ကသ့ၣ်မိၢ်ခါထီၣ်ဝဲ (ထွံၣ်မဲၢ်က့ၣ်… ဘျၢထီၣ် အကူာ် ၁၀)

စီၤက့ၣ် ဟ့ၣ်ကဒါက့ၤ အဖါတံၢ်အစ့, အပၢ်အစ့, ဝံၤဟ့ၣ်လီၤကဒီး စ့ခံကလီၢ်လၢ ြဖၣ်သူဝါ အစုပူၤ လၢကဘှီထီၣ်, “တၢ်သ့ၣ်နီၣ်ထီၣ် စကီၤမုၣ်နီၢ်ထူ တၢ်ဆါဟံၣ်” လၢသဝီစံာ်ဖးလဲၢ် န့ၣ်လီၤ. တၢၣ်ပီၣ်သကိး တၢ်ဂ့ၢ်အံၤ ဒီးအဖါတံၢ် ဒီးအပၢ် ယံာ်တဘျုးနၣ်ရံၣ် မးလီၤ. အၢၣ်လီၤသကိးဝဲ လၢကပာ်ပဒိၣ်ကသံၣ်သရၣ် ခံဂၤ, သရၣ်မုၣ်ကွၢ် ပှၤဆါလွံၢ်ဂၤလီၤ. ကသံၣ်သရၣ်ကဘၣ်အိၣ် ထီဘိဖဲ တၢ်ဆါဟံၣ် ပူၤတဂၤ ဃုာ်ဒီး ကသံၣ်သရၣ်မုၣ်ကွၢ်ပှၤဆါ ခံ၈ၤလီၤ. မ့မ့ၢ်ကသံၣ် သရၣ်အဂၤတဂၤ ဃုာ်ဒီး သရၣ်မုၣ်ခံဂၤ တခီကဘၣ်ဟး ဝ့ၤဝီၤလၢ ပှၤကညီသဝီလၢ ကစၢၢ်ခိၣ် တဖၣ်ဒီး ကူစါ ပှၤဆါ, သိၣ်လိမၤယုၤ ပှၤသဝီဖိ တဖၣ်လၢ တၢ်အံး တၢ်ကွၢ်ပှၤဆူးပှၤဆါဒီး ြတီဃာ် တၢ်ဆါတဖၣ်န့ၣ်လီၤ. တၢ်ဆါအအါကတၢၢ် လၢပှၤကစၢၢ်ခိၣ်ဖိ အကျါမ့ၢ် တၢ်ညၣ်ဂိၢ်ဒီး တၢ်ဖံးသးခီသး န့ၣ်လီၤ.

လၢခံတနံၤ ြဖၣ်သူဝါဒီး ပှၤစံာ်ဖးလဲၢ်ဖိတဖၣ် က့ၤကဒါက့ၤ လၢလ့ၣ်မ့ၣ် အူဆူလၢၢ်ဟ့လီၤ.
တဘျီအံၤ စီၤက့ၣ်ကိးထီၣ် ခၠူ၀ၣ်ဒီး လဲၤတၢၣ်ပီၣ် တၢ်ဒီး သးပှၢ်တီဝူ, ဒီးကထၢၣ်ခၠါလ့ၣ်, မ့ရ့ၣ်ဒီး ယီၣ်စွါ တဖၣ် သ့သ့ နံၤလီၤ. ယီၣ်စွါ တူၢ်လိာ် သရၣ်မၤစၢၤ တၢ်ဂံၢ်တၢ်ဒွး, ြဖီၣ်ဖဲးစၢၣ် လၢစီၤပၤဖိခီလ့ၣ် ပူၤ ဒီးခဲအံၤ အိၣ်ဒၣ် တပူၤဃီဒီး အမံၤပှၢ်လီၤ.

စီၤက့ၣ် သးအိၣ်ဘှီထီၣ် တၢ်လီၢ်တကဝီၤ လၢကကၢၤဖှိၣ်က့ၤ ပှၤဖိသၣ်ဒ် ခၠူ၀ၣ်အသိး တဖၣ်လၢ ဘီကီာ် ဝ့ၢ်ပူၤ, ဒီးအံးက့ၤကွၢ်က့ၤ အီၤလီၤ. တၢၣ်ပီၣ်လိာ်သး ယံာ်တနွံဘျဲၣ်ဒီး သုးကျဲၤ က့ၤဝဲဒ် အဖီလာ်အသိးလီၤ.

၁. ခၠူ၀ၣ် ဒီးမ့ရ့ၣ် ကဃုထၢ ပှၤဖိသၣ်လၢ ကဘၣ်တၢ်တူၢ်လိာ် မၤစၢၤအီၤ, ကဘၣ်မ့ၢ် ပှၤလၢအဖှီၣ်အဃိ ကဲထီၣ်ပှၤအၢ.
၂. သးပှၢ်တီဝူ ကဆါန့ၢ်စီၤက့ၣ် လၢဟီၣ်ခိၣ်တကဝီၤ, လဲၢ်အ့ကၢၣ် ၁၀၀, အိၣ်ဒီး စံာ်လီၢ်, တၢ်သူၣ်တၢ်ဖျး အလီၢ်, နိၣ်ဖိတနိၣ် လၢပှၤကပီၢ်ထံ အပှ့ၤစ့တကလး, မ့ၢ်တၢ်စှၤကိာ်ဖိ, မ့ၢ်သးပှၢ်အံၤ အတၢ်ဟ့ၣ် မၤစၢၤလီၤ.
၃. ဒီးကထၢၣ်ခၠါလ့ၣ် ကထုးထီၣ်တၢ်ဂီၤလ ၢတၢ်ဘှီထီၣ်လၢ ဟီၣ်ခိၣ် ကဝီၤပူၤအံၤအဂီၢ်, ဒ်အထံၣ်တၢ်မၤဝဲ လၢခီၣ်မၠူနံး အပှၤကရူၢ်ကျါအသိး, တၢ်ခဲလၢာ် ကလၢာ်စ့ယဲၢ်ကလး.
၄. ယီၣ်စွါ ကကွၢ်ထွဲ တၢ်ဘှီထီၣ်, ကိးန့ၢ်ခီၣ်ြထဲးထၢၣ်.
၅. ဖိသၣ်တဖၣ် ကဘၣ်တၢ်နီၤဖးလီၤအီၤ ဒ်အတၤလၣ်အိၣ် လီၤဆီအကရူၢ်အသိးဒီး ဘၣ်တၢ်သိၣ်လိအီၤ လၢတၢ်ဖးလံာ်, ကွဲးလံာ်, ဂံၢ်တၢ်ဒွးတၢ် ဒီး တၢ်မၤစုမၤခီၣ် ဒ်တၤလၣ် အသိး.
၆. ဖိသၣ်တဂၤဒီး တဂၤ ကန့ၢ်ဘူးန့ၢ်လဲ ဒ်အစုအတၢ်မၤ ကဲထီၣ်အသိး တ၀ာ်, အတ၀ာ် တၢ်ကပာ်အီၤလၢ တၢ်လုၢ်အီၣ်အီၤ အဂီၢ်.
၇. စီၤက့ၣ် ကဘၣ်ကွၢ်ထွဲတၢ်ခဲလၢာ်.

တၢ်အံၤမ့ၢ် တၢ်မၤကွၢ်မၤစၢၤဘှီစၢၤ တၢ်အသီတမံၤလီၤ. တံၤသကိး တဖၣ်အဲၣ်စီၤက့ၣ်, ဒီးစီၤက့ၣ် အတၢ်သးဆူၣ်န့ၣ် ဘၣ်ကူဘၣ်ဂာ်အီၤလီၤ. ထဲးဂံၢ်ထဲးဘါဒီး မၤသကိး တၢ်လၢ သးတဖျၢၣ်ဃီအပူၤ လီၤ. ယဲၢ်လါ ပှဲၤထီၣ်ဒီး စီၤက့ၣ် အတၢ်ဘှီထီၣ်တဖၣ် ဝံၤဝဲ, ဒီး ပှၤဖိသၣ်ဘၣ်တၢ်ပာ်ဖှိၣ်လံအီၤ အဂၤဃိးဆံသၢဂၤ, ပှၤယူၣ်တရၣ်ဖိ မ့ၢ်လွံၢ်ဆံခံဂၤ ဒီးပှၤတရူးအစဲး ဒီး ကးြပါလွံၢ်ဆံ တဂၤလီၤ.

တၢ်သိၣ်လိတၢ်ဖးလံာ် ကွဲးလံာ်အိၣ်လၢ မ့ရ့ၣ်အစုပူၤ လီၤ. မ့ရ့ၣ် မ့ၢ်တချုးဒီး ယီၣ်စွါ ဟဲလၢအလီၢ်လီၤ. စီၤက့ၣ်သိၣ်လိ တၢ်ဂံၢ်တၢ်ဒွး လီၤ. ခၠူ၀ၣ် မၤလိလံာ်ဒီး တဘျီဃီ ကွၢ်ထွဲ တၢ်လိာ်ကွဲ ဒီး မ့ၢ်စီၤက့ၣ် အစုဒုၣ် စုတီၤလၢ တၢ်ပၢဆှၢ ဖိသၣ်အဂီၢ်လီၤ. တၢ်ဘုၣ်ထိး, ဆီ, တၢ်ထူစံာ်, မၤတၢ်စုသ့ တၢ်မၤ, တၢ်ပနာ်ထး, တၢ်သူၣ်တၢ်ဒိးတၢ်လၣ်တဖၣ်, ဘၣ်တၢ်စးထီၣ် မၤအီၤ ဟၢၣ်ဟၢၣ်လီၤ. ပှၤသ့လၢ တၢ်မၤတဖၣ်အံၤ ဘၣ်တၢ်ဒိး လဲန့ၢ်အီၤ လၢကဟဲကဲ သရၣ်ဒီး သိၣ်လိဖိသၣ် တဖၣ်လီၤ.

စီၤက့ၣ်အတၢ်လီၢ်အံၤ ယံၤဒီး ဝ့ၢ်ထဲ ယဲၢ်မံးလာ် ဧိၤလီၤ. တဘျီတဘျီ တၢ်ဂီၤမူ လၢအဂ့ၤလၢ ဖိသၣ် ြကၢးကွၢ်ကီဘၣ်အီၤ တဖၣ် မ့ၢ်ပၢၢ်ထီၣ်ဒီး စီၤက့ၣ် လဲၤကိးပၠး အီၤလီၤ. ဖိသၣ်တဖၣ် ကိးဂၤဒဲး ဃၣ်ဃၣ် ပာ်ကဲ စီၤက့ၣ်ဒိၣ်မး ဒ်အမ့ၢ်ပှၤကျီနး ခၠဲပယဲၣ် တဂၤအသိး ဒီးဒိကနၣ် အီၤဂ့ၤမး အဃိ ညီလၢစီၤက့ၣ် ကဆှၢအီၤ ပၢအီၤအဂီၢ်လီၤ. မ့မ့ၢ် ဖိသၣ်နၢ်က့ၣ် အိၣ်ယဲၢ်ဂၤ လၢစီၤက့ၣ်မ့ၢ်ဂ့ၤ ခၠူ၀ၣ် မ့ၢ်ဂ့ၤ မၤတဂီာ် ဝဲန့ၣ်ဘၣ်. ပှၤယဲၢ်ဂၤအံၤ ဟုၣ်အဂိၤမီၣ်တဖၣ် အစ့ဒီး တၢ်ဖိတၢ်လံၤ ဒီး ဘၣ်တၢ်ဖီၣ် န့ၢ်အီၤ လီၤတံၢ်လီၤဆဲး, သးဒ့ဒီ အလီၢ်တအိၣ်ဘၣ်. စီၤက့ၣ် မၢဖိသၣ် အဂၤတဖၣ် ကဲစံၣ်ညီၣ်ကွီၢ်လၢ ပှၤယဲၢ်ဂၤ အံၤအဖီခိၣ် ဒီးဖိသၣ် ခဲလၢာ် စံၣ်ညီၣ်ဝဲလၢ ြကၢးတၢ်ဖျ့အီၤ တဂၤတဆံယဲၢ်ဘီ ဆါဆါကလဲာ်လီၤ. ခၠူ၀ၣ် ဘၣ်ဖျ့အီၤလီၤ. ဘၣ်ဆၣ် ပှၤယဲၢ်ဂၤအံၤ မၤကဒီး ဒၣ်ဒ်လီၢ်လီၢ်လီၤ. တၢ်စံၣ်ညီၣ် အီၤအိၣ် နွံဘျီလံ. အဘျုးတအိၣ်ဘၣ်.

စီၤက့ၣ်တၢၣ်ပီၣ် အဂ့ၢ်ဒီး တံၤသကိးတဖၣ်, ဒီးလၢ တၢ်သးအုးအပူၤ ပှၤခဲလၢာ် အၢၣ်လီၤဝဲလၢ ဖိသၣ်ယဲၢ်ဂၤအံၤ ြကၢးဘၣ် တၢ်ဟီထီၣ်ကွံာ်လီၤ. အအံၤမ့ၢ် စီၤက့ၣ်ဘၣ်ဃၣ်ကွံာ်အခီၣ်ထံး တတီၤဒီး အသးဃၢ တစဲးညါလီၤ. စီၤက့ၣ်တသ့ၣ်ညါ ဒံးဘၣ် ကစၢ်ခရံာ်ဒီး အတၢ်အုၣ်က့ၤခီၣ်က့ၤ အစိကမီၤဘၣ်. “စ့ဒုးလဲၤကသ့ၣ်မိၢ်အတၢ်” လီၤ. ဘၣ်ဆၣ် ကသ့ၣ်တဘျီဘျီ လဲၤတၢ်တကဲဘၣ်.

ခၠူ၀ၣ်ဒီး စီၤက့ၣ်တဖၣ် ဂဲၤပျုၢ်နီၢ်နီၢ်မး လၢပှၤဖိသၣ်တဖၣ် ကသ့မၤသကိးတၢ် လၢတၢ်သးတဖျၢၣ်ဃီ အပူၤလီၤ. အဝဲသ့ၣ်ခံဂၤ အတၢ်သးတဖျၢၣ်ဃီ, တၢ်နၢ်ပၢၢ်လိာ်သး, တၢ်မၤသကိး ဃုာ်တဖၣ် ဒိၣ်မးဝဲလီၤ. ခၠူ၀ၣ်အိၣ်မူလၢ စီၤက့ၣ်အဂီၢ်, ဒီးစီၤက့ၣ် စ့ၢ်ကီး လၢကျဲတဘိဘိန့ၣ် အဲၣ်ခၠူ၀ၣ်ဒ် အဖိခွါ ဒၣ်ဝဲအသိး လီၤ. ခၠူ၀ၣ် ဟ့ၣ်လီၤသးလီၤဆီဒၣ်တၢ်လၢ ကဒုးအိၣ်ထီၣ် ဒီးသိၣ်လိ တၢ်ဒ့တၢ်အူ အပှၤတကရူၢ်, ဒီးစီၤက့ၣ် ဆီၣ်ထွဲအခံ, ပှ့ၤန့ၢ်အီၤ တၢ်အပီးအလီဖဲ အလိၣ်ဘၣ်ဝဲ ခဲလၢာ်န့ၣ်လီၤ. ပှၤဖိသၣ် အိၣ်ဆံဆဲၣ်ဂၤ လၢအတၤလၣ်အိၣ်ဘၣ်ဃး တၢ်ဒ့တၢ်အူ ဒီးတၢ်သးဝံၣ် န့ၣ်လီၤ. ဒီးလၢ ခၠူ၀ၣ် အတၢ်ကျဲးစၢး သပှၢ်ပှၢ်အဃိန့ၣ် လၢဆံဆဲၣ်လါ အတီၢ်ပူၤ, အီခဲးစြထၣ်ဖိအံၤ ဟးဒ့တၢ်အူတၢ်လၢ ပှၤမဲာ်ညါ သ့ထီၣ်လံ. တဘျီတဘျီ သးပှၢ်တီဝူ မ့ၢ်ကွဲအီၣ်တံၤသကိး ပှၤထူးပှၤတီၤ တဖၣ်အမ့ၤဒီး ငါခၠူ၀ၣ် အအီခဲးစြထၣ် ဖိအံၤ ဒီး ဟ့ၣ်မၤစၢၤ ဝဲလၢကျိၣ်စ့ တစှၤဘၣ်.

စီၤက့ၣ်ကျဲးစၢးစ့ၢ်ကီး အါမးလ ၢကသူၣ်ထီၣ် တၢ်မၤသကိး တၢ်အသးလၢ ဖိသၣ်တဖၣ် အကျါခီဖျိ တၢ်လိာ်ကွဲ တဖၣ်လီၤ. လီၤဆီဒၣ်တၢ် တၢ်လိာ်ကွဲဒ် တၢ်ထူဘီဒီး တၢ်ဒိ ဟီခ့ၣ်ခံမံၤ န့ၣ် အဝဲကျဲးစၢး မၤဝဲ ဆူၣ်ဆူၣ် လီၤ. ဒီးပှၤဖိသၣ်တဖၣ် ဟးြပၢလိာ်ကွဲဒီး ကၠိဖိအဂၤတဖၣ် တဘျီတဘျီ ဒီး တအိၣ်လၢ ပှၤဖီလာ် ကဲၣ်ဆိးဘၣ်.

ဒီး တၢ်မၤသကိးတၢ် အသးအိၣ်ထီၣ် စ့ၢ်ကီးဝဲ ဆံးအါဆံးအါ န့ၣ် ဖျါထီၣ်ဝဲ တဘျီအံၤလီၤ. တဂီၤ ယီၣ်စွါ ကတိၤဃီၤ တၢ်လၢ ထဲလံၣ်ဖိ ဆူစီၤက့ၣ်အအိၣ်, “ဟဲလိၣ်, စီၤက့ၣ်, မ့ၢ်နၤဧါ. ယၤယီၣ်စွါ ကတိၤလီၤတၢ်နၤဧၢ, ခွါ ဖိမုၣ် အိၣ်ဖျဲၣ်မနၤကၢာ် နၤဧၢ, မ့ရ့ၣ် အိၣ်ဆူၣ် ဂ့ၤကစီဒီ. နဟဲအိၣ်သကိး တဘျးဘီၣ်. အီ, မ့ရ့ၣ်စံးဝဲ လၢပကဘၣ်ယုၢ်န့ၢ်ပဖိမုၣ် အမံၤဒ် နမိၢ်အမံၤ အသိးဒီး ပယုၢ်အီၤလၢ နီၢ်ထူ လံ.” စီၤက့ၣ်လဲၤဃ့ၢ်ကွၢ် မ့ရ့ၣ်တဘျးဝံၤ ဟဲက့ၤဝဲဒၣ်လီၤ. ကိးန့ၢ်ခၠူ၀ၣ် ဒီးတၢၣ်ပီၣ် တၢ်ဒီး စံးဝဲလၢ သါကပှ့ၤနွါမိၢ် အိၣ်လၢ ဖိဆံးတဒုလၢ အနုၢ်ထံဂ့ၤမး လၢမ့ရ့ၣ်အဂီၢ်လီၤ. ပှၤကၠိဖိ တဖၣ်နၢ်ဟူ တၢ်အံၤဒီး တၢၣ်ပီၣ်လိာ်အသး, ထၢဖှိၣ်သကိး တၢ်မၤဘူၣ် န့ၢ်စ့ခံကယၤ လွံၢ်ဆံယဲၢ် ထ့းကီၣ် လၢအတၢ်ဘူး တၢ်လဲ ဖိမၤန့ၢ်သကိးဝဲ အပူၤ န့ၣ်လီၤ. ဒီးလဲၤဟ့ၣ်စီၤဝဲလၢ စီၤက့ၣ်အစုပူၤဒီးစံး, “သရၣ်ဧၢ, ပတၢ်ဟ့ၣ်စှၤပသ့ၣ်ညါ ဘၣ်ဆၣ် ပအဲၣ်ဒိး ပာ်ဖှိၣ်အီၤလၢ နသကိး လၢနကပှ့ၤန့ၢ် နွါမိၢ်လၢ ပသရၣ်မုၣ် မ့ရ့ၣ်အဂီၢ် န့ၣ်လီၤ.” စီၤက့ၣ် ထံၣ်တၢ်အံၤဒီး အသးခု ဘူးကဟီၣ် ဘၣ်အသး တခီန့ၣ်လီၤ. ပှ့ၤန့ၢ်နွါမိၢ် ဟ့ၣ်ဘၣ်ဝဲ ယဲၢ်ကယၤ ထ့းကီၣ်ဒီး လဲၤဆှၢန့ၢ် မ့ရ့ၣ်ဒီး လၢတၢ်သးမုာ် အပူၤတဲပၠးအီၤလၢ ဖိသၣ်တဖၣ် အတၢ်ဟ့ၣ်န့ၣ်လီၤ. မ့ရ့ၣ် အသးဘၣ်ထံး အါမးဒီး အမဲာ်ထံ လီၤဘၣ်သးဝဲလီၤ.

စီၤက့ၣ် အတၢ်မၤအံၤ တဘိးဘၣ်သ့ၣ်ညါဝဲ သနာ်က့, တၢ်မၤဘိးဘၣ် သ့ၣ်ညါ လီၤဒၣ် အသးလီၤ. ပဒိၣ်ဖးဒိၣ် ဒီး စီၤပၤဒၣ်လဲာ် နၢ်ဟူဘၣ် အဂ့ၢ်, ဟဲကွၢ်ကီ အတၢ်မၤလီၢ်, ဟဲကွၢ် ပှၤဖိသၣ်တဖၣ် ဖဲအဖံး အမၤ တၢ်အခါ, စံးဂ့ၤစီၤက့ၣ် ဒီး ဟ့ၣ်ဆူၣ်ထီၣ်အသးဒီး စံးဝဲလၢ သါသးအိၣ် မၤစၢၤ တၢ်မၤအံၤ တသ့ဖဲ သါသ့ စ့ၢ်ကီးလီၤ. ဖဲစီၤပၤ ရၣ်မၣ် ဟဲကွၢ်ကီ တၢ်အခါန့ၣ်, ခၠူ၀ၣ်ဒီး အအီခဲးစြထၣ် ဒ့န့ၢ်အူန့ၢ် အတၢ်ဒီး ကနၣ်ဝဲမုာ်မးလီၤ. ခၠူ၀ၣ်, မ့ၢ်လၢစီၤက့ၣ်မၢအီၤအဃိ, ဒ့န့ၢ်စီၤပၤလၢ ဝါဧိၤလံန် ထဲတဂၤဧိၤ, ဒီး စီၤပၤမၢကဒီး အဒ့ဝဲ တဘျုးယုၢ်ဒံး လၢ အကနၣ်ဝဲ မုာ်အဃိန့ၣ်လီၤ.

စီၤပၤရၣ်မၣ် စံး, “စီၤက့ၣ်ဧၢ, ဆှၢန့ၢ်ယၤ ခၠူ၀ၣ်ဒီး အီခဲးစြထၣ် တလါတဘျီဖဲ လါဒိၣ်လါပှဲၤနံၤမီၣ် တဘျီအဂီၢ် ယကဟ့ၣ်အီၤ ခံကယၤ ထ့းကီၣ်လီၤ.”
စီၤက့ၣ်စံးဘျုးက့ၤစီၤပၤ ဒီးအၢၣ်လီၤအတၢ်ဃ့ လၢတၢ်သးခု အပူၤလီၤ.

ဒ်ညီနုၢ်အသိး တၢ်ပရၢတဖၣ် စိာ်ဝ့ၤဝီၤ တၢ်ကစီၣ် ဘၣ်ဃး စီၤက့ၣ်အတၢ်မၤ အဂ့ၢ်, စီၤပၤ အတၢ်လဲၤကွၢ် ကီအီၤ, ဒီးငါ အအီခဲးစြထၣ် အဂ့ၢ် တဖၣ်လီၤ. တဘျီအံၤ ခၠူ၀ၣ် အတၢ်မၤအါလံ. အီခဲးစြထၣ် ဘၣ်တၢ် ငါဝ့ၤဝီၤ အီၤသကုၤဆးဒး ဘီကီာ် အဝ့ၢ်ပူၤလီၤ. ပှၤကညီန့ၣ် တလီၤဆီဒီး တၤအုးဘၣ်. ကွၢ်လိမၤဒိး လိာ်ဒၣ် သးလီၤ. ဒီးလီၤဆီဒၣ်တၢ် ပှၤဖးဒိၣ်တဖၣ် အတၢ်မၤန့ၣ် ပှၤလူၤမၤဒိး အီၤလီၤ. ပှၤလီၢ်ဒိၣ်တဖၣ်ဧၢ, သုမူဒါ ဒိၣ်မးလဲၣ်.

စီၤက့ၣ်န့ၢ်ဘၣ် လံာ်ပရၢ တဘျုးဘ့ၣ် လၢတံၤသကိး ခီလ့ၣ်ကၠိဖိလီၢ်လံၤ ဒီးပှၤဂၤတဖၣ် အအိၣ်တခီ, ကတိၤဒိၣ်အီၤဒီး သံကွၢ်လၢ အဘၣ်မၤစၢၤအီၤ ဒ်လဲၣ် အဂ့ၢ်လီၤ. စီၤက့ၣ်စံးဆၢ စံးဘျုးက့ၤအီၤခဲလၢာ်, ဒီးတဲအီၤ တကူၢ်သ့ၣ်လၢ အလီၢ်မ့ၢ်အိၣ် သါကဘိးဘၣ် သ့ၣ်ညါက့ၤအီၤလၢခံ န့ၣ်လီၤ.

တနံၤတခီၣ်, စီၤက့ၣ်လဲၤဟးလိာ်ကွဲ အိၣ်သကိး သးပှၢ်တီဝူ လၢအတၢ်မၤလီၢ် ဒီးဘၣ်သဂၢၢ်လိာ်သးဒီး ပဒိၣ်ဖးဒိၣ် ကွၢ်ထွဲ စံာ်လီၢ်ပှဲၤလီၢ် တဖၣ်အခံ တဂၤလီၤ. သးပှၢ်မၤသ့ၣ်ညါ စီၤက့ၣ် လၢပဒိၣ်ြဖၣ်နၣ်လွဲ အံၤဒီး ပဒိၣ်နူးဆဲး အီၤဝံၤ ကတိၤဒိၣ်အီၤလၢ အကဲထီၣ် ယူၣ်တရၣ် ခၠဲပယဲၣ် ကျီနးဒီး လၢအတၢ်မၤစၢၤ ပှၤဖိၣ်ဃဲ ဖိတဖၣ်အဃိ လီၤ.

ြဖၣ်နၣ်လွဲ စံး, “ပှၤထူစံာ်ဖိတဖၣ် ဖှီၣ်ဒိၣ်မးလီၤ. ပှၤအမျးကယၤ ၉၀ ဘျဲၣ်ခဲအံၤ အစံာ်လီၢ် စံာ်ပှဲၤရှူကွံာ် ဝဲဆူ ပှၤဒုးလိၢ်လီၤ စ့တဖၣ် အစုပူၤလံ. ပှၤဒုးလိၣ်စ့ဖိတနီၤ ဟံးန့ၢ် စ့အ့ၣ်အါတလၢကွံာ် ပဒိၣ် တၢ်သိၣ် တၢ်သီလီၤ. ဘၣ်ဆၣ် လၢ ဒုးလိၢ်စ့ လံာ်တၢ်အၢၣ်လီၤအပူၤတခီ ကွဲးဝဲထဲသိး တၢ်သိၣ်တၢ်သီ မၢအဟံးန့ၢ် စ့အ့ၣ်အသိး, တရံးမၤအါထီၣ် စ့မိၢ်ပှၢ် လၢလံာ်ခၠူး အပူၤလီၤ. ပှၤတဂၤ လၢစ့တကယၤ အဖီခိၣ် န့ၢ်အခွဲး ထဲကဟံးန့ၢ်စ့အ့ၣ် ၁၂ ထ့းကီၣ်လီၤ. ဟံးန့ၢ်ဝဲတခီ ၃၆ ထ့းကီၣ် ဒီးပၢနုာ်လီၤ ဝဲစ့မိၢ်ပှၢ်လၢ အဟ့ၣ်ဒုးလိၢ်ဝဲဒ် ၃၀၀ အသိးလီၤ. ပှၤတနီၤနီၤ ပှၤဟ့ၣ်က့ၤ အစ့တန့ၢ်ဘၣ်ဒီး တၢ်လိးအီၤလၢ ကွီၢ် ဒီးမၤနၢၤ ကွံာ် ပှၤလိၢ်စ့ဖိတဖၣ် ခီဖျိ လံာ်တၢ်အၢၣ်လီၤ အီလီၤတဖၣ်အဃိ ဟံးန့ၢ်ကွံာ်အစံာ်လီၢ်လီၤ.”

စီၤက့ၣ်သံကွၢ်အီၤ, “ဖါတံၢ်တၢ်ဒိၣ်ဧၢ, ပဒိၣ်သုးကျဲၤ က့ၤတၢ်ဂ့ၢ်အံၤ ကျဲတအိၣ် နီတဘိဘၣ်ဧါ.”
“ကျဲအိၣ်တဘိဧိၤ ထဲလၢ ပဒိၣ်ကပှ့ၤက့ၤစံာ် တဖၣ်လၢ ပှၤစ့ကစၢ်တဖၣ် အစုပူၤ ဒီး ကွၢ်ဟ့ၣ်နီၤလီၤ ဝဲသ့သ့ဘၣ်ဘၣ် န့ၣ်လီၤ. ဘၣ်ဆၣ် ကလိၣ်စ့ အကကွဲၢ်ယဲၢ်ကလီၢ် ဒီး ပဒိၣ်မၤတသ့ဘၣ်. စီၤပၤ အသးဆူၣ်မး ဘၣ်ဆၣ် ထံကီၢ်အစ့တအိၣ်ဘၣ်.”

စီၤက့ၣ်နၢ်ဟူ တၢ်ဂ့ၢ်အံၤဒီး အသးကိၢ်လူး မးလီၤ. ပာ်လီၤသးလၢ မ့ၢ်သ့ဒီး ကမၤတၢ်တမံၤမံၤ လၢတၢ်ဂ့ၢ် တမံၤအံၤ အဂီၢ်လီၤ. စံးဝဲလၢ အသးကံၢ်ပူၤ, ပှၤမၤနၢၤမၤကျံၤတၢ် တတီတလိၤတဖၣ်အံၤ ပကဘၣ်ဃုကျဲလၢ ကဘၣ်စံၣ်ညီၣ်အီၤ ဒီးမၢအမၤဘၣ်က့ၤ တၢ်အဂီၢ် န့ၣ်လီၤ.

တဟါန့ၣ် ဒီးကထၢၣ်ခၠါလ့ၣ် ဟဲအိၣ်သကိးစီၤက့ၣ်ဒီး စီၤက့ၣ်တဲပၠးအီၤ လၢတၢ်ဂ့ၢ်အံၤလီၤ.
ဒီးကထၢၣ်ခၠါလ့ၣ် နံၤထီၣ်ဒီး လၢတၢ်ကလိာ်ကလာ်အပူၤ စံးဘၣ်စီၤက့ၣ်, “စီၤက့ၣ်ဧါနၤ, မၤဒ် ပှၤအမဲရကၤဖိ ကရၢခူသူၣ် ခ့ၣ်, ခ့ၣ်, ခ့ၣ်, အသိးဘီၣ်နၤ.”

စီၤက့ၣ်သံကွၢ်အါထီၣ်အီၤ ဘၣ်ဃး ခ့ၣ်, ခ့ၣ်, ခ့ၣ် အဂ့ၢ်အကျိၤလီၤ. ကရၢအံၤ သူတၢ်စုဆူၣ်ခီၣ်တကး လၢပှၤအၢပှၤသီလၢ ပဒိၣ်တစံၣ်ညီၣ်အီၤ, မ့ၢ်လၢ သဲစးဖီၣ်အီၤန့ၢ် တသ့ဘၣ်အဃိတဖၣ်လီၤ. အဝဲသ့ၣ် ကၤဆ့ကၤဖးထီ ဖျီၣ်ဘၢမဲာ်ဒီး ခိၣ်ဖျီၣ်ဝါ, ပာ်ဖျါထီၣ်ထဲ မဲာ်သၣ်ချံခံတိၣ်, ဒီးလဲၤဖီၣ်န့ၢ် ပှၤအၢပှၤသီတဖၣ်, စိာ်ကွံာ်အီၤဆူ တၢ်လီၢ်တဒၢတပူၤပူၤ ဒီးဖဲန့ၣ် စံၣ်ညီၣ်အီၤ လီၤ. တဘျီဘျီ ဘ့ၣ်လီၤကွံာ် ပှၤကူပှၤကၤ, လံာ်ဝဲ လၢရ့ၣ်နီၣ်ထုး စဲဘူးဒီး ထွၣ်တလ့ၣ်ဝဲလၢ ထိၣ်ဆူၣ်ကျါ, ထိၣ်ဆူၣ် စဲဘူးအီၤဒီဂၤ ဝံၤ ပျၢ်ကွံာ်ဝဲလီၤ. တဘျီဘျီ ဖျ့ပှၤ တီၢ်ပှၤ, ဒီး တဘျီဘျီ စၢသံ ဒၣ်လဲာ်ပှၤလီၤ.

ဒီးကထၢၣ် ခၠါလ့ၣ်ကတိၤကလီာ်ကလာ် တၢ်လီၤ. သနာ်က့ တၢ်သးကိၢ်လူးမၤတချဲ စီၤက့ၣ်အသးပူၤ ဒီးကဲထီၣ် ဟီၣ်ခိၣ်ညၣ်ထ့ၣ် လၢတၢ်ကတိၤအံၤ အဂီၢ်လီၤ. ဒီးကထၢၣ် ခၠါလ့ၣ် တသ့ၣ်ညါထွဲ အတၢ်မၤ အခံဘၣ်.

တဟါ ခၠူ၀ၣ် တဲပၠးစီၤက့ၣ်လၢ တၢ်ပရၢ, “ဘီကီာ်ကိးနံၤဒဲးတၢ်ပရၢ” ဒီးဒုးနဲၣ်စီၤက့ၣ်လၢ ပှၤအၢ အခိၣ် နဲၣ်ဘူနး တဂၤ ဘၣ်တၢ်ဖီၣ်အီၤလၢ အဟုၣ်ဆါကသံၣ်သူ, တၢ်လဲၤထံၣ်န့ၢ် ကသံၣ်သူလၢ အအိၣ်ဟံၣ်ပူၤ အပီၢ် တကထိညါန့ၣ်လီၤ.

“စီၤက့ၣ်ဧၢ, ယကကဲထီၣ် ဝံတဂၤ ဒီးဟီတၢ်တဘီနဲာ်. ကွၢ်တၢ်မူးအဝဲအံၤ ကဘၣ်ထူၣ်ဖျဲးဝဲ သပှၢ်တၢၢ်လီၤ. နဲၣ်ဘူနး ဘၣ်တၢ်ဖီၣ်အီၤ အဘျီတစှၤလၢၤဘၣ်. ဖၢလီၤစ့, အပျဲၢ်တဖၣ် ဟးမၤပျံၤ ပှၤဟ့ၣ်တၢ်အုၣ်သး သ့ၣ်တဖၣ်ဒီး ထူၣ်ဖျဲးကွံာ် ဒၣ်ကိးဘျီဒဲးလီၤ. စးထီၣ်လၢ စံၣ်ညီၣ်ကွီၢ် ပၢၢ်လၢ ပဒိၣ်တၢ်ခ့တၢ်ပှၤ အဆံးကတၢၢ် န့ၣ် ကပှ့ၤန့ၢ်ဝဲလၢ စ့လီၤ. တမျာ်ဖိဒ်သိးယၤ အကလုာ်အံၤ, ပကၢကီၣ်တိၢ်ခံဘ့ၣ် တၢ်ဖီၣ်ပှၤန့ၢ် ပလီၤဆူ ကပိၤပူၤချ့ကတၢၢ်လီၤ. စ့အသဟီၣ် ဆူၣ်မးနၤဧၢ. ယကတဲနၤ အါထီၣ်ဘၣ်ဃး ဘူနး အဂ့ၢ်တစဲး, အဝဲကဲဒိၣ် ထဲသိး ဃၣ်ဃၣ် သးပှၢ်တီဝူလီၤ. အပျဲၢ်အိၣ်လၢ အကယၤလီၤ. ဆါကသံၣ်သူ, ဆါအီၣ် ပိာ်မုၣ်, ဒိတမျာ်, အပျဲၢ်တဖၣ် ဘုးပှၤထၢၣ် လၢလ့ၣ်မ့ၣ် သန့, တၢ်ြပၢကသ့ၣ်လီၢ် ဒီး ပှၤကတံာ်လီၢ်တဖၣ်, တၢ်လၢ စ့ကန့ၢ် အကျိၤချ့ချ့ တတီတလိၤခဲလၢာ်န့ၣ် မၤဝဲလီၤ. ဘုၣ်အီၣ် ပလံးအခိၣ် တဖၣ်အဘူးအလဲ တလါလီၤလၢတဘျုးကလး, မၤန့ၢ်ဝဲ တခီ တဘျုးကလီၢ်နၤဧၢ. ကွၢ်ပိာ်မုၣ်ဖိသၣ် မ့ၢ်ဂ့ၤ တဂၤဂၤ, ဖီၣ်န့ၢ်ဝဲ မၤဟးဂီၤဝဲဝံၤ ဒုးကဲထီၣ်အီၤလၢ ဃဲသဲမုၣ် လီၤ. အပျဲၢ်အိၣ်အါဂၤ လၢအဟးဃုန့ၢ်အီၤ ပိာ်မုၣ် လိၣ်ဘိ တဖၣ်လၢ အဝဲ ကမၤဟးဂီၤအီၤ ဒ်သိးအံၤ လီၤ.”

စီၤက့ၣ် တစံးတၢ်နီတမံၤဘၣ်. ဘၣ်ဆၣ် အသးပူၤတခီ မ့ၣ်အူကဲၤကပျီၤ မးလီၤ.
လၢခံတနွံ, ခၠူ၀ၣ် ဟဲဃ့ၢ်ပၠး ကဒီးအီၤ, “ဘီကီာ် ကိးနံၤဒဲးတၢ်ပရၢ” တဘ့ၣ်ဒီးစံး, “ကနၣ်, စီၤက့ၣ်ဧၢ, နဲၣ်ဘူနး ထူၣ်ဖျဲးကွံာ်လံ. ပဒိၣ်အပီၢ်ရီလၢ အမၤတၢ်မူး ထုးကွံာ်တၢ်မူးလၢ ဘူနး အဖီခိၣ်လံ.”

တနၤန့ၣ် စီၤက့ၣ် မံဝဲတန့ၢ်ဘၣ်. မုၢ်ဆ့ၣ်ဝဲ ဃၣ်ဃၣ်မး မံသပ့ၤဝဲလီၤ. အနၢ်ပူၤ သီၣ်ဒၣ် “ခ့ၣ်, ခ့ၣ်, ခ့ၣ်” လီၤ.