ခူၣ်နီၢ်လ့ဒီးနီၢ်မုၣ်အ့အ​ပူ

လၢပျၢၤန့ၣ်ပှၤဒီမါ၀ၤအိၣ်၀ဲခံဂၤလီၤ.အ၀ၤန့ၣ်အမံၤလၢစီၤခူၣ်နီၢ်လ့ဒီးအမါတခီအမံၤမ့ၢ်၀ဲနီၢ်မုၣ်အ့လီၤ.အ၀ဲ

သ့ၣ်ထီၣ်ပှၢ်၀ံၤအလီၢ်ခံတၢ်စံး၀ဲလၢခူၣ်နီၢ်လ့တဲဘၣ်အမါလၢသါကလဲၤအီၣ်ကၤနွံနံၣ်နွံလါဒီးတချုးအလဲၤတၢ်
ဒံးဘၣ်အခါလၢမုၢ်နၤမံမီၢ်၀ဲလၢကလီၤဘံအထီးလီၤ.လၢတၢ်န့ၣ်အဃိဖဲမုၢ်ဆ့ၣ်ထီၣ်အခါအ၀ဲဘၢၣ်န့ၢ်အမါလၢ
ထီးကျိးလၢ၀ၣ်ကျုၣ်နွံကပိာ်တဘိဒီးအပူၤတခီအိၣ်ဒၣ်ထဲတကပိာ်န့ၣ်လီၤ.

ဘၢၣ်ထီးကျိးဆံယဲၢ်ကပိာ်
မၤလိာ်ဖီအတၢ်တကျိး

၀ံၤဒီးမၤလိာ်အမါနီၢ်မုၣ်အ့လၢနွံနံၤနွံနၤအတီၢ်ပူၤန့ၣ်တဘၣ်ပျၢ်လီၤအထီးဘၣ်၀ံၤဒီးအ၀ဲလဲၤတၢ်လီၤ.

ခူၣ်နီၢ်လ့မံမီၢ်တၢ်ကီ
နီၢ်မုၣ်အ့သုတပျၢ်ထီး

အ၀ဲလဲၤတုၤလၢပှၤဟံၣ်တဘျီန့ၣ်စးထီၣ်ပိာ်နၢ်ဒံး,ခိၣ်ကျီၤဒီးလဲၤကူၣ်လဲၤမၤကၤတၢ်န့ၣ်လီၤ.အမါနီၢ်မုၣ်အ့တ
ခီအိၣ်တီၢ်လၢလီၢ်ခံဒီးဒုးဃာ်အထီးပှဲၤထီၣ်၀ဲဃုနံၤလံ,အိၣ်တီၢ်က့ၤထဲတနံၤန့ၣ်အ၀ဲသးပ့ၤနီၣ်ဘၣ်အသးအဃိ
ပျၢ်လီၤဘၣ်အထီးလီၤ. သတးဒီးတုၤမ့ၢ်မုၢ်ဘၣ်ဖီၣ်ထီးဖီၣ်ဆီတဘျီတကျိာ်က့ၤအထီးဒီးအထီးတဟဲက့ၤဘၣ်, တကျိာ်ထီးကျိးသဘှံးကွံာ်၀ဲနွံကပိာ်တဘျီန့ၣ်အထီးတဒုဟဲက့ၤတွံၢ်န့ၢ်အီၤလၢကလီၤတဘိ,ထဲသိးဒီးချီၣ်မုၢ်
ထူတလံးအသးတဘိန့ၣ်လီၤ.ဖဲန့ၣ်အ၀ဲထံၣ်လၢကလီၤဘံဃာ်အထီးတ၀ီန့ၣ်လီၤ.

ပျၢ်ထီးတဂ့ၤနပျၢ်ထီး
ထီးဟဲက့ၤန့ၢ်ဒီးကလီၤ
တပိၢ်သဲလၢ၀ၢ်အံးအံး
ထီးဖါဟဲက့ၤကလီၤဘံ
တပိၢ်သဲလၢ၀ၢ်အီးအီး
ထီးဖါဟဲက့ၤန့ၢ်ကလီၤ

နီၢ်မုၣ်အ့လဲၤကိးန့ၢ်အပှၤဟံၣ်ဖိဃီဖိဒီးမၢအမၤသံကွံာ်ကလီၤန့ၣ်လီၤ.ပှၤဟံၣ်ဖိဃီဖိတဖၣ်ကျီကျီဆဲးဆဲးက
လီၤတဘိန့ၣ်ဘၣ်ဆၣ်တနုာ်ဘၣ်,ဒီးကလီၤတဘိန့ၣ်တလီၤဘှၣ်ဘၣ်,ဘံဃာ်ထိးကျၢၤမုဆုလီၤ.တုၤပှၤမၤ
တသ့တဘၣ်နီတပူၤလၢၤဘၣ်န့ၣ်နီၢ်မုၣ်အ့အနီၢ်ကစၢ်ဒၣ်၀ဲဟံးန့ၢ်ထိးအနီၣ်ဂိာ်န့ၣ်ဒီးတီၢ်ကလီၤတဘိန့ၣ်လီၤ. ကလီၤတခီထိၣ်ကဆှၣ်လီၤကွံာ်အသးလၢထီးအလိၤ၀ံၤဒီးဘံထီၣ်က့ၤလၢနီၣ်မုၣ်အ့တဘျီဃီက့ၤစိာ်နုာ်၀ဲဆူ
အပူၤန့ၣ်လီၤ.

ထီးနီၣ်ဂိာ်ဒိဂုၢ်မဲးမဲး
ဂုၢ်လီၤဆှၣ်ဘံနီၢ်ရဲးရဲး
ထီးနီၣ်ဂိာ်ဒိဂုၢ်မီးမီး
ဂုၢ်လီၤဆှၣ်ဘံနီၢ်ရီးရီး
ဆဲးတိၢ်ထီးလၢလုၣ်စီၢ်ဘိ
ဂုၢ်လီၤဆှၣ်ဘံထီၣ်နီၢ်လိၤ
ဆဲးတိၢ်ထီးလၢလုၣ်စီၢ်လွဲ
ဂုၢ်လီၤဆှၣ်ဘံနီၢ်ရဲးရဲး
ဆဲးတိၢ်ထီးလၢသ့ၣ်မုၣ်ဒ့
ဂုၢ်လီၤဆှၣ်ဘံနီၢ်မုၣ်အ့

အန့ၣ်တဘျီပှၤမၤတသ့နီတဂၤလၢၤဘၣ်.ပှၤတဲလိာ်သးလၢကဘၣ်လဲၤကိးန့ၢ်က့ၤအ၀ၤခူၣ်နီၢ်လ့န့ၣ်လီၤ.ပှၤ
လဲၤလၢပှၤကညီန့ၣ်တချုးတၢ်ခံဘၣ်အဃိပှၤမၢထိၣ်လွံၢ်တဘ့ၣ်လဲၤကိးက့ၤခူၣ်နီၢ်လ့လီၤ.

တၢ်ဂုၤတၢ်ဂၤလဲၤတချ့
မၢထိၣ်လွံၢ်လဲၤအီၣ်ဂီာ်က့ၤ
တၢ်ဂုၤတၢ်ဂၤလဲၤတညီ
မၢထိၣ်လွံၢ်လဲၤဂီာ်က့ၤအီၤ

ခူၣ်နီၢ်လ့လဲၤပိာ်နၢ်ဒံး
လၢခံအမါကလီၤဘံ
ခူၣ်နီၢ်လ့လဲၤပိာ်ခိၣ်ကျီၤ
လၢခံအမါကလီၤကွီၤ

တုၤမ့ၢ်ထိၣ်လွံၢ်တဘ့ၣ်လဲၤတုၤ၀ဲလၢပှၤဟံၣ်တဘျီစီၢ်လီၤအိၣ်၀ဲလၢပှၤဒၢးခိၣ်န့ၣ်လီၤ.ဖဲန့ၣ်အခါဘၣ်လၢပှၤအီၣ်
မူးတမူးအဃိပှၤပှီၢ်ဒၢပှီၢ်မိၤဒီးမၤလုၢ်အုၣ်ထါ, သီၣ်သြထုးမးလီၤ. ထိၣ်လွံၢ်တဘ့ၣ်ပှ့ၤထီၣ်၀ဲလၢဟံၣ်ခိၣ်ဒုး,

တြကုကု-တြကုကု
ခူၣ်နီၢ်လ့ဟဲက့ၤဟဲက့ၤ
ကလီၤဘံသံနီၢ်မုၣ်အ့
ခူၣ်နီၢ်လ့က့ၤလီၤက့ၤလီၤ
နီၢ်မုၣ်အ့ကလီၤဘံအီၤ

ပှၤနၢ်ဟူ၀ဲလၢထိၣ်လွံၢ်တဘ့ၣ်ပှ့ၤထီၣ်သီၣ်လီၤလးမးအဃိအ၀ဲသ့ၣ်တဲလိာ်အသးလၢသီၣ်လၢၤတဂ့ၤ,ကနၣ်
ကွၢ်ထိၣ်လွံၢ်ပှ့ၤတဘ့ၣ်န့ၣ်တက့ၢ်.အဃိပှၤအိၣ်ဘှီၣ်၀ဲခဲလၢာ်ဒီးကနၣ်၀ဲလီၤ.ထိၣ်လွံၢ်တဘ့ၣ်ပှ့ၤထီၣ်၀ဲဒ်အလီၢ်
လီၢ်အဃိပှၤသ့ၣ်ညါလၢအကိးက့ၤခူၣ်နီၢ်လ့လီၤ.ခူၣ်နီၢ်လ့ဟဲက့ၤတုၤဒီးတုၤမ့ၢ်အက့ၤကဒါက့ၤတုၤဆူအဟံၣ်
တဘျီအ၀ဲဒိထီၣ်ထါဒီးစံး၀ဲ,

နီၢ်မုၣ်အ့အနၢ်တလိၤ
သံလၢထီးဖံးမဲၢ်အဃိ
နီၢ်မုၣ်အ့အနၢ်တဘှါ
သံလၢထီးဖံးမဲၢ်အတွး

အန့ၣ်တဘျီခူၣ်နီၢ်လ့ဟံးန့ၢ်ဘီကဆုနွံဘ့ၣ်ဒီးလဲၤခူၣ်က့ၤအမါနီၢ်မုၣ်အ့လၢကလီၤအပူၤန့ၣ်လီၤ. ခူၣ်၀ဲကၢ်ဘီကဆုနွံဘ့ၣ်လၢာ်ဒီးထံၣ်စိ၀ဲနီၢ်မုၣ်အ့အိၣ်လၢကလီၤအကျီၤပူၤ,ဒီးလ့ၢ်ဘဲလၢကဟၣ်ထူကဟၣ်စ့
န့ၣ်လီၤ.

ခူၣ်က့ၤမုၣ်အ့ခူၣ်တူတူ
ခူၣ်ဘီဆုနွံဘ့ၣ်ကၢ်တူာ်
ဘီကဆုနွံဘ့ၣ်ကၢ်တူာ်
ကၢ်လၢမုၣ်အ့အဂီၢ်ပူၤ

မုၣ်အ့အိၣ်လၢဂုၢ်ကျီၤပူၤ
လ့ၢ်ကဟၣ်စ့ကဟၣ်ထူ
မုၣ်အ့အိၣ်လၢဂုၢ်ကျီၤသး
လ့ၢ်ကဟၣ်စ့ကဟၣ်ထး

ခူၣ်ကဒီး၀ဲတုၤအဘီခိၣ်စူနွံြကးနွံဒၢန့ၣ်ကၢ်လၢာ်စီ, ဘၣ်ဆၣ်ခူၣ်က့ၤ၀ဲတန့ၢ်လၢၤဘၣ်အ ဃိဒိထီၣ်ထါဒီးစံး၀ဲဒၣ်,

ဘီကဆုနွံြကးနွံဒၢ
ခူၣ်က့ၤမုၣ်အ့တန့ၢ်လၢၤ
ဘီကဆုနွံဒၢနွံြကး
ခူၣ်က့ၤမုၣ်အ့တန့ၢ်ဘၣ်

ဒီးနီၢ်မုၣ်အ့စံးဆၢအီၤ,

ခူၣ်မုၣ်အ့စီးခွဲးစီးခွဲး
ဘီတကၢ်ကၢကၢ်န့ၢ်၀ဲ
ခူၣ်မုၣ်အ့စီးခွီးစီးခွီး
ဘီတကၢ်ကၢကၢ်န့ၢ်အီၤ

ကလီၤတခီတဲဘၣ်ခူၣ်နီၢ်လ့ဒီးတဲ၀ဲဒၣ်,နမ့ၢ်ထိလီၤန့ၢ်ယၤလၢနကိာ်ဘိအသွံၣ်န့ၣ်,ယကပျၢ်ထီၣ်က့ၤနီၢ်မုၣ်အ့
လီၤ.သူလီၤလ့တခီကျီသံလီၤထွံၣ်,ကျီသံလီၤထီးဒီးထိလီၤန့ၢ်၀ဲလၢအသွံၣ်,ကလီၤနၢ၀ဲ၀ံၤဒီးစံး၀ဲလၢတမ့ၢ်ခူၣ်
နီၢ်လ့အသွံၣ်ဘၣ်အဃိတအီ၀ဲဘၣ်.တပျၢ်ထီၣ်က့ၤစ့ၢ်ကီးနီၣ်မုၣ်အ့ဘၣ်.ခူၣ်နီၢ်လ့ကျီသံကဒီးကျီၢ်,ပနၢ်ဒီးထိလီၤ
န့ၢ်ကဒီး၀ဲအသွံၣ်,ကလီၤနၢ၀ဲဒီးသ့ၣ်ညါ၀ဲလၢအမ့ၢ်ကျီၢ်ပနၢ်အသွံၣ်အဃိတပျၢ်ထီၣ်နီၢ်မုၣ်အ့ဒံးဘၣ်.မၤ၀ဲတသ့
နီတမံၤလၢၤဘၣ်အဃိအ၀ဲဒီၣ်လီၤအနီၢ်ကစၢ်ဒၣ်၀ဲအစုနၢတဘိဒီးထိလီၤ၀ဲအသွံၣ်လၢကလီၤအပူၤန့ၣ်လီၤ.
ဘၣ်ဆၣ်ကလီၤတဲ၀ဲလၢတမ့ၢ်အကိာ်ယူၢ်ဘိအသွံၣ်ဘၣ်အဃိတပျၢ်ထီၣ်က့ၤနီၢ်မုၣ်အ့ဘၣ်.လၢခံကတၢၢ်န့ၣ်ခူၣ်
နီၢ်လ့ကူးလီၤအကိာ်ဘိဒီးသံ၀ဲဒၣ်န့ၣ်လီၤ. အန့ၣ်တဘျီကလီၤပျၢ်ထီၣ်က့ၤနီၢ်မုၣ်အ့လီၤ.

ဒီၣ်လီၤအစုနၢခီၣ်နၢ
တၢ်သးကညီၤတအိၣ်လၢၤ
ဒီၣ်လီၤအစုညါခီၣ်ညါ
တၢ်သးကညီၤတအိၣ်ဘၣ်

တုၤမ့ၢ်နီၢ်မုၣ်အ့ဟဲက့ၤထီၣ်က့ၤတုၤလၢခိတဘျီ,တီၢ်သံလီၤအထီး,ခွဲၣ်န့ၢ်၀ဲအသိပှဲၤမီပီၤသၢဆံဒီး၀းတံၢ်၀ဲအခိၣ်
ကျီသလီ၀ံၤဒီးဒၢၣ်န့ၢ်ကဒီးထံပှဲၤမီအပီၤသၢဆံ၀ံၤဒီးစၢတံၢ်၀ဲအခိၣ်ကျၢၤကျၢၤန့ၣ်လီၤ.တုၤမ့ၢ်ပှၤလဲၤကုၢ်ခူၣ်နီၢ်
လ့န့ၣ်ပှၤလဲၤစိာ်ဃုာ်၀ဲဒီးသိအမီသၢဆံဒီးထံအမီသၢဆံန့ၣ်လီၤ.ပှၤစးထီၣ်ကုၢ်ခူၣ်နီၢ်လ့ဒီးဘၣ်ဖဲမ့ၣ်အူကပျီၤ
ထီၣ်အခါနီၢ်မုၣ်အ့ကူၣ်ထီၣ်တၢ်ဒီးစံးဘၣ်ပှၤလၢ,ကွၢ်ကွၢ်လံာ်ဖးဒိၣ်တၢၤ၀့ၤ၀ီၤလၢပခိၣ်ဒီတဘ့ၣ်န့ၣ်တက့ၢ်.ဖဲပှၤ
ကွၢ်ထီၣ်တၢ်အခါအ၀ဲခွ့လီၤဆူမ့ၣ်အူပူၤန့ၣ်လီၤ. ​ မီလၢပှၤဘံတံၢ်ဃာ်အခိၣ်ကျၢၤကျၢၤတဖၣ်န့ၣ်ပှၤဘီၣ်ထီၣ်
ဘၣ်ကီအဃိအါတက့ၢ်ပှၤဟံးန့ၢ်​ လၢအခိၣ်ထိးကျီတဖၣ်န့ၣ်လီၤ.​ အဃိမီလၢပှၤဟံးန့ၢ်တဖၣ်ဘၣ်လၢသိအမီ
အါတက့ၢ်အဃိဖဲပှၤလဲၤလူလီၤလၢမ့ၣ်အူပူၤအခါမ့ၣ်အူတပျီၤဒိၣ်န့ၢ်အလီၢ်ဒီးခူၣ်နီၢ်လ့ဒီးနီၢ်မုၣ်အ့အူအီၣ်ကွံာ်
၀ဲခံဂၤလၢာ်န့ၣ်လီၤ.ဖဲနီၢ်မုၣ်အ့ဘျုးလီၤအသးအခါကလီၤတိစၢၤက့ၤနီၢ်မုၣ်အ့စ့ၢ်ကီးလီၤ.ဘၣ်ဆၣ်မ့ၢ်လၢမ့ၣ်အူ
ကဲၤကပျီၤဒိၣ်ထီၣ်အဃိတိစၢၤက့ၤ၀ဲတနၢၤလၢၤဘၣ်.လၢတၢ်န့ၣ်အဃိပှၤသးပှၢ်တဲစိၤ၀ဲလၢကလီၤန့ၣ်အမဲၢ်စိး
ခံအိၣ်က့ၤဃုမၢၢ်တၢၢ်လီၤဂာ်လၢမ့ၣ်အူအီၣ်အီၤမ့ၢ်လၢလၢပျၢၤန့ၣ်ကလီၤတိစၢၤနီၢ်မုၣ်အ့လီၤဘျုးလၢမ့ၣ်အူပူၤ,
ခွံခွးထီၣ်မ့ၣ်အူလၢအမဲၢ်ဒီးအမဲၢ်အိၣ်က့ၤဃုမၢၤတၢၢ်လီၤဂာ်မ့ၣ်အူအီၣ်တုၤမုၢ်မဆါတနံၤအံၤန့ၣ်လီၤ.

ဟံး​န့ၢ်​အီၤ​လၢကညီတၢ်စံၣ်ဃဲၤတဲဃဲၤတဖၣ်လၢကျိၣ်တၢ်ရၤလီၤလံာ်လဲၢ်ကရူၢ်ထုးထီၣ်ဝဲ
http://www.piemmamure.org/2011/06/blog-post_05.html