ဆၢဒီးသဘျုၣ်တၢ်​ဃဲၤ​ပူ

ပတဲတၢ်လၢပျၢၤပှၤဒီတခွါခံဂၤလၢအမ့ၢ်စီၤတီလုးဒီးနီၢ်ဒွဲၣ်န့ၣ်အမိၢ်အပၢ်ခံခီလၢာ်အၢၣ်လီၤအီလီၤလိာ်အသး

လၢအဖိတချုးအိၣ်ဖျဲၣ်ဒံးဘၣ်တဂၤဂၤမ့မ့ၢ်ပိာ်ခွါ,တဂၤမ့မ့ၢ်ပိာ်မုၣ်န့ၣ်ကမၤသံၣ်မၤဖီ၀ဲဒီးတ့ဃုာ်ဖျီဃုာ်၀ဲလီၤ.
တုၤဖိသၣ်ခံဂၤအိၣ်ဖျဲၣ်ထီၣ်တစု,မ့ၢ်သပှၢ်တၢၢ်မုၣ်တဂၤခွါတဂၤသတးဒီးသူၣ်လီၤပလိာ်သးလီၤဂာ်အသးတုၤ
ဒၣ်လဲာ်ပှၤပာ်မံလီၤဖးအီၤတန့ၢ်ဘၣ်.ပှၤမ့ၢ်ပာ်မံလီၤလၢစုာ်တဖျၢၣ်ဃီအပူၤမးမံ၀ဲန့ၣ်လီၤ.တုၤအဒိၣ်ထီၣ်ဒီး
သ့ၣ်ညါအဲၣ်လိာ်ကွံလိာ်အသးတစဲးဘၣ်တစဲးစ့ၢ်ကီး,ဒိၣ်ထီၣ်တၢ်အဲၣ်အါထီၣ်ဒီးကဲသံၣ်ကဲဖီ,ဒ်ပစံးတၢ်အသိး
အဲၣ်ဘၣ်လိာ်အသးဒီးပှၤအီၣ်ဃံးအီၣ်ဃီၣ်န့ၢ်အ၀ဲသ့ၣ်န့ၣ်လီၤ.မ့မ့ၢ်တချုးပှၤတ့ဃုာ်ဖျီဃုာ်အ၀ဲသ့ၣ်ဒံးဘၣ်န့ၣ်
စီၤတီလုးကဘၣ်ဟးထီၣ်လဲၤကူၣ်လဲၤမၤကၤတၢ်ဆူထံယံၤကီၢ်ယံၤန့ၣ်လီၤ.တချုးအ၀ဲလဲၤတၢ်န့ၣ်မၤလိာ်ပာ်
၀ဲနီၢ်ဒွဲၣ်လၢယကလဲၤမၤကၤတၢ်ဒီးတဘၣ်သူၣ်တီသးဂ့ၤလၢပှၤဂုာ်ပှၤဂၤတဂ့ၤ,ယတၢ်ဖံးတၢ်မၤမ့ၢ်၀ံၤယကဟဲ
က့ၤဒီးပကအီၣ်မူးအီၣ်ပွဲဒီးတ့ဃုာ်ဖျီဃုာ်ပသးလီၤ.

တုၤနုၤတစုစီၤတီလုးဟးထီၣ်လဲၤတၢ်လီၤ.နီၢ်ဒွဲၣ်အိၣ်တ့ၢ်လၢတၢ်မုၢ်လၢ်ကွၢ်လၢ်အပူၤလီၤ.ဒ်အ၀ဲမ့ၢ်ပှၤဒိၣ်ထီၣ်
ဘၣ်ဒုၣ်ဘၣ်ဒ့ဂ့ၤမးတဂၤအသိးပှၤပိာ်ခွါအါဂၤဟဲတလိၢ်အီၤ,ဟဲကတိၤဟးဂီၤအသးလၢစီၤတီလုးမ့ၢ်ပှၤပစါဒ်
အံၤဒ်နုၤဒီးခဲအံၤဟါမူၤဟါမၢ်လံ,ဘၣ်ဆၣ်နီၢ်ဒွဲၣ်အသးကျၢၤမုဆုတကဒံကဒါနီတစဲးဘၣ်.ဘၣ်ဆၣ်လၢခံက
တၢၢ်လၢတၢ်မၤဆူၣ်အီၤအဃိနီၢ်ဒွဲၣ်ဘၣ်ဖျီအသးဒီးပှၤကီၢ်၀ၢ်ခီတဂၤလီၤ.ဖျီအသး၀ံၤက့ၤပိာ်အ၀ၤအခံဆူကီၢ်
၀ၢ်ခီလီၤ.က့ၤ၀ံၤတဘျုးသီဒီးစီၤတီလုးဟဲက့ၤတုၤလၢအတၢ်လဲၤတၢ်က့ၤအပူၤလီၤ.ဖဲစီၤတီလုးဟဲက့ၤပၢၢ်
ထီၣ်အခါပှၤတဲအီၤလၢနီၢ်ဒွဲၣ်ဖျီအသးဒီးပှၤကီၢ်၀ၢ်ခီ,ဒီးက့ၤပိာ်အ၀ၤအခံအိၣ်တဘျုးသီလံ.အန့ၣ်တစုစီၤတီ
လုးအသးတဟးဂီၤဘၣ်,လူၤက့ၤနီၢ်ဒွဲၣ်လီၤ.လူၤ၀ဲလၢကျဲထံၣ်ပှၤဒီမါ၀ၤမံအလီၢ်,ဖီမ့ၤဖီထံ,မၤမ့ၤတိၢ်မ့ၤစုၣ်ဒီး
မ့ၤတိၢ်ပံာ်အလီၢ်,ဒီးမ့မ့ၢ်နီၢ်ဒွဲၣ်တခီမုၢ်လၢ်၀ဲလၢစီၤတီလုးကဟဲလူၤအီၤအဃိပာ်တ့ၢ်တၢ်အီၣ်တစဲးတစဲးကိးပူၤ
ဒဲးလီၤ.အ၀ဲမံဘၣ်လၢနီၢ်ဒွဲၣ်ဒီမါ၀ၤအလီၢ်တဘျုးနၤညါဒီးအီၣ်တၢ်လၢနီၢ်ဒွဲၣ်ပာ်တ့ၢ်န့ၢ်အီၤ,ဘၣ်ဆၣ်ဖၣ်ဆါအ
လီၢ်အိၣ်မးခုၣ်ယုၢ်ကလာ်အဃိမုၢ်ဆ့ၣ်ထီၣ်ဘၣ်လူၤကဒီး၀ဲဒ်န့ၣ်တသီဘၣ်တသီလီၤ.ယံာ်ယံာ်ဒီးတဟါ
န့ၣ်ယီၢ်ကွၢ်ဖၣ်ဆါဒီးမၤအသးလၢၤလၢၤအဃိ,မံတစိၢ်တလီၢ်၀ံၤဂဲၤဆၢထၢၣ်ဂီၤဂီၤဒီးလူၤ၀ဲသ့တနံၤကျၢၤတုၤမုၢ်
ဟါလီၤန့ၣ်ထံၣ်ကဒီးတၢ်မံအလီၢ်တပူၤန့ၣ်လီၤ.

ဖဲန့ၣ်ထံၣ်၀ဲလၢမ့ၣ်အူအ့ၣ်အိၣ်ဒံးတစဲးဒီးအ၀ဲသးခုလၢတဘျီအံၤကချုးနီၢ်ဒွဲၣ်လီၤ.အဃိအ၀ဲတအိၣ်ဘှံးလၢၤ
ဘၣ်ဒီးလူၤ၀ဲလၢာ်သးဒ်သိးကချုးန့ၢ်အတၢ်အဲၣ်သးဘိနီၢ်ဒွဲၣ်တချုးအတုၤလၢပီၣ်လဲၣ်ပူၤဒံးဘၣ်အခါန့ၣ်လီၤ.
စီၤတီလုးလူၤသဘျိၣ်ဒီနၤညါတုၤမုၢ်ကပီၤထီၣ်တစုတုၤလၢပီၣ်လဲၣ်ကၢၢ်ခိၣ်ဒီးထံၣ်လၢနီၢ်ဒွဲၣ်အကဘီဟးထီၣ်
တရံးအခိၣ်ဆူပီၣ်လဲၣ်ခၢၣ်သးတခီလံလီၤ.စီၤတီလုး၀ၢ်ဃီၤနီၢ်ဒွဲၣ်,နီၢ်ဒွဲၣ်တခီကွၢ်ဃီၤစီၤတီလုးလၢတၢ်အဲၣ်ခံ
ဂၤလၢာ်အပူၤနာ်သက့တဂၤမးမၤတသ့လၢၤဘၣ်.ကဘီလဲၤတၢ်ယံၤထီၣ်လၢခိဆူပီၣ်လဲၣ်ခၢၣ်သးကွ့ၢ်ကွ့ၢ်လီၤ.
စီၤတီလုးအိၣ်တ့ၢ်ဖဲကဘီသန့ဒီးမၤတၢ်တဘျုးလါတုၤအန့ၢ်ကဘီအလဲဒီးဒိးထီၣ်ကဘီလဲၤလူၤကဒီးနီၢ်ဒွဲၣ်
တသါလီၤ.တုၤအတုၤကီၢ်၀ၢ်ခီထံၣ်နီၢ်ဒွဲၣ်ကွၢ်လီၤတၢ်လၢတၢးဖးထီတဖျၢၣ်အဖီခိၣ်အဃိမၤတသ့ကဒီးဘၣ်,
အဃိအ၀ဲပာ်လီၤအသးလၢကက့ၤကဒါက့ၤလီၤ.တချုးအ၀ဲက့ၤဒံးဘၣ်ဒီးမၤလိာ်နီၢ်ဒွဲၣ်ဒ်အံၤ,ခဲအံၤနပိာ်ယခံ
တသ့လၢၤဘၣ်,သနာ်က့လၢခံလၢလာ်နမ့ၢ်နၢ်ဟူဘၣ်ထိၣ်တလ့ဟဲပှ့ၤလၢနဟံၣ်အဖီခိၣ်ဒီးဟီၣ်ဘၣ်လၢ်တၢ်
လၢယဂီၢ်တက့ၢ်.မၤလိာ်၀ဲဒ်န့ၣ်၀ံၤဒိးထီၣ်ကဘီဒီးက့ၤကဒါက့ၤဆူအထံအကီၢ်အဟံၣ်အဃီလီၤ.

တုၤမ့ၢ်စီၤတီလုးက့ၤတုၤလၢအဟံၣ်န့ၣ်ပာ်ဖှိၣ်သ့ၣ်မုၣ်လၢမ့ၣ်အူကအီၣ်ဘၣ်၀ဲနွံနံၤနွံနၤအဂီၢ်၀ံၤဒွဲၣ်ထီၣ်၀ဲဒီး
တုၤအဒွဲၣ်ထီၣ်၀ဲပှဲၤထီၣ်နွံသီတသီန့ၣ်,အ၀ဲကစံၣ်နုာ်သံကွံာ်အသးလၢအပူၤလီၤ.ဖဲစီၤတီလုးကတဲာ်ကတီၤ
ထီၣ်အသးဒ်အံၤအဖၢမုၢ်လၢကီၢ်၀ၢ်ဘးခီန့ၣ်ထိၣ်တလ့သ့ၣ်တဖၣ်ပှ့ၤထီၣ်လၢနီၢ်ဒွဲၣ်အဟံၣ်တၢးဖီခိၣ်တုၤနီၢ်ဒွဲၣ်
အိၣ်တသ့တကဲဘၣ်ဒီးဃ့အခွဲးလၢအ၀ၤ,တဘျီဃီဒိးထီၣ်ကဘီ၀ံၤတဘျိၣ်ဆူခိဒ်တၢ်ဟိမိၢ်ဃ့ၢ်အသိးတသီဘၣ်
တသီ,မုၢ်နၤတစံးမုၢ်ဆါတစံးလၢၤဘၣ်,ဖဲက့ၤ၀ဲတုၤထီၣ်ဆူစီၤတီလုးအဟံၣ်အခါထံၣ်ဘၣ်၀ဲလၢစီၤတီလုးယူာ်
ဃီၤအသးဆူမ့ၣ်အူကဖးအပူၤန့ၣ်လီၤ.အန့ၣ်တဘျီနီၢ်ဒွဲၣ်စံၣ်ဖီၣ်အီၤဒီးတဘျီဃီလီၤဘျုးကွံာ်၀ဲဆူမ့ၣ်အူပူၤခံ
ဂၤလၢာ်လီၤ.ပှၤလၢတၢ်ခိၣ်တၢ်ဃၢၤတဖၣ်ထံၣ်ထွဲတၢ်မၤအသးအံၤအဃိအ၀ဲသ့ၣ်လဲၤကရီလူစၢၤသံကွံာ်မ့ၣ်
အူန့ၣ်လီၤ.ဘၣ်ဆၣ်အ၀ဲသ့ၣ်လူဘၣ်ကဒီးလၢရ့ၣ်နီၣ်သိအဃိမ့ၣ်အူကဲၤကပျီၤထီၣ်ဒိၣ်န့ၢ်အလီၢ်ဆူတၢ်ဖီခိၣ်ဖး
ထီညါတုၤတၢ်မၤက့ၤပှၤခံဂၤအသးသမူတသ့လၢၤဘၣ်ဒီးသံဃုာ်ဟါမၢ်ဃုာ်,ဟါမူၤဟါမၢ်ကွံာ်ဖဲမ့ၣ်အူဖၣ်ဆါ
အကျါန့ၣ်လီၤ.

၀ံၤအလီၢ်ခံတယံာ်တမီၢ်တၢ်လီၢ်ဖဲနီၢ်ဒွဲၣ်ဒီးစီၤတီလုးဒွဲၣ်သံကွံာ်အသးအလီၢ်န့ၣ်ဟဲမဲထီၣ်၀ဲလၢဆၢတထူၣ်ဒီးသ
ဘျုၣ်စွါထီၣ်လၢအလိၤလီၤ.မၤသးဒ်န့ၣ်ဒီးတၢ်လၢသဘျုၣ်လၣ်န့ၣ်တုၤခဲအံၤအိၣ်မူအိၣ်ကၢဒီးအဒ့အြတၢ်အ
လၣ်အဖီဂ့ၤဒၣ်လၢဆၢအလိၤန့ၣ်လီၤ.တၢ်လၢဆၢန့ၣ်အထံအနိအါ,အထံခုၣ်အမဲာ်ညါ,အဆှုၣ်ထီၣ်သတးဒီး
သဘျုၣ်လၣ်စွါထီၣ်လၢအလိၤန့ၢ်ဂံၢ်န့ၢ်ဘါဒီးစဲဘူးကျၢၤမုဆှုစ့ၢ်ကီးလီၤသတးဒီးပှၤမၤအီၣ်သဘျုၣ်လၢပှၤက
ညီအကျါကိးပူၤဒဲးသူၣ်လီၤဆၢဒီးသူၣ်ထီၣ်သဘျုၣ်လၣ်ဒီးဒုးစွါထီၣ်၀ဲလၢအလိၤလီၤ.


ဟံး​န့ၢ်​အီၤ​လၢကညီတၢ်စံၣ်ဃဲၤတဲဃဲၤတဖၣ်လၢကျိၣ်တၢ်ရၤလီၤလံာ်လဲၢ်ကရူၢ်ထုးထီၣ်ဝဲ

http://www.piemmamure.org/2011/06/blog-post_4010.html