စ့ဒုးလဲၤကသ့ၣ်မိၢ် အတၢ် (ထွံၣ်မဲၢ်က့ၣ်… ဘျၢထီၣ် အကူာ် ၇)

တၢ်ဒိးစဲးအိၣ်တီၢ် ဒၣ်ထဲသၢလါဧိၤ ဒီးကဘၣ်ဝဲလီၤ. စီၤက့ၣ်ဂံာ်လီၤ တုၤအသး နီၢ်နီၢ် လၢတၢ်ကွၢ် က့ၤဖးက့ၤ လံာ်, ဒီးလီၤဆီဒၣ်တၢ် တၢ်ဂံၢ်တၢ်ဒွး ဒီး တၢ်စံၣ်စိၤတဲစိၤ ခံဘ့ၣ် န့ၣ်လီၤ. လံာ်ခံဘ့ၣ် အံၤ စီၤက့ၣ် တအဲၣ်လၢၤ အီၤအါအါဘၣ်. တကျဲးစၢး မၤနၢၤအီၤဘၣ်အဃိ အိၣ်လၢပှၤလီၢ်ခံလီၤ. အဝဲဟ့ၣ်လီၤက့ၤ အဆၢကတီၢ် အါကတၢၢ်လၢ လံာ်ခံဘ့ၣ် အံၤလီၤ.

ဘၣ်ဃး တၢ်လိာ်ကွဲတခီ ဖဲအတၢ်ဆၢကတီၢ်အိၣ်ဝဲန့ၣ် အဝဲဒၣ် မၤလိသ့အါထီၣ်အသး ပှီၢ်ပှီၢ် လၢတၢ်ကျီ နး န့ၣ်လီၤ. အဖါတံၢ်အသုးခိၣ် ဖိစါကၠဲး သးပှၢ် နဲၣ်လူဘၢ် တဂၤ အိၣ်ဘှံးက့ၤလၢ တၢ်မၤ, အီၣ်ပ့ၣ်စ့ၣ် ဒီး ဟဲက့ၤ အိၣ်က့ၤလၢ ဘီကီာ်ပူၤလီၤ. တနွံခံဘျီ စီၤက့ၣ် လဲၤဟံးန့ၢ် တၢ်မၤလိလၢ အအိၣ်ဒီး တၢ်လၢ ခၠဲပယၢၣ် သးပှၢ် မၤလိထွဲ အခံခဲလၢာ်, ဒ်တၢ်ဃ့ၢ် ဒီးတၢ်စံၣ်ပျံၤ တဖၣ်န့ၣ်, စီၤက့ၣ် က့ၤမၤထွဲက့ၤ အီၤလီၤတံၢ် လီၤဆဲး လၢခီလ့ၣ်တၢ်လိာ်ကွဲ လီၢ်လီၤ. စီၤက့ၣ် ကဲထီၣ်တ့ၢ်လံ ခီလ့ၣ် အခၠဲပယၢၣ် စးထီၣ်လၢ အဟဲအခီၣ် ထံးတနံၣ်လီၤ. မ့တမ့ၢ် ဘၣ်ယီၣ်စွါတဂၤဧိၤ ဘၣ်န့ၣ် ပှၤခီလ့ၣ်အလိာ်ကွဲ နးဖိအဂၤ တအိၣ်နီတဂၤလၢ အတီၤကထီၣ်ဘး စီၤက့ၣ်ဘၣ်.

ဒီးစီၤက့ၣ် ဟ့ၣ်လီၤသးထဲအံၤလၢ တၢ်ကျီနး အတၢ်လိာ်ကွဲ န့ၣ် ဟဲလၢ အသရၣ်ဟ့ၣ်ဆူၣ်ထီၣ် အသးလီၤ. “စီၤက့ၣ်ဧၢ, နမ့ကျဲးစၢး သပှၢ်ပှၢ်ဒီး နကဲထီၣ် ယူၣ်တရၣ်ဒီကီၢ် အခၠဲပယဲၣ် သ့သပှၢ်တၢၢ်လီၤ.”

စီၤက့ၣ် ဃုနၢ်ပၢၢ် တၢ်လိာ်ကွဲ နးအဂ့ၢ်, လီၤဆီဒၣ်တၢ် လၢ စ့တကပၤဒီး ထံၣ်ဝဲလၢ ပှၤလုၢ်အီၣ်သးသမူ သ့လၢအဃိအါမး ဒီးခိၣ်ဖး လၢပှၤကဲထီၣ် ခၠဲပယၢၣ် တဂၤအဂီၢ် တဘျီတဘျီ လီၤလၢ စ့လၢ အကလး အမဲာ်ညါ, တၢ်တၤကျိၣ်တၤစ့လၢ တၢ်လိာ်ကွဲအံၤ အဃိအါမးလီၤ.

စီၤက့ၣ်သးလီစ့အါအါလီၤ. ဒွးဝဲလၢ သါစ့မ့ၢ်အါမး ဒီးသါကွၢ်မၤ စၢၤက့ၤ သါပှၤကလုာ် ကသ့လီၤ. ဒီးကျဲတဘိဧိၤ လၢသါကမၤန့ၢ်စ့ အါအါဒီး ချ့ချ့ န့ၣ် မ့ၢ်တၢ်လိာ်ကွဲအံၤလီၤ. အအံၤမ့ၢ် ဟီၣ်ခိၣ်ဖိ အတၢ်ဒွးလီၤ. စီၤက့ၣ်တသ့ၣ်ညါဒံးယွၤ ဒီးယွၤအကျဲလၢ အခ့အပှၤ လၢအအဲၣ်ဒိးမၤ စၢၤပှၤဂၤတဖၣ် အဂီၢ်ဘၣ်. ယွၤမ့ၢ် ပှၤထူးပှၤတီၤ အဒိၣ်ကတၢၢ်, အတၢ်ထူးတၢ်တီၤ လၢာ်တန့ၢ် လၢာ်တသ့, ဒီးမၤပှဲၤ အခ့အပှၤ ခဲလၢာ် အတၢ်လိၣ်ဘၣ် ဃးနီၢ်ခိ ဂ့ၤနီၢ်သးဂ့ၤ သ့န့ၣ်, စီၤက့ၣ်တသ့ၣ်ညါ ဒံးနီတစဲးဘၣ်. မ့ၢ်ဒၣ်ဟီၣ်ခိၣ်ဖိ တဂၤလၢ အပာ်ဒိၣ် ဒၣ်ဟီၣ်ခိၣ်ဖိ အတၢ်စိတၢ်ကမီၤ လၢအမ့ၢ် စ့န့ၣ်လီၤ. ဟီၣ်ခိၣ်ဖိ အတၢ်ကူၣ်ဘၣ်ကူၣ်သ့ စံး, “စ့ဒုးလဲၤ ကသ့ၣ်မိၢ်အတၢ်” လီၤ. စီၤက့ၣ်ခဲအံၤ အိၣ်ဒံးဒၣ်ဖဲ တီၤအဝဲအံၤ အပူၤလီၤ.

တၢ်အိၣ်အဂၤတမံၤ လၢစီၤက့ၣ်စးထီၣ် မၤဝဲန့ၣ် မ့ၢ်တၢ်မၤလိ ဒ့ဝါဧိၤလံန် လီၤ. စးထီၣ်လၢ အနၢ်ဟူ ဘၣ်ဒီးကထၢၣ် ခၠါလ့ၣ်ဝူဒ့ဝါဧိၤလံန် ဝံၤန့ၣ် စီၤက့ၣ်အသးဂဲၤ ဒိၣ်မး. ပှ့ၤန့ၢ်တရီတဖျၢၣ် လဲၤဒိးသိၣ်လိ သးလၢ ပှၤကိၢ်အါနံး တရီသရၣ် တဂၤအအိၣ် တနွံတဘျီလီၤ. က့ၤလၢခီလ့ၣ်တခီ, လဲၤသိၣ်လိ ဒ့ခူသူၣ် အသးလၢ တၢ်ချၢတခီ ဖဲတၢ်လိာ်ကွဲ ထူဘီအလီၢ်, ဖဲလီၢ်ဆ့ၣ်နီၤ ဖးထီအလိၤ, လၢအဝဲဒီး မ့ရ့ၣ် ကတိၤလိာ်တ့ၢ် လံအသး အလီၢ်န့ၣ်လီၤ. မ့ၢ်ပှၤကျဲးစၢး သပှၢ်ပှၢ်တဂၤဒီး လဲၤထီၣ်ဝဲပှီၢ်ပှီၢ်လီၤ. အဲၣ်လီၤဆီ တၢ်သးဝံၣ် “တၢ်အဲၣ်လၢညိကွံာ် ယၤတကဲ” တယုၢ်န့ၣ် ဒီးထိဝဲ ခဲအံၤခဲအံၤ န့ၣ်လီၤ.

ယီၣ်စွါ တဂၤကဲထီၣ်, ချံးလီၤဘၣ်လၢ ထံပူၤလီၤ. စီၤက့ၣ်ဒီး မ့ရ့ၣ် တဲဖျါအီၤလၢ အဂ့ၢ်အပီၢ် ထံထံဆးဆး လံ, မ့ရ့ၣ် မ့ၢ်တအဲၣ်အီၤ သနာ်က့ တူၢ်လိာ်လံအီၤလၢ ကဒိးတ့ ဒိးဖျီအသးဒီး အီၤအဃိ, အဝဲအသးဖှံ ယီၢ်လီၤက့ၤ ဟီၣ်ခိၣ် သါတဘၣ်လၢၤဘၣ်. မၤလိာ် အပၢ်သးပှၢ် စ့းဟိၣ် လၢကဟဲဆူဘီကီာ် လၢအချ့ ဒ်သိး ကဟဲထံၣ်လိာ် သးပှၢ်တီဝူ ဒီး သုးကျဲၤ လီၤတံၢ်က့ၤ တၢ်တ့တၢ်ဖျီ အမုၢ်နံၤန့ၣ်လီၤ. သးပှၢ်စ့းဟိၣ် သးခုမးလၢ အဖိခွါကန့ၢ်ဘၣ် က့ၤ အတၢ်အဲၣ်တီလီၢ်လံၤ သးပှၢ်မုၣ် အၣ်ဖူၣ် အဖိမုၣ် န့ၣ်လီၤ. တမၤယံာ် မၤနီၢ်တၢ်ဘၣ်. ဟဲစိာ် စ့ယဲၢ်ကလး ထ့းကီၣ် တဘျီဃီဒီး တီၣ်ထီၣ် ဝဲလ ၢအဖိခွါ ကဆီဟံၣ်ဆီဃီ အဂီၢ်လီၤ. သးပှၢ်တီဝူဒီး သးပှၢ်စ့းဟိၣ် အၢၣ်လီၤဝဲလၢ ကဖျီပှၤသးစၢ် ခံဂၤအံၤ လၢလါယူၤ ထီၣ်တသီ နံၤန့ၣ်လီၤ. တၢ်အံၤမ့ၢ်ဒၣ် ဆူညါထဲဃုလါ ဧိၤလီၤ. ဒီး စးထီၣ်သုးကျဲၤသကိး တၢ်တ့တၢ်ဖျီ အမူးအပွဲအံၤ အဂီၢ်တခီ လံ.

ယီၣ်စွါ မၤမံလီၤက့ၤ အသးဒီးစံးဝဲ, “ယမၤန့ၢ် မုၢ်မ့ၢ်တသ့ သနာ်က့, ယမၤန့ၢ် လါမ့ၢ်သ့ဒီး ဘၣ်တ့ၢ်လံ. မ့ရ့ၣ်မ့ၢ်တအဲၣ်ယၤသနာ်က့ မ့ၢ်ကဲထီၣ်ယမါဒီး အါလံ. တၢ်ပာ်လီၤသးသ့ဒ်သိး အံၤ မ့ၢ်တၢ်လၢအဂ့ၤ ကစီဒီ လီၤ. ပှၤဟီၣ်ခိၣ်ဖိ မ့ၢ်သ့ မၤမံဒၣ် အသးကိးဂၤဒဲး ဒ်ယီၣ်စွါ အသိးဒီး ကမ့ၢ်မး တၢ်ဂ့ၤ ဖးဒိၣ်တမံၤ စ့ၢ်ကီး သၢၣ်. တၢ်ကူၣ်အၢ ကၠီၣ်သီ, တၢ်ဂုာ်လိာ်၀ာ်လိာ် အသးတဖၣ် ကဟါမၢ် ကွံာ်ဝဲသၢၣ်.

မ့မ့ၢ် တခီ တသီၣ်တသဲ အါအါဘၣ်. လဲၤထီၣ်က့ၤ ခီလ့ၣ်, လိာ်ခိၣ်လိာ်ကွဲက့ၤ, မၤတၢ်လၢ အလီၤဘၣ်အီၤ ခဲလၢာ် လၢတၢ်ကစုဒု အပူၤလီၤ. ဖဲအမိၢ်စံးဘၣ်အီၤ ဘၣ်ဃးတၢ်ကတဲာ်ကတီၤ တၢ်ဒိးတ့ဒိးဖျီ သးအကူ အသိးဒီး တၢ်ဂၤတဖၣ် န့ၣ် မၤဝဲကစုဒု လီၤ. ယီၣ်စွါ မ့ၢ်ဟဲအိၣ်သကိး အီၤဒီး တူၢ်လိာ်ခီၣ်ဆၢဒၣ် အီၤ မုာ်မုာ် တသ့ဖဲအသ့လီၤ. ဒ့န့ၢ်အီၤဖံၣ်အဲနိၣ် ဒီးသးဝံၣ်န့ၢ် အတၢ်ဖဲ အသးအိၣ် ဝဲန့ၣ်လီၤ. ယီၣ်စွါမ့ၢ်ကိး ဟးလိာ်ကွဲအီၤ ဒီးပိာ်ဝဲ အခံကစုဒုလီၤ. တၢ်ထီဒုၣ်ဒါ တအိၣ်ဘၣ်. တၢ်သူၣ်ဟူးသးဂဲၤ နီၢ်နီၢ် စ့ၢ်ကီး တအိၣ်ဘၣ်. တၢ်မုာ်သးမ့ၢ်အိၣ် တဆံးတက့ၢ်န့ၣ် မ့ၢ်ဒၣ်အထံၣ်ဘၣ် စီၤက့ၣ် တနံၤတဘျီလၢ ကၠိပူၤန့ၣ်လီၤ. တဘျီဘျီ ယီၣ်စွါ တဲပၠးမ့ရ့ၣ်လၢ စီၤက့ၣ်မၤတၢ်အံၤ မၤတၢ်နုၤ ဒီးမ့ၢ်တၢ်လၢ အမၤဂဲၤထီၣ် မ့ရ့ၣ် အသးန့ၣ်လီၤ.

“မ့ရ့ၣ်ဧၢ, ပှၤအါဂၤနာ်ဝဲလၢ စီၤက့ၣ် ကကဲထီၣ် က့ၤယူၣ်တရၣ် တၢ်ကျီနးခၠဲပယၢၣ် အသီန့ၣ်လီၤ. ပှၤန့ၣ် လဲၤဆူအသရၣ် နဲၣ်ဘူဘၢ် အအိၣ် တနွံခံဘျီဝံၤ ဟဲက့ၤကၠီးအသး ကိးဟါဒဲးလီၤ. သ့ထီၣ်ပှီၢ်ပှီၢ်လီၤ. မ့မ့ၢ်လၢ ခီလ့ၣ်ပူၤ တဂၤန့ၣ် ပှၤကးဘူး အကပၤတန့ၢ်နီတဂၤဘၣ်. စီၤက့ၣ် အိၣ်ဒၣ် အထူၣ်ဒီး အညၣ်ကိၢ် လိၢ်ဒီဂၤညါလီၤ. အသိအချါ တအိၣ်ဘၣ်. ကိးဟါဒဲး ဃ့ၢ်တၢ်ဒ့ၣ်စၢၤ သၢမံးလာ်ဘဲၣ်, စံၣ်ပျံၤယံာ်တခီ နၣ်ရံၣ်, ကပၢၤဒိၣ်ယွၤ တဘီလီၤ. မၤကးတမံၤန့ၣ်, အဝဲစးထီၣ်ဒ့ ဝါဧိၤလံန်, လဲၤဒ့ညီနုၢ်ဝဲလၢ တၢ်ထူဘီ ကဝီၤကပၤ သၣ်ဘုၣ်ဘီ ဖးဒိၣ်ခီၣ်ထံး လီၢ်ဆ့ၣ်နီၤ လိၤန့ၣ်လီၤ. အဝဲအဲၣ်လီၤဆီ တၢ်သးဝံၣ်, “တၢ်အဲၣ်လၢ ညိကွံာ်ယၤတကဲ” တယုၢ်န့ၣ်, ဒ့ဝဲလၢ ဝါဧိၤလံန်, သးဝံၣ်ကဖီဝဲ ခဲအံၤခဲအံၤ လီၤ.”

တၢ်ကစီၣ်တဖၣ်အံၤ, မၤအိၣ်ထီၣ်တၢ်သးသယုၢ်လၢ မ့ရ့ၣ်အပူၤ, တဘျီဃီစ့ၢ်ကီး န့ၣ် မၤမုာ်အသးလၢ အသ့ၣ်ညါခူသူၣ်ဝဲလၢ စီၤက့ၣ်တသးပ့ၤနီၣ် အဲၣ်အီၤ န့ၣ်အဃိလီၤ.

“ယီၣ်စွါဧၢ, စီၤက့ၣ်မ့ၢ်ဖျိ ခီလ့ၣ်ဝံၤ သါကမၤမနုၤလဲၣ်”
“တတဲလီၤတံၢ်ဝဲဘၣ်, စံးဝဲ တမံၤန့ၣ် သါကသူ သါတၤလၣ် ဘၣ်ဃး တၢ်ကျီနး အံၤဒီး မၤန့ၢ်စ့ အါအါ လၢ သါကမၤစၢၤက့ၤ သါပှၤကလုာ်အဂီၢ် န့ၣ်လီၤ.”
“ယီၣ်စွါဧၢ, စီၤက့ၣ်မ့ၢ်လိာ်ဘၣ် စ့ဒီး တဲယၤမီၣ်, ဖဲယသ့ယသးအိၣ် မၤစၢၤအီၤ လီၤ.”
“မ့ရ့ၣ်ဧၢ, ယဲယသးအိၣ် မၤစၢၤအီၤ ကီးလီၤ. ဘၣ်ဆၣ် နသ့ၣ်ညါ စီၤက့ၣ်အဂ့ၢ် ကစီဒီ ဘၣ်. တနါစိၤ တူၢ်လိာ်ပျၤဂၤ အတၢ်မၤစၢၤ ဘၣ်ဃး ကျိၣ်စ့ န့ၣ်ဘၣ်.”
“နသါတဲပၠးယၤ စီၤက့ၣ်အပၢ် အဂ့ၢ်တဘီလဲၣ် ယီၣ်စွါဧၢ, မ့ၢ်အမ့ၢ် ပှၤအဖှီၣ်ဖိဧါ.”
“စီၤက့ၣ်အပၢ် မ့ၢ်စကီၤလၢ ပှၤပာ်ကဲအီၤ အါမး တဂၤလၢ ကီၢ်ဆၣ် လၢၢ်ဟ့ တခီလီၤ. မၤစကီၤ အတၢ်မၤ အမဲာ်ညါ မၤစ့ၢ်ကီး သ့ၣ်တၢ်မၤလီၤ. ယံာ်ထီၣ်ဒိၣ်ထီၣ်ဝဲလၢ အစုလီၢ်ခီၣ်ခိၣ်လီၤ. ယပၢ်တဲယၤလၢ ခဲအံၤအကဆီအိၣ် အဒုခံဆံ ဘျဲၣ်လံ. ဒီးကီၤလၤမၤသ့ၣ် ခီပန့ၣ်တဖၣ် အဲၣ်အီၤဒိၣ်မး နာ်န့ၢ်အီၤ အါမး လီၤ. စီၤဝါ အပုၢ်ပိာ်မုၣ် နီၢ်ဆၣ်ဖီ မ့ၢ်ကီၢ်၀ၢၣ်နၢၣ် ြဖၣ်သူဝါ အမါဖးဒိၣ်န့ၣ်လီၤ. ြဖၣ်သူဝါအံၤ ရ့လိာ်သးဒီး ပစီၤပၤ ရၣ်မၣ် တံၢ်မး လီၤ. စီၤက့ၣ် မ့ၢ်သးအိၣ် မၤတၢ်လၢ ပဒိၣ်တၢ်ဖံးတၢ်မၤ တခီ ကျဲညီမး လၢအဂီၢ်လီၤ. ဘၣ်ဆၣ် စီၤက့ၣ်စံးဝဲ, ပမၤအီၣ် ဘူးလဲပကဲဒိၣ် တန့ၢ်ချ့ဘၣ်. ပှၤန့ၣ် ဒုခဲအံၤ ကဘံၣ်လီၤမဲာ် ဃုဒၣ်စ့ လီၤ.”
မ့ရ့ၣ်သံကွၢ်ကဒီး, “ယီၣ်စွါဧၢ, စီၤက့ၣ် ပာ်သူၣ်ပာ်သးဘၣ်ဃး တၢ်ဟူးတၢ်ဂဲၤ ခီၣ်မၠူနံးစၢၢ် တမံၤအံၤ န့ၣ် နသ့ၣ်ညါစ့ၢ်ကီးဧါ.”
“အဝဲတအၢၣ်လီၤအီၤ ခဲလၢာ်ဒ်ပသိးဘၣ်. စံးဝဲ ပှၤထူးပှၤတီၤလၢ အဂ့ၤလၢ အအဲၣ်အကွံ ပှၤဖှီၣ်ဖိယာ်ဖိ တဖၣ် ဂီးဂုာ်မၤစၢၤအီၤ ကစီဒီန့ၣ် ပတြကၢးထီဒါအီၤ ဘၣ်. အဝဲစံးလၢ ပြကၢးထီဒါ ထဲဒၣ် ပှၤကဲဒိၣ်တတီတလိၤ လၢအမၤနၢၤမၤကျံး ပှၤဖှီၣ်ဖိ တဖၣ်ဧိၤ န့ၣ်လီၤ. စီၤက့ၣ် အတၢ်ပာ်သူၣ်ပာ်သး ခးလီၤဂာ် ဒီးရီဘ့ၣ်ဟူး န့ၣ်လီၤ.”

မ့ရ့ၣ်နံၤကမှံထီၣ်လီၤ. အဝဲနာ်စဲဃဲၤလၢ စီၤက့ၣ် အပာ်အသးဒ်အံၤ န့ၣ်လီၤ. မ့ရ့ၣ်ထံၣ်လၢ စီၤက့ၣ်ဒီး ယီၣ်စွါ မ့ၢ်ပှၤတဂၤအမၠိ ဂ့ၤမးလီၤ. ယီၣ်စွါ မ့ၢ်ပှၤပ့ၢ် ပှၤရှါ သနာ်က့, မ့ၢ်ပှၤအပျိၢ် ဃံခးပှဲာ်ပှဲာ် လၢအပိာ် တၢ်ခိၣ် တၢ်နၢ် အဂၤအခံ လၢတၢ်သးတီ တခီန့ၣ်လီၤ. ယီၣ်စွါ ကဲခိၣ်ကဲနၢ် နီၢ်နီၢ် တသ့ဘၣ်.

“အီၣ်, ယီၣ်စွါဧၢ, နကွဲစီၤက့ၣ် လၢကဟဲပတၢ်ဖျီ အမူးန့ၣ်ဝး”
“ယကွဲသၢၣ်, ဒီးအၢၣ်လီၤစ့ၢ်ကီး ယၤလီၤ. စီၤက့ၣ်စံး လၢသါမ့ၢ်က့ၤ ဆူစံာ်ဖးလဲၢ်, သါဖျီသါသကိး စီၤလါဝံၤ သါကလဲၤခးန့ၢ်နပၢ် အတၤဒိၣ်ခီၣ် တဒု, ဒီးသါကခးန့ၢ် ဃုာ်ကဆီဖါတံၢ် တဒုဒီး ဟ့ၣ်နၤဒီးယၤ လၢအမဲ လီၤ.”
“အီၣ်, ဒ်န့ၣ်ဧါ. ဘၣ်လံ.”

စီၤက့ၣ်တခီ ပှၤကတိၤတၢ်ဂ့ၢ်ဒ်အံၤ အခါ ဒွး တၢ်ဂံၢ်တၢ်ဒွးတဖျၢၣ်, ဒွးဝဲတဘၣ်, က့ၤစုၣ်လီၤ သးလၢလီၢ်မံ ခိၣ်, ဆိမိၣ်ဒီး ကနိဒၣ်ဒီး တၢ်ဂံၢ်တၢ်ဒွး အကီတဖျၢၣ် အံၤလီၤ. အသးဖျိးထီၣ်လၢ အဒွးဝဲ တဘၣ်အဃိ လီၤ. ဒီး အတၢ်သးဖျိး ဒ်အံၤ တကလုာ်အံၤ မ့ၢ်တၢ်လၢ အဂ့ၤဝဲလီၤ. ယွၤဟ့ၣ်ပှၤ တၢ်သးဖျိး သ့အသး, သးလၢ အအဲၣ်ဒိး ဒုးတၢ်အသးန့ၣ် မ့ၢ်လၢ ပတၢ်ဂ့ၤ အဂီၢ်လီၤ. မ့ၢ်လၢ ပကကွၢ်ဆၢၣ်မဲာ် တၢ်ကီတၢ်ခဲ ဒီး မၤနၢၤကွံာ်အီၤ အဂီၢ်လီၤ. စီၤက့ၣ်ကနိလိာ်သး ယံာ်မးတစဲးညါ ဒီးလၢခံကတၢၢ် မၤနၢၤ ကွံာ် တၢ်ဒွး တဖျၢၣ်အံၤ လီၤ. အိၣ်တတီၤဒီး ယီၣ်စွါ ဟဲက့ၤတုၤက့ၤလၢ မ့ရ့ၣ်အအိၣ်တခီ လီၤ.

“စီၤက့ၣ်ဧၢ, မ့ရ့ၣ်သံကွၢ်ယၤလၢ နဖျိကၠိဝံၤအလီၢ်ခံ နကမၤမနုၤလဲၣ် လီၤ. ဒီးယစံးဆၢအီၤ တဘၣ်ဘၣ်.”
“နစံးဆၢ ကဘၣ်သ့ဧါခွါဧၢ, ယနီၢ်ကစၢ်မး ယတသ့ၣ်ညါ ဒံးနဲာ်.”
“အီၣ်, စီၤက့ၤဧၢ, နမ့ၢ်လိၣ်ဘၣ်စ့ ဒီးမ့ရ့ၣ် ဒီးယၤ ဖဲပသ့ ပသးအိၣ် မၤစၢၤနၤလီၤ.”
“တၢ်ဘျုးလီၤနၤဧၢ, မ့မ့ၢ်ခဲအံၤ တလိၣ်ဒံး ကီးဘၣ်. မ့ၢ်လိၣ်ဒီး ခွါကသ့ၣ်နီၣ် သုတၢ်သးအိၣ် မၤစၢၤ န့ၣ်လီၤ.” စီၤက့ၣ်ကတိၤတၢ်ဝံၤ, ဖီၣ်ထီၣ် အဝါဧိၤလံန် ဒီးဟးထီၣ်ကွံာ် ဆူတၢ်ထူဘီ လီၢ်လီၤ. စီၤက့ၣ်လဲၤ ဒ့လိာ်ကွဲ တၢ်ဖဲန့ၣ် တုၤတၢ်မိၣ်မံ သး အိၣ်တကဲလၢၤဘၣ် တစု ဟဲက့ၤဆူဒၢး ပူၤကသွံဒံ, တမၤတံာ်တာ် ယီၣ်စွါ နီတမံၤဘၣ်, ဒီးနုာ်က့ၤလီၢ်မံ ပူၤဒီး သါြကီာ်ြကီာ်လီၤ.

မုၢ်ဆ့ၣ်ထီၣ်တနံၤ စီၤက့ၣ် အသရၣ်သိၣ်လိ တၢ်ဂံၢ်တၢ်ဒွးတဂၤ ကွဲစီၤက့ၣ်လၢ ကလဲၤကွၢ် တၢ်ဂီၤမူ လၢအသကိး လီၤ. တၢ်ဂီၤမံၤ ဟူသၣ်ဖျါ အမံၤလၢ “တၢ်အီၣ်လီၤ ကလိၤသး အဂ့ၤဒိၣ်မး တမံၤ” ဒီးဘၣ်ဃးလၢ ကသံၣ်သရၣ် တဂၤလၢ အမံၤဟူသၣ်ဖျါမး အဂ့ၢ်လီၤ. စီၤက့ၣ် အသရၣ် အဲၣ်လီၤဆီ အီၤလီၤ. အပျဲၢ်အကျါ ပှၤလၢအဂုာ်ကျဲးစၢး မၤနၢၤတၢ်ဂံၢ်တၢ်ဒွး အကီကတၢၢ် တဖၣ်အဒိၣ်ကတၢၢ် မ့ၢ်ဒၣ် စီၤက့ၣ်လီၤ. စီၤက့ၣ် လဲၤတၢၣ်ပီၣ် သံကွၢ်တၢ်လၢ သရၣ်အံၤ အအါကတၢၢ်လီၤ. အဂၤတမံၤ န့ၣ်သရၣ်အံၤ မ့ၢ်ပှၤအဲၣ်ကွၢ်ကီ ပှၤကျီလိာ်သး အတၢ်လိာ်ကွဲ လီၤ. ဒီးစီၤက့ၣ် မ့ၢ်ပှၤလိာ်ကွဲ တၢ်တမံၤအံၤ အသ့အဂ့ၤကတၢၢ် လၢခီလ့ၣ်ဒီဖျၢၣ်ညါ အပူၤလီၤ. သရၣ်အံၤ ဒိၣ်တၢ်ပှဲာ်ပှဲာ်, လီၤဂာ်ပိာ်မုၣ် တစဲးစဲးလီၤ. တၢ်လၢ အတအိၣ်ဒီးအီၤ, လၢစီၤက့ၣ်အပူၤစ့ၢ်ကီး အဃိ သရၣ်အံၤ အဲၣ်စီၤက့ၣ်ဒီး ဂုာ်ရ့ဒီးအီၤလီၤ.

သရၣ်ဒီးပျဲၢ်ခံဂၤ လဲၤဆူ တၢ်ဂီၤမူအဟံၣ် ဒီးကွၢ်တၢ်ဂီၤတယုၢ် အံၤလီၤ. ဟံၣ်ပှဲၤကတံာ် မးဒီး ပှၤအါဂၤ ဘၣ်အိၣ်ကတီၢ်လၢ တၢ်ချၢ, မ့ၢ်လၢ တၢ်လီၢ် တလၢလၢၤအဃိ လီၤ. ဒီးတၢ်ဂီၤတယုၢ်အံၤ တဲတၢ်ဘၣ်ဃး ကသံၣ်သရၣ်လၢ အကူးကါ ပှၤဆါသ့အါအါကလဲာ်, ဒီးပှၤဆါလူၤအီၤ အါဒီး မၤန့ၢ် စ့အါမး တဂၤ အဂ့ၢ်လီၤ. အဝဲဘၣ်ဒိလၢ သိလ့ၣ် ဒီးသံကွံာ် အလီၢ်ခံ တခီ ပှၤထံၣ်ဘၣ်လၢ အစ့တအိၣ် လၢၤဘၣ်. မ့ၢ်လၢ အဟးမၤစၢၤခူသူၣ် ပှၤဘၣ်ဖှီၣ်ဘၣ်ယာ် အဃိအတၢ်တအိၣ် တီၢ်နီတမံၤလၢၤဘၣ်. တၢ်လၢ အအိၣ်တီၢ် တခီ မ့ၢ်ပှၤလၢ အဘၣ်ဖှီၣ်ဘၣ်ယာ် လၢအဝဲမၤစၢၤ တဖၣ် အတၢ်အဲၣ်အီၤ ဒီးစံးဘျုး စံးဖှိၣ် အီၤလၢ အသးပူၤ တဂၤဘၣ်တဂၤ န့ၣ်လီၤ. ပှၤကွဲးတၢ်တဲတဂၤအံၤ ကွဲးတၢ်သ့ဒီး တၢ်ဂ့ၢ်မိၢ်ပှၢ် မ့ၢ်တၢ်လၢ အလီၤမိၢ်လီၤမး ဒီးဂ့ၤဝဲ, ဒီးပှၤလိာ်ကွဲ တၢ်ဂီၤမူတဖၣ် ဒုးနဲၣ် တၢ်ဂ့ၤဒိၣ်မး အဃိ ပှၤလၢအလဲၤကွၢ်တၢ် ဂီၤခဲလၢာ် အသးဘၣ်ဒိ ဘၣ်ထံးမးဝဲ လီၤ. စီၤက့ၣ် အသးဘၣ်ကတံာ်ဒီး မဲာ်ထံဟဲြပံာ် ထီၣ်သး ဘၣ်ကၢၤက့ၤဝဲ တခီလီၤ. အတၢ်ပာ်လီၤသးဆူၣ်ထီၣ် ကျၢၤထီၣ်ဝဲလၢ ကအိၣ်မူလၢ အပှၤကလုာ် ပှၤဖှီၣ်ပှၤယာ် တဖၣ်အဂီၢ် လီၤ. တွ့ထီၣ်ဝဲလၢ အသးကံၢ်ပူၤ, ယကကျဲးစၢး ကျီနး တုၤယမၤန့ၢ်စ့အါအါဒီး ဘှီထီၣ်တၢ်ဆါဟံၣ် လၢစံာ်ဖးလဲၢ် တဖျၢၣ်လီၤ. စီၤက့ၣ် သ့ၣ်ညါက့ၤလၢ အမိၢ်အတၢ်ဆါန့ၣ် မ့ၢ်ဘၣ်တၢ်ကူစါဆိအီၤ ဒီး ကွဲးအီၤလၢ ကသံၣ်သရၣ် သ့ကွဲးပှၤပှံာ်ဖးဒ့ညိး ဂ့ၤဂ့ၤဒီး ဘျါက့ၤဝဲသ့ ကစီဒီန့ၣ်လီၤ.

ကွၢ်တၢ်ဂီၤဝံၤ က့ၤသကိးဆူ ကၠိလီၤ. ကၠိကယံၤဒၣ် ဒီးတၢ်ဂီၤမူ အဟံၣ်ထဲ တမံးလာ် ဧိၤဒီး မ့ၢ်လၢ လါကပီၤဒီး တၢ်ခုၣ်မုာ် အဃိ သရၣ်စံးလၢ ကက့ၤသကိးလၢ အခီၣ်လီၤ. ဒီးဖဲ အက့ၤ လၢကျဲပှၤဂုာ်တၢ်ဖိ ခံဂၤ စိာ်လၢဒီစူခိၣ် ဟဲသဂၢၢ်အီၤ သါကဂုာ် အကျိၣ်အစ့လီၤ. သရၣ်တခီ ပျံၤတၢ် ကနိး ဘၣ်အသးလီၤ. စီၤက့ၣ် ပာ်သဒၢကွံာ် အသရၣ်လၢ အလီၢ်ခံ, ဝီၣ်လီၤ သဘျံး ဒုးပှၤအၢဖိခံဂၤ လၢစုခိၣ်ဒီး ခီၣ်လီၤ. ထူပှၤအၢ အဘူးတဂၤ ဘၣ်ဖဲ အကံၣ်ဖျၢၣ်ခိၣ် ဒီးပှၤအံၤ လီၤဃံၤထွၣ်တလ့ၣ် ဘၣ်သး, ဒီးအဒီဖျိးကွံာ်ဝဲ လီၤ. ပှၤအၢဖိ ခံဂၤတဂၤ ထံၣ်အဂိၤမီၣ်ဘၣ်ဒ်အံၤ သတူၢ်ကလာ် ဒီးပျံၤတၢ် ထွးထီၣ်ဃ့ၢ် ဝဲလီၤ. စီၤက့ၣ် လဲၤထၢထီၣ် ပှၤအၢအံၤ အဒီဒီး မၢပှၤအၢတဂၤ ဂဲၤထၢၣ်က့ၤ လီၤ. သရၣ်စံးလၢ ဂ့ၤကတၢၢ် ကလဲၤဟ့ၣ်လီၤကွံာ် လၢပလ့း တဖၣ်အစုပူၤလီၤ. စီၤက့ၣ် တခီဃ့ကညး သရၣ်လၢ ကက့ၤကိးအီၤဆူ ခီလ့ၣ်ဒီး သံကွၢ်သံဒိး အဂ့ၢ် လီၤ. မ့ၢ်လၢစီၤက့ၣ် မ့ၢ်ပှၤမၤနၢၤ ပှၤအၢ အံၤလၢ အတၢ်သးဒူ ဒီး တၢ်ပ့ၢ်တၢ်ဆှါ အဃိ သရၣ်အၢၣ်လီၤ အီၤလီၤ. ဒီးက့ၤကိး အီၤဆူခီလ့ၣ်လီၤ.

လၢသရၣ်အဟံၣ်ပူၤ လၢတၢ်ကပီၤကျါ, အဝဲသ့ၣ် ထံၣ်လၢ ပှၤအၢတဂၤအံၤ မ့ၢ်ဒၣ် ပှၤလုၣ်ဘီဘိထီၣ်သီ တဆံနွံနံၣ်ဃိးနံၣ် တဂၤလၢ အဖှံၣ်အဃဲၤ မးဝဲန့ၣ်လီၤ. သံကွၢ်သံဒိးဝဲ အဂ့ၢ်အကျိၤ ဒီးပှၤအၢအံၤ တဲဘၣ်အီၤလၢ သါမိၢ်သါပၢ်တအိၣ်, သါတသ့ၣ်ညါ သါထံးသါခံ, သါဘၣ်တၢ်လုၢ်ဒိၣ်ထီၣ်သါလၢ ပှၤအၢပှၤသီ အိၣ်ဝ့ၢ်ပူၤတနီၤ, သါဒိၣ်ထီၣ်တစဲး ပှၤသိၣ်လိ သါလၢသါကဟုၣ် တၢ်ဘျၣ်တၢ်, သါလီၤဘၣ်ဃိာ်ပူၤ ယံာ်ဃုလါ တဘျီဝံၤ သါဟဲက့ၤ ထီၣ်လၢဃိာ်ပူၤ တဂီၤညါအံၤ လၢသါသကိး တဂၤလၢ အဃ့ၢ် သဒၣ်ကွံာ်သါ ဖဲမုကၢာ် န့ၣ်, သါတအီၣ်ဘၣ်ဟါတၢ်အီၣ်ဒံး, သါသၣ်ဝံၤ ဒီးသါသါ ကဂုာ်န့ၢ်သရၣ် ဒီးစီၤက့ၣ် အစ့ဖ ဲအန့ၢ် သမၠးဝံၤ လဲၤပှ့ၤအီၣ်မ့ၤလီၤ. စီၤက့ၣ်သံကွၢ် အီၤဒီးစံးဘၣ်စီၤက့ၣ် လၢဘီကီာ်ဝ့ၢ်ပူၤ, ပှၤသးစၢ် ဒ်သိး သါမိၢ်တအိၣ် ပၢ်တအိၣ် ပှၤတအိၣ်အံးက့ၤကွၢ်က့ၤအီၤ, ဟးဟုၣ်အီၣ်ဂုာ်အီၣ်ဆၣ် ဒ်သိးသါအိၣ်အါမးလီၤ.

စီၤက့ၣ်သံကွၢ် သရၣ်လၢ တၢ်အံၤ မ့ၢ်စဲဃဲၤန့ၣ်ဧါ, ဒီးသရၣ် အၢၣ်လီၤဝဲလီၤ. စီၤက့ၣ်ဃ့ကညး သရၣ်လၢ သရၣ်ကတူၢ်လိာ် ပာ်ပှၤဖိသၣ်တဂၤအံၤ လၢအဟံၣ်ပူၤ, ဟ့ၣ်အီၤတၢ်မၤ, လုၢ်အီၣ် ပာ်အီၤလၢ လွံၢ်လါ အတီၢ်ပူၤဝံၤ သါကဟဲဟံးန့ၢ် က့ၤအီၤလၢ သရၣ်အစုပူၤလီၤ. စီၤက့ၣ်ဃ့န့ၢ်သရၣ်အမ့ၤ ဆွံကသူဆွံ ဒီးဒုးအီၣ် သးစၢ်တဂၤအံၤ ဟါတၢ်အီၣ်လီၤ. စီၤက့ၣ် က့ၤဟံးန့ၢ် အတၢ်ကူတၢ်သိး ဒၣ်ဝဲခံစူၣ် လၢအမံဒၢး ပူၤဒီး ဟဲဟ့ၣ်ဖိသၣ်အံၤလီၤ. ဖိသၣ်အံၤ အမံၤလၢ ခၠူ၀ၣ် လီၤ. တၢ်ကူတၢ်သိး ဒိၣ်လၢအဂီၢ် တစဲးသနာ်က့, တလံးထီၣ် ဝဲအဖျီၣ်ခံခီၣ်ထံး, အီကၠံစုဒုၣ်တဖၣ်ဒီး ကူဝဲသ့ဖဲ အြကၢး န့ၣ်လီၤ.

ဖိသၣ်ခၠူၣ်ဝၣ်အံၤ တအိၣ်ညီနုၢ်လၢ ဟံၣ်ဂ့ၤဃီဘၣ် ပူၤဒ်အံၤ နီတစု, တဘၣ်တိနိၣ်ဒီး တံၤသကိး အဂ့ၤအဝါ နီတဘျီ, တထံၣ်ဘၣ် ပှၤမၤအီၤလၢ တၢ်အဲၣ်ဒ်အံၤ နီတခီၣ်ဘၣ်. တၢ်ခဲလၢာ် မ့ၢ်တၢ်အသီ လၢအဂီၢ်, တၢ်လီၤကမၢကမၣ် ဘၣ်အီၤဒိၣ်မး န့ၣ်လီၤ. တဟါတဘျီ စီၤက့ၣ် ဟဲကိးအီၤ မၢအဃ့ၢ်လၢအသကိး ရ့အီၤ ဒီးမၤစၢၤအီၤလၢ အဂံၢ်အဘါ ကဂ့ၤထီၣ်က့ၤ အဂီၢ်လီၤ. ခၠူ၀ၣ် ထံၣ်စီၤက့ၣ်ကျီနး, ဘီၣ်လီၤသး အညၣ်ကိၢ်လိၢ် မးဒီး စီၤက့ၣ်ကဲထီၣ်မး ယွၤဖိတဂၤလၢ အဂီၢ်လီၤ. တၢ်လၢစီၤက့ၣ် မၤန့ၣ် မိၣ်မၤဒိးသးဝဲ ခဲလၢာ် လီၤ. တၢ်လၢစီၤက့ၣ် စံးန့ၣ် နာ်ဝဲဒီး ဒိကနၣ်ဝဲခဲလၢာ်လီၤ. အီၣ်ဘၣ်က့ၤအဆၣ် ကူကူလၢလၢ, ဒီးယံာ်ထီၣ် အဖံးအညၣ် ဟဲပှဲၤထီၣ်ဝဲ ပှီၢ်ပှီၢ်လီၤ. လၢအအဲၣ်စီၤက့ၣ်အဃိ အိၣ်လၢသရၣ်အဟံၣ် ဒၢၣ်ထံ ဖးသ့ၣ်မုၢ်, ခွဲပျီတၢ် ဒီးဖဲအချုးန့ၣ် လဲၤလိာ်ကွဲလၢ စီၤက့ၣ် အသကိးလီၤ. စီၤက့ၣ်သိၣ်လိန့ၢ်အီၤ တၢ်ကျီနး, တၢ်ထိဒီး တၢ်လိာ်ကွဲ အဂၤတဖၣ်လီၤ.

တဟါတခီၣ် ဘၣ်ဖဲ တဆံနၣ်ရံၣ်ဃၣ်ဃၣ် ဘၣ်လၢလါကပီၤ ဆဲးထူခံခါ, ခၠူ၀ၣ်ဖိမံတန့ၢ် ဘၣ် ဒီး နၢ်ဟူဝါဧိၤလံန် သီၣ်ဝဲလၢ တၢ်ထူဘီကဝီၤန့ၣ်လီၤ. ခၠူ၀ၣ်ဖိ အဲၣ်ဝါဧိၤလံန်ဒိၣ်မး လီၤ. ဖဲအသးအိၣ် ထဲတဆံနံၣ် ဧိၤန့ၣ် ပှၤဃ့အီၣ်ဆၣ် မဲာ်ဘျီၣ်တဂၤ လုၢ်ဖိအီၤ, ဒီးအဝဲဘၣ် လဲၤမိၤဆှၢအီၤလၢ ဝ့ၢ်ပူၤကိးနံၤဒဲး လီၤ. လၢဟါတခီ သးပှၢ်အံၤ သိၣ်လိအီၤလၢ တၢ်ဒ့အံၤလီၤ. မၤဝဲဒ် အံၤယံာ်ထီၣ်ခံနံၣ်လီၤ. ခၠူ၀ၣ်ဖိ အတၤလၣ် အိၣ်လီၤဆီမးဒီး ကျဲးစၢးဆူၣ်မး အဃိ သ့ထီၣ်တၢ်ဒ့အံၤ ဂ့ၤဂ့ၤကလဲာ် ဒ်ယူၣ်တရၣ် အတၢ်သူၣ်ဝံၣ်သးဆၢ အသိးန့ၣ်လီၤ. ခံနံၣ်ပူၤကွံာ် တစိၢ်ဒီး ပှၤဃ့အီၣ်ဆၣ်သးပှၢ်အံၤ သံကွံာ်ဝဲဒၣ် ဒီး ခၠူ၀ၣ် ဘၣ်တိနိၣ်ဒီး တံၤသကိး အအၢအသီတဖၣ်, စူးကွံာ် ဝါဧိၤလံန် ဒီးဖီၣ် ထီၣ်ဒီ, ဟုၣ်အီၣ်၀ာ်အီၣ်အဆၣ်လီၤ.

နၢ်ဟူဝါဧိၤလံန် အံၤဒီး အသးသယုၢ်ထီၣ်သ့ၣ်နီၣ်က့ၤ ပှၤဃ့အီၣ်ဆၣ် သးပှၢ်တဂၤန့ၣ်လီၤ. အိၣ်တကဲလၢၤ ဘၣ်အဃိ ဟးထီၣ်ကွံာ်ကစုဒုလၢ သရၣ်အဟံၣ်တခီဒီး လဲၤဝဲဆူ တၢ်ထူဘီလီၢ်လီၤ. လဲၤဝဲဘူးထီၣ်ဒီး ကွၢ်ပှၤဒ့ တၢ်အံၤဒီး ထံၣ်ဝဲဒၣ်လၢ အမ့ၢ်စီၤက့ၣ် န့ၣ်လီၤ.

“အီ, သရၣ်ဧၢ, မ့ၢ်ဒၣ်နၤလီၤဧါ, ပျဲယကဟဲဆူနအိၣ် တဘီဘီၣ်.”
စီၤက့ၣ်တရံးဃီၤထံၣ်လၢ ခၠူ၀ၣ်ဒီးကိးဃီၤအီၤလီၤ. စီၤက့ၣ်ဒ့ကဒီး “တၢ်အဲၣ်လၢညိကွံာ်ယၤ တကဲ” ဒီးခၠူ၀ၣ် ဒိကနၣ် အခိၣ်ဂၢၢ်မးလီၤ.
“သရၣ်ဧၢ, တၢ်သးဝံၣ်တယုၢ်အံၤ မုာ်မးလဲၣ်. ဘၣ်ဆၣ် တမ့ၢ်ယူၣ်တရၣ် တၢ်သးဝံၣ်ဘၣ်.”
စီၤက့ၣ်တဲပၠးခၠူ၀ၣ် အံၤလၢ တၢ်သးဝံၣ်ဖိအံၤအဂ့ၢ်ဒ် မ့ရ့ၣ်လ့ တဲတ့ၢ်လံအီၤအသိး လီၤ. ဝံၤစီၤက့ၣ် သးဝံၣ် ပၠးအီၤလၢ ယူၣ်တရၣ် ကျိာ်လီၤ.
“သရၣ်ဧၢ, ယွၤအိၣ်န့ၣ် နနာ် စ့ၢ်ကီးဧါ.”
“ယနာ်, ဘၣ်ဆၣ် ယွၤမၤသးဒ်လဲၣ်န့ၣ် ယတသ့ၣ်ညါဘၣ်. တၢ်သးဝံၣ်တခီ တဲပှၤလၢ အအဲၣ်ပှၤဒီး ပှၤဂၤ မ့ၢ်ညိကွံာ်ပှၤဘၣ်ဆၣ် အဝဲညိကွံာ် ပှၤတကဲဘၣ် ခၠူ၀ၣ်ဧၢ, ယသးမ့ၢ်တမုာ် တပၢၤ, ယမၤမုာ်ထီၣ်က့ၤဒၣ် အီၤလၢ တၢ်သးဝံၣ်အံၤလီၤ.”
“သရၣ်ဧၢ, ဝံသးစူၤ ဒုးဒ့ယၤန ဝါဧိၤလံန် တဘီမီၤ. ဝံၤနသါသးဝံၣ်ကဒီး စါနတၢ်သးဝံၣ် အံၤတဘျီကးလဲၣ်.”

စီၤက့ၣ် ဟ့ၣ်ဃီၤအီၤ တနၣ်ဝံၤ သးဝံၣ်ကဒီးတၢ်သးဝံၣ် အံၤလီၤ. ခၠူ၀ၣ်ဒ့ပိာ်ထွဲ အခံဒီး စီၤက့ၣ်ကမၢ ကမၣ် မးဝဲလၢ ခၠူ၀ၣ်နၢၤ တၢ်ဒ့အကလုၢ် ဂ့ၤမး အဃိလီၤ. စီၤက့ၣ် သးဝံၣ်လွံၢ်ဆၢလိာ်ဝံၤ တဘီ ခၠူ၀ၣ်တိၢ် တၢ်သးဝံၣ် အယုၢ်န့ၢ်လီၤတံၢ်လီၤဆဲးလီၤ. ဝံၤစီၤက့ၣ်တသးဝံၣ်ဘၣ်. မ့မ့ၢ် ခၠူ၀ၣ်ဒ့တၢ် ထဲတရီဧိၤလီၤ. တၢ်သၣ်ဝံၤသၣ်စ့ၤလၢ တၢ်အဲၣ်လၢ အအိၣ်လီၤဘၢ ယံာ်တ့ၢ်လံ တဘျုးမးအံၤ လၢခၠူ၀ၣ်အသးခဲဒး ဟဲပုာ်ထီၣ် ယွၤလီၤဝဲဒီး လဲၤနုာ်မးလၢာ်လၢာ်ဆ့ဆ့ ဆူ တၢ်ဒ့တၢ်သးဝံၣ် ဖုၣ်ဖိတယုၢ် အံၤအပူၤလီၤ.

လၢမုၢ်နုာ်ဂ့ၤ လၢမုၢ်ထီၣ်ဂ့ၤ, ယွၤအိၣ်ဒီး အဖိလီၤဆီ တနီၤစှၤဂၤလၢ အဟ့ၣ်လီၤဆီဝဲ ဒၣ်တၤလၣ် တမံၤဒီး ဟ့ၣ်အီၤအ့န့ၢ် ပှၤဂၤန့ၣ်လီၤ. ခၠူ၀ၣ် မ့ၢ်ပှၤဒ်သိးအံၤ တဂၤလၢ ဝါဧိၤလံန် အဖီခိၣ်လီၤ. အဝဲဒ့ တၢ်သးဝံၣ်အံၤဒီး စီၤက့ၣ်သ့ၣ်ညါ တဘျီဃီလၢ ခၠူ၀ၣ် မ့ၢ်ဝါဧိၤလံန် ကစၢ်တဂၤ, မၢဝါဧိၤလံန် ကတိၤတၢ်ဖဲ အသးအိၣ် ဝဲန့ၣ်သ့ဝဲလီၤ. ဝါဧိၤလံန် ကအုကစွါထီၣ် ခၠူ၀ၣ် အတၢ်လီၤဒိလၢ တၢ်အဲၣ်တံၢ်နီၢ် ဒီး စီၤက့ၣ်အမဲာ်ထံ လီၤမးဝဲ ြပူၤြပူၤလီၤ. စီၤက့ၣ်သံကွၢ်ခၠူ၀ၣ် ဘၣ်ဃး အတၢ်ဒ့ဝါဧိၤလံန် အဂ့ၢ်အကျိၤဒီး ခၠူ၀ၣ် တဲပၠးအီၤ လီၤ. စီၤက့ၣ် ထံၣ်တဘျီဃီ လၢခၠူ၀ၣ် ြကၢးဘၣ်တၢ်သိၣ်လိအီၤလၢ အဲကလံးအနိး ဒ်သိး ကသ့ဒ့ ဟီၣ်ခိၣ် ဒီဘ့ၣ် အတၢ်သးဝံၣ် တဖၣ်လီၤ. ဒီးပာ်လီၤသးလၢ ကလဲၤဆှၢအီၤဆူ အကိၢ်အါနံး သရၣ် အအိၣ်လၢ ကသိၣ်လိခၠူ၀ၣ် လၢနိးအဂီၢ် န့ၣ်လီၤ. တနၤန့ၣ် ခၠူ၀ၣ်ဒ့န့ၢ် စီၤက့ၣ်လၢ တၢ်သးဝံၣ် အါကလုာ်, ထိၣ်ဖိသးဖှံ အတၢ်သးဝံၣ်, ပှၤသးဖျိး အတၢ်သးဝံၣ်, မုၢ်ဆ့ၣ်ထီၣ်အတၢ်သးဝံၣ်, မုၢ်ခံးလီၤ အတၢ်သးဝံၣ်ဒီး တၢ်ဂၤတဖၣ် န့ၣ်လီၤ. မ့ၢ်ပှၤခံဂၤ အခီစၢးလီၤ. စီၤက့ၣ် ပှၤဒိကနၣ်တၢ်ဖိ ခၠူ၀ၣ် ပှၤဒ့တၢ်ဖိလီၤ. တုၤဃီၤဖးဖီမုၢ် ဘျဲၣ်မး ဒီးဟးဖး ဒီး က့ၤမံက့ၤဝဲလီၤ.

တဟါတခီၣ် ယီၣ်စွါလဲၤအိၣ်သကိးမ့ရ့ၣ်လီၤ. မ့ရ့ၣ် ဒ့န့ၢ်အီၤဖံၣ်အဲနိၣ်, သးဝံၣ်န့ၢ်အီၤ တၢ်လီၤ.

“မ့ရ့ၣ်ဧၢ, တၢ်မၤအသးအသီတမံၤ ဒီး စီၤက့ၣ်နၤဧၢ, အဝဲခဲအံၤ လုၢ်ဖိကွၢ်က့ၤ ယူၣ်တရၣ် တမျာ်သးစၢ်ဖိ တဂၤ, ဒီးပာ်ပာ်စၢၤဝဲလၢ ြဖိၣ်ဖဲးစၢၣ် နဲၣ်ကူၣ်မဲ အအိၣ်လီၤ.”

မ့ရ့ၣ်ကမၢကမၣ်မးဒီး သံကွၢ်အါထီၣ်ယီၣ်စွါ လၢတၢ်ဂ့ၢ်အံၤ တဆီတဆီလီၤ. မ့ရ့ၣ်အသး မုာ်မး ဒီးပာ်ကဖၢ မးသးဖဲ အနၢ်ဟူ ဘၣ်စီၤက့ၣ် အတၢ်သးဒူ သးပ့ၢ်လၢ အမၤနၢၤကွံာ် ပှၤအၢဖိခံဂၤ ထဲစုယၢ်ခီဧိၤ, အတၢ်သးကညီၤဒုၣ်ဒါ လၢအမၤနၢၤလံဝဲဒီး အတၢ်ကဟုကယာ်က့ၤ ဒုၣ်ဒါ လီၢ်လံၤ အံၤန့ၣ်လီၤ.

“ယီၣ်စွါဧၢ, နဆိမိၣ်ဒ်လဲၣ်. နၤဒီးယၤ ပမ့ၢ်ကွဲစီၤက့ၣ်ဒီး အဖိတမျာ် လီၢ်လံၤဖိခံဂၤလိာ်, မၢအဟဲအီၣ်တၢ် ဖဲကၠိပျၢ်တၢ်ဒိးစဲးဝံၤ အဟါဝံၤ အိၣ်ဒီး တၢ်သူၣ်ဝံၣ်သးဆၢ တဂ့ၤဘၣ်နၤဧဲၢ်.” မ့ရ့ၣ် တအဲၣ်ယီၣ်စွါ တုၤလီၤ တီၤလီၤ သနာ်က့, မ့ရ့ၣ်သ့ဟ့ၣ်အီၤ အတၢ်သးတီအလါဒ်အံၤ ဒီး သးမုာ်ဝဲလၢ လၢပှဲၤပှဲၤ ဒီးယီၢ်လီၤ ဟီၣ်ခိၣ် တဘၣ်ကဲၣ်ဆိးဘၣ်.

“အၢၣ်, ဂ့ၤဝဲသၢၣ်. ကွဲနဲမ့ရ့ၣ်ဧၢ, အဝဲအံၤ မ့ၢ်ဒၣ်သုဟံၣ်လီၤ. ဒီးကထၢၣ် ခၠါလ့ၣ် မ့ၢ်အိၣ်, ဒီးပှၤထိတရီ ကအိၣ်သၢဂၤ, ပှၤဒ့တနၢ်ကအိၣ် နၤတဂၤ ယဲယကအူ ပံ(ယီၣ်စွါအူပံသ့ဂ့ၤမး) ဒီးကကဲထီၣ် မးအီးခဲးစြထၣ် တဖုသၢၣ်.”

သးစၢ်ခံဂၤအံၤ ကူၣ်လိာ်သးဝံၤ, တၢၣ်ပီၣ်ကဒီးဝဲလၢ မ့ရ့ၣ် အမိၢ်ဒီးအပၢ်လီၤ. အတၢ်အၢၣ်လီၤန့ၢ်အီၤ တကူၢ်သ့ၣ် ညီကဒၣ်လီၤ. ဒီးကထၢၣ်ခၠါလ့ၣ် စ့ၢ်ကီး အၢၣ်လီၤဝဲလၢ သါကအိၣ်ဝဲန့ၣ်လီၤ. ဒီးမ့ရ့ၣ်ကွဲးဟ့ၣ် လီၤတၢ်ကွဲအံၤလၢ ယီၣ်စွါ အစုပူၤလီၤ.

ဒီနွံညါ မ့ၢ်တၢ်ဒိးစဲးအနွံဒီး မ့ရ့ၣ်, ယီၣ်စွါ, စီၤက့ၣ်ဒီး ပှၤလွံၢ်နံၣ်ဖိ လၢခီလ့ၣ်ပူၤကိးဂၤဒဲး ကျဲးစၢး သပှၢ်ပှၢ် လၢကမၤနၢၤတၢ်ဒိးစဲး အခိၣ်တကျီာ် တဘီလီၤ. တၢ်ဒိးစဲး ဝံၤအဟါ, စီၤက့ၣ်ဒီး ခၠူ၀ၣ် ဟးဃ့ၢ်လိာ်ကွဲ, ဟဲက့ၤကဒါက့ၤ ကပၢၤကနိယွၤမး, ဝံၤစီၤက့ၣ် က့ၤကိး ခၠူ၀ၣ်ဆူ အမံဒၢး တခီဒီး ဟ့ၣ်လီၤအီၤလၢ တၢ်ကူတၢ်ကၤ အသီတစူၣ် လၢအဘၣ်မး ခၠူ၀ၣ် လီၤတံၢ်လီၤဆဲး န့ၣ်လီၤ.

“သရၣ်ဧါနၤ, လဲၤထဲနၤတဂၤလီၤမီၣ်, ယမဲာ်ဆှး တစဲးစဲး လၢပကလဲၤလၢ ပှၤတူၢ်ဒိၣ်ကီၤဒိၣ် တဖၣ် အကျါ လီၤ.”
“ခၠူ၀ၣ်ဧၢ, နဘၣ်တၢၤကွံာ် နတၢ်မဲာ်ဆှး လီၤ. သးပ့ၤနီၣ်ကွံာ် တၢ်လီၢ်လံၤ ခဲလၢာ် ဒီးကွၢ်တၢ်ဆူညါ တခီ. နမ့ၢ်ယသကိး ဒီးပှၤမ့ၢ်ကွဲနၤန့ၣ် နဘၣ်သ့ၣ်ညါ လၢအပာ်ကဲနၤအဃိ ကွဲနၤလီၤ. ပှၤတဒူၣ်အံၤ မ့မ့ၢ် ပှၤကဲဒိၣ် သနာ်က့ တပာ်ဒိၣ် ပာ်ထီအသးဘၣ်. ခွါသ့ၣ်ညါ အီၤဂ့ၤကစီဒီလီၤ.”

“သရၣ်ဧၢ, မ့ဒ်န့ၣ်ဒီး ဒ်န့ၣ်သၢၣ်.” ခၠူ၀ၣ် တဘျီအံၤ တဒ်သိး ခၠူ၀ၣ်လၢ စီၤက့ၣ်ဟဲက့ၤမိၤအီၤဆူ ြဖိၣ်ဖဲးစၢၣ် နဲၣ်ကူၢ် မဲ အဟံၣ်လၢၤဘၣ်. ဒိၣ်တၢ်ဖံးပှဲၤညၣ်ပှဲၤ, ဒီး အတၢ်လိာ်ကွဲ သကိး ဒီးစီၤက့ၣ် တဖၣ် မၤရှိၣ်ထီၣ် မၤဘျၢထီၣ်အီၤ, လီၤပိာ်ခွါဒိၣ်မး, အတၢ်သူၣ်မံသးမံ လၢအရ့ဘၣ်ဒီး စီၤက့ၣ်ဘူးဘူး တံၢ်တံၢ် လၢသၢလါ ပူၤဒ်အံၤ ဖျါထီၣ်ဝဲလၢ အမဲာ်သၣ်နါစ့ၤအလိၤ န့ၣ်ဒီး မ့ၢ်ပိာ်ခွါလုၣ်ဘီဘိ ဒိၣ်တၢ်ဂ့ၤမး တဂၤလီၤ.

စီၤက့ၣ်ဖိးဟုအီၤ တစိၢ်ဝံၤ မၢအတၢ်က့ၤလုၣ်ထံ လုၣ်နိ ကူထီၣ်ကၤထီၣ် လၢကလဲၤအီၣ်တၢ်လၢ ပှၤကဲဒိၣ် တီဝူအဟံၣ် န့ၣ်လီၤ. ဃုနၣ်ရံၣ် တခီဒီး ဒီးကထၢၣ် ခၠါလ့ၣ် ဟဲအိၣ်န့ၢ်အီၤ လၢသိလ့ၣ်လီၤ. သးပှၢ်တီဝူ ဟဲခိး နူးဆဲးအီၤလၢ ဟံၣ်မဲာ်ညါ ပဲြတီဖးဒိၣ်ဒီး က့ၤမိၤနုာ်အီၤဆူ တမှံၤဒၢးပူၤလီၤ. အိၣ်တစိၢ်ဖိ ဒီးသိလ့ၣ် ဟဲတုၤ အဂၤတဆိ ဒီးမ့ရ့ၣ် ဒီးယီၣ်စွါ ဟဲက့ၤတုၤစ့ၢ်ကီး လၢတၢ်ဟးလိာ်ကွဲ အလီၢ်န့ၣ်လီၤ. မ့ရ့ၣ် ကူကၤ ဆ့တဘ့ၣ်ဃီ, ဆ့ဝါဖးထီ ဒီးဖီ အပၠၣ် တဖီးဧိၤ ဒ်တၢ်သးတီ ပနီၣ်သိး, လၢအနူးဆဲး စီၤက့ၣ်န့ၣ်လီၤ. စီၤက့ၣ် ထံၣ်ဒီး သ့ၣ်နီၣ် ဝဲတဘျီဃီ လီၤ. မ့ရ့ၣ် ဖီၣ်နူးဆဲး စီၤက့ၣ် အစုခံခီလိာ် ကွၢ်ဃီၤဝဲ ဒီးထံၣ်ပသံး လၢၢ်လါ ဒီး တၢ်မျၢ်လါ ခံဘိလိာ် ဒီး နံၤကမှံ ထီၣ်ဝဲ လီၤ. ယီၣ်စွါ တသ့ၣ်ညါ တၢ်ကစီၣ်ခီဖျိဆ့, ဖီ, ဒီးပသံး တဖၣ်အံၤဘၣ်. ဒီးတသ့ၣ်ညါ ဝဲန့ၣ် ဂ့ၤတက့ၢ်လၢ အဂီၢ်စ့ၢ်ကီးလီၤ.

စီၤက့ၣ်မိၤဃီၤ ခၠူ၀ၣ် ဒီးဒုးသ့ၣ်ညါ အီၤလၢမ့ရ့ၣ်, အပၢ်, အမိၢ်ဒီး ဒီးကထၢၣ် ခၠါလ့ၣ် တဖၣ်လီၤ. ပှၤခဲလၢာ် သ့ၣ်ညါပာ်စၢၤ ခၠူ၀ၣ် အဂ့ၢ်လီၤ. ပှၤတကွၢ်တလီၤအီၤ နီတဂၤဘၣ်. မ့ၢ်စီၤက့ၣ် အသကိး ဒီး ပှၤတူၢ်လိာ်မုာ်အီၤလီၤ.

စီၤက့ၣ်တခီ ပြတၢၤကၢ်ကီာ်မး ခၠူ၀ၣ် အတၢ်ဒ့ဝါဧိၤလံန် ဒီးစံး, “အဝဲအံၤ မ့ၢ်ယသရၣ်လီၤ.” တၢ်ရ့လိာ်မုာ် လိာ်ဒ်အံၤ မၤလီၤကဆှၣ်မၤလီၤပှံၢ်ထီၣ် ကွံာ် တၢ်မဲာ်ဆှး ခဲလၢာ်လၢ ခၠူ၀ၣ် အပူၤ ဒီးအဝဲအသးခု သးဖှံ လၢလၢပှဲၤပှဲၤ အမဲာ်ညါ, ပာ်လီၤအသးဒီးစံးဝဲ, “ယမၤမဲာ်ဆှး ယသရၣ်စီၤက့ၣ် တသ့ဘၣ်. ယကကွၢ် တၢ်ဆူညါ ဒီးသးပ့ၤနီၣ်ကွံာ် တၢ်လီၢ်ခံ ခဲလၢာ်န့ၣ်လီၤ.”

တၢ်အီၣ်တဟါညါန့ၣ် ပှဲၤမးဒီး တၢ်နံၤကဝဲၢ်ပျီၢ် ကဒီလီၤ. ထဲခၠူ၀ၣ်တဂၤ ဃဲၤလီၤအဂ့ၢ် လၢအလီၤနံၤ တဖၣ် တီတီဖျါဖျါ န့ၣ် ပှၤခဲလၢာ် တနံၤဒီး အိၣ်တကဲဘၣ်. မ့ရ့ၣ် သးပ့ၤနီၣ်ကွံာ် အတၢ်သးအုး တ၀ာ်ညါလီၤ. မ့မ့ၢ် သးပှၢ်တီဝူ တဂၤနၢ်ဟူ ခၠူ၀ၣ်တဲပၠးအီၤလၢ အလီၤလၢဃိာ်ပူၤအဂ့ၢ်, လၢဃိာ်ပူၤ န့ၣ်မုၢ်နၤခီ ပှၤမ့ၢ်သးအိၣ် ဆံၣ်ဆါ ပှၤဘၣ်ကိးထီၣ် “ဆံၣ်ဆါ” မ့တမ့ၢ် “အ့ၣ်ဆါ” ဝံၤမးလဲၤဟးဘၣ်ဝဲ, လၢဃိာ်ပူၤန့ၣ် ဃိာ်စီၤပၤဖိ အိၣ်အဒိၣ် အဆံး, လၢဃိာ်ပူၤန့ၣ် ထူဧိၤစ့ဧိၤ လဲၤတရံးတၢ်ဒ် လၢခူဝ့ၢ်တဖျၢၣ်အပူၤ အသိး, တၢ်ဆါတၢ်ပှ့ၤ အိၣ်ဝဲ, ဃိာ်ဒိၣ်တဖၣ် တၢ်ဖၢဘျီၣ်အမဲာ်လၢစ့, စ့မၤတၢ်သ့ အါမံၤအါမၠိ န့ၣ် ပှၤတၤကျိၣ် တၤစ့, ပှၤပှ့ၤအီၣ်ဖီအီၣ်, ဒီးတၢ်ဂၤ အါမံၤဒီး သးပှၢ်အံၤ နံၤအမဲာ်ထံယွၤ နါအ့ၣ်ယွၤ ဘၣ်ထွါဝဲ ဩံဝဲလၢ ပ၀ၣ်ပူၤ ခဲအံၤခဲအံၤ လီၤ. မ့ရ့ၣ်စီၤကွၢ် စီၤက့ၣ်တဘျးတဘျး, ဒီးထံၣ်ဝဲလၢ စီၤက့ၣ် အမဲာ်ဖျါလၢ အသးမုာ် လၢခၠူ၀ၣ် ကဲထီၣ် ပှၤသ့မၤသးဖှံ ပှၤအသး ဒ်အံၤန့ၣ်လီၤ. မ့ရ့ၣ်တသးကါ ခၠူ၀ၣ် လၢအဟံးန့ၢ် တံၤသကိး အလီၢ်လၢ စီၤက့ၣ် အသးပူၤန့ၣ်ဘၣ်. နာ်ဝဲလၢ အဝဲဒၣ် (မ့ရ့ၣ်) အိၣ်ပာ်စၢၤလၢ စီၤက့ၣ်အသးအဒၢး လီၤဆီတဖျၢၣ် လၢခၠူ၀ၣ်ဒၣ်လဲာ် လဲၤနုာ်ဝဲတပၢၢ် န့ၣ်ဘၣ်. ဒီးတၢ်လၢ အမၤသးဖှံ စီၤက့ၣ် န့ၣ် မၤသးမုာ် မ့ရ့ၣ် စ့ၢ်ကီးလီၤ.

စီၤက့ၣ်ကတိၤထီၣ်တၢ်, “ခၠူ၀ၣ်ဧၢ, နသါတဲပၠးစါ ဒီးကထၢၣ်ခၠါလ့ၣ် ဘၣ်ဃး နဝါဧိၤလံန် သရၣ် ဘျီၣ်မဲာ် သးပှၢ်တဂၤ အဂ့ၢ်တဘီလဲၣ်.”

ခၠူ၀ၣ် တဲပၠးပှၤခဲလၢာ် လၢပှၤဃ့အီၣ်တၢ်သးပှၢ် တဂၤအံၤ အဂ့ၢ်တဆီတဆီ ဖဲအသ့ၣ်ညါ ထွဲဝဲန့ၣ်ဒီး, ဒီးကထၢၣ် ခၠါလ့ၣ် ကနၣ်အမဲာ်ချံ တကျိၣ်တဘီလီၤ. “လၢယတၢ်အိၣ်မူအပူၤ, ယတသ့ၣ်ညါမိၢ် သ့ၣ်ညါပၢ်ဘၣ်. ယသ့ၣ်ညါ ဒၣ်လၢ ယက၀ာ်အီၣ်ဂုာ်အီၣ် ယဆၣ်လီၤ. ယမ့ၢ်တမၤဒ်အံၤဒီး ယလီၤဒိလီၤ. ယထီဒါပှၤ, ပှၤထီဒါယၤ, ယနၢၤပှၤအခါ ယနၢၤ, ပှၤမၤနၢၤယၤအခါ ယခီၣ်ဘၣ်လီၤ. ဘၣ်ဆၣ် ယထံၣ်ဘၣ် တၢ်အဲၣ်လၢ တၢ်လီၢ်သၢပူၤလီၤ. ယအိၣ်ခံနံၣ်လၢ ယသရၣ်မဲာ်ဘျီၣ် အသကိး မ့ၢ်တၢ်လီၢ် အခီၣ်ထံး တတီၤ ဖဲယထံၣ်ဘၣ် တၢ်အဲၣ်န့ၣ် အဆိကတၢၢ် လီၤ. ယသရၣ် စီၤက့ၣ် အတၢ်အံး က့ၤကွၢ်က့ၤယၤ ခဲအံၤ မ့ၢ်တၢ်အဲၣ်အလီၢ် ခံတီၤတတီၤ, ဒီးယဘၣ် တၢ်တူၢ်လိာ်ယၤ ခဲအံၤ လၢသုဟံၣ်ပူၤ လၢမုၢ်တဟါညါအံၤ မ့ၢ်သၢ ပူၤတပူၤလီၤ. ယသးပ့ၤနီၣ် တၢ်တဖၣ်အံၤ တန့ၢ်နီတစုဘၣ်.

ခၠူ၀ၣ် အတၢ်ကတိၤယိယိဖိ လၢအဟဲထီၣ်နီၢ်နီၢ်လၢ အသးအကံၢ်အလဲအံၤန့ၣ် မၤဘၣ်ဒိဘၣ်ထံး မးပှၤဒိကနၣ် တၢ်အသး လီၤ. မ့ရ့ၣ် အတၢ်ဆိကမိၣ်အါထီၣ် မးဝဲလၢ အနၢ်ဟူတၢ်အုၣ်အသးအံၤ န့ၣ်အဃိလီၤ. အီၣ်, တၢ်အဲၣ်အံၤ အစိကမီၤ ဒိၣ်မးဝဲလဲၣ်. ပှၤလၢအလိၣ် ဘၣ်တၢ်အဲၣ်အံၤ, အိၣ်အါမး လဲၣ်. ယြကၢး မၤစၢၤ ပှၤတဖၣ်အံၤ လၢကျဲမတၤတဘိလဲၣ်. ယသါကွၢ် စါစီၤက့ၣ် ကမၤဝဲဒ်လဲၣ်.

ယီၣ်စွါတခီစံး, “ခၠူ၀ၣ်ဧၢ, နသါဂုာ်န့ၢ်စ့လၢ ြဖိၣ်ဖဲးစၢၣ် နဲၣ်ကူၢ်မဲ ဒီးစီၤက့ၣ်အအိၣ်ဒီး တၢ်မၤ အသးဒ်လဲၣ်.”
“အါ, ယကွၢ်မုၢ်တချုးဘၣ်. ယသရၣ် အခီၣ်ဟဲယွဲၢ်ကနာ်, ဒီးယသ့ၣ်ညါ ဒၣ်လၢ ယပှီၤဒ့ၣ်လၢ ကျဲခိၣ်လီၤ. ပှၤတဂၤအံၤ ပချ့န့ၢ်လီ၀ၢ်ဒံးနဲာ်,”
“မ့ၢ်စဲဃဲၤနၤဧၢ, ယသ့ၣ်နီၣ်က့ၤလၢ ပအိၣ်လၢ တီၤထီကၠိလၢ လၢၢ်ဟ့ တခီ ပကျီြပၢလိာ်သးလၢ နးတဟါ, အိၣ်အိၣ် စီၤက့ၣ်ဝံၢ်တကၢ ပဝံာ်ယစု, ယနးကၢ်ကွံာ် မးချဲးကနာ် တဘ့ၣ်, ယဘၣ်ခီၣ်ရှူ ယသးလီၤ.”

တၢ်ကတိၤတရံးဃီၤကဒီးဆူ တၢ်ကျီနး အအိၣ်တခီန့ၣ်လီၤ.
သးပှၢ်တီဝူစံး, “လီၤမဲာ်ဆှး ဘၣ်ယၤဒိၣ်မး လၢပှၤအ့ဒိၣ်ခၠဲနၣ်ဖိ တဂၤ ဒ်နဲၣ်အူခၠဲး အသိး ဟဲကဲဘၣ် ယူၣ်တရၣ် ခၠဲပယဲၣ် ယံာ်မးယဲၢ်နံၣ်လံ အံၤလီၤ. မ့ၢ်ပှၤယူၣ်တရၣ်ဖိ တအိၣ်လၢၤဘၣ် နီတဂၤလၢ ကျီအီၤ ကနၢၤန့ၣ်ဧဲၢ်.”
ယီၣ်စွါတခီ, “ကွၢ်ဘီၣ်, စီၤက့ၣ်ဒီး နဲၣ်အူခၠဲး မ့ၢ်ဘၣ်ကွးလိာ်သး တၢ်ကမၤသးဒ်လဲၣ်.”
“အီၣ်, စီၤက့ၣ်ကူၣ်ထီၣ်လၢ ကတၤအီၤ န့ၣ်ဧါ,” သးပှၢ်တီဝူ သံကွၢ်ဝဲလီၤ.
“ယကူၣ်ထီၣ်စဲဃဲၤ ဖါတံၢ်ဧၢ, ယကျီနၢၤတနၢၤ ဒုယစံးတသ့ဘၣ်. ယကမၤကွၢ် လၢာ်သးလီၤ.”
“မ့မ့ၢ်ဒ်န့ၣ်, ဖါတံၢ်ကထုးထီၣ် ဟ့ၣ်လီၤစ့ ခံကလး ထ့းကီၣ်လၢ တၢ်ပာ်လီၤဆိစ့ ဒ်သိး နတၢ်တၤအီၤ န့ၣ် ပဒိၣ်ကတူၢ်လိာ် ဝဲအဂီၢ်န့ၣ် တဘီမီၣ်.” ကီၢ်ယူၣ်တရၣ် ပဒိၣ်ပၢဆှၢတၢ်ကျီြပၢလိာ်သး လၢနးလၢအအိၣ်ဒီး တၢ်တၤ ကျိၣ်တၤစ့ န့ၣ်လီၤ. ပှၤလၢ အသါကခီၣ်ကျီ ခၠဲပယဲၣ် တဂၤန့ၣ် အဆိကတၢၢ် ဘၣ်တီၣ်ထီၣ် စ့အုၣ်ခီၣ်သး ခံကလး ထ့းကီၣ် လၢအဝဲမ့ၢ် ပှၤကျီနးသ့, မၤန့ၢ် ကမျၢၢ် အါဂၤ အသးလၢ ကဟဲကွၢ်ကီ တၢ်အါအါဂီၢ်ဂီၢ်န့ၣ်လီၤ. ပှၤဟဲကွၢ်ကီ တၢ်ဖိခဲလၢာ် ဟ့ၣ်တၢ်ကွၢ်ကီအလဲ မ့ၢ်ပှဲၤထီၣ် ဒီး အါန့ၢ် စ့ခံကလး ထ့းကီၣ်ဒီး ပှၤအံၤ မၤန့ၢ်က့ၤအစ့ အုၣ်ခီၣ်သး ခံကလး အံၤလီၤ. မ့ၢ်စှၤတခီ တစ့အံၤ ရှူဝဲလီၤ.

“ဖါတံၢ်ဧၢ, တၢ်ဘျုးဒိၣ်မးလီၤ. ယဆိမိၣ်သးလၢ ယကက့ၤဃ့န့ၢ်စ့ခံကလးအံၤ လၢယပၢ် အအိၣ်လီၤ. နမ့ၢ် တီၣ်ထီၣ်န့ၢ်ပာ်စၢၤ ယၤဒီး တၢ်ဘျုးလီၤ. နစ့မ့ရှူလၢ ယဃိ ယကလိးက့ၤလီၤ.”
“ထ့ၣ်ဧၢ, ဖါတံၢ် အဲၣ်တၢ်လိာ်ကွဲအံၤ အဒိၣ်ကတၢၢ်, ဖါတံၢ်နၢ်ပၢၢ် အဂ့ၢ်ဘၣ်ဃး တၢ်သုးတၢ်ကျဲၤ ပှၤကွၢ်တၢ်ဒီး စ့တခီကစီဒီ, ကိၢ်တဂ့ၤ. ပှၤကဘၣ်ဟဲကွၢ်ကီ တၢ်အစှၤကတၢၢ် အဂၤသၢကလးနဲၣ် ထ့ၣ်ဧၢ, လိၣ်ဒၣ် နကနၢၤလီၤ. ဖါတံၢ် ကတၤလီၤစ့ တကလီၢ်လၢ နဖီခိၣ်သၢၣ်. ညီနုၢ်ပှၤဟ့ၣ် စ့သၢဘး ထီဒါပှၤတၤ ခၠဲပယဲၣ် တဂၤ အစ့တဘး, နမ့ၢ်နၢၤ ဖါတံၢ် ကကဲဒိၣ် အါထီၣ်စ့ သၢကလီၢ် ဒံးတခီသၢၣ်.”
“ကွၢ်မၤ ကွၢ်မၤဖါတံၢ်ဧၢ, ယစံးလၢ ယကနၢၤသပှၢ်ကတၢၢ် တသ့ဘၣ်.”
“အီၣ်, ယစ့မ့ၢ်စှၤလီၤ တကလီၢ် ယတဖှီၣ်လီၤကီး ပျာ်လဲၣ်. တမ့ၢ်ဧဲၢ် ပှၤမုပှၢ်ဧၢ.” သးပှၢ်တီဝူ တရံးဃီၤကွၢ်အမါ အမဲာ်လီၤ. မုပှၢ်ဒိၣ်နံၤ ကမှံထီၣ်ဒီး တစံးဆၢ တၢ်နီတမံၤဘၣ်. ကျၢၢ်ကျာ်လီၤ အခိၣ်တစဲး လီၤ. မ့ရ့ၣ် သံကွၢ်, “ပၢ်ဧၢ, ပှၤကျီခၠဲပယဲၣ် မ့ၢ်နၢၤ ကန့ၢ်ဘၣ်မနုၤလဲၣ်.”
“ကန့ၢ်ဘၣ် ဖလါထူ ကၢကီၣ်စ့တကလး တဖျၢၣ် ဃုာ်ဒီး စ့တခီ တကလးထ့းကီၣ်လီၤ.”

မ့ရ့ၣ်တရံးဃီၤဆူ စီၤက့ၣ်အအိၣ်ဒီး သံကွၢ်အီၤ, “နမၤဆူးတဖၣ်အံၤ မ့ၢ်န့ၢ်ဒီး နသါသူအီၤဒ်လဲၣ်, စီၤက့ၣ်ဧၢ.”
“အဆိကတၢၢ် န့ၣ် ယသးအိၣ်ဘှီထီၣ်တၢ်ဆါဟံၣ် တဖျၢၣ်လၢ ယသဝီ ဒၣ်ယဲလၢ ယပှၤကလုာ်တဖၣ် အဂီၢ်လီၤ. ဝံၤယသးအိၣ် မၤတၢ်လၢ ပှၤသးစၢ်ဒ် ခၠူ၀ၣ် တဖၣ်အဂီၢ် တမံၤမံၤလီၤ.”

ပှၤအီၣ်တၢ်ဝံၤ က့ၤကၢၤဖှိၣ် က့ၤအသး လၢတမှံၤဒၢးပူၤလီၤ. ဖဲန့ၣ် ပှၤစးထီၣ် တၢ်ဒ့တၢ်အူ ဒီး တၢ်သူၣ်ဝံၣ် သးဆၢတဖၣ်လီၤ. စီၤက့ၣ် ဃ့ကညးလၢ ဒီးကထၢၣ်ခၠါလ့ၣ် ကဒ့ဝါဧိၤလံန် တယုၢ်ထဲတဂၤဧိၤလီၤ. ဒီးကထၢၣ် ခၠါလ့ၣ် ဒ့န့ၢ်အီၤ ပှၤကနၣ်မုာ်မးလီၤ.

ဝံၤဒီး ခၠူ၀ၣ် ဘၣ်တၢ်မၢအီၤလီၤ. “ယကဒ့တၢ်သးဝံၣ် တယုၢ်လီၤ. ယသရၣ်သးပှၢ် မဲာ်ဘျီၣ် အတၢ်သးဝံၣ် ခံယုၢ်ယဒုးကဲထီၣ်က့ၤ တယုၢ်ဃီလီၤ. ဝံၤသုဖးစါ, အဲၣ်ဒိး စံးမနုၤခီဖျိ တၢ်သးဝံၣ် အံၤန့ၣ်လဲၣ်.”

ခၠူ၀ၣ် ဖီၣ်ထီၣ် ဝါဧိၤလံန်, မၤဖ့ၣ်ဆၢထီၣ်အပျံၤ, မၤဘျ့ဝဲအပျံၤ လီၤတံၢ်လီၤဆဲးဝံၤ မိာ်ထီၣ် အကိာ်ဆူ ထးဒီး စးထီၣ်ဒ့ဝဲလီၤ. ဒ့ဝဲ တကျိၤခံကျိၤတဘီ တၢ်သးဝံၣ် အကဟုကညီၢ်လီၤကးဘၢ ပှၤခဲလၢာ် အသး တုၤတၢ်ဘှ့ၣ်မး ြပံးကလာ်လီၤ. တၢ်သးဝံၣ် အခီၣ်ထံးတတီၤ အံၤဒုးလီၤကံးမး ပှၤခဲလၢာ်အသးလၢ တၢ်သးအုး လၢအမၤသးဒ် ပသၣ်ဝံၤ မ့ၤပတအီၣ် ဘၣ်အီၤဒီး ပကအုကစွါအသိး န့ၣ်လီၤ. ခံတီၤတတီၤ တခီ ဘိးကဒါအသး လၢာ်လၢာ်ဆ့ဆ့ လီၤ. လၢတၢ်သးအုး အလီၢ်န့ၣ် တၢ်သးခု ဟဲြပံာ်ထီၣ်ဝဲဒီး ပှၤခဲလၢာ် အခီၣ်ကမိၣ် ဂဲၤကလံၣ် သးလၢ တၢ်သးခု, တၢ်စံးဘျုးစံးဖှိၣ် သးတၢ်အဂီၢ်လီၤ. ခၠူဝၣ် ဒ့တၢ်ဝံၤ ပှၤတကတိၤ တၢ်နီတဂၤဘၣ်. “ကဲၢ်, မတၤကစံးဆၢ ယတၢ်သံကွၢ်တဂၤလဲၣ်.” ခၠူ၀ၣ် သံကွၢ်ဝဲလီၤ.

မ့ရ့ၣ်ကတိၤထီၣ်တၢ်ဒီးစံးဝဲ, “ခၠူ၀ၣ်ဧၢ, မ့မ့ၢ် ယဲယကစံးဒ်အံၤလီၤ. တၢ်သးဝံၣ် အခီၣ်ထံးတတီၤန့ၣ် ပာ်ဖျါထီၣ် နသရၣ်သးပှၢ် အတၢ်နးတၢ်ဖှီၣ် ဖဲအဃ့တၢ်သးကညီၤ တန့ၢ်ဘၣ် ဒီးဘၣ်အိၣ် သၣ်ဝံၤ သၣ်စ့ၤ ဝဲန့ၣ်လီၤ. ခံတီၤတတီၤတခီ နံၤလၢအဝဲဘၣ်ဘျုး အါမးဒီး အီၣ်ဘၣ်ကူကူလၢလၢ အခါ န့ၣ် အဝဲလၢတၢ်သးခု သးမုာ်အပူၤ စံးဘျုးက့ၤတၢ် န့ၣ်လီၤ.” ပိာ်မုၣ်လၢ အတၢ်အဲၣ်အါ မးတဖၣ် အသးသဒ့ၣ် လၢကနၢ်ပၢၢ် တၢ်ခူသူၣ် န့ၣ်ဆူၣ်မးဝဲလီၤ. ဒီးမ့ရ့ၣ် မ့ၢ်ပိာ်မုၣ် ဒ်အံၤတဂၤလီၤ. တၢ်အဲၣ်မ့ၢ် တၢ်ဟဲလၢယွၤ အအိၣ်ဒီး မ့ၢ် တၢ်ကူၣ်ဘၣ်ကူၣ်သ့, တၢ်စိတၢ်ကမီၤ အဒိၣ်ကတၢၢ်လီၤ. ပှၤတဂၤစံးဝဲတဘျီ, “စုလၢအထိဝးစုာ် န့ၣ် မ့ၢ်စုလၢ အပၢဟီၣ်ခိၣ်လီၤ.” ပှၤအံၤ အဲၣ်ဒိးစံးဒၣ် ဘၣ်အသးလၢ ဖိလံၤတဖၣ် အသကဲာ်ပဝး န့ၣ်အိၣ်လၢ မိၢ်တဖၣ် အစုပူၤ, ဒီး ပှၤလၢ အဖံးတၢ်မၤတၢ် အဒိၣ်အမုၢ်လၢ ဟီၣ်ခိၣ်ချၢ တဖၣ် န့ၢ်ဘၣ် တၢ်ဂံၢ်တၢ်ဘါအံၤ လၢမိၢ် တဖၣ် အအိၣ်န့ၣ်လီၤ.

“ဟါ မ့ရ့ၣ်တဲတၢ်ဘၣ်မး ချီကနာ်လီၤ.” ခၠူ၀ၣ်စံး.
တဟါန့ၣ် ခၠူ၀ၣ် မၤမုာ်ပှၤခဲလၢာ် အသးလၢ တရီ အတၢ်သးဝံၣ် အကလုာ်လုာ် အမၠိမၠိလီၤ. မၤနံၤပှၤ, မၤဟီၣ်ပှၤ, မၤဆဲးခွဲးပှၤအသး, ထိၣ်ဂဲၤထီၣ် ပှၤဒိကနၣ်တၢ် အသး အလုၢ်အလၢ်အသဟီၣ်လၢ ကီၤလၤဖိ ကိးဝဲလၢ အံၣ်မိရှၢၣ် တဖၣ်ဖဲအသးအိၣ်န့ၣ် သ့ဝဲလီၤ. ပှၤစံးဝဲလၢ ဝါဧိၤလံန် မ့ၢ်တၢ်ဒ့ ခဲလၢာ် အစီၤပၤလီၤ. မ့ၢ်စဲဃဲၤလီၤ. ဝါဧိၤလံန် တဆိ မ့ၢ်ဘၣ်သဂၢၢ်ဒီး အကစၢ်လၢ အပၢၤအီၤသ့တဂၤဒီး ကဲထီၣ် စုကဝဲၤ လၢအဆူၣ်ကတၢၢ် လၢတၢ်ဒ့တၢ်အူ အပီးအလီခဲလၢာ် အကျါန့ၣ်လီၤ.

လၢခံကတၢၢ် ဟဲတုၤလၢ စီၤက့ၣ်အတီၤလီၤ. စီၤက့ၣ် တတုၤဃီၤ ဒီးကထၢၣ် ခၠါလ့ၣ် မ့ၢ်ဂ့ၤ, ခၠူ၀ၣ် မ့ၢ်ဂ့ၤ အတီၤဒံးဘၣ်. သနာ်က့ တၢ်သယုၢ်သညိ အသးလၢ အပူၤအံၤ အီၣ်လီၤကလိၤ တၢ်ဆူၣ်မး ဒီးတၢ်သးဝံၣ် ယိယိဖိ “တၢ်အဲၣ်လၢ ညိကွံာ် ယၤတကဲ” တယုၢ်လၢ အဃုထၢဝဲလၢ ကဒ့ဝဲန့ၣ် မ့ၢ်တၢ်သးဝံၣ် တယုၢ်လၢ အဝဲဂၢ်လီၤ မးအတၢ်သးလီၤ သဘှံးခူသူၣ် ခဲလၢာ် အတဟီၣ်လၢ အပူၤအံၤ န့ၣ်လီၤ. စီၤက့ၣ်တဲပၠး ပှၤဒိကနၣ် တၢ်တဖၣ် လၢပှၤထုးထီၣ် တၢ်သးဝံၣ် တဂၤအံၤ အဂ့ၢ်ဒ် မ့ရ့ၣ် တဲပၠးတ့ၢ်လံ အီၤအသိး, ဝံၤဃ့ကညး မ့ရ့ၣ်ကဒ့ဃုာ် အီၤလၢ ဖံၣ်အဲနိၣ် ဒီးသးဝံၣ် ဃုာ်အီၤန့ၣ်လီၤ. တၢ်တမံၤဃီ လၢအမၤအသးလၢ စီၤက့ၣ်အံၤ မၤအသးလၢ မ့ရ့ၣ် န့ၣ်လီၤ. မ့ရ့ၣ် ဂၢ်လီၤစ့ၢ်ကီး အတၢ်သးလီၤ သဘှံး ဆူတၢ်သးဝံၣ် တယုၢ်အံၤ အပူၤခဲလၢာ်ခဲဆ့ လီၤ. ဝါဧိၤလံန်, ဖံၣ်အဲနိၣ် ဒီးကလုၢ်သၢမံၤ မၤသကိးတၢ် ဃူဃူဖိးဖိး လီၤ. တမ့ၢ်ပှၤဒ့သနၢ်, ဒ့ဝါဧိၤလံန်, သးဝံၣ်တၢ် အသ့ကတၢၢ် တဖၣ်ဘၣ်. သနာ်က့ တၢ်အနီၢ်အသံး လၢသးတခီ မၤပှဲၤထီၣ်က့ၤ တၢ်လီၤတူာ်လီၤကာ် ခဲလၢာ်လီၤ. လၢတၢ်တသ့ၣ်ညါ ဘၣ်အပူၤ, သးစီဆှံ ကစၢ်ကတိၤတၢ် ခီဖျိ တၢ်သးဝံၣ် တယုၢ်အံၤ ဒီး ပှၤဒိကနၣ်တၢ်ခဲလၢာ် အသးလၢ အသၣ်ဝံၤ သၣ်စ့ၤယွၤ လၢအတ့လီၤအီၤ ဒီးတူၢ်သံ လံအသးလၢ ထူၣ်စုညါ အလိၤလၢ အဝဲသ့ၣ်အဂီၢ် ဘၣ်ဒိဘၣ်ထံး မးဝဲလၢ တၢ်သးသယုၢ် လၢအနၢ် တပၢၢ်က့ၤဝဲဘၣ်န့ၣ်လီၤ. သးပှၢ်တီဝူ ဒီးအမါ ခံဂၤ အသးဘၣ်ဒိ အဒိၣ်ကတၢၢ်လီၤ. အဂ့ၢ်ဒ်အံၤ, သ့ၣ်ညါ စီၤက့ၣ်ဒီး မ့ရ့ၣ် အတၢ်နးတၢ်ဖှီၣ်ခူသူၣ်အံၤ န့ၣ်လီၤ. ယီၣ်စွါစ့ၢ်ကီး သါသဖှိထီၣ်မး “ဟုၤ, ဟုၤ” ဖဲအနၢ်ဟူ တၢ်သးဝံၣ် အခါန့ၣ်လီၤ. တၢ်သးဝံၣ်ကတၢၢ်တစု, ခၠါလ့ၣ်ဒီး ခၠူ၀ၣ် တဖၣ်အိၣ်တကဲလၢၤဘၣ်. ဖီၣ်ထီၣ် အတရီဒီး ဝီၣ်လီၤဒ့ဃုာ် ကဒီးလၢ စီၤက့ၣ်ဒီး မ့ရ့ၣ် အသကိး လီၤ. ယီၣ်စွါ စ့ၢ်ကီး ဖီၣ်ထီၣ်အပံ (ပလွ့ၣ်) ဒီးအူဝဲလီၤ. တဟါန့ၣ် ပှၤတဖၣ် မၤမးဝဲတုၤ အသးဝံၣ် တၢ်သးဝံၣ် တယုၢ်အံၤ ဘၣ်ခဲလၢာ် န့ၣ်လီၤ. စီၤက့ၣ်ဒီး မ့ရ့ၣ် မ့ၢ်တသ့ၣ်ညါ သနာ်က့, ယွၤဖှံလီၤ အတၢ်သးခုကစီၣ် အချံလၢ တရူးကဲဒိၣ် တဂၤ အဟံၣ်ပူၤအံၤ လၢမုၢ်တဟါညါအံၤ ခီဖျိ တၢ်သးဝံၣ် အံၤန့ၣ်လီၤ.

မုၢ်ယိာ်လံဒီး တၢ်ရ့လိာ်မုာ်လိာ် တဘျီအံၤ ဘၣ်ကတၢၢ်ကွံာ်ဝဲလီၤ. ပှၤသးပ့ၤနီၣ် မုၢ်တဟါညါအံၤ တသ့နီတဂၤဘၣ်. မ့ၢ်မး မုၢ်တဟါလၢ ယွၤအိၣ်ဃုာ်သကိး လၢအဝဲသ့ၣ် အတၢ်သူၣ်ဖှံသးညီ အံၤအပူၤလီၤ. ဒီးတၢ်မၤလၢ ယွၤမၤဝဲလၢ အနီၢ်ကစၢ်န့ၣ် အိၣ်စံာ်အိၣ်ကျၢၤဝဲထီဘိလီၤ.

သးပှၢ်တီဝူစံး, “စီၤက့ၣ်ဧၢ, ခဲဂီၤ နမ့ၢ်က့ၤဒီး နမ့ၢ်သးအိၣ်န့ၣ် ယကတူၢ်လိာ် ပာ်ခၠူ၀ၣ် လၢယအိၣ်အံၤ မီၣ်.”
စီၤက့ၣ်နံၤကမှံထီၣ်ဒီး စံးဘၣ်ခၠူ၀ၣ်, “ကဲၢ်, ခၠူ၀ၣ်ဧၢ, နကစံးဒ်လဲၣ်.”
ခၠူ၀ၣ်တခီစံးဆၢ, “သရၣ်ဧၢ, ဖဲနလဲၤန့ၣ် ယသးအိၣ်လဲၤဃုာ်ဒီးနၤလီၤ. နမ့ၢ်က့ၤဆူ စံာ်ဖးလဲၢ် ဒီးယသးအိၣ် လဲၤပိာ်နခံလီၤ.”
သးပှၢ်တီဝူ နံၤထီၣ်ဒီးစံး, “စီၤက့ၣ် ဒီးခၠူ၀ၣ် ကဲထီၣ်မး လံထွံၣ်ဒီးအမဲၢ်လံဧါသၢၣ်.”
မ့ရ့ၣ်သံကွၢ်စီၤက့ၣ်, “နလ့ၣ်မ့ၣ်အူ ကဟးထီၣ်ပှဲၤနၣ်ရံၣ်လဲၣ်.”
စီၤက့ၣ်စံးဆၢအီၤ, “လၢဂီၤခီ ဃိးနၣ်ရံၣ်လီၤ. ဘၣ်မနုၤလဲၣ်.”
“အီၣ်, ယီၣ်စွါဒီးယၤ ပအဲၣ်ဒိး ဟဲဆှၢလီၤသုလၢ လ့ၣ်မ့ၣ်အူ သန့အဃိသၢၣ်.”
မ့ရ့ၣ်ဒီး ယီၣ်စွါ ကူၣ်လိာ် ပာ်အသးဝံၤ, ဒီးလဲၤပှ့ၤပာ်စၢၤ လၢၢ်ဝါ တဘ့ၣ်လၢ ကဟ့ၣ်လီၤစီၤက့ၣ် လၢ ကက့ၤပာ်လီၤဝဲလၢ အမိၢ် အသွၣ်ခိၣ် အဂီၢ်န့ၣ်လီၤ. လၢလၢၢ်ဝါ အလိၤ တၢ်ကတိၤ လၢလာ်တဖၣ် ဘၣ်တၢ်စိး ပျၤအီၤ ဒီးကွဲးအီၤလၢ ထူထံန့ၣ်လီၤ.

လၢတၢ်သ့ၣ်နီၣ်ထီၣ်က့ၤ

စကီၤမုၣ်နီၢ်ထူ, ပိာ်မုၣ်တဂၤလၢ
“အဖိဂဲၤဆၢထၢၣ် ဒီးဆိၣ်ဂ့ၤအီၤ,
အ၀ၤန့ၣ် စံးထီၣ်ပြတၢၤအီၤလီၤ.”

မ့ရ့ၣ် တမ့ၢ်ပှၤခရံာ်ဖိသနာ်က့, အိၣ်တဘျုးနံၣ်လၢ ခရံာ်ဖိကၠိပူၤဒီး အဲၣ်မၤလိ ပှၤခရံာ်ဖိ အလုၢ်အလၢ် အါမံၤန့ၣ်လီၤ. ဒီးမ့ရ့ၣ် ဃုထၢ တၢ်ဟ့ၣ် အံၤဒ်သိး စီၤက့ၣ် အသးကဘၣ် တၢ်မၤမုာ် ထီၣ်အီၤတစဲးလၢ အမိၢ်သံ အဃိန့ၣ်လီၤ.

စီၤက့ၣ်ဒီး ခၠူ၀ၣ် က့ၤတုၤက့ၤကၠိလီၤ. တနၤန့ၣ် တံၤသကိးခံဂၤအံၤ မုၢ်နၤယိာ်လံ, တမံဝဲဒၣ်ဘၣ်.

ခၠူဝၣ် စံးဘၣ်စီၤက့ၣ်, “သရၣ်ဧၢ, ယသးအိၣ် တဲနၤတၢ်လၢ အအိၣ်လၢ ယသးပူၤ တမံၤလီၤ. ဘၣ်သးဒိၣ် တဂ့ၤမီၣ်.”
“သရၣ်ဧၢ, ယသးတဲယၤလၢ မ့ရ့ၣ်လ့ န့ၣ် တအဲၣ်ယီၣ်စွါဘၣ်, အဲၣ်လၢနၤတခီလီၤ. ယသးတဲဘၣ်စ့ၢ်ကီး ယၤလၢ နအဲၣ်မ့ရ့ၣ်လ့လီၤ. ဘၣ်မနုၤ မ့ရ့ၣ်သါကဖျီ အသးဒီး ယီၣ်စွါလဲၣ်. တၢ်ဂ့ၢ်တခါအံၤ မၤတံာ်တာ် ယသးဒီ ဟါညါ ဖဲပဒ့ တၢ်သးဝံၣ် တၢ်အခါ န့ၣ်လီၤ.” ဖိသၣ်ပိာ်ခွါတဂၤအံၤ အတၢ်အဲၣ်စီၤက့ၣ်န့ၣ် ဒုးသ့ၣ် ညါအီၤ စီၤက့ၣ် အတၢ်ခူသူၣ် တဖၣ်အါမံၤ ဒီးတၢ်ဘၣ်ထွဲ ဒီးစီၤက့ၣ် န့ၣ်ပာ်ကဲဝဲဒ် တၢ်ဘၣ်ထွဲဒီး အီၤအသိး စ့ၢ်ကီးလီၤ.

စီၤက့ၣ် အိၣ်ဘှီၣ်မး ဝဲတစိၢ်ညါ ဝံၤမး ဒီးယူာ်ဃီၤစုစ့ၣ်ဆူ ခၠူ၀ၣ် အအိၣ်ဒီး စံး, “ကွၢ်ပသံး ခံဘိအံၤ ခၠူ၀ၣ် ဧၢ, လၢၢ်လါတဘိ မ့ၢ်ယမိၢ် အတၢ်ဟ့ၣ်ဒီး တၢ်မျၢ်လါ တဘိမ့ၢ် မ့ရ့ၣ်လ့ အတၢ်ဟ့ၣ်လီၤ. ကနၣ်ပသံးခံဘိ အံၤအဂ့ၢ် တက့ၢ်.” ဝံၤဒီး စီၤက့ၣ်စးထီၣ် တဲပၠးခၠူ၀ၣ် လၢပသံး ခံဘိအံၤ အဂ့ၢ်တဆီ ဘၣ်တဆီ, တဆီဘၣ် တဆီလီၤ. ခၠူ၀ၣ် ကနၣ်ဝဲ အခိၣ်ဂၢၢ် မးအမဲာ်ညါ, အမဲာ်ထံဟဲ ြပံာ်ထီၣ်ဝဲ, ဒီးစီၤထွါစီ ခူသူၣ် ဝဲတခီ လီၤ. သးကညီၤဘၣ် အသကိး ဒီး မ့ရ့ၣ်, ဒီးသးကညီၤဃုာ် ယီၣ်စွါ ဒၣ်လဲာ်န့ၣ်လီၤ.

“သရၣ်ဧၢ, ယနၢ်ပၢၢ်လံ. ယတမ့ၢ် မ့ရ့ၣ်ဒီး ယမၤပှဲၤထီၣ် အလီၢ်တသ့ဘၣ်, ယသးအိၣ် စံးဘၣ်နၤဒ်အံၤ တခီလီၤ. ယအဲၣ်နၤဒ်ယတံၤသကိး အဂ့ၤကတၢၢ် တဂၤအသိးလီၤ. ဖဲယမၤစၢၤ နၤသ့န့ၣ် ယကမၤယဲတုၤ ယသံတစုလီၤ. ယတအဲၣ်ဒိး လီၤဖးဒီး နၤနီတစု ဘၣ်.”

စီၤက့ၣ် နၢ်ဟူ ခၠူ၀ၣ် အတၢ်ကတိၤဖိအံၤ ဒီး သ့ၣ်ညါဝဲစ့ၢ်ကီး လၢ အတမ့ၢ် တၢ်ကတိၤ ကလွၤတၢ် န့ၣ်ဘၣ်. မ့ၢ်တၢ်ဟဲ ထီၣ်လၢ ခၠူ၀ၣ် အသးအကံၢ်အလဲအပူၤ န့ၣ်အဃိ အသးမုာ်ထီၣ်က့ၤမးဖးဒိၣ်လီၤ. ယွၤသးကညီၤဘၣ် စီၤက့ၣ်ဒီး ခီဖျိ ခၠူ၀ၣ်အံၤ ယွၤကျဲၤ က့ၤတၢ်မၤမုာ် က့ၤစီၤက့ၣ်အသး န့ၣ်လီၤ. ပိာ်ခွါ တဂၤ ၀ၤတဂၤ အတၢ်အဲၣ်မ့ရ့ၣ်လ့အံၤ အကျိၤတံာ်တၢၤလံ. ယွၤတရံးကတဲာ် ကတီၤက့ၤ တၢ်အဲၣ် အကျိၤ အသီတဘိ လၢစီၤက့ၣ် ကဒုးယွၤ လီၤက့ၤ အတၢ်အဲၣ်န့ၣ်လီၤ. ပၢ်တဂၤ အတၢ်အဲၣ် ဟံးန့ၢ်က့ၤ ဖိၣ်သၣ်ခွါ အတၢ်အဲၣ်မုၣ်ကနီၤ, ၀ၤအဲၣ်မါ အတၢ်အဲၣ်အလီၢ်, ဒီးစီၤက့ၣ် စးထီၣ် ပူၣ်လီၤက့ၤ အတၢ်အဲၣ်အံၤဆူ တၢ်ကျိၤသီအံၤအပူၤ, ဆူတၢ်သးအိၣ် မၤစၢၤဒီး ကဟုကယာ်က့ၤ ခၠူ၀ၣ်, ဒီး ပှၤဘၣ်ဖှီၣ်ဘၣ်နး ဒ်ခၠူ၀ၣ် အသိး တဖၣ်န့ၣ်လီၤ. တနၤန့ၣ် စီၤက့ၣ်ဘါထုကဖၣ် တၢ်အဆိကတၢၢ် တဘျီဒ်အံၤလီၤ.

“တၢ်ထံတၢ်တီကစၢ်ဧၢ, ယနာ်လၢနအိၣ်လီၤ. နတၢ်သးဝံၣ်တယုၢ် တဲဝဲလၢ နအဲၣ်ယၤဒီး ပှၤဟီၣ်ခိၣ်ဖိ ခဲလၢာ်, ဒီး တၢ်အဲၣ်အံၤ ညိကွံာ်ယၤ တကဲဘၣ်. ယတၢ်အဲၣ် ပိာ်မုၣ် မ့ရ့ၣ်လ့အံၤ ဟ့ၣ်က့ၤယၤတၢ်စိ တၢ်ကမီၤ ဒ်သိး ယကဆီလဲကွံာ် အီၤဆူ တၢ်အဲၣ် ပှၤဂံၢ်စၢ်ဘါစၢ်, ပှၤဖှီၣ်ပှၤယာ်, ပှၤလိၣ် ဘၣ်ယတၢ်မၤစၢၤ ခဲလၢာ် ဒ် ခၠူ၀ၣ်အသိးတဖၣ် တခီန့ၣ်တက့ၢ်.”

တၢ်ထုကဖၣ် တယုၢ်အံၤ တအိၣ်ဒီး “လၢခရံာ်အမံၤ” လၢနီၢ်ခိနီၢ်ခီ ဘၣ်. မ့မ့ၢ်တခီ မ့ၢ်တၢ်ထုကဖၣ် ဖုၣ်ဖိလၢ အဟဲ ယွၤလီၤ စဲဃဲၤလၢ စီၤက့ၣ် အသးအကံၢ်အလဲအပူၤတခီ, ဝံၤကဒီး မ့ၢ်တၢ်လၢ အဖိးမံ လိာ်အသး ဒီး ခရံာ်အတၢ်ဘၣ်အသး လၢအမ့ၢ် တၢ်အဲၣ်ပှၤလၢပဃၢၤ, ဒ်ပစံးတၢ်အသိး, ပှၤလၢ အလိၣ်ဘၣ် ပတၢ်မၤစၢၤ ခဲလၢာ်န့ၣ်အဃိ, ယွၤစံးဆၢ အီၤတဘျီဃီ ဒီး စးထီၣ် လၢမုၢ်တနၤန့ၣ် စီၤက့ၣ်န့ၢ်ဘၣ်က့ၤ တၢ်သူၣ်မံ သးမံ ဘၣ်ဃး မ့ရ့ၣ်လ့ အဂ့ၢ်အမဲာ်ညါ ယွၤပာ်ကျၢၤထီၣ်အသးဒိၣ်မး လၢကအိၣ်မူ က့ၤဝဲလၢ ပှၤဖှီၣ်ဖိတဖၣ် အဂီၢ်န့ၣ်လီၤ.

ဘၣ်ဆၣ် စီၤက့ၣ် နၢ်ပၢၢ်ဒံးဒၣ်ဝဲလၢ ကဘၣ်ဃုမၤန့ၢ်စ့အါအါလၢ တၢ်အံၤအဂီၢ်လီၤ. စီၤက့ၣ် တဘၣ်တၢ်သိၣ် လိဒံးအီၤလၢ ကစၢ်ခရံာ် အကျဲဘၣ်. မ့ၢ်ဒံးဒၣ် ပှၤသူခိၣ်ဖိ လၢ အကျဲးစၢး မၤဂ့ၤတၢ်လၢ တၢ်ဂံၢ်တၢ်ဘါ လၢအဖျါအပူၤတဂၤ, ပှၤတဂၤဂၤလၢ အဖံၣ်လီစိၣ်ဖံၣ် မ့ၢ်ဒံးဒၣ်ဝဲ, “စ့ဒုးလဲၤကသ့ၣ်မိၢ်အတၢ်” န့ၣ်ဒ်ပှၤ မုၢ်နုာ်ဖိတဂၤ ကတိၤဒိဝဲ အသိးန့ၣ်လီၤ.