စံာ်ဖးလဲၢ်ကဒီး (ထွံၣ်မဲၢ်က့ၣ်… ဘျၢထီၣ် အကူာ် ၈)

တဂီၤအံၤ ဖဲဘီကီာ်လ့ၣ်မ့ၣ်အူ သန့ပူၤ ပှၤတဲၤတီၤသးအါမး, အါန့ၢ်ဒံး ညီနုၢ်တခီလီၤ. ခီလ့ၣ်ကၠိ အ၈ၤတဖၣ် ပျၢ်ဝဲဒီး ကၠိဖိအိၣ်လၢ ဝ့ၢ်အဆံး အါဂၤ ဟဲက့ၤဒိးလ့ၣ်မ့ၣ်အူ လီၤ. ပှၤဆါတၢ်ပှ့ၤတၢ် တဖၣ်ကိး ကလူ ကိးကလီ, “ထံခုၣ်, ကိၣ်ဆၢ, မိာ်, သဘျုၣ်” ဒီး တၢ်ဂုၤတၢ်ဂၤ တဖၣ်ဒ် ညီနုၢ်အသိး လီၤ. ပှၤကူၣ်လံၣ် ဖိဆီၣ်စုလ့ၣ်ဖိ ပှဲၤကတံာ် ဒီးတလါ, ထၢၣ်တၢ်ဖံးဒီး တၢ်ပဒၢး တဖၣ်ကိးသြတီ, “ပျဲကျဲ, ပျဲကျဲ” ဒ်သိး အလ့ၣ် သုတဘၣ်ဒိ ပှၤလၢ အခးပတ့ၤ မးသးတဖၣ် န့ၣ်အဂီၢ်လီၤ. ပှၤလဲၤတၢ်ဖိ တနီၤ မၤအလီၢ်န့ၣ်, ဒါလီၤချီၣ်ယၣ်လုး, တနီၤတန့ၢ် အလီၢ်အကျဲ, ဃ့ၢ်လၢအံၤ ဃ့ၢ်လၢဘး ဟးချုအလီၢ်လီၤ.

ပှၤဟဲအိၣ်ကၠိလၢ ဘီကီာ်တဖၣ် ခဲလၢာ် ဃၣ်ဃၣ် မ့ၢ်ပှၤမၤသ့ အီၣ်ဘၣ် အဖိအလံၤ, ဒီး တိၢ်လၢစ့ အဃိ အဝဲသ့ၣ်ပှ့ၤဒိး လ့ၣ်မ့ၣ်ဒၢး တီၤထီ တဖၣ် န့ၣ်ဝဲ, ဒီးမၤန့ၢ် ပာ်စၢၤ အလီၢ်လံလီၤ. စီၤက့ၣ်ဒီး ခၠူ၀ၣ် တဖၣ် မၤန့ၢ်အဒၢးဝံၤလံ, ဒီးဖဲ စီၤက့ၣ်ကတိၤလိာ်သး ဒီး ပှၤခီလ့ၣ်ဖိအဂၤတဂၤ အဖၢ, မ့ရ့ၣ်ဒီး ယီၣ်စွါ ဟဲပၢၢ်ထီၣ် လီၤ. မ့ရ့ၣ်ဟ့ၣ်ဃီၤ စီၤက့ၣ်လၢ စးခိတခီလၢ အမ့ၢ်လဲးမးဘၣ်ဃး တၢ်ဆှၢလီၤ လၢၢ်ဝါ လၢစီၤက့ၣ် အမိၢ်အသွၣ်ခိၣ် အဂီၢ် န့ၣ်လီၤ.

“စီၤက့ၣ်ဧၢ, အဝဲအံၤ မ့ၢ်ယီၣ်စွါဒီးယၤ ပတၢ်ဟ့ၣ်လီၤလၢ နမိၢ်အသွၣ်ခိၣ် အဂီၢ်လီၤ. ရွ့ထီၣ်က့ၤလၢၢ်ဝါ အံၤလၢ လၢၢ်ဟ့သန့မီၣ်.”
“ယီၣ်စွါဒီးမ့ရ့ၣ်ဧၢ, တၢ်ဘျုးဒိၣ်မးလီၤ. လၢယပၢ်ဒီး ယဒီပုၢ်ဝဲၢ်မုၣ် ခံ၈ၤအဂီၢ် စ့ၢ်ကီး ယစံးဘျုးသုလီၤ.”
ယီၣ်စွါတခီ သံကွၢ်စီၤက့ၣ်, “ယမ့ၢ်ဒိန့ၢ်နၤလီပျံၤဆူ နဖါတံၢ်ြဖၣ်သူဝါ အအိၣ်ဘၣ်ဃး တၢ်ဒိးစဲး အတၤသၣ် အဂ့ၢ်န့ၣ် ဘၣ်နကမ့ၢ်ဘၣ်ချ့ချ့ ကီးဧါ.”
“န့ၢ်ဘၣ်မၤဧၢၢ်, ယကမၤလိာ်ပာ် ဖါတံၢ်ဒ်သိး ကမၢန့ၢ်ယၤ ပှၤလၢအကဟဲဆှၢအီၤ ချ့ချ့လီၤ. တၢ်ဘျုး လီၤယီၣ်စွါဧၢ.”

လ့ၣ်မ့ၣ်စဲးခိၣ် အူထီၣ်တၢ်သၢဘျီ တဘျီဝံၤ, ဒၢလွဲဖိသီၣ်ထီၣ်ဒီး လ့ၣ်မ့ၣ် စးထီၣ်ဟးကယီကယီ လံ. မ့ရ့ၣ် နူးဆဲးစီၤက့ၣ် ဒီးခၠူ၀ၣ်ဝံၤ ယီၣ်စွါ စ့ၢ်ကီး နူးဆဲးအီၤလီၤ.

“စီၤက့ၣ်ဧၢ, သးပ့ၤနီၣ် ဟဲဖျီပှၤတဂ့ၤနီ. လါယူၤထီၣ်တသီ.”
စီၤက့ၣ်နံၤကမှံ ထီၣ်ဒီး ဝံၢ်၀ၢ်အစုဒီးစံး, “ကိၢ်တဂ့ၤ, ခွါကဟဲ သပှၢ်တၢၢ် လီၤ.” ဒီးလီၤဖးလိာ်သးလီၤ.

တဟါန့ၣ် သၢနၣ်ရံၣ်ဒီး လ့ၣ်မ့ၣ် တုၤဖဲ လၢၢ်ဟ့သန့လီၤ. စီၤက့ၣ် အဖါတံၢ် ပျၢ်လီၤ တၢ်ခ့တၢ်ပှၤ လၢသိလ့ၣ် ဟဲအိၣ်ခိး ပာ်စၢၤအခိၣ်လီၤ. သံကွၢ် မ့ၢ်အဖါတံၢ်အိၣ်ဆူၣ်ဧါ. ဒီးနၢ်ဟူဝဲလၢ အအိၣ်ဆူၣ် ကစီဒီ ဝံၤ လဲၤထုးထီၣ်က့ၤ တၢ်ဖိတၢ်လံၤ, ဃုာ်ဒီး မ့ရ့ၣ်, ယီၣ်စွါ အတၢ်ဟ့ၣ်လၢၢ်ဝါ တဘ့ၣ်န့ၣ်, တီၣ်ထီၣ်ဝဲလၢ သိလ့ၣ် လီၢ်ခံဒၢးဖိပူၤဝံၤ, က့ၤဆူအဖါတံၢ် အဟံၣ်လီၤ.

မ့ၢ်က့ၤတဘျီဃီ ဆူစံာ်ဖးလဲၢ်ချုး ကစီဒီ, ဘၣ်ဆၣ် အဖါတံၢ် မၢအမံသကိးအီၤ ဒီးဒိကနၣ်ဝဲလီၤ. အဖါတံၢ် သံကွၢ်အီၤဘၣ်ဃး တၢ်ဒိးစဲး အဂ့ၢ်လီၤ.
“ဖါတံၢ်ဧၢ, ယနာ်လၢ ယကဖျိကီးလီၤ.”
“ထ့ၣ်ဧၢ, ယသးခုလီၤ. နသ့ၣ်ညါ ဖါတံၢ် ပာ်ကဲနၤဒ် ဖါတံၢ်​ အဖိဒၣ်ဝဲအသိးလီၤ. ဖါတံၢ် အဖိတအိၣ် နီတဂၤဘၣ်. ဖါတံၢ် မုၢ်လၢ်တၢ်အိၣ် ဒၣ်နၤတဂၤလီၤ. ကဲၢ်, နဖျိမ့ၢ်ဝံၤ နသါကမၤမနုၤလဲၣ်. သ့ၣ်နီၣ် ယတၢ်ကတိၤလၢညါ ဒီးနၤတက့ၢ်. ယမ့ၢ်လဲၤတဲဘၣ်န့ၢ်နၤ လၢစီၤပၤရၣ်မၣ် ဒီး အဝဲကဟ့ၣ်နၤ အတၢ်မၤ တမံၤမံၤ သပှၢ်ကတၢၢ်လီၤ.”
“ဖါတံၢ်ဧၢ, ယသ့ၣ်နီၣ်ကစီဒီလီၤ. ယသ့ၣ်ညါစ့ၢ်ကီး နတၢ်အဲၣ်ယၤလီၤ. ယတသးအိၣ် မၤတမုာ် နသးဘၣ်. ဘၣ်ဆၣ် ဖါတံၢ်ဧၢ, ဝံသးစူၤ ကနၣ်ယဂ့ၢ်တဘီဝံၤ ဟ့ၣ်ကူၣ်ယၤလၢ ယကမၤ လၢမၤပှဲၤ ဘၣ်က့ၤ ယတၢ်ပာ်လီၤ ယသးတဘီ.”

ဝံၤစီၤက့ၣ် ဃဲၤပၠးအဖါတံၢ် လၢအမိၢ်ကသံအဆၢ အမိၢ်မၤလိာ်အီၤ ဒီး အဝဲအၢၣ်လီၤဝဲလၢ ကမၤစၢၤက့ၤ အပှၤကလုာ်န့ၣ်လီၤ. ဝံၤသါဘၣ် တိနိၣ် ဒီးခၠူ၀ၣ် အဂ့ၢ်, ဒီးသါသးပၢၢ်ထီၣ်လၢ သါကဘၣ်အိၣ်မူလၢ တၢ်မၤစၢၤ ပှၤဖှီၣ်ဖိယာ်ဖိ တဖၣ်အဂီၢ်, တဲပၠးစ့ၢ်ကီး အဖါတံၢ်လၢ အတၢ်ကီတၢ်ခဲ ဘၣ်ဃး ဒီးမ့ရ့ၣ်လ့ န့ၣ်လီၤ. ြဖၣ်သူဝါ ကနၣ်စီၤက့ၤ အဂ့ၢ်တဖၣ် ဒီးအသးလီၤ ကတုၤ ဘၣ်မးသး လီၤ. ဖျါလီၤဂာ် ဘၣ်မးအီၤလၢ တၢ်မံမီၢ် တယုၢ်လီၤ.

“ဖါတံၢ်ဧၢ, ယဘၣ်ဃုမၤန့ၢ် စ့အါအါ လၢညါကတၢၢ်လီၤ. ဒီးတၢ်ဃု စ့အကျဲ လၢယဂီၢ် အညီကတၢၢ် ဒီးချ့ကတၢၢ် န့ၣ်မ့ၢ်ဒၣ် တၢ်ကျီနး လီၤဘဲၣ်. ယက့ၤအိၣ်သကိး လၢဟံၣ်စှၤလါဝံၤ, ယကလဲၤကဒါက့ၤ ဆူဘီကီာ် လီၤ. နသ့ၣ်နီၣ်ဒံး စဲကၠဲးနဲၣ်လူဘၢ်ဧါ. အဝဲမ့ၢ်ယသရၣ်ဒီး စံးဝဲ သါနာ်လၢ ယကကဲထီၣ် ယူၣ်တရၣ် ဒီဘ့ၣ် အခၠဲပယဲၣ် သ့ဝဲလီၤ. ခဲအံၤ သထ့ဖးဒိၣ် တီဝူ သါကလဲၤ တီၣ်ထီၣ်န့ၢ်ယၤ စ့ခံကလး ထ့းကီၣ် လၢယကတၤ ခၠဲပယဲၢ် ခဲအံၤတဂၤအဂီၢ်လီၤ. ယကက့ၤဃ့န့ၢ် ပၢ်အစ့ ဖဲအဟ့ၣ်ယၤ သ့သမၠးဒီး တၤစ့ၢ်ကီး အီၤလၢ ယကနၢၤတၢ် အဂီၢ်လီၤ.”

ြဖၣ်သူဝါ မ့ၢ်စ့ၢ်ကီး ပှၤအဲၣ်ကွၢ်ကီ တၢ်လိာ်ကွဲနး, ဒီးမ့ၢ်ချုး န့ၣ်တနံၣ်တဘျီ လဲၤကွၢ်တၢ်ဂုာ် ြပၢခၠဲပယဲၣ် အလီၢ် န့ၣ်လီၤ. စါကၠဲးနဲၣ်လူဘၢ် န့ၣ်ဟဲက့ၤကိးက့ၤဝဲ ဒီးကွၢ်က့ၤဝဲလီၤ. လၢအမ့ၢ်ဒံး ခၠဲၣ်ပယဲၣ် အခါ, လူဘၢ် မၤန့ၢ်စ့အါမး, ဘၣ်ဆၣ် တသ့ကတီၤဝဲဘၣ်. မ့မ့ၢ် တၤစ့အါ ကဲၣ်ဆိး ဒီးဖှီၣ်လီၤကွံာ် ဝဲလီၤ. ပှၤယူၣ်တရၣ်ဖိ ဒီးတရူးဖိအိၣ်လၢ ယူၣ်တရၣ် ကီၢ်ပူၤတဖၣ် မ့ၢ်ပှၤတၤစ့ ဆူၣ်မးလီၤ. ြဖၣ်သူဝါ အနီၢ်ကစၢ် တၤစ့ၢ်ကီး တၢ်ဖဲ အလဲၤကွၢ် ပှၤကျီကိးဘျီဒဲးလီၤ. တၢ်အံၤ မ့ၢ်စီၤလိာ်စီၤပၤ, ပှၤဖှီၣ်ဖိယာ်ဖိ ခဲလၢာ်ဃၣ်ဃၣ် အတၢ်အဲၣ်ဒိး, ဒီးထံကီၢ် အတၢ်ဂံၢ်စၢ် ဘါစၢ် တမံၤမးလီၤ.

“ထ့ၣ်ဧၢ, နမ့ၢ်ပာ်လီၤလံနသးဒီး ဖါတံၢ်တစံးလၢၤ တၢ်နီတမံၤဘၣ်. ဖါတံၢ် ကဟ့ၣ်လီၤနၤစ့ တကလီၢ် ထ့းကီၣ် လၢနကတၤအဂီၢ်လီၤ. နမ့ၢ်နၢၤ ဒီးဟ့ၣ်ကဒါက့ၤစ့အံၤ, နမ့ၢ်ရှူ ပာ်လၢ ဖါတံၢ် အတၢ်မၤစၢၤ နၤဒီး ဝံၤလီၤ.”

စီၤက့ၣ် တူၢ်လိာ် အဖါတံၢ် အတၢ်မၤစၢၤအီၤ အံၤဒီး စံးဘျုးက့ၤအီၤလီၤ.

အီၣ်မ့ၤဝံၤ တဟါန့ၣ် စီၤက့ၣ်မၢ ခၠူ၀ၣ် ဒ့ပၠး အဖါတံၢ် လၢဝါဧိၤလံန်လီၤ. ခၠူ၀ၣ် ဒ့ထီၣ်ဝါဧိၤလံန် တယုၢ်ဘၣ်တယုၢ် ဒီးနီပူၤ သုးဖိ, သုးခိၣ်, တၢ်ခ့တၢ်ပှၤတဖၣ် ဟဲကၢၤဖှိၣ်မး သးလၢ တၢ်ချၢတခီဒီး ဒိကနၣ် အီၤလီၤ. ြဖၣ်သူဝါ မၢပှၤဒါလီၤချီၣ် လၢဒၢးဖးလဲၢ်ပူၤ, ကိးနုာ် တၢ်ခ့တၢ်ပှၤခဲလၢာ် ဒုးဆ့ၣ်နီၤအီၤလၢ ကဒိကနၣ် တၢ်အဂီၢ်လီၤ. တဟါန့ၣ် ကဲထီၣ် မးခီစၢးဖးဒိၣ် တဘျီလီၤ. လၢခံကတၢၢ် ခၠူ၀ၣ် ကိးထီၣ်စီၤက့ၣ် ဒီးမၢ စီၤက့ၣ်သးဝံၣ် “တၢ်အဲၣ်လၢ ညိကွံာ်ယၤတကဲ” လၢယူၣ်တရၣ်ကျိာ် ဒီးခၠူ၀ၣ် ဒ့န့ၢ်အီၤ တရီလီၤ. ခၠူ၀ၣ် ဒီးစီၤက့ၣ် ကဲထီၣ် ပှၤမၤတၢ်သးခု ကစီၣ်လၢ ကစၢ်ခရံာ်အဂီၢ် တဘျီညါအံၤ, ဘၣ်ဆၣ် တသ့ၣ်ညါဝဲဘၣ်.

တချုးမံ, စီၤက့ၣ်သုးကျဲၤ ဝဲလၢ အဖါတံၢ်လၢ အတၢ်ကဆှၢလီၤန့ၢ်အီၤ ပှၤဘှီအူးသွၣ်ခိၣ် တဂၤ လၢအမိၢ် အဂီၢ်ဃုာ်ဒီး ပှၤတဂၤ ကလဲၤဆှၢန့ၢ်အီၤ လီပျံၤ မ့ၢ်ဟဲ လၢဘီကီာ် တခီန့ၣ်လီၤ.

မုၢ်ဆ့ၣ်ထီၣ် လၢဂီၤတဖၣ်မဲာ် ြဖၣ်သူဝါ မၢပှၤလဲၤဆှၢ က့ၤစီၤက့ၣ် ဒီးခၠူ၀ၣ် လၢကဆီဆူ စံာ်ဖးလဲၢ် လီၤ. ယိၤပှၤစုသ့ လဲၤဃုာ်တဂၤလၢ ကဘှီထီၣ် က့ၤနီၢ်ထူ အသွၣ်ခိၣ် န့ၣ်လီၤ.

မုၢ်ဟဲထီၣ် နွံနၣ်ရံၣ်ဒီး စီၤက့ၣ်က့ၤတုၤ အဟံၣ်လီၤ. အပၢ်တဂၤ ညၣ်ဂိၢ်ဘျါသီသီ သနာ်က့ ဟဲနူးဆဲး အဖိခွါ ဒီးခၠူ၀ၣ်လၢ တၢ်သးဖှံအပူၤလီၤ. စီၤက့ၣ် အဝဲၢ်ပိာ်မုၣ် အဝဲၢ်ကိ နီၣ်စ့ ဒီးအ၀ၤ ဒီးအဖိခံဂၤ ဟဲက့ၤအိၣ် လၢအပၢ်အဟံၣ်လီၤ. စီၤလါ, စီၤဟ့, ဒီးစီၤဂီၤ တဖၣ် ဟဲသဂၢၢ် နူးဆဲး အီၤလၢ တၢ်သးဖှံအပူၤလီၤ. စီၤက့ၣ် အိးထီၣ်ထၢၣ် တၢ်ဖံးတဖျၢၣ် ဒီးဟ့ၣ်နီၤလီၤ တၢ်ဟ့ၣ်ဂၤမံၤ ဂၤမၠိလၢ အပှၤဟံၣ်ဖိအဂီၢ်လီၤ. ဟ့ၣ်အပၢ် လၢနၣ်ရံၣ် ပးစု တဖျၢၣ်, စီၤလါလၢ ထိၣ်ဒံးတဘိ, စီၤဟ့လၢ ဖျီၣ်ခံတဘ့ၣ်, စီၤဂီၤလၢ ဆ့ကၤတဘ့ၣ်, အဝဲၢ် နီၢ်စ့လၢ နံၣ်သတိၢ် တကူာ်, နီၢ်စ့ အ၀ၤစီၤကဒွဲၣ် လၢအဲကလံး ဒီလဲၤခး တၢ်ဂ့ၤမးတဘ့ၣ်, အဖိဒိၣ် ပိာ်ခွါ ဖိစီၤဟဲဆိ လၢတၢ်လိာ်ကွဲ သိလ့ၣ် တဆိ, ဒီးအဖိဒိၣ် မုၣ် နီၢ်ြပံလၢ တၢ်ဂီၤဖိဒီလ့ၣ် တဒုလီၤ.

စီၤက့ၣ် မၤသ့ၣ်ညါ ခၠူ၀ၣ် လၢအဟံၣ်ဖိဃီဖိခဲလၢာ် လီၤ. ခၠူ၀ၣ် တခီ ပာ်စီၤက့ၣ်အပှၤဟံၣ်ဖိဃီဖိဒ် အဟံၣ်ဖိဃီဖိ ဒၣ်ဝဲအသိး, ဘီၣ်လီၤ ကူကၤဝံၤ နုာ်လီၤ မၤတၢ်ဖဲ အလီၢ်အိၣ် တဖၣ် ဒ်ဟံၣ်ဖိဃီဖိ လီၢ်လံၤ တဂၤအသိး လီၤ. စီၤက့ၣ် မၤနၢ်ပၢၢ် စကီၤလၢ ခၠူ၀ၣ် အဂ့ၢ် ခဲလၢာ်ခဲဆ့ ဒီး စကီၤ သးကညီၤဘၣ် မးခၠူ၀ၣ် ဒီး တူၢ်လိာ်အီၤလၢ အသးပူၤဒ် အဖိခွါ အဆံး တဂၤအသိး တဘျီဃီ န့ၣ်လီၤ.

အီၣ်မ့ၤဝံၤဒီး စီၤက့ၣ် လဲၤကိး အပၢ်ဒီး ယိၤပှၤစုသ့ဒီး ခၠူ၀ၣ်ဆူ အမိၢ် အသွၣ်ခိၣ် န့ၣ်လီၤ. စီၤဝါ ပှ့ၤပာ်စၢၤ တၢ်အပီး အလီခဲလၢာ်ဝံၤလံ. အိၣ်ခိး ကွၢ်လၢ် စီၤက့ၣ် ကဟဲက့ၤ ဒီးသုးကျဲၤ က့ၤတၢ်ဘှီထီၣ် တခီ ဧိၤလီၤ. ခၠူ၀ၣ် တဂၤဒ် ယူၣ်တရၣ် အလုၢ်အလၢ် အသိး တီၤလီၤဝဲသၢဘျီ ဖဲနီၢ်ထူ အသွၣ်ခိၣ် ဖီခိၣ် န့ၣ်လီၤ. စီၤက့ၣ်တဲနၢ်ပၢၢ် ပှၤတ့ တၢ်သရၣ် လၢအသးလီ ဘှီအမိၢ် အသွၣ်ခိၣ် ဒ်လဲၣ်, ဘၣ်တီၣ်ထီၣ် လၢၢ်ဝါ ဘ့ၣ်ဘၣ် လၢခိၣ်ထး တခီဒ်လဲၣ် န့ၣ်ဝံၤ, ကျဲၤန့ၢ်ပယၣ် လၢပှၤကဟဲမၤစၢၤ ပယၣ်အံၤ အဂီၢ်လီၤ. စီၤဟ့ ဒီးခၠူ၀ၣ် ဘၣ်တၢ်ဃုထၢအီၤလၢ ကမၤစၢၤ ပယၣ်အံၤ လီၤ. စီၤက့ၣ် လဲၤဟးလၢ ခရံာ်ဖိ တၢ်သွၣ်ခိၣ် လၢဘီကီာ် တဘျီဒီး ထံၣ်တၢ်သွၣ်ခိၣ် အဂ့ၤဘၣ်မးအီၤ တခါဒီး ခဲအံၤ ကွၢ်လိမၤဒိး အီၤလီၤ.

တနၤန့ၣ် ခၠူ၀ၣ် မၤသးဖှံ ဟံၣ်ဖိဃီဖိ ခဲလၢာ် အသးလၢ တၢ်ဒ့သနၣ် ဝါဧိၤလံန် လီၤ. သဝီဖိအါဂၤ ဟဲဒိကနၣ် စ့ၢ်ကီးအီၤလီၤ. ခၠူ၀ၣ် အတၢ်ဒ့တရီအံၤ ကဲထီၣ်မး နီၣ်ဝံာ်ခံတဘိ လၢအအိးထီၣ်န့ၢ်အီၤ ပှၤစံာ်ဖးလဲၢ်ဖိ တဖၣ်အသးပဲြတီ ကိးဖျၢၣ်ဒဲးန့ၣ်လီၤ.

မုၢ်ဆ့ၣ်ထီၣ်တနံၤ စီၤက့ၣ် ကတိၤလိာ်သးဒီး အပၢ်စကီၤ ဘၣ်ဃး တၢ်ကတ့ဖျီ စီၤလါဒီး မုၣ်ဆၣ် အဂ့ၢ်လီၤ. ပှၤသ့ၣ်နံၤဖးသီဝံၤလံ အိၣ်တ့ၢ်ထဲနွံသီ ဧိၤလီၤ. စကီၤပှ့ၤပာ် ကျီၢ်, ထိးတဖၣ် ဝံၤလံ. တၢ်ကျီပာ် ၀ၣ်, သံၣ်ပာ်ကဟံလၢ တၢ်ဒုးခိၣ် လၢပှၤကဖျီ တၢ်အဂီၢ် ဒီးဘုၣ်အီၣ်မ့ၤ အဂီၢ် ဝံၤလံ. မုၢ်ဆ့ၣ်ထီၣ်တနံၤ န့ၣ်သဝီဖိ ပိာ်ခွါတဖၣ် ကစးထီၣ် ဘှီတၢ်ဒုးခိၣ် တဖၣ်လီၤ. တၢ်ကွဲ ပာ်ဒူသဝီ အဘူးအတံၢ်တဖၣ် ဝံၤလံ. စီၤက့ၣ် စံးဘၣ် အပၢ်လၢ တၢ်သူၣ်ဝံၣ် သးဆၢဒီး တၢ်ဂဲၤကလံၣ်မၤထါ တခီ သါဝဲ ဒီးခၠူ၀ၣ် သါကမၤစၢၤဝဲလီၤ.

စီၤက့ၣ်စံးအပၢ်, “ပၢ်ဧၢ, ပဖျီစီၤလါဝံၤ, နလဲၤခးယုၤယၤ တၢ်လၢ ဆီဖါလ့ခိၣ် ပှၤပူၤ သၢသီလွံၢ်သီ တချုးဘၣ်ဧါ. ယသးအိၣ် မၤန့ၢ် တၤဒိၣ်ခီၣ် အနၢၤတဘိ လၢပှၤထူးတီၤ တီဝူ အဂီၢ်, ဒီးကဆီမဲ တစူၣ်လၢ ယသကိး ယီၣ်စွါ ဒီးတီဝူ အဖိမုၣ် ကဖျီသး အဂီၢ်လီၤ.”

စီၤဝါ ဆါဘျါဝံၤသီတကထၢ, မ့ၢ်လဲၤဒီး နီၢ်ထူတအိၣ်လဲၤ ဖီန့ၢ်အီၤမ့ၤ တကထၢအဃိ, အသးတဆူၣ် လဲၤသနာ်က့ ပာ်ခူသူၣ် အတၢ်သးဃၢ ဝံၤစံး, “လဲၤသၢၣ်, ခးနဲကဆီ, ယကခးယဲတၤဒိၣ်ခီၣ်, တဂ့ၤဧဲၣ် စီၤက့ၣ်.”
စီၤက့ၣ်သးခုမးလၢ အပၢ်အၢၣ်လီၤအီၤ အဃိလီၤ.

တၢ်ဖျီ စီၤလါတဘျီအံၤ မၤသးဒ် စကီၤစီၤဝါ ဖျီအဖိဒၣ်ဝဲ တဂၤအသိး လီၤ. စကီၤခီၣ်လၢာ် ဘူၣ်စ့ၤအါမး, ဒီးတၢ်ခဲလၢာ် လဲၤအသး ဃံဃံ လၤလၤ, ဒီးပှၤခဲလၢာ် သးဖှံဒိၣ်မး, လီၤဆီဒၣ်တၢ်ဖဲ အနၢ်ဟူဘၣ် ခၠူ၀ၣ် အတၢ်ဒ့ ဝါဧိၤလံန် န့ၣ်လီၤ. ခၠူ၀ၣ် ဟ့ၣ်လီၤသး လၢာ်လၢာ်ဆ့ဆ့ လၢတၢ်မၤသးဖှံ ကမျၢၢ် အဂီၢ်လီၤ. လီၤဘှံး ဒိၣ်မး သနာ်က့ ထံၣ်ဝဲလၢ ကမျၢၢ် ဒိးန့ၢ်ဘၣ် သးဖှံအဃိ သးဖှံကဒါခိၣ် ဝဲဒီး သးပ့ၤနီၣ်ကွံာ် တၢ်လီၤဘှံး လီၤတီၤ ခဲလၢာ်ဃၣ်ဃၣ်လီၤ.

အိၣ်ဘှံးမံက့ၤဝဲ တနံၤ, မၤကဒီးတနံၤ, စီၤဝါ, စီၤလါ, စီၤက့ၣ်, ခၠူ၀ၣ်, စီၤဂီၤ, စီၤဟ့ ဒီး စီၤကဒွဲၣ် တဖၣ် လဲၤခးတၢ်လီၤ. တၢ်သးသယုၢ်မါ ဒီး မိၢ် မၤတံာ်တာ် စီၤဝါ ဒီးစီၤက့ၣ် အသးအဃိ တမုာ်တလၤထဲသိး လၢပျၢၤ တဘျီန့ၣ်ဘၣ်. မ့မ့ၢ်လၢခၠူ၀ၣ်, ပှၤဒိၣ်ထီၣ်လၢ ဝ့ၢ်ပူၤတဂၤအဂီၢ် မ့ၢ်တၢ်အသီ, တၢ်လီၤပျံၤ အလီၢ်သနာ်က့ အဝဲမၤနၢၤ အတၢ်ပျံၤ တဖၣ်န့ၣ် ကစီဒီလီၤ.

လဲၤသူၣ်လီၤဒဲဖဲ ဒဲလီၢ်လၢပျၢၤ န့ၣ်လီၤ. စီၤဟ့ဒီး စီၤကဒွဲၣ် ခံဂၤ မၤပှဲၤ က့ၤနီၢ်ထူ အလီၢ် လၢတၢ်ဖီအီၣ် တ့ၤအီၣ်န့ၣ်လီၤ. လဲၤတုၤလၢခံတနံၤ စီၤဝါခးန့ၢ် တၤဒိၣ်အနၢၤ ထီမးတဒု, ဒီးစီၤက့ၣ် မၤန့ၢ် ကဆီဖါတံၢ် အမဲဂ့ၤဒိၣ်မး တဒု ညီကဒၣ်လီၤ.

လၢခံတနံၤ စီၤက့ၣ်ဟးဒီး ခၠူ၀ၣ် ထဲခံဂၤဧိၤ, လဲၤခး တၤဖးလီၤ. ခးတၤဖး ဖါတံၢ် တဒု အတၢ်လီၤတဲာ်လၢ လ့ကပၤြတီၤပူၤဒီး လဲၤလီၤထၢက့ၤဝဲလီၤ. ဘၣ်လဲၤမးဝဲ ကီကီ ခဲခဲ တခါဘၣ်တခါ လီၤ. တၢ်လီၤဂာ် ပှၤကညီ ဟးပိာ်ခီၣ် ကျဲဖိ အိၣ်တဘိလီၤ. မ့ၢ်တၤဖး အကျိၤ, လဲၢ်ထဲတပျၢ်ဧိၤ လၢတၤဖး အကထိကလး တဖၣ် ပိာ်တ့ၢ်လံ ဝဲအကျဲလၢ အနံၣ်လၢ အကယၤ တဖၣ်အပူၤန့ၣ်လီၤ. တၤဖးတဒု လဲၤလီၤတဲာ်သံ ဖဲ လၢၢ်ကအိအပူၤတပူၤ အခိၣ်တီလိၤလိၤလီၤ. လၢၢ်ကအိအံၤ အမဲာ်ညါ လၢၢ်ဖးဒိၣ် လီၤဂာ်ြတဲၤ အိၣ်ကးဘၢ အီၤဒီး ပှၤအိၣ်လၢ အယံၤ ပှၤတသ့ၣ်ညါ လၢတၢ်ပူၤအံၤ အိၣ်ဝဲဘၣ်. စီၤက့ၣ် လဲၤနုာ်လီၤဆူ လၢၢ် ကအိပူၤလီၤ. ယံာ်ထီၣ်လဲၢ်ထီၣ် ဝဲလီၤ. တၢ်တခံးဘၣ်. လၢတၢ်ဖီခိၣ် တခီ တၢ်ပူၤ ဖျိဃီၤ ဆူဆီဖါ လ့စိးနါ အိၣ်တပူၤ, ကလံၤဆှံ ဟဲနုာ်လီၤ, မုၢ်ကပီၤ နုာ်လီၤ စ့ၢ်ကီးခီဖျိ တၢ်ပူၤအံၤ လီၤ. လ့အခၢၣ် သးပူၤ ဒၢးဖး ဒိၣ်ကြတီၢ်မး ပှၤခံကယၤ ကမံဝဲ အိၣ်တဖျၢၣ်လီၤ.

“သရၣ်ဧၢ, တၢ်လီၢ်တပူၤအံၤ ပမ့ၢ်မၤပျီအီၤ ပဟဲအိၣ်သ့ဒီး မုာ်မး သၢၣ်.” ဝံၤသိၣ်ခံဂၤ ဟးကွၢ်တၢ်ဆူအံၤ ဆူဘး ထံၣ်ဘၣ်ထံမူတပူၤ ဟဲယွၤလီၤ စဲးရဲၣ်စဲးရဲၣ်, အီကွၢ်ဝဲဒီး ထံအံၤ ဝံၣ်မးဘဲမး လီၤ. တၢ်ကအိ ပူၤအံၤ မ့ၢ်မး န့ဆၢၣ် အတၢ်မၤလီၤလး တမံၤလီၤ. ပှၤဟဲတတုၤဒံး သ့ၣ်ညါဒံးဝဲ နီတဂၤဘၣ်.

“ခၠူ၀ၣ်ဧၢ, စံးဘၣ်ပှၤနီတဂၤ အံၤလၢ လ့အံၤ အဂ့ၢ်တဂ့ၤနီၣ်.”
စီၤက့ၣ် ဘၣ်မနုၤ အအဲၣ်ဒိး ပာ်ခူသူၣ် အတၢ်ထံၣ်န့ၢ် တၢ်ကအိအံၤ မ့ၢ် တၢ်ကမၢကမၣ် လၢခၠူ၀ၣ် အဂီၢ် သနာ်က့ တသံကွၢ်အီၤ တၢ်နီတမံၤဘၣ်. နီၢ်နီၢ်န့ၣ် စီၤက့ၣ် တအိၣ်ဒံး ဒီး တၢ်ကူၣ်တၢ်ကၠီၣ်လီၤတံၢ် လီၤဆဲး နီတမံၤ ဘၣ်. မ့မ့ၢ်တခီ တၢ်ဆိကမိၣ် ဟဲပၢၢ်ထီၣ် “တၢ်ကအိတခါအံၤ ဂ့ၤမးလၢ ပှၤဒ်သိး ရီဘ့ၢ်ဟူး ဒီးအသကိး တဖၣ် ကအိၣ်ခူသူၣ် အဂီၢ်လီၤ.”

က့ၤကါက့ၤ အတၤဖးဖါတံၢ်, ယိးထီၣ်ဝဲ ဂၤ၀ာ်ဂၤ၀ာ်ဝံၤ က့ၤက့ၤဆူ ပှၢ်ဒဲလီၤ.
ခးတၢ်ဖဲပှၢ်ပူၤန့ၣ် ယံာ်ကဒီး ခံသီ, ဝံၤက့ၤက့ၤဆူ စံာ်ဖးလဲၢ်လီၤ.
လၢဟံၣ်န့ၣ် လီပျံၤတၢ်ပရၢ အိၣ်ခံဘ့ၣ်လီၤ. အခီၣ်ထံးတဘ့ၣ် ဟဲလၢယီၣ်စွါ အအိၣ်ဒ်အံၤလီၤ.
“မ့ရ့ၣ်, နၤဒီးယၤဖျိခဲလၢာ်, နဲနဖျိ ဒီးတၢ်လၤကပီၤတၢ်ဂံၢ်တၢ်ဒွး, ကျဲလၢ နကကျီဒီး ခၠဲပယၢၣ် လၢဆံးဆၣ် လါပှဲၤစံးဆၢပာ်ဂၢၢ်ပာ်ကျၢၤတၢ်ကျဲၤ သးပ့ၤနီၣ် ယူၤတသီတဂ့ၤ.”
ခံဘ့ၣ်တဘ့ၣ် ဟဲလၢခီလ့ၣ်ကၠိခိၣ် အအိၣ်ဒ်အံၤ, “ကတိၤဒိၣ်နၤလၢ နဖျိဒီး တၢ်လၤကပီၤတၢ်ဂံၢ်တၢ်ဒွး, နသါကတူၢ်လိာ် သရၣ်မၤစၢၤ တၢ်ဂံၢ်တၢ်ဒွး ြဖိၣ်ဖဲးစၢၣ် ဘူးလဲတလါ သၢကယၤဧါ. စံးဆၢ.”

စီၤက့ၣ်ဖးပၠးအပၢ် လၢလီပျံၤပရၢ ခံဘ့ၣ်လိာ်အဂ့ၢ်ဒီး အပၢ်သးခုမးဝဲ လီၤ. တနၤန့ၣ် ဒီဖိပၢ် ခံဂၤ တၢၣ်ပီၣ် လိာ်သး ယံာ်မးလီၤ. စီၤက့ၣ်တဲပၠးအပၢ်လၢ တၢ်ဂ့ၢ်ခဲလၢာ်ဒီး တပာ်ခူသူၣ် ဒၣ်လဲာ် မ့ရ့ၣ် အဂ့ၢ်ဘၣ်. အပၢ်သးကညီၤအီၤဒိၣ်မးလီၤ.

“ဖိခွါဧၢ, ပၢ်တီၢ်နၤလၢ နသးစၢ် တဘျီအၢအၢသီသီ ဝံၤ, ပၢ်ထံၣ်က့ၤ ပၢ်အတၢ်ကမၣ်လီၤ. ပျၢ်ပၢ်တက့ၢ်.” စီၤက့ၣ်ဖိးဟု အပၢ်ဒီး အမဲာ်ထံလီၤ မးဝဲ ခံဂၤလိာ်လီၤ.

“ပၢ်ဧၢ, ယနၢ်ပၢၢ် လၢနစံၣ်ညီၣ်ယၤ ဒၣ်ဒ်သိး နနာ် တၢ်ဂ့ၤ လၢယဂီၢ်အသိး န့ၣ်လီၤ. ယတပာ်နၤ တၢ်ကမၣ် နီတမံၤဘၣ်. ဖဲအခီၣ်ထံးဒု ယသးဆါ, ယသါထွး ထီၣ်ဃ့ၢ် ကွံာ်လၢ ဟံၣ်လီၤ. မိၢ်တခီ ဒုးနၢ်ပၢၢ် ယၤလၢ နမ့ၢ် ပှၤသးတီတဂၤ ဒီး နမၤဒၣ်ယၤလၢ တၢ်သးတီ ဒီး တၢ်အဲၣ်အပူၤန့ၣ် အဃိ ယတၢၤကွံာ် ယတၢ်သးဒိၣ် ခဲလၢာ်လီၤ.”
မိၢ်အဂ့ၤ တဂၤအံၤ သံသနာ်က့, အတၢ်မၤဂ့ၤ န့ၣ် အိၣ်မူတ့ၢ်ထွဲ အခံဒီး ဒုးနၢ်ပၢၢ် လိာ်က့ၤ၀ၤဒီး ဖိခွါခံဂၤ အံၤအသးကဒဲကဒဲ န့ၣ်လီၤ.

စီၤဝါစံး, “စီၤက့ၣ်ဧၢ, ပၢ်သးပှၢ်ထီၣ်လံ. ဒီးယဆၢလၢ နကဖံးထီၣ် ဖီၣ်ထီၣ်က့ၤ ယတၢ်မၤဒီး မၤဂ့ၤထီၣ် အီၤဆူညါ န့ၣ်လီၤ. သနာ်က့ ယတမၤဆူၣ်နၤဘၣ်. ပိာ်နသး အခံလၢ တၢ်သးတီအပူၤ တက့ၢ်. တနံၣ်အံၤ တၢ်ထံတၢ်တီ ကစၢ်မၤဂ့ၤလီၤဆီ, ကီၤလၤတဖၣ် ဟ့ၣ်ယၤခိၣ်ဖး စ့ယဲၢ်ကလး ထ့းကီၣ်လီၤ. ပၢ်ဟ့ၣ်ထွဲ လီၤနၤ လၢစ့အံၤ ခဲလၢာ်ဒီး ဆိၣ်ဂ့ၤထွဲနခံလီၤ.”

မုၢ်ဆ့ၣ်ထီၣ်တနံၤ စီၤက့ၣ်ဒီး အဒိၣ်ခွါ စီၤကဒွဲၣ် လဲၤလီၤဆူ လၢၢ်ဟ့, စိာ်ဃုာ်ဒီး ကဆီမဲဒီး တၤဒိၣ်နၢၤ လီၤ. လဲၤတုၤ အဖါတံၢ်အဟံၣ်, ဘိၣ်ထီၣ် တၤဒိၣ်နၢၤဒီး ဆှၢလီၤန့ၢ်သထ့ တီဝူ တဘျီဃီလီၤ. မ့မ့ၢ် ကဆီမဲ တစူၣ်တခီ အဖါတံၢ်ဟ့ၣ်လီၤလၢ ပှၤပိာ်ထူပိာ်စ့ သ့တဂၤအစုပူၤ, မၢအဘှီထီၣ် မိၤစ့ ဂ့ၤဂ့ၤ တဖျၢၣ်ဒီး ဘျးလီၤစဲၤလၢ ကဆီမဲ ဘၢၣ်စၢၤ, ကဆီမဲခံခီ ဘၣ်တၢ်ပိာ်ဆၢထၢၣ် အီၤလၢ သ့ၣ်ဂ့ၤဘ့ၣ်ဘၣ် ဂ့ၤမး အဖီခိၣ်, ကွီၤအီၤလၢ စ့ကွီၤတတီၤတတီၤ ဒဲးကံၣ်ဒဲးဝ့ၤ အီၤလီၤ. ပှၤဘှီတၢ်ဃ့အီၤ ထ့းကီၣ် ခံကယၤလီၤ.

တၢၣ်ပီၣ်တၢ်ဒီး အဖါတံၢ် ဒီးစံးဆၢက့ၤယီၣ်စွါ
“တၢ်ဘျုးလၢနလီပျံၤအဃိ, ပာ်ဂၢၢ်ပာ်ကျၢၤ တၢ်ကျီသလ့ၤလါပှဲၤ, တသးပ့ၤနီၣ် ယူၤတသီဘၣ်.”
စံးဆၢက့ၤခီလ့ၣ်ကၠိခိၣ်
“တၢ်ဘျုးလၢနလီပျံၤအဃိ, သးအုးတူၢ်လိာ် နတၢ်ကိးတသ့ဘၣ်.”
စီၤက့ၣ်မံသကိး အဖါတံၢ် တနၤဝံၤ မုၢ်ဆ့ၣ်ထီၣ် က့ၤကဒါက့ၤဆူ စံာ်ဖးလဲၢ်လီၤ. ဖဲန့ၣ် အဝဲမၤစၢၤ အပၢ်လၢ တၢ်ဖံးတၢ်မၤ တသ့ဖဲအသ့ ဝံၤတုၤဃီၤ လါမ့ၤကလၢာ် ဒီးက့ၤကဒါက့ၤဆူ ဘီကီာ်လီၤ.