၢ်ပရၢ” အခိၣ်အအိၣ်ဒီး မၢအဟ့ၣ်န့ၢ်နၤ ဆူစီၤပၤအအိၣ် ဒီးကွဲးန့ၢ်လံာ်ပရၢလၢ စီၤပၤအဂီၢ် လၢတၢ်ကစဲကျံးရၤလီၤအီၤလၢ တၢ်ပရၢပူၤဒီး စံး, “ကစၢ်စီၤပၤဧၢ, တၤဘီနၢၤစံၣ်ညီၣ်ယၤဒီး ယအၢၣ်လီၤအတၢ်စံၣ်ညီၣ်လၢ, ယမၤန့ၢ်ယတၢ် ထူးတၢ်တီၤလၢ တၢ်ဒုးအိၣ်ထီၣ် ဃဲသဲဟံၣ်, တၢ်ပှ့ၤဆါကသံၣ်သူ, တၢ်ဒုးအိၣ်ထီၣ် တၢ်ဘုးထၢၣ်ကရၢ, တၢ်ဘျၣ်ကရၢ, ဒီး တမျာ်ကရၢတဖၣ်လီၤ. ဒ်တၤဘီနၢၤ ကရၢစံၣ်ညီၣ် အသိး, ကစၢ်စီၤပၤဧၢ, ယဆှၢလီၤစ့ ယဲၢ်ကလီၢ်ထ့းကၢၣ် ဆူနအိၣ်လီၤ. မ်နကဝံသးစူၤ အံးက့ၤကွၢ်က့ၤ ပှၤဖှီၣ်ဖိ, ဃဲသဲမုၣ် တဖၣ်, ဒီးဘှီထီၣ်န့ၢ်အီၤ ဟံၣ်လၢ ကအိၣ်ကဆိးက့ၤဝဲ ဂ့ၤဂ့ၤဝါဝါ အဂီၢ်ဒီး မ့ၢ်သးအိၣ်န့ၣ် ဆှၢက့ၤအီၤဆူ အဟံၣ်အဃီ ဒၣ်ဝဲတက့ၢ်. ယနီၢ်ကစၢ် ဒၣ်ယဲ ယကထွးထီၣ်ကွံာ်လၢ ကစၢ်အတၢ်ပၢပူၤ ယူၣ်တရၣ်ကီၢ်ပူၤ တစိၤသးလီၤ.”

“ဘူနးဧၢ, ပတပျံၤ လၢနဃ့ၢ်ကွံာ်ပှၤကပူၤဘၣ်. ခဲမုၢ်ဆ့ၣ်ဂီၤခီ ပမ့ၢ်တဖးဘၣ် တၢ်ပရၢဒ်အံၤ လၢတၢ်ပရၢလၢ ပယၢၤထီၣ်အံၤ အပူၤဘၣ်ဒီး ပကလူၤနၤတုၤ အန့ၢ်, ပကအုၣ်ကွံာ်နဖံး ဒီးတ့ၢ်လီၤနၤလၢ ပီၣ်လဲၣ် က့ၣ်ကျီၤ ပူၤဒ် ယစံၣ်ညီၣ်တ့ၢ်လံ အသိးလီၤ.”
“ပျၢ်လီၤကွံာ်ဘူနး” ဒီးတၤဘီနၢၤ ခံဂၤ ဆှၢထီၣ်ကွံာ်ဘူနး, ကးဘၢအမဲာ်ဒီး က့ၤဆှၢက့ၤအီၤဆူ ဘီကီာ်ဝ့ၢ်ပူၤ, ဒီးပာ်တ့ၢ်အီၤတယံၤတဘူးဒီး အဟံၣ်ဒၣ်ဝဲဘၣ်လီၤ.

ဘူနးပျံၤတၢ်လီၤ. ဘူနး လီကီစ့ ယဲၢ်ကလီၢ် အသးတဂ့ၤတဝါတၢ်ဘၣ်. ဘၣ်ဆၣ် သးစၢ်တဖၣ် အတၢ်မၤလၢ တၢ်သူၣ်တီသးရၤဒီး တၢ်နာ်လၢ အဝဲဃ့ၢ်အီၤ တပူၤဘၣ်န့ၣ် မၤနၢၤကွံာ်အတၢ်သးအိၣ် ပဒ့ၣ်တၢ်စံၣ်ညီၣ် အံၤလီၤ. အဝဲက့ၤထုးထီၣ်စ့လၢ စ့တၢးပူၤ, ဘိၣ်ထီၣ်ဝဲ, ကွဲးလီၤလံာ်ပရၢဒီး ဆှၢလီၤစ့ဒီး လံာ်ပရၢ အံၤချ့ချ့ လၢခံတဂီၤလီၤ.

မုၢ်ဆ့ၣ်ထီၣ် “ဘီကီၣ်ကိးနံၤဒဲးတၢ်ပရၢ.”
ဟးထီၣ်လၢ မုၢ်ဃ့ၢ်လီၤတခီ အိၣ်ဒီး လံာ်ခိၣ်တီဖးဒိၣ်,

“တၢ်လီၤလး, ဘူနး ဟ့ၣ်လီၤစီၤပၤစ့ယဲၢ်ကလီၢ် အၢၣ်လီၤတၢ်ကမၣ်.”
တၤဘီနၢၤကရၢအတၢ်မၤဂ့ၤ

တၢ်ကစီၣ်အံၤ မၤတၢထီၣ်တၢလီၤ တၢ်သကုၤထံ သကုၤကီၢ်လီၤ. တၤဘီနၢၤကရၢဖိ တဖၣ် နံၤတံးနံၤတူးမး လၢအတၢ်မၤအဆိကတၢၢ် တဘျီကဲထီၣ်ဝဲ လၢလၢပှဲၤပှဲၤ အဃိန့ၣ်လီၤ. တနွံအတီၢ်ပူၤ ပှၤကၢၣ်ကီၣ်ဒၣ်တၢ်ဂ့ၢ်အံၤလီၤ. မ့ရ့ၣ်ဖးဘၣ် ဒီး ဆိမိၣ်ထီၣ် တဘျီဃီ “တၢ်တဂၤအံၤ လီၤဂာ် ဒၣ်စီၤက့ၣ် အတၢ်မၤလီၤဘဲၣ်.” လဲၤကသွံဒံဆူ အမိၢ်အအိၣ်ဒီး ပာ်ဖျါထီၣ် အတၢ်ဆိကမိၣ်လီၤ. မိၢ်အံၤစံးအီၤ, “ဖိမုၣ်ဧၢ, သီၣ်သဲ တဂ့ၤ, ယဲယဆိမိၣ် ဒ်နၤအသိး စ့ၢ်ကီးလီၤ.” ဒီးမ့ရ့ၣ် တသဲလၢၤကီးဘၣ်. မ့ၢ်ထံၣ် စီၤက့ၣ်ဒီး ဆိမိၣ်ထီၣ်ဝဲ, “မ့ၢ်ဒၣ်အီၤဧါသၢၣ်.” ဘၣ်ဆၣ် အိၣ်ဘှီၣ်ဝဲလီၤ.

လၢခံခံသီ, စီၤပၤအသုးခိၣ် ခိးအသးသမူတဂၤ ဟဲအိၣ်န့ၢ်စီၤက့ၣ်ဒီး က့ၤကိးအီၤဆူ နီပူၤလီၤ. ဖဲန့ၣ် စီၤပၤဒီး နီၢ်ပၤမုၣ်, ဒီးစီၤပၤ အဖိမုၣ် လဲၤဖျိခီလ့ၣ် ဒီးဟဲက့ၤတုၤသီလၢ ကီၢ်အမဲရကၤတဂၤ တူၢ်လိာ်အိၣ် သကိးစီၤက့ၣ် လီၤ. စီၤပၤဖိမုၣ် အသးဆူၣ်မး လၢတၢ်ကအံးက့ၤကွၢ်က့ၤ ဃဲသဲမုၣ် ဘၣ်နးတဖၣ် အံၤအဂီၢ်လီၤ.

စီၤပၤစံး, “စီၤက့ၣ်ဧၢ, ယမၤလိာ်နၤဒ်သိး နကဟ့ၣ်ကူၣ်ယၤလၢ ပကဘၣ်သူ စ့ယဲၢ်ကလီၢ် လၢနဲၣ်ဘူနး ဟ့ၣ်လီၤ ယၤအံၤ ဒ်လဲၣ်န့ၣ်လီၤ. ယသးအိၣ်အးလီၤ တၢ်မၤအံၤလၢ နီၢ်ပၤမုၣ် ဒီး ပဖိမုၣ် အစုပူၤလီၤ. နဲနမၤလံတၢ် လၢပိာ်ခွါဖိတဖၣ် အကျါယံာ် ခံနံၣ်လံ. နသါတဲပၠး ကွၢ်ပှၤ နစးထီၣ် မၤအီၤဒ်လဲၣ်န့ၣ်လီၤ.”

ဒီးစီၤက့ၣ်တဲပၠးအဝဲသ့ၣ် တဆီတဆီ ဒီးဟ့ၣ်ကူၣ်ဝဲလၢ နီၢ်ပၤမုၣ်ဒီး စီၤပၤဖိမုၣ် ကမၤလိာ် မ့ရ့ၣ်လ့ဒီး ဃ့အတၢ်ဟ့ၣ်ကူၣ်လၢ ြကၢးပှၤမတၤတဖၣ် ဘၣ်တၢ်ဃုထၢလၢ ကမၤသကိးတၢ်ဒီး နီၢ်ပၤမုၣ်ဒီး စီၤပၤဖိမုၣ် လဲၣ်န့ၣ်လီၤ. တဂီၤန့ၣ် စီၤက့ၣ်ဘၣ်အီၣ်သကိးတၢ်ဒီး စီၤပၤလၢ ဂီၤတၢ်အီၣ်ဝံၤမး က့ၤဘၣ်ဝဲလီၤ.

မုၢ်ဆ့ၣ်ထီၣ်တနံၤ စီၤပၤဖိမုၣ်, လၢတပာ်ဒိၣ်သးတဂၤဘၣ်, ဒ်အဘၣ်တၢ်သိလိ လံအီၤလၢ အမဲရကၤ တခီအသိး နီၣ်ထီၣ်သိလ့ၣ်ဒီး လဲၤအိၣ်သကိး မ့ရ့ၣ်လီၤ. မ့ရ့ၣ်ကမၢကမၣ်မး လၢအဝဲအတၢ်ဟဲအိၣ်သကိး အီၤဒ်အံၤ တကလုာ်အဃိန့ၣ်လီၤ. ပိာ်မုၣ်သးစၢ် ခံဂၤအံၤ ထံၣ်လိာ်သး တဘျီဃီ အသးစဲဘူး လိာ်သး လၢ ပိာ်မုၣ်သကိး ပိာ်မုၣ် အတၢ်အဲၣ်တံၢ်နီၢ်လီၤ. ကတိၤသကိး တၢ်ယံာ်ဖးယံာ် ဝံၤ စီၤပၤဖိမုၣ် အံၤကွဲးလီၤ ပှၤမံၤပှၤသၣ်လၢ မ့ရ့ၣ် ဟ့ၣ်ကူၣ်အီၤ ခဲလၢာ်လၢ ကကဲထီၣ် အမိၢ်ဒီးအီၤ အပှၤကူၣ်လိာ် တၢ်ခဲလၢာ် အမံၤပၣ်ဃုာ်လီၤ. ခီလ့ၣ်ကၠိသရၣ် အမၢၤဒီး သးပှၢ်မုၣ် အဂၤတနီၤ လၢမ့ရ့ၣ် သ့ၣ်ညါလၢအမ့ၢ် ပှၤဂ့ၤပှၤဝါ, ပှၤအဲၣ် ပှၤဖှီၣ်ဖိ တဖၣ်ပၣ်ဃုာ်ဝဲ လီၤ. မ့ရ့ၣ်ဟ့ၣ်ကူၣ်စ့ၢ်ကီးလၢ ဘီကီာ်ဝ့ၢ် ပလံးအခိၣ် ကပၣ်ဝဲ န့ၣ်လီၤ. အဝဲမ့ၢ် ပှၤသးစၢ် ဟဲက့ၤတုၤသီလၢ ြဖၣ်စ့ၣ် ကီၢ်တဂၤ တဘျီဃီဒီး ခၠါလ့ၣ်လီၤ. အသးဆူၣ်ဒိၣ်မးလၢ ကမၤဂ့ၤထီၣ် ဝ့ၢ်ပူၤအံၤလီၤ.

စီၤပၤအဖိမုၣ်ဘူးကက့ၤ, ဖိသၣ်ဟီၣ်လၢ ဒၢးဘီခီ တခီဒီး စီၤပၤဖိမုၣ် လဲၤပိာ်ဃုာ်မ့ရ့ၣ်အခံဒီး ကွၢ်ထီၣ်နီၢ်ထူဖိလီၤ.

“မ့ရ့ၣ်ဧၢ, နမ့ၢ်တရူး, န၀ၤမ့ၢ်တရူး, နပျိာ်န့ၢ်အမံၤလၢ ပှၤကညီအမံၤတခီ ဒ်လဲၣ်.”
မ့ရ့ၣ်ဆုးလီၤခိၣ်တဘျးဒီး, တၢ်အဲၣ်သိၣ်လိအီၤလၢ ကစံးဘၣ် စီၤပၤဖိမုၣ်အံၤ လၢစီၤက့ၣ်ဒီးအီၤ အဂ့ၢ်ခဲလၢာ်လီၤ. စီၤပၤဖိမုၣ်ကနၣ် တတီၤဘၣ်တတီၤ ဒီးအမဲာ်ထံလီၤ ဘၣ်မးသးလီၤ.

“မ့ရ့ၣ်ဧၢ, နနာ်ယၤ, နတဲယၤနဂ့ၢ်ဒီး ယစံးဘျုးနၤလီၤ. တၢ်တမံၤဃီအံၤ ဘၣ်ယၤလီၤ. ယလဲၤမၤလိတၢ်လၢ ကီၢ်အမဲရကၤ, ယအဲၣ်လိာ်ယသးဒီး ပှၤမၤလိသကိးဃုာ်လံာ် တတီၤဃီဒီးယၤ, ပှၤအမဲရကၤဖိတဂၤ လီၤ. ယပၢ်တခီ အဲၣ်တီပာ်စၢၤန့ၢ်ယၤလံလၢ ခဲၣ်ဘိဒယၢ် စီၤပၤဖိခွါ အဃိ ယဘၣ်တၢၤကွံာ် ယတၢ်သးလီဒၣ်ယဲလီၤ. မ့ရ့ၣ်ဧၢ, ခဲငါကၢာ်ယဘၣ် ဖျီယသးလီၤ. သ့ၣ်နီၣ်ယၤလၢ နတၢ်ထုကဖၣ် အပူၤဒ်သိး ယဂံၢ်ယဘါ ကလၢဒ်နၤအသိး လၢယကမၤတၢ်လီၤဘၣ်ယၤ အံၤတက့ၢ်. စီၤပၤဖိမုၣ် ဖိးနၢမူ မ့ရ့ၣ်ဒီး ဖိသၣ် နီၢ်ထူဖိ ဒီး ဟံးထီၣ်တၢ်မျၢ်လါ ထးရှိးဆဲးသးနါပှၢ် တခါ လၢအသးနါပှၢ်အလိၤဝံၤ ဆဲးလီၤဝဲလၢ ဖိသၣ် နီၢ်ထူအဆ့ကၤ ဖိလိၤလီၤ. ဒီးသါကက့ၤဝဲသနာ်က့ မ့ရ့ၣ်လဲၤထုးအီၤဆူ ဖံၣ်အဲနိၣ်အဃၢၤ, ဒီးဒ့န့ၢ်သး ဝံၣ်န့ၢ်အီၤ, “တၢ်အဲၣ်လၢညိကွံာ်ယၤတကဲ” လၢကီၤလၤကျိာ် လွံၢ်ဆၢလိာ် လီၤ. တၢ်သးဝံၣ် အံၤမၤမုာ်ထီၣ် က့ၤစီၤပၤဖိမုၣ်အသး တဆံးတစှၤဘၣ်. အဝဲဖိးနၢမူ မ့ရ့ၣ်ဒီး နီၢ်ထူဖိ ခံဘျီတဘျီဝံၤ ဒိးထီၣ်က့ၤသိလ့ၣ်, ဒီးက့ၤဝဲလီၤ.

ပှၤလၢ အဘၣ်တၢ်ဃုထၢထီၣ် အီၤတဖၣ် ဘၣ်တၢ်ကိးဖှိၣ်အီၤလၢ နီပူၤ ဒီးအိၣ်ဖှိၣ်တၢၣ် ပီၣ်သကိး တၢ်ခံဘျီသၢဘျီဝံၤ ဒီးတၢ်ဖံးတၢ်မၤ ဘၣ်တၢ်စးထီၣ် အီၤလီၤ. တၢ်ငါန့ၢ်ဟံၣ် ဖးဒိၣ် အိၣ်ဒီး ကရၢၢ်ဂ့ၤဂ့ၤတဖျၢၣ်, ဃဲသဲအဟံၣ်တဖၣ် ဘၣ်တၢ်ကးတံာ်ကွံာ်, ဒီးပိာ်မုၣ်အဖှီၣ်အယာ် မးတဖၣ် ဘၣ်တၢ်က့ၤပာ်ဖှိၣ်က့ၤအီၤ ဖဲဟံၣ်ပူၤအံၤ, တၢ်အံးထွဲကွၢ်ထွဲ က့ၤအီၤ ဂ့ၤဂ့ၤဝါဝါလီၤ. တၢ်ဃုထၢထီၣ်မုၣ်ကမဲ သးပှၢ်လၢ ပှၤနာ်န့ၢ်အီၤသ့ လၢကပၢဆှၢက့ၤ ဟံၣ်ဖိဃီဖိ တဖၣ်လီၤ. မ့ရ့ၣ်ဒီး စီၤပၤဖိမုၣ် လဲၤမၤစၢၤ တၢ်အါမး, ပာ်ဖျါထီၣ်တၢ်အဲၣ် တၢ်သးကညီၤ လၢပှၤဘၣ်တၢ်ဖှီၣ်တဖၣ်အံၤ အဖီခိၣ် အါမးလီၤ. ပလံးခိၣ် လူၤဃုသ့ၣ်ညါ က့ၤပိာ်မုၣ် ဖိသၣ်တဖၣ် အခီၣ်ထံးခီၣ်ဘိ, တၢ်ဘိးဘၣ်သ့ၣ်ညါ က့ၤဖံးဘူး ညၣ်တံၢ် တဖၣ်လၢ အဂ့ၢ်ဖဲ ပှၤသ့ၣ်ညါသ့, ဒီးတနီၤအဘူးအတံၢ် တဖၣ်ဟဲကိးက့ၤအီၤလီၤ. တၢ်သးအုး အလီၢ်အိၣ်စ့ၢ်ကီးဝဲလီၤ. ပိာ်မုၣ်ဖိသၣ်တနီၤ အဲၣ်တၢ်အၢ တၢ်သီအံၤ ဒီးထွးထီၣ်ဃ့ၢ် ကွံာ်လီၤ. ပလံးခိၣ်ဘၣ်လူၤဃုက့ၤအီၤ တဘျီဝံၤတဘျီလီၤ. ပျၤမၤ တဘၣ်ဘၣ်အဃိ ပှၤဘၣ်ပာ်လီၤဆီန့ၢ် အီၤလၢ တၢ်လီၢ်တပူၤ ဒၣ်ဒီး ပၢၤအီၤဒ်ဃိာ် ဖိတကလုာ် အသိး လီၤ. ပိာ်မုၣ်ဖိသၣ် ခဲလၢာ် ဘၣ်တၢ်ကူစါဘျါက့ၤအီၤ, သိၣ်လိမၤယုၤအီၤ လၢတၢ်ဖံးတၢ်မၤဒီး စးထီၣ် မၤတၢ်ဒ်အတၤလၣ် အိၣ်ဝဲအသိးလီၤ. စီၤပၤဖိမုၣ် ဒီးမ့ရ့ၣ် ဒီးသးပှၢ် မုၣ်ကူၣ်လိာ်တၢ်တဖၣ် လဲၤလၢညါ, ဃုထၢတူၢ်လိာ် ပိာ်မုၣ်ဖိသၣ်တနီၤ လၢအဟံၣ်ပူၤဒၣ်ဝဲဒီး ဟ့ၣ်အီၤ တၢ်ဖံးတၢ်မၤ အိၣ်ဒီး ဘူးလဲန့ၣ်လီၤ. တူၢ်ဒိၣ်ကီၤဒိၣ် လၢအသးအိၣ် မၤစၢၤမၤဂ့ၤတၢ် တဖၣ်စ့ၢ်ကီး ဟဲကိးန့ၢ်ဖိသၣ်မုၣ်ကနီၤ ဒီးက့ၤပာ်အီၤ လၢအဟံၣ်ဒီး ဟ့ၣ်အီၤတၢ်မၤလီၤ.

ဃဲသဲ အတၢ်မၤဖျါလၢ အတအိၣ်လၢၤဘၣ်. သနာ်က့ လၢတၢ်ခူသူၣ်ပူၤတခီ တလၢာ်ဒံးဝဲဘၣ်. စီၤက့ၣ်ဒီး ခၠူ၀ၣ် တၢၣ်ပီၣ်သကိး တၢ်ဂ့ၢ်အံၤလီၤ. စီၤက့ၣ်စံး, “ခၠူ၀ၣ်ဧၢ, ယနာ်လၢ တၤဘီနၢၤ ကရၢကဘၣ် ဝီၣ်လီၤ မၤစၢၤတၢ်လီၤ. ပိာ်မုၣ်ဟးဂီၤအိၣ်မ့ၢ်လၢ ပိာ်ခွါဟးဂီၤ လၢအသးလီ အီၤအိၣ် အဃိလီၤ. ဃုန့ၢ်ပှၤပိာ်ခွါ လူၤတၢ်မုာ်တၢ်ပၠီၣ် ဒ်အံၤတဖၣ်အမံၤ ဒီးပကမၢ တၤဘီနၢၤကရၢ မၤတဘီလဲၣ်”

ပိာ်ခွါလၢ အလူၤတၢ်ဟးဂီၤ တဖၣ် ဘၣ်တၢ်ဖီၣ်ခူသူၣ်အီၤ လၢတၤဘီနၢၤတဖၣ်, ဖျ့အီၤဆါဆါဝံၤ, ဟ့ၣ်ပလီၢ်အသးဝံၤ ပျၢ်လီၤကွံာ်အီၤလီၤ. တၤဘီနၢၤကရၢ ကွဲးဟ့ၣ်ယုၢ်စ့ၢ်ကီး လံာ်ပရၢဆူ ကမျၢၢ်အအိၣ်, ဟ့ၣ်ပလီၢ်ပိာ်ခွါ တဖၣ်အသး ဒ်သိး သုတမၤဟးဂီၤ ပိာ်မုၣ်ပိာ်မၢၤ တဖၣ်တဂ့ၤလီၤ. တၢ်ပရၢအံၤ ဖျါထီၣ်ဝဲလၢ “ဘီကီာ်ကိးနံၤဒဲးတၢ်ပရၢ” အပူၤလီၤ.

ပှၤထူးပှၤတီၤ အိၣ်ခူသူၣ် ဒီး မါဖိသၣ်တဖၣ်, ငါန့ၢ်အီၤ ဟံၣ်ဒီးလဲၤအိၣ်သကိး ခူသူၣ်အီၤလီၤ. ပှၤဒ်သိး အံၤတဖၣ်တပူၤဖျဲး စ့ၢ်ကီးလၢ တၤဘီနၢၤ ကရၢ အတၢ်စံၣ်ညီၣ်ဘၣ်.

တၤဘီနၢၤကရၢမၤဒိၣ်ထီၣ်လဲၢ်ထီၣ် အတၢ်မၤပှီၢ်ပှီၢ်လီၤ. ရၤလီၤသး သကုၤဝ့ၢ်တဖၣ် ဒီးသဝီဖးဒိၣ် တဖၣ်လီၤ. ကရၢခၢၣ်စး ခူသူၣ်တဖၣ် ဟးဝ့ၤဝီၤ သကုၤဆးဒး, ဃုထံၣ်န့ၢ် ပှၤလၢအသးဂ့ၤ, ဆၢမၤဂ့ၤတၢ် တဖၣ် အိၣ်သကိး သဆၣ်ထီၣ်ဝဲအခံ ဒီးကရၢအဒ့ တဖၣ်ကဲထီၣ် တကဝီၤဘၣ်တကဝီၤ လီၤ.

တနံၣ်တဘျီ ကရၢအတၢ်ခိၣ်တၢ်နၢ် တဖၣ်လဲၤအိၣ်ဖှိၣ်ခူသူၣ်ဝဲလၢ ဆီဖါလ့ခိၣ် အလၢၢ်ကအိပူၤလီၤ. ကွၢ်ကဒါက့ၤ အတၢ်ဖံးတၢ်မၤ, ဒီးမၤဂ့ၤထီၣ်လဲၢ်ထီၣ် ဝဲပှီၢ်ပှီၢ်လီၤ. အိၣ်ဖှိၣ် အခါဟးခးလိာ်ကွဲ စ့ၢ်ကီး တၢ်ဒီး ကဲထီၣ်တၢ်ဟးကသုၣ် သးတကလုာ်န့ၣ်လီၤ. ကရၢစံၣ်ညီၣ်ဝဲလၢ ကစးထီၣ် ဘှီဘၣ်က့ၤ ဘၣ်ဃး စံာ်လီၢ်စံာ်ပှဲၤ အဂ့ၢ်ဒီး ဃုကျဲလၢ ကမၤဘၣ်ဝဲဒ်လဲၣ် န့ၣ်လီၤ. လူၤကွၢ်ဃုက့ၤ တၢ်ဂ့ၢ်လီၢ်လံၤတဖၣ်, စရီဘၣ်ဃး တၢ်ခီလဲ စံာ်လီၢ်ကစၢ် တဖၣ် အမံၤအသၣ်, ဒီး တၢ်မၤနီၣ်မၤဃါ ပှၤမံၤပှၤသၣ်တဖၣ် လၢကစံၣ်ညီၣ်ဝဲ အဂီၢ်လီၤ.

ပှၤဒုးလိၢ်လီၤစ့, ဒီးလၢကျဲတတီတလိၤ မၤနၢၤမၤကျံၤ ပှၤထူစံာ်ဖိ တဖၣ် စးထီၣ်ဘၣ်နး ကဒီးလံ. ဘၣ်တၢ်ဖီၣ်အီၤ, သိၣ်ဃီၣ်အီၤ, ဒီးမၢန့ၢ်ဆီၣ်ခံအီၤလၢ ကဟ့ၣ်ကဒါက့ၤ စံာ်လီၢ်တဖၣ်ဆူ စံာ်လီၢ်ကစၢ် နီၢ်နီၢ် အစုပူၤလီၤ.

တၢ်အဂၤတမံၤ လၢတၤဘီနၢၤ ကရၢစးထီၣ် ဖီၣ်ထီၣ်ဝဲန့ၣ် မ့ၢ်တၢ်ဆါသံး ဧိၤဂာ်ဧိၤလီၤ. သံးဧိၤဂာ်ဧိၤ မၤဟးဂီၤ, မၤဘၣ်ဒိ တၢ်တဒိးကွဲဘၣ်. မၤဖှီၣ်လီၤယာ်လီၤ ပှၤအီတၢ်, ဒုးအိၣ်ထီၣ် ဟံၣ်ဖိဃီဖိ အတၢ်တဃူ တဖိး, ဒုးအိၣ်ထီၣ် တၢ်အ့ၣ်လိာ်ဆိးက့, တၢ်မၤသံမၤဝီ အါမးလီၤ. တၢ်ဆါ သံးတၢးတဖၣ် ဒိးန့ၢ်ဘၣ် ကဒီး တၤဘီနၢၤကရၢ အလံာ်ဟ့ၣ်ပလီၢ် တဖၣ်လီၤ. တနီၤဒိကနၣ်ဝဲ ညီကဒၣ်ဒီး ကးတံာ်ကွံာ် အတၢ်ဆါတၢ်ပှ့ၤ လီၢ်လီၤ. တနီၤ တဒိကနၣ် တၢ်ဘၣ်အဃိ, တၤဘီနၢၤကရၢ ဘၣ်စံၣ်ညီၣ် အီၤလီၤ. တၢ်ဆါ သံးအတၢး တဖၣ် ဘၣ်တၢ်မၤ လီၤပှီၢ်, ဆူးထီၣ်ကွံာ်လၢ မ့ၣ်အူ ဒၣ်လဲာ်လီၤ.

တၢ်ဆါသံး မၤကဲဒိၣ် ပှၤအါဂၤလီၤ. သထ့တဖၣ်အံၤ ကရၢကရိ လိာ်သးဒီး ပတံထီၣ် တၢ်ဆူ ကီၢ်အသဲစး ဘျီၣ်ဒိၣ် ကူၣ်လိာ်တၢ် အအိၣ်လီၤ. လၢဘျီၣ်ဒိၣ်ပူၤ တၢ်ဂ့ၢ်လိာ်ဘှီလိာ် ဖးဒိၣ်အိၣ်ထီၣ်ဝဲလီၤ. ပှၤကူၣ်လိာ်တၢ် တနီၤစံးဝဲလၢ တၤဘီနၢၤ ကရၢအတၢ်မၤအံၤ မ့ၢ်တၢ်အဂ့ၤလီၤ. တနီၤစံးဝဲလၢ အမ့ၢ်တၢ်မၤဆူၣ် မၤဆိး, ပျံကွံာ်ထံကီၢ် အသဲစးန့ၣ်လီၤ.

ပှၤကူၣ်လိာ်တၢ်ခၢၣ်စး တဂၤဆှၢနုာ်ဝဲ, “မ်ဘျီၣ်ဒိၣ်အၢၣ်လီၤ တူၢ်လိာ်လၢ ကဒီၣ်တဲာ်ကွံာ် တၤဘီနၢၤ ကရၢအံၤ ဒ်အမ့ၢ် ကရၢတဖု လၢအထီဒါ တၢ်ပၢတၢ်ြပး ဒီး သူအတၢ်ဂံၢ်တၢ်ဘါ ခဲလၢာ်ဒ်သိး ကမၤဟးဂီၤကွံာ် တၤဘီနၢၤ ကရၢအံၤတက့ၢ်.”

တၢ်ဆှၢနုာ်အံၤ ဘၣ်တၢ်မၤစၢၤအီၤလီၤ.
ပှၤကူၣ်လိာ်တၢ် ခၢၣ်စးအဂၤတဂၤ ဆှၢနုာ်ဝဲ, “မ်ပကစံးဘျုး က့ၤတၤဘီနၢၤကရၢဖိ လၢပတသ့ၣ်ညါ အီၤသနာ်က့, ပထံၣ်ဘၣ် အတၢ်မၤဂ့ၤ အါမံၤ, ဒီးအၢၣ်လီၤ တူၢ်လိာ်လၢ ြကၢးဘျီၣ်ဒိၣ် ဒုးကဲထီၣ်တၢ်ဆါသံး လၢ တၢ်ကမၣ်န့ၣ်တက့ၢ်.”

တၢ်ဆှၢနုာ်အံၤ ဘၣ်တၢ်မၤစၢၤအီၤ စ့ၢ်ကီးလီၤ.
ပှၤပၢၤလီၢ်ဆ့ၣ်နီၤ မၢပှၤဟ့ၣ် တၢ်ဖးလၢ တၢ်ဆှၢနုာ်ခံထံၣ်အံၤ အဖီခိၣ် လီၤ. တၢ်ထၢ တၢ်ဖးဒီး ပှၤလၢ အအၢၣ်လီၤတၢ်ဆှၢနုာ်တၢ အနီၣ်ဂံၢ် အိၣ်စှၤအဃိ, တၢ်ဆှၢနုာ်ခံနၢၤဝဲလီၤ.

တၢ်ပရၢတဖၣ် ရၤလီၤတၢ်ကစီၣ် အံၤလီၤ. တၤဘီနၢၤကရၢဖိ တဖၣ် ဖးဘၣ်အီၤဒီး နံၤတံးနံၤတူး လီၤ. ဘၣ်ဆၣ် ပှၤဆါသံးဖိတဖၣ် တဆိကတီၢ်ဒံးဘၣ်. ပတံထီၣ်ကဒီး တၢ်ဆူ စီၤပၤ ရၣ်မၣ် အအိၣ်လီၤ. စီၤပၤ ဟ့ၣ်လီၤကလုၢ်ဒ်အံၤလီၤ.
“ကီၢ်ယူၣ်တရၣ်ဘါစီၤကီတမးလီၤ. စီၤကီတမး ြတီသံးဧိၤဂာ်ဧိၤ လီၤ. ယတၢၤကွံာ် တၢ်ပတံထီၣ်အံၤလီၤ.”

ပှၤဆါသံးတဖၣ် ဃၣ်ကဒီးလံ. ဘၣ်ဆၣ် တဆိကတီၢ်ဝဲဘၣ်. ဆါခူသူၣ်ဖီခူသူၣ် သံးလီၤ. တၤဘီနၢၤ ကရၢအတၢ်မၤအါထီၣ်ကဒီးလီၤ. ဘၣ်လူၤဃုထံၣ် န့ၢ်တၢ်ဖီသံးလီၢ်, ဆါသံးလီၢ်ခူသူၣ် တဖၣ်အံၤဒီး မၤဟးဂီၤ ကွံာ်အီၤတပူၤဘၣ်တပူၤလီၤ.

တၤဘီနၢၤကရၢအတၢ်မၤ အံၤကဲထီၣ် လိၣ်ထီၣ်သ့လၢ ကျဲမတၤန့ၣ်လဲၣ်. မ့ၢ်ဒၣ် မၤတၢ်တီတီ, ဒီး တၢ်တီတၢ်လိၤန့ၣ် ဟဲလၢယွၤအဃိ ယွၤအိၣ်ပှိၤက့ၤအီၤလီၤ. လၢယွၤအိၣ်ပှိၤအီၤအဃိ, ထံလီၢ်ကီၢ်ပူၤ လၢပှၤလၢ အအဲၣ်တၢ်တီတၢ်လိၤတဖၣ် ပၢၢ်လၢစီၤပၤဒၣ်လဲာ် ကၢၤဖှိၣ်သးလၢ အလီၢ်ခံလီၤ. မ့ၣ်အါမ့ၣ်နၢၤ, ထံအါထံနၢၤလီၤ. ပှၤတဖုလၢ ယွၤအိၣ်ပှိၤအီၤန့ၣ် မ့ၢ်စှၤဘၣ်ဆၣ် ကဲထီၣ်ပှၤအအါ သ့ကစီဒီလီၤ.

ထဲလ့ၣ်ဖိဒၢလွဲဖိသီၣ်ထီၣ်ရ့ရ့, စီၤက့ၣ်ဖီၣ်ထီၢ် တၢ်ဒိကနၣ် ကတိၤတၢ်အစုဟံး, “ဟဲလိၣ်, မတၤလဲၣ်, ယၤစီၤက့ၣ်. အီ, ယီၣ်စွါဧၢ, မနုၤ. အီ, မ့ရ့ၣ်အဖိခံဂၤတဂၤ အပိာ်ခွါယ တၢ်ဘျုးတၢ်ဖှိၣ်ဖးဒိၣ်လၢ နဂီၢ်လီၤ. အီ, နသါကယုၢ်အမံၤလၢမနုၤ, စီၤက့ၣ်, အၢၣ်, တၢ်ဘျုးလီၤ.”