၀့ၢ်လၢၢ်ဟ့ (ထွံၣ်မဲၢ်က့ၣ်… ဘျၢထီၣ် အကူာ် ၃)

ဘူးတၢ်စူၤလီၤသီသီလံ. တဟါတခီၣ် စံာ်ဖးလဲၢ်စကီၤမုၣ် နီၢ်ထူအိၣ်လၢမံဒၢးပူၤခံဂၤ ဧိၤဒီး အဖိခွါ စီၤက့ၣ်လီၤ. စကီၤမုၣ်ကွၢ်ထွဲ မၤစၢၤအဖိခွါ ချံးကူချံးကၤဝံၤ ဒၢနုာ်ဝဲလၢအတလါပူၤလီၤ. မုၢ်ဆ့ၣ်ထီၣ်လၢ ဂီၤထၢၣ်သၢ ဖိခွါ အံၤကလဲၤဆူ ဝ့ၢ်လၢၢ်ဟ့ လဲၤမၤလိတၢ်လၢ ပဒိၣ်တီၤထီကၠိလီၤ. စကီၤအနီၢ်ကစၢ် ကလဲၤဆှၢလီၤအဖိခွါလီၤ. ဘၣ်ဆၢဘၣ်ကတီၢ်လၢ ပဒိၣ်မၤလိာ်ဃုာ်အီၤလၢ ကလဲၤဟံးန့ၢ်က့ၤခိၣ်ဖးတဖၣ်လီၤ. လါယူၤ ၁ သီနံၤန့ၣ် စီၤပၤဖိခွါဝဲၢ်ကိလၢ ဝ့ၢ်ဘီကီာ်တခီ ကဟဲမၤမူးမၤပွဲ နီၤလီၤခိၣ်ဖးလၢ ပဒိၣ်တၢ်ခ့ တၢ်ပှၤလၢ ကီၢ်လၢၢ်ဟ့တၢ်ပၢတခီ လၢတၢ်ဃုထၢတ့ၢ်လံအီၤ လၢတနံၣ်န့ၣ်အဂီၢ် လၢကန့ၢ်ဘၣ်ခိၣ်ဖး တၢ်မၤလၤ ကပီၤ တဖၣ်လီၤ. ဒီးစကီၤစီၤဝါ ပၣ်ဃုာ်ဝဲလၢ အကျါဒီး လံာ်ဟဲတုၤအိၣ်အီၤ လၢအါဖၢအရူ လၢကဘၣ် လဲၤလီၤဝဲန့ၣ်လီၤ.

“ဖိခွါဧၢ, မိအဲၣ်ဒိးမၤလိာ်ထွဲနခံတမံၤလီၤ. သးပ့ၤနီၣ်လၢ နမ့ၢ်ပှၤကညီတဂ့ၤ ဧီၢ်. နဖိၣ်သၣ်ခွါထီၣ်လံ. ဒီးတယံာ်ဘၣ် နကဖိၣ်သၣ်ခွါလ့ၤတုၤလ့ၤတီၤ လီၤ. ကၠီၣ်တဲၣ်ကီၢ်ပူၤအံၤ တၢ်လ့ပစီလၢ အဘၣ်ပှၤပိာ်ခွါ တဖၣ်မ့ၢ်ဒၣ်ပိာ်မုၣ်လီၤ. နဖါတံၢ်စီၤကၢတဂၤ လၢအမ့ၢ်ဒၣ်ယဝဲၢ်ဒၣ်ယဲ န့ၣ် ဖိၣ်သၣ်ခွါထီၣ်သီသီ လဲၤမၤသ့ၣ်ပှၢ် အတၢ်မၤ, ဟံးန့ၢ်ကၠီၣ်တဲၣ်မုၣ်တဂၤ ,တကနၣ်က့ၤအပှၤကလုာ်, တဟဲက့ၤလၢၤဆူ စံာ်ဖးလဲၢ်နီတစု လၢၤဘၣ်. ပှၤစံာ်ဖးလဲၢ်ဖိပိာ်ခွါ လၢတၢ်တမံၤဃီအံၤ မၤအသးအိၣ်ဒံးဝဲအါဂၤလီၤ. ပှၤခဲလၢာ်တဖၣ်အံၤ ကဲထီၣ်က့ၤပှၤဘါ စီၤကီတမး ဒီးစံးလီၤက့ၤဒၣ်အသးလၢ ပှၤကၠီၣ်တဲၣ်ဖိ, တကနၣ်က့ၤအပှၤကလုာ် လၢၤဘၣ်. နသါအၢၣ်လီၤမိၢ်လၢ နကဟးဆှဲးတၢ်လီၤကမၣ်တဖၣ်အံၤ တဘီဧါ.”

စီၤက့ၣ်ကွၢ်စူၣ်ထီၣ်အမိၢ်အမဲာ်ဝံၤ စံးဆၢဝဲ, “မိၢ်ဧၢ, နသ့ၣ်ညါလၢ ယအဲၣ်နၤလီၤ. အဃိ ယအၢၣ်လီၤ စဲဃဲၤနၤ လၢ ယတဟံးန့ၢ် ယမါလၢ ပိာ်မုၣ်လၢ ပှၤကလုာ်ဂၤအကျါ နီတစုဘၣ်.”

နီၢ်ထူသးခုမးလၢ အဖိခွါသဒါ အၢၣ်လီၤအတၢ်ဃ့ကညးန့ၣ်လီၤ. အဝဲဒၣ်တသ့ၣ်ညါကစၢ်ခရံာ်ဘၣ်. တဒိးန့ၢ်ဘၣ်ဒံး တၢ်သးခုကစီၣ်ဘၣ်. ဘၣ်ဆၣ်မိၢ်အတၢ်အဲၣ်န့ၣ် ဂဲၤဆူၣ်မးလၢ ဖိခွါ အိၣ်တဂၤဃီ အံၤအဖီခိၣ်ဒီး ဖဲအတၢ်ကပီၤအိၣ်ဝဲန့ၣ် အဲၣ်ဒိးဆှၢဖိအံၤလီၤ. ဖိမုၣ်အဒိၣ်ခံဂၤ ထီၣ်ပှၢ်လီၤဖးလံ. မၤန့ၢ်၀ၤလၢ ပှၤကညီဖဲ စံာ်ဖးလဲၢ် အပူၤ, ပှၤမၤကစု အီၣ်ကစု, ပှၤသကဲာ်ပဝး ဂ့ၤခံဂၤလိာ် ဒီး တဘၣ်ယိၣ်ဝဲလၢ အဂီၢ် အါကဲၣ်ဆိး ဘၣ်. မ့မ့ၢ်ဖိသဒါစီၤက့ၣ်တဂၤ, မိၢ်အံၤသ့ၣ်ညါ အတၢ်အခိၣ်ကိၤ, မ့ၢ်ပှၤတဂၤ လၢတုၤလၢ အသးလီမၤ တၢ်တမံၤမံၤ ဒီးမတၤမး ြတီအီၤတန့ၢ်လၢၤဘၣ်လီၤ. ဒီးမိၢ်အံၤ အတၢ်ဘၣ်ယိၣ်အဒိၣ်ကတၢၢ်တမံၤ လၢဖိခွါအံၤအဂီၢ် မ့ၢ်ဒၣ် လၢအဝဲကန့ၢ်ဖိန့ၢ်မါဒီး ကလုာ်ဂၤ ဒီးလီၤမၢ်ကွံာ်ဝဲလၢ နီၢ်ခိအတၢ်လီၤမၢ် အံၤန့ၣ်လီၤ.

စကီၤမုၣ်ဘုးထီၣ် တၢ်လၢအဆ့ကၤထၢၣ်ဖိတဖျၢၣ်အပူၤ, ထုးထီၣ်ပသံးလၢၢ်ဝါတဘိ, ဖီၣ်ဃီၤဖိခွါအစုစ့ၣ်, ဒီးဖျီၣ်န့ၢ်အီၤလၢ အစုဒဲးလိၤလီၤ. “စီၤက့ၣ်ဧၢ, ပသံးအံၤမ့ၢ်နဖံ ယမိၢ် အနီၢ်ကစၢ်ဒၣ်ဝဲ အတၢ်ဟ့ၣ်သါယၤ တၢ်အကျါတမံၤ လီၤ. နဖံဟ့ၣ်ယၤပသံးအံၤအခါ, မၤလိာ်ယၤဒီး ပဒီပုၢ်ဝဲၢ်ခဲလၢာ် လၢတၢ်တမံၤဃီလၢ ယမၤလိာ်နၤခဲအံၤ လၢတၢ်ဟံးဃာ်ပပှၤကလုာ် အတၢ်ကဆှီဒီး ထီၣ်ဖိန့ၢ်မါန့ၢ်၀ၤက့ၤ ဒီးပပှၤကလုာ် ဒၣ်ဝဲ န့ၣ်လီၤ.”

တုၤစီၤက့ၣ်ကွၢ်လီၤက့ၤပသံး လၢအစုဒဲးလိၤဒီး နၢ်ဟူဘၣ်အမိၢ်အတၢ်ကတိၤတဖၣ်အံၤ အသးဂဲၤထီၣ်မး လုာ်လုာ် လၢအတဲက့ၤဝဲ အဂ့ၢ်တဘၣ်တပှိၤလၢၤဝဲန့ၣ်လီၤ. တၢ်အဲၣ်အပှၤကလုာ်အသးအံၤ ဟဲဂဲၤထီၣ်ဝဲ န့ၣ်တသ့ၣ်ညါဝဲဘၣ်. ဒီးကနၣ်ဝဲလၢ ဟံးဃာ်အတၢ်အၢၣ်လီၤ အမိၢ်အံၤ ကန့ၢ်ညီကဒၣ်လီၤ. တထံၣ်စိ တၢ်ကီဖးဒိၣ် အိၣ်ခိးပာ်စၢၤအခိၣ်ဘၣ်. တထံၣ်စိတၢ်ဒုးတၢ်ယၤဖးဒိၣ် လၢအသးပူၤ လၢအကဘၣ်ဒုးဒံးဝဲ န့ၣ်ဘၣ်.

အိၣ်ဒ်အံၤအခါ စီၤလါအကလုၢ်သီၣ်ထီၣ် ဝဲလၢဟံၣ်ဖီလာ်တခီ, “ဟ့ စီၤက့ၣ်, စီၤက့ၣ်.”
“ဘၣ်မနုၤလဲၣ်နၤ စီၤလါ.”
“ခွဲးလီၤမ့ၤလၢဟံၣ်ဝံၤလံနၤဧၢ, ဖါတံၢ်စီၤဘျဲၣ် ဟဲတုၤကီးလံ. ပှၤခိးနၤ နၤဧၢ.”
စကီၤမုၣ်စံးဘၣ်စီၤက့ၣ်, “ဖိသဒါဧၢ, လဲၤမ့ချ့, မိၢ်ကကွၢ်မၤဝံၤက့ၤနတလါ.”
စီၤက့ၣ်လဲၤဃ့ၢ်လီၤဆူ ဟံၣ်ဖီလာ်, ဖိးထီၣ်အသိၣ်ခွါ ဖိစီၤလါအကိာ်, ညိၣ်ကလံၤကွ့ကွ့ ကွ့ကွ့ ဒီးလဲၤဆူ စီၤလါအဟံၣ်လီၤ. လဲၤတုၤသ့စုဝံၤ ဝီၣ်လီၤဆ့ၣ်နီၤလၢ မ့ၤပျဲၢ်စီၢ်သရ့ၤ ဒီးစးထီၣ်အီၣ်မ့ၤလီၤ. စီၤလါ လဲၤဒိးတ့ၤခီၣ် ဘၣ်လၢတၢ်ပုညီၢ်တဒု ဒီးဆီမံၤဖါကီၢ် တဘ့ၣ်လီၤ. ဆီမံၤတခီ ဖီပဲာ်ပိာ်ဝဲလၢ ၀ၣ်ဖိပျိာ်, မ့မ့ၢ် တၢ်ပုညီၢ်တခီ ဖီဝဲလၢသိလၢချါ, တၢ်နၢမူနၢဆှီတဖၣ်တခီလီၤ. ထိးအီၣ်တၢ်ဖိသွံဒီး ညၣ်အုၣ်ဝ့ၤထံ ကျဲၣ်ကျီ ဃုာ်လၢမိၢ်ဂံာ်ဘၢၣ်ကမူၣ် (ကၣ်လံၣ်ဖိသၣ်) န့ၣ်လီၤ. အီၣ်မ့ၤသကိးသၢဂၤ ဘဲမး, ဆူးစုလ့ၣ်ခီၣ်မးဝဲလီၤ. သိၣ်ဖိခံဂၤအံၤ ကဘၣ်လီၤဖးလိာ်သးလီၤ. ဒီးမ့ၢ်တၢ်လီၤဖးအတၢ်အီၣ်သကိးတဘျီန့ၣ်လီၤ.

စီၤလါကွၢ်ဃီၤစီၤက့ၣ် အစုစ့ၣ်တခီ ဒီးထံၣ်အတၢ်သိးပသံးလၢၢ်လါ တဘိလၢ တသိးညီနုၢ်ဝဲဘၣ်န့ၣ်ဒီး ကိးဩီထီၣ်ဝဲ, “ဟ့းနၤ, စီၤက့ၣ်, နကလဲၤလီၤမၤလိတၢ်လၢဝ့ၢ်ကၠိတဘီ နမၤလီၤဆီနသး, နလီၤဂာ်မးထဲ သထ့တဂၤတခီနဲာ်.”
“ဟ့းနၤ, ပသံးအဝဲအံၤ မ့ၢ်ခွါဖံအတၢ်ဟ့ၣ်သါခွါမိၢ်နၤဧၢ, ဒီးခွါမိၢ် ဒုးသီးထီၣ်ဒၣ်ခွါ ဖဲနလဲၤကိးန့ၢ်ယၤန့ၣ်လီၤ.”

စီၤဘျဲၣ်တခီ ကွၢ်ဃီၤအဖိဒိၣ်အပသံး, သ့ၣ်နီၣ်က့ၤဝဲတဘျီဃီလၢ အမိၢ် (စီၤက့ၣ်အဖံ) အတၢ်ဟ့ၣ်လီၤ ပသံးအခါ မၢအဖိတဖၣ် အၢၣ်လီၤကျီာ်လီၤအီၤလၢ အသုတထီၣ်ဖိန့ၢ်၀ၤန့ၢ်မါ လၢကလုာ်ဂၤတဂ့ၤန့ၣ်ဘၣ် လီၤ. သ့ၣ်နီၣ်ထီၣ်က့ၤစ့ၢ်ကီး အဝဲၢ်စီၤကၢ အတၢ်လီၤမၢ်ကွံာ်လၢ အတၢ်ဟံးန့ၢ်အမါဒီး ကၠီၣ်တဲၣ်မုၣ်ဝံၤအလီၢ်ခံ ဒီးအသးလီၤသကံးမးဒီး အိၣ်ဘှီၣ်ကလာ်ဝဲ လီၤ.

အီၣ်မ့ၤအီထံဝံၤဒီး က့ၤအိၣ်သကိးအိၣ်ပဟၢက့ၤလၢ ဟံၣ်ဘျီၣ်ပူၤ, ဆ့ၣ်နီၤအီလာ်ဖးထံ ခၣ်ဒီး နီၣ်ဝ့လီၤ. လၢဂီၤပၤလိၤတခီ, လါဖံးဖါတံၢ်အနၢၤ ဘၣ်တၢ်ပျၤထီအီၤ တမီးကဒီး လီၤ. ပှၤအံၤသံလံ, သနာ်က့ နကွၢ်အနၢၤတခီ လီၤကဟုကညီၢ်မးဝဲလီၤ. တၢ်စံးဝဲလၢ လါဖံးဖါတံၢ်တဖၣ် ခွဲးဒိးတၢ်ဘျၢမးလီၤ. လါဖံးဖါတံၢ်တဖၣ် ကျ့ဘျ့ကျ့စူထီၣ်အနၢၤ, ဒီးတဘျီဘျီ ဖဲတယၤသၣ်မံလံန့ၣ် လဲၤတိတရူၢ်လီၤ တယၤသၣ်ဒီး ခွဲးဒိး တယၤသၣ်, ဘၣ်လၢနၢၤစိးနါ ပိၢ်ဖးမး စွးစွး လီၤ. ဘၣ်တဘၣ် တၢ်အံၤကမ့ၢ်တၢ်ကတိၤပျံၤတၢ်ကဲၣ်ဆိးလီၤ. ဘၣ်တဘၣ်တၢ်အံၤကမ့ၢ် တၢ်ကပျံၤတၢ်ကဲၣ်ဆိးလီၤ. တၢ်လၢပသ့ၣ်ညါလီၤတံၢ်တခီမ့ၢ်ဒ်အံၤ, လါဖံး မ့ၢ်ဆၣ်ဖိကီၢ်ဖိလၢအဒူမး, ချ့မး, ဒီးဘီၣ်သအိၣ်ဒၣ်လဲာ်ပာ်ကဲအီၤ, ကဆီခးပျံၤပျံၤအီၤလီၤ. ပှၤခးတၢ်ဖိ တဖၣ် ပလီၢ်သးဒိၣ်မးဖဲ အခးအီၤအခါန့ၣ်လီၤ. တၢ်အံၤဒၣ်လဲာ် န့ၣ် ပှၤခးလါဖံးဒီး ဘၣ်ဒိသံပှၢ်ကွံာ်ဝဲ ဒးဧီၢ်ဒးဧီၢ်လီၤ. တၢ်စံးဝဲ ပခးလါဖံးမ့ၢ်တသံဒီး မ့ၢ်သဖှိလူၤဃီၤပှၤန့ၣ်, ပဘၣ်ကွံာ်ဒါလီၤပသးလၢ ဟီၣ်ခိၣ်လိၤ ဒီးအဝဲကစံၣ်ခီပတာ်ကွံာ်ပှၤလီၤ. ဘျၢၣ်လီၤတၢ်ဆူဟီၣ်ခိၣ်တသ့ဘၣ်. အကိာ်ယူၢ်ခီၣ်ထံး လၢအဖီလာ်တခီ အညၣ်ကိၢ်လိၢ် (ဘိး) ခီၣ်အသးအဃိလီၤ.

စီၤလါ စီၤက့ၣ် ဒီးသးပှၢ်စီၤဘျဲၣ်တဖၣ် ကွၢ်တၢ်လါဖံးတဒုအံၤ အနၢၤ ဒီးကတိၤဒၣ်ထဲ တၢ်ဆဲးတၢ်ခး အဂ့ၢ်လီၤ. စီၤဘျဲၣ်မ့ၢ်ပှၤလၢ အခးဆၣ်ဖိကီၢ်ဖိဖျဲၣ်မးတဂၤ ဒီးအဝဲလဲၤခီဘၣ် တၢ်လီၤပျံၤအလီၢ်အါမံၤလီၤ. တမ့ၢ်ပှၤ ကတိၤတၢ်အါ, ကတိၤကလွၤတၢ်တဂၤဘၣ်. ဖိသၣ်ခံဂၤအံၤ ကနၣ်အ တၢ်တဲပၠးအီၤ အလဲၤခးကဆီ, တၤဒိၣ်ခီၣ်, တၤသူ, ဘီၣ်သိၣ်တဖၣ်ဒီး အကိာ်ပူၤအီမးတဘီလီၤ.

စီၤဘျဲၣ်စံး, “အၢၣ်, စီၤက့ၣ်ဧၢ, နကၠိပျၢ်လၢနံၣ်ဖးဖီခဲကၢာ် ဟဲက့ၤဟး, ဖဲန့ၣ်ထံလီၤစှၤကွံာ်လံ. ဒီးပထိၣ်ထွံ လီၤသ့ၣ်တသ့လၢၤဘၣ်. ဖါတံၢ်ကဃ့န့ၢ်အခွဲးလၢ နပၢ်စကီၤ ခဲၤခးယုၤသုတၢ်လၢ ကစၢၢ်ဆီဖါလ့ခိၣ်.”

ဖိသၣ်ပိာ်ခွါခံဂၤ သးခုမးလီၤ. မုၢ်ယိာ်ထီၣ်လံ သိၣ်ဖိခံဂၤ စးထီၣ်တကီထီၣ် “ဟဲၤ, ဟဲၤ” လံ. ဖါတံၢ်စီၤဘျဲၣ် စံး, “ကဲ, ထ့ၣ်ဖိသ့ၣ်ဧၢ, ပကမံဘၣ်လံဧါသၢၣ်.” ဝံၤဒီးက့ၤဆူဟံၣ်လီၤ. စီၤလါတခီ လဲၤပိာ်စီၤက့ၣ်အခံ လဲၤမံသကိးအီၤ လၢခံကတၢၢ်တနၤအံၤလီၤ.

ဆီဖါအိၣ်အိထီၣ်ခံဘျီတဘျီဒီး စံာ်ဖးလဲၢ်သဝီပူၤ ပိာ်မုၣ်ခဲလၢာ် ပၢၢ်ထီၣ်ဆုဘု, ဖီမ့ၤဖီထံ တၢ်သီၣ်မး “ြကုၤ ထး, ြကုၤ ထး” ဒီသဝီညါလီၤ. စီၤက့ၣ်အမိၢ်ဂဲၤထၢ ၣ်, ဒိထီၣ်ထံချီ, ဟၢထီၣ်ပအံ, ဖီထီၣ်ကသူ, ဘိၣ်ထီၣ် ပအံဒီးကသူလၢ ဖိ၀ၤကလဲၤစိာ်အီၣ်လၢကျဲ အဂီၢ်လီၤ. ကျဲပာ်စၢၤ လာ်ဖးထံဆၢ ဘဲဘဲရှီရှီဝံၤ ဆီဖါ အိၣ်အိထီၣ်သၢဘျီတဘျီ ထိၣ်ဂဲၤထီၣ်ဖိ၀ၤခံဂၤလၢ ကဘၣ်လဲၤတၢ်အဂီၢ် န့ၣ်လီၤ.

မ့ၢ်လၢစီၤက့ၣ်ကလဲၤလီၤကၠိအဃိ, ပှၤဂီၤကၢ်ထီၣ်ကဆီဖါသၢဒုလိာ် လီၤ. ကဆီတဖၣ်ဟဲတုၤလၢ ဟံၣ်မဲာ်ညါ အခီလီတဖၣ် သီၣ်ြက့ြကိၣ်မး, ထွံၣ်မီၤမးတၢ် ပိၢ်တထူၣ်တဘီလီၤ. စီၤက့ၣ်ဒီဖိပၢ်, စီၤဘျဲၣ်ဒီး ပှၤကွၢ် ကဆီဖိသၢဂၤ, ပျၢ်မဲာ်ပျၢ်နါ, အီၣ်ဆၣ်အီဆၣ်ဝံၤ ဒီး စၢထီၣ်တီၣ်ထီၣ် တၢ်ဖိတၢ်လံၤလၢ ကဆီစုာ်ပူၤလီၤ. စီၤက့ၣ်အမိၢ် ထုးသဒၢအီၤဆူဖၣ်ကပူၤ ဖီၣ်ဃီၤပသံးလၢၢ်လါလၢ စီၤက့ၣ်အစုလိၤဒီးစံး, “ဖိခွါဧၢ, မိၢ်နာ်န့ၢ်နၤလီၤ.” ဝံၤဖိးနၢမူအီၤ လၢတၢ်သးသယုၢ်အမဲာ်ထံမဲာ်နိအပူၤလီၤ. စီၤက့ၣ်အမဲာ်ထံသါကလီၤစ့ၢ်ကီး ဘၣ်ဆၣ်မဲာ်ဆှးလၢ ပှၤကထံၣ်လၢအဟီၣ်, နၢမူဆၢအမိၢ် ပစုာ်ပတ့ၤဝံၤ ဟးထီၣ်ဆူခိဒီး ဒိးထီၣ်ကဆီ လီၤ.

ကဆီဖါဂဲၤဆၢထၢၣ်လၢ အအီလီၤအလီၢ်, စီၤက့ၣ်နူးဆဲးစီၤလါ, “စီၤလါဧၢ, လဲၤလံနၤဧၢ.”
စီၤလါတခီလၢတၢ်သးကတံာ်မး လၢဘၣ်လီၤဖးဒီးစီၤက့ၣ်အဃိ, စံးဆၢအီၤအကလုၢ်သီၣ်သီၣ်တသီၣ်သီၣ် “လဲၤမုာ်မုာ်လီၤနၤဧၢ” ဝံၤက့ၤဃ့ၢ်ဆူအဟံၣ်ဒၣ်ဝဲလီၤ.

မုၢ်ဆ့ၣ်ထီၣ်ဒီးလဲၤတုၤလၢၢ်ဟ့အသရ့ၤဖဲ ညီနုၢ်ပှၤပာ်တီၢ်ကဆီအလီၢ်န့ၣ်လီၤ. ဖဲန့ၣ်ဘီၣ်လီၤကသူဘိၣ် ပအံဘိၣ် တဖၣ်ဝံၤ အီၣ်ကဒီးအဆၣ်လီၤ. စကီၤစီၤဝါ မၤလိာ်ပှၤကွၢ်ကဆီသၢဂၤလၢ ကကွၢ်ကဆီဂ့ၤဂ့ၤ, ဟ့ၣ်တီၢ်ဝဲကျိၣ်စ့ လၢကအီၣ်တၢ်ဒီး ကဆီကအီၣ်တၢ်အဂီၢ်ဝံၤ, လဲၤနုာ်လီၤဆူဝ့ၢ်ပူၤလီၤ.

လဲၤတုၤဃီၤလၢ ြဖၣ်သူဝါအနီပူၤ,လဲၤနုာ်လီၤဆူ နီဒၢးပူၤဖဲ ြဖၣ် (ကစၢ်) အံၤညီနုၢ်အီၣ်ဆၣ်လၢ ဂီၤအလီၢ် န့ၣ်လီၤ. ြဖၣ်ထံၣ်ဃီၤဖိဒိၣ်လၢ အအဲၣ်လီၤဆီဝဲတဂၤ အံၤတဘီ ဂဲၤထၢၣ်မး တြကူၤတြကၤ လဲၤဖိးဟု ဖိးဃာ်မးအီၤလီၤ. နူးဆဲးအယီာ်ဖးဝံၤ က့ၤကိးကသွံစီၤက့ၣ်ဆူ မံဒၢးပူၤတခီဒီး သံကွၢ်အီၤ, “ယနၢ်ဟူ နစိာ် နပၢ်အကျိကဆီ လဲၤဖးလါဖံးဖါတံၢ်တဒု နပၢ်တီၢ်နၤ နမိၢ်ဘၣ်စံၢ်ထိးက့ၤနၤမ့ၢ်ဧါ.” “မ့ၢ်ဖါတံၢ်ဧၢ.”
“နပၢ်အံၤဘီၣ်, နပၢ်အံၤဘီၣ်, အတွးတအိၣ်ဘၣ်ထ့ၣ်ဧၢ, နသးမ့ၢ်ပှဲၤထီၣ် တဆံဃုနံၣ် ခဲကိာ်ဖါတံၢ် ကပှ့ၤန့ၢ်နၤကျိကဆီဖဲနသးလီ တဆိဆိဒီး ဟ့ၣ်နၤ, နကပှဲၤထီၣ် တဆံဃုနံၣ် လိၣ်ဒံးဆံးအါလဲၣ်ထ့ၣ်.”
“လိၣ်ဒံးခံလါဘျဲၣ် လီၤဖါတံၢ်ဧၢ.”
“တယံာ်လၢၤမးလဲၣ်. ကၠိတချုးပျၢ် နံၣ်ဖးဖီအံၤ နကန့ၢ်ဘၣ်ဃါမနၤလီၤ. ဖါတံၢ်ကထုးထီၣ် ဟ့ၣ်ဃုာ်နၤ လဲစ့ၣ်တဘ့ၣ်, ဒ်ထံကီၢ်အသဲစးအိၣ် ဝဲအသိးသၢၣ်. ဘၣ်ဆၣ်မီၤ နဘၣ်အၢၣ်လီၤလၢ ကဆီလၢ နခးန့ၢ် အဆိကတၢၢ် တဒု အမဲစွဲၣ်န့ၣ် နကဘၣ်ဟ့ၣ်ဖါတံၢ်နီၤ.”
“တၢ်ဘျုးဒိၣ်မးလီၤ. ဖါတံၢ်ဧၢ, ကၠိပျၢ်ခဲကၢာ် တၢ်ယီၤထီၣ်သီန့ၣ် ယဖါတံၢ်စီၤဘျဲၣ် အၢၣ်လီၤယၤလၢ သါကလဲၤ ခးယုၤယၤ တၢ်လၢကစၢၢ်ဆီဖါလ့ခိၣ် လီၤ. ယကျဲးစၢးမၤန့ၢ်နၤ ကဆီမဲတစူၢ် နီၢ်ကီၢ်လီၤ.”

ြဖၣ်သူဝါ အသးယဲၢ်ဆံဘျဲၣ်လံ. ဘီၣ်ဒိၣ်မးဒီး ဟးခးတၢ်တကဲလၢၤဘၣ်. တဘျီအဝဲမ့ၢ် ပှၤလၢအဟးခး တၢ်ဆူၣ်မး, ဒီးအဟံၣ်ဘျီၣ်ပူၤ ပှဲၤကတံာ်မး ဒီးဘီၣ်သိၣ်ဖံး, တၤသူဖံး, ကဆီမဲ, ကဆီခီၣ်ဖံး တၢ်ဖိတၢ်လံၤ အကလုာ်ကလုာ် တဖၣ်လၢအခးန့ၢ်ဝဲ အနၢၤဒီးအဖံးတဖၣ်လီၤ. အဝဲသ့ၣ်နီၣ်ထီၣ်က့ၤ ဆၣ်ဖိကီၢ်ဖိခဲလၢာ် တဒုဘၣ်တဒု အတၢ်စံၣ်စိၤတဲစိၤ, ခးန့ၢ်ဝဲဖဲလဲၣ်, ခးဝဲဒ်လဲၣ်န့ၣ်လီၤ. လၢညါလၢညါ စကီၤစီၤဝါ မ့ၢ်ဟဲကိး စီၤက့ၣ် ဟဲအိၣ်သကိးအီၤဒီး တဲဃဲၤယုၤဒၣ်အီၤ အတၢ်ဟးခးတၢ်အဂ့ၢ်သ့ၣ်တဖၣ်လီၤ. ဒီးပှၤလၢအကနၣ်အီၤကဲ, ကနၣ်အီၤတၢ်တကၢၣ်အသး အိၣ်ဒၣ်စီၤက့ၣ်တဂၤဧိၤ န့ၣ်လီၤ. ပှၤဂၤတဖၣ် ကနၣ်အီၤအဘျီ အါထီၣ် ဒီးတၢ်ကၢၣ်မးအသးလီၤ. မ့မ့ၢ်စီၤက့ၣ် ကနၣ်စူၣ်မးအီၤလၢအမဲာ်ညါ, သံကွၢ်အီၤတၢ်အါမံၤဘၣ်ဃး ဆၣ်ဖိကီၢ်ဖိအလုၢ်အလၢ်, ပဘၣ်စီၤအီၤဒ်လဲၣ်, ခးအီၤဒ်လဲၣ်, ဒီးတၢ်အါမံၤလီၤ. မ့မ့ၢ် တၢ်ဆဲးတၢ်ခး တမံၤ အဖီခိၣ် မ့ၢ်ပှၤသးဆူၣ်ခံဂၤလိာ် အဃိဒီး ရ့လိာ်သးမုာ်မးလီၤ.

တနံၤညါန့ၣ် ြဖၣ်သူဝါဒီး ကီၢ်ပဒိၣ်ခဲလၢာ် ဘၣ်ကတဲာ်ကတီၤ တံၢ်က့ၤတၢ်တူၢ်လိာ် ယူၣ်တရၣ်စီၤပၤဖိခွါ ဝဲၢ်ကိ အတၢ်ဟဲဟ့ၣ်နီၤလီၤ ခိၣ်ဖးတဖၣ်အလီၢ်အကျဲ, တၢ်ရဲၣ်လီၤသုးမုၢ်တဖၣ် လၢကျဲလၢကဟဲဖျိဝဲ တၢ်ရဲၣ်လီၤပှၤခူဖိဝ့ၢ်ဖိတဖၣ် အလီၢ်ဒီး တၢ်ဂုၤတၢ်ဂၤ အါမံၤလီၤ.

ဒ်ကီၢ်၀ၢၣ်နၢၣ် အဖိဒိၣ်တဂၤအသိး စီၤက့ၣ်မၤန့ၢ်လဲးမးတဘ့ၣ်လၢ ကလဲၤကွၢ်ကီ တၢ်ဟ့ၣ်လီၤခိၣ်ဖး တဘျီအံၤ လၢပျဲၢ်စီၢ်ဘၣ် တၢ်ဘှီလီၤဆီအီၤလၢ ကီၢ်ပဒိၣ်ပပှၢ်, အဖိအမါအဖိအလံၤ, ပှၤဒိၣ်ပှၤပှၢ် တူၢ်ဒိၣ်ကီၤ ဒိၣ်ဒီး အဟံၣ်ဖိဃီဖိသ့ၣ်တဖၣ်အဂီၢ်န့ၣ်လီၤ. ြဖၣ်သူဝါထုးထီၣ်တ့ၢ်လံအကလုၢ်လၢ တၢ်ဘၣ်ကူဘၣ်သိး ထံဖိကီၢ်ဖိအကူအကၤ လီၤဆီလၢ တၢ်ညီနုၢ်လဲၤကူလဲၤကၤလၢ စီၤပၤအမဲာ်ညါ, မ့တမ့ၢ်ဘၣ်ဒီး ဘၣ်ကူ ယူရပၤ တၢ်ကူတၢ်ကၤလၢ တၢ်ညီနုၢ်ကူကၤဝဲလၢ ဂီၤတခီလၢ စီၤလိၣ်စီၤပၤတဖၣ် အမဲာ်ညါန့ၣ်လီၤ.

စကီၤစီၤဝါမ့ၢ် ပှၤညီနုၢ်န့ၢ်ဘၣ် တ့ၢ်လံခိၣ်ဖးအါဘျီတဂၤ, အတၢ်ကူတၢ်ကၤ အိၣ်ပာ်လံဒီး ကူဝဲဘၣ်လံ. မ့မ့ၢ်ပသိၣ်ဖါဖိ စီၤက့ၣ်အတၢ်တအိၣ်ပာ်စၢၤနီတမံၤအဃိ, အဖါတံၢ်ပျၢ်လီၤ ပှၤလၢနီပူၤတဂၤ လဲၤပှ့ၤန့ၢ် ဆးန့ၢ်အီၤ ပစုာ်ပတ့ၤလီၤ. တၢ်ကူတၢ်သိးမ့ၢ်ဝဲ ခိၣ်သလုးတၢ်ကံးညာ်ဝါ, အီကၠံခိး ကိာ်ယူၢ်ကးတံာ်သး အိၣ်ဒီးဆ့ကၤနုၢ်သၣ်ထူ, ထဲကူသတိၢ်ဂီၤလုး, ဘၣ်ကူကွံးထီၣ်အခံ, ခီၣ်ဖံးဝါ ခီၣ်ဖျီၣ်ဝါ န့ၣ်လီၤ. စီၤက့ၣ် ဘၣ်တၢ်သိၣ်လိပာ်စၢၤအီၤ လၢလၢပှဲၤပှဲၤ ဘၣ်ဃး တၢ်ကူတၢ်သိးအမဲာ်ညါ, တၢ်ဘၣ်ကျိာ်လီၤနူးဆဲး စီၤပၤဖိဒ်လဲၣ် ဒ်လဲၣ်န့ၣ်လီၤ.

တနၤန့ၣ် မုၢ်နၤယိာ်ထီၣ်မးဘၣ်ဆၣ် ြဖၣ်သူဝါ အဟံၣ်ဖိဃီဖိတဖၣ် တမံဝဲဘၣ်. ပှၤခဲလၢာ်သူၣ်ပိၢ်သးဝး မးလီၤ. စီၤပၤဖိကဟဲတုၤဂီၤ ၇ နၣ်ရံၣ်လီၤ. ကဆီဝါတဒု ဘၣ်တၢ်ဒဲးကံၣ်ဒဲးဝ့ၤပာ်အီၤ လၢကိာ်ကျီၤထူ, ဒၢလွဲထူဖိတဖၣ်, စုာ်စ့ဒီး သဒၢမုၢ်ထူတဖၣ် အိၣ်ခိးပာ်စၢၤတၢ်လီၤ. အဝဲအံၤ မ့ၢ်လီၤဆီ ဒၣ်တၢ်လၢ စီၤပၤ ဖိခွါ ကဒိးအဂီၢ်လီၤ. ကဆီသူအိၣ်ဒံးအါဒု လၢစီၤပၤဖိခွါအပျဲၢ် သုးခိၣ်, ပဒိၣ်တဖၣ်ကဒိးဝဲ, လၢြဖၣ်သူဝါ ဒီး ကီၢ်ဆၣ်လၢၢ်ဟ့ တၢ်ပၢတၢ်ြပး အခိၣ်အနၢ်တဖၣ် ကဒိးဝဲအဂီၢ်န့ၣ်လီၤ. လ့ၣ်မ့ၣ်သန့ ဘၣ်တၢ်မၤကဆှဲကဆှီ မၤဃံမၤလၤအီၤဂ့ၤမး, ဖီကိတဖၣ် ဘၣ်တၢ်စံၣ်ရဲၣ်လီၤအီၤ ဃံဃံလၤလၤ, လ့ၣ်မ့ၣ်သန့အထူၣ် ခဲလၢာ် ဘၣ်တၢ်ကျးဘၢအီၤလၢ စးခိဘူ အလွဲၢ်အါမၠိ, စးခိအံၣ်ဖးထီတဖၣ် ဘၣ်တၢ်စၢဘျးလီၤအီၤ လၢတၢ်ဖးဖီ, ကျဲလၢစီၤပၤဖိကစံၣ်လီၤလၢ လ့ၣ်မ့ၣ်တွဲဒီး လဲၤဃီၤဆူကဆီဝါအအိၣ် ဘၣ်တၢ်ဒူၣ်ဃာ်ခံခီလိာ် လၢပျံၤ ဒဲးကံၣ်ဒဲးဝ့ၤ, လီၢ်ဒါကပုာ် ချီၣ်ဒါလီၤအသးလၢ လၢၢ်ဒါအဖီခိၣ်, သုးဖိကူကၤတၢ်ကူတၢ်သိး ထူးအသးလၢ ထးကိၢ် ကစီဒီ, ဆ့ကၤနုၢ်သၣ်, ခီၣ်ဖံးခဲလၢာ် ဘၣ်တၣ်ထူးကြတ့ၣ်အီၤ, ဒီးသုးအပှၤအူဘဲတဖု အိၣ်ခိး စ့ၢ်ကီး လၢကတူၢ်လိာ်စီၤပၤဖိလၢ တၢ်သးဝံၣ်လီၤ.

နၣ်ရံၣ်ဘၣ်ဃၣ်ဃၣ်လံ. ပှၤအိၣ်ခိးတၢ်တဖၣ် ကွၢ်စူၣ်ဃီၤတၢ်ဆူ လ့ၣ်မ့ၣ်ကျဲလီၤ. ဟါအလၣ်လီၤလံ. လ့ၣ်မ့ၣ် ကလုၢ်ဟူထီၣ်လံ. အခိၣ်ဟဲဖျါထီၣ်လံ. ဘူးထီၣ်ဘူးထီၣ်, မၤဃၢလီၤဝဲ, ဒီးဃၢထီၣ်တစဲးဘၣ်တစဲး ဖဲ အနုာ်လီၤသန့ အပူၤန့ၣ်လီၤ. အလါ, ပှၤနီၣ်လ့ၣ်မ့ၣ်တဂၤ ပှၤစဲၣ်နိးဟ့း, ပာ်တီၢ်အလ့ၣ်မ့ၣ်ဘၣ်လိၤလိၤ တၢ်လီၢ်ဖဲ အကဘၣ်အိၣ်ကတီၢ်ဝဲန့ၣ်လီၤ. တၢ်ခ့တၢ်ပှၤတဂၤလၢ တၢ်ပာ်လီၤဆီအီၤ သဖှိဃီၤြစးကနာ်, ဝံာ်အိးထီၣ် လ့ၣ်မ့ၣ်အူကျဲစၢၤြပဲြတီလီၤ. ပှၤတဒိၣ်တထီဘၣ်, အမဲာ်ညါလီၤဂာ်တရူးတစဲးစဲး, မဲာ်သၣ်ချံ ခးဘံယုၤဘံယုၤ, ကူသိးကဘီသုးခိၣ်ဖးဒိၣ် တၢ်ကူတၢ်ကၤအဝါ တဂၤဟဲစံၣ်လီၤလၢလ့ၣ်မ့ၣ်ပူၤ, ဘဲ သီၣ်ထီၣ်, သုးဖိတဖၣ် ပှီၢ်ကျိဒီး ဝံၢ်ထီၣ်ဝဲ “ြပူး, ြပူး, ြပူး” ဆူ“ယူးယီၣ်” ပှၤခဲလၢာ်ထုးလီၤကွံာ်အခိၣ်သလုး, ဆုးလီၤခိၣ်ဖဲ တၢ်အူဘဲဖုၣ်ကိာ် လၢအမ့ၢ်ကီၢ်ယူၣ်တရၣ် စီၤပၤတၢ်သးဝံၣ်အခါန့ၣ်, မ့မ့ၢ်စီၤပၤဖိတဂၤ ခီ ဟ့ၣ်ဆၢတၢ်ယူးယီၣ်, အစုလၢခိၣ်သလုးဒ် မုၢ်နုာ်အလုၢ်အလၢ်အသိး န့ၣ်လီၤ. အဝဲမ့ၢ် စီၤပၤဖိ ရၣ်မၣ် လီၤ. အပၢ်ဆှၢလီၤအီၤ လဲၤမၤသုးတၢ်မၤတနံၣ်လၢ ကီၢ်ြဖၣ်စ့ၣ်, ကဘီသုးတၢ်မၤခံနံၣ်လၢ ကီၢ်အဲကလံး ဒီး အဲၣ်ကီၢ်မုၢ်နုာ်အလုၢ်အလၢ် ဒီးသ့ဝဲအကျိာ်တဖၣ် တစဲးညါန့ၣ်လီၤ.

ဘဲအိၣ်ကတီၢ်လံ, ြဖၣ်သူဝါဒီး အပဒိၣ်ခဲလၢာ် လဲၤတီၤလီၤလၢ စီၤပၤဖိအမဲာ်ညါလီၤ. စီၤပၤဖိ ဝံၢ်ထီၣ် ြဖၣ်သူဝါ, ဒီးဟ့ၣ်လီၤအကလုၢ်လၢ ပဒိၣ်ခဲလၢာ်ကဂဲၤဆၢထၢၣ်က့ၤဝဲ ဒီးအတၢ်ဂဲၤဆၢထၢၣ်က့ၤလီၤ. ြဖၣ်သူဝါ မၤသ့ၣ်ညါအီၤ တဂၤဘၣ်တဂၤလၢစီၤပၤဖိဝံၤ, စီၤပၤဖိသုးအသး လဲၤကွၢ်ဟုၣ်ကွၢ်စုၣ် သုးဟဲ မၤလၤကပီၤအီၤတဖုအံၤ တစဲးဝံၤ, ဟးထီၣ်ဆူလ့ၣ်မ့ၣ်သန့အချၢလီၤ. ဖဲန့ၣ်ကဆီဝါ ချံးခီၣ်တီၤလီၤ, ဒီးစီၤပၤဖိ ယီၢ်ထီၣ်တလါလၢ ကယီၢ်လီၤဝဲအဂီၢ်တဖျၢၣ်ဝံၤ, နုာ်လီၤဆ့ၣ်နီၤဝဲလၢ ကဆီစုာ်စ့အပူၤလီၤ. ဒ်န့ၣ် အသိး ြဖၣ်သူဝါဒီး ပဒိၣ်အဂၤတဖၣ် ဒိးထီၣ်ကဆီသူတဖၣ်ဝံၤ ပိာ်ထီၣ်စီၤပၤဖိ အကဆီဝါအခံ ပှီၢ်ပှီၢ်န့ၣ် ဆူတၢ်ကဟ့ၣ်လီၤခိၣ်ဖး အတလီပူၤန့ၣ်လီၤ.

စီၤပၤဖိလဲၤတၢ်လၢကျဲဒီး သုးဖိအိၣ်ရၤလီၤသး လၢကျဲခံခီယၢ်ဘးလီၤ. ပျံၤဘၣ်စၢပလူာ်လၢ အလွဲၢ်အဂီၤ, အဝါ, အလါတဖၣ် ြတီဃာ်ကမျၢၢ်ဒ်သိး သုတဟဲမၤတံာ်တာ်အကျဲတဂ့ၤန့ၣ်လီၤ. ကမျၢၢ်တခီကိးသြတီ ထီၣ်, “မ်စီၤပၤဖိခွါ အသးကၢတက့ၢ်.” တနီၤနီၤ ဝံၢ်၀ၢ်ယူၣ်တရၣ်နီၣ်တယၣ် ဆံးဖိ, တနီၤနီၤပ၀ၣ်ဖိပတီၢ်မုၢ်, တနီၤနီၤစုယၢ်ခီန့ၣ်လီၤ. ကဆီခဲလၢာ် ဘၣ်သဂၢၢ်ညီနုၢ်ဒီး တၢ်သီၣ်လုာ်လုာ်တၢတၢဒ်အံၤအဃိ တဖုးတလဲး, တဃ့ၢ်နါစိၤစ့ၢ်ကီးဘၣ်. ထွဲဒၣ်အခီၣ်ကပျဲာ်ကပျဲာ် ဆူညါန့ၣ်လီၤ. အအံၤမ့ၢ် တၢ်ဖျါဃံဖျါလၤ ဘၣ်ပှၤယူၣ်တရၣ်ဖိ တဖၣ်အဒိၣ်အမုၢ်န့ၣ်လီၤ. တနံၤန့ၣ်မ့ၢ်တၢ်ကွၢ်ကီအနံၤ, တၢ်သးခုအနံၤဒီး တၢ်မၤလီၢ် ခဲလၢာ် ဘၣ်တၢ်ကးတံာ်အီၤ, ပှၤမၤတၢ်ဖိခဲလၢာ် န့ၢ်ဘၣ်အခွဲးလၢ ကဆိကတီၢ်တၢ်မၤဒီး လဲၤကွၢ်ကီ တၢ်န့ၣ်လီၤ.

စီၤပၤဖိလဲၤတုၤကဒီးလၢ သုးဒုးနဲၣ်တၢ်ဒုး အတၢ်ဟူးတၢ်ဂဲၤအလီၢ်, ဖဲကမျၢၢ်ဒီဝ့ၢ်ညါ အိၣ်ခိးဝးတရံး ပာ်စၢၤအီၤ န့ၣ်လီၤ. ကမျၢၢ်တဖၣ် တၢ်ြတီဃာ်အီၤလၢ ပျံၤဝါ, လါ, ဂီၤ တဖၣ် လၢသုတလဲၤနုာ်လီၤမၤတံာ် တာ် တၢ်အဂီၢ် တဂ့ၤန့ၣ်လီၤ. စီၤပၤဖိအကဆီဝါ လဲၤတုၤဃီၤ ပျဲၢ်စီၢ်ဝါလၢ တၢ်ကတဲာ်ကတီၤပာ်လၢ အဂီၢ်လၢ တလီခၢၣ်သးဒီး အိၣ်ဆိကတီၢ်ဝဲ, ချံးလီၤခီၣ်ကယီလီဖဲ တလါတဖျၢၣ်ကပၤဒီး စီၤပၤဖိ စံၣ်လီၤ က့ၤဝဲလီၤ. ပဒိၣ်ပပှၢ်အိၣ်လၢကဆီသူတဖၣ်အလိၤစ့ၢ်ကီး စံၣ်လီၤက့ၤဝဲလီၤ.

တဘျီဃီဘဲသီၣ်ထီၣ်ကဒီးဝဲ, အူဝဲဒၣ်ယူၣ်တရၣ် အပှၤကလုာ် အတၢ်သးဝံၣ်, ဖဲယူၣ်တရၣ်အနီၣ်တယၣ် အိၣ်ဒီး ကဆီဝါအဂီၤ ဖဲတၢ်ကံးညာ် ဖါဂီၤအနၢၣ်လိၤန့ၣ် ဘၣ်တၢ်ထုးသလၣ်ထီၣ်ဝဲ, ဒီးကလံၤအူအီၤ ဝံးဝး သး ကပျဲာ်ကပျဲာ်လၢ တၢ်ဖီခိၣ်တခီန့ၣ်လီၤ.

ကမျၢၢ်တဖၣ်အိၣ်ဘှီၣ်ကလာ်, ဘီၣ်လီၤခိၣ်သလုး, ဆုးလီၤခိၣ်, ဖဲစီၤပၤဖိတခီ ဟ့ၣ်တၢ်ယူးယီၣ်ထီၣ် နီၣ်တယၣ်အံၤ လၢစုထွဲတခီန့ၣ်တုၤ တၢ်အူဘဲအံၤကတၢၢ်တစုလီၤ. စီၤပၤဖိ ပာ်လီၤက့ၤအစု, ကမျၢၢ်တဖၣ် ဝံၣ်ထီၣ်က့ၤအခိၣ်, ဒီးကၢၢ်ထီၣ်က့ၤ ခိၣ်သလုးန့ၣ်လီၤ.

ြဖၣ်သူဝါလဲၤဆှၢထီၣ် စီၤပၤဖိဆူ ပျဲၢ်စီၣ်ဖီခိၣ်လီၤ. ဖဲန့ၣ်လီၢ်ဆ့ၣ်နီၤ ထူအိၣ်ဒီး လၢၢ်ဂီၤလၢၢ်ဝါတဖျၢၣ် ဘၣ်တၢ်ကတီၤပာ်စၢၤအီၤလၢ အဂီၢ်လီၤ. စီၤပၤဖိတုၤဖဲန့ၣ်, တချုးဆ့ၣ်နီၤဒံးဘၣ်ဒီး ြဖၣ်သူဝါ ဟးမၤသ့ၣ်ညါ ကဒီးအီၤလၢ ပဒိၣ်ပပှၢ် တူၢ်ဒိၣ်ကီၤဒိၣ်ဒီး အဖိအမါတဖၣ်လၢ အအိၣ်တီၤလီၤသးလၢ အမဲာ်ညါန့ၣ်လီၤ. လၢပှၤအကျါန့ၣ် ပသိၣ်ဖိစီၤက့ၣ် ပၣ်စ့ၢ်ကီးဝဲလီၤ. တၢ်အံၤဝံၤမးဒီး စီၤပၤဖိက့ၤဆ့ၣ်နီၤက့ၤ လၢအလီၢ် ဆ့ၣ်နီၤထူ, လၢၢ်ဂီၤ, လၢၢ်ဝါ လီၤ.

တဘျီအံၤဒ် ကီၢ်၀ၢၣ်နၢၣ်အသိး, ြဖၣ်သူဝါ လဲၤတီၤလီၤလၢ စီၤပၤဖိအမဲာ်ညါဒီး ဃ့အခွဲး လၢအီၤလၢ ကဖးဖျါထီၣ် လံာ်တၢ်ကတိၤဒိၣ်အီၤအဂီၢ်လီၤ. စီၤပၤဖိ ကျၢၢ်ကျာ်လီၤ အခိၣ်လီၤ.

ြဖၣ်သူဝါ သလၣ်လီၤလံာ်ကွဲးလၢ သတိၢ်တၢ်ကံးညာ်လၢ အမဲာ်ဖျၢၣ်လုၣ်ဂီၤသတိၢ်တဘ့ၣ်, ဒီးဖးထီၣ်အီၤ လီၤ. တၢ်ကတိၤအံၤ ထီကဲၣ်ဆိးလၢ တၢ်ကွဲးဖျါဖဲအံၤ ခဲလၢာ်အဃိ, ပကွဲးဖျါထီၣ်ထဲ တနီၤဧိၤလီၤ…

“တၢ်ဒိၣ်ကစၢ်စီၤပၤဖိ ရၣ်မၣ်ဧၢ, ပစံးဘျုးဘၣ်နၤဒိၣ်မး ဒီးတၢ်ဒိၣ်ကစၢ် နပၢ်စီၤပၤ ဖးဒိၣ်လၢ အပျၢ်လီၤနၤ လၢနကဟဲ မၤဃံမၤလၤ ပခူပဝ့ၢ်, ဝ့ၢ်လၢၢ်ဟ့အံၤန့ၣ်လီၤ. ဖျါလၢအမ့ၢ် သုတၢ်သးအိၣ်ပှၤဒီး နာ်န့ၢ်ပှၤလၢ ပတၢ်သူၣ်တီ သးရၤဒီး စီၤပၤအတၢ်ပၢတၢ်ြပး အဃိန့ၣ်လီၤ.

“ကီၢ်လၢၢ်ဟ့အံၤ ဘၣ်တၢ်ပၢတ့ၢ်အီၤလၢ ပဝဲပှၤကညီကီၢ်ခိၣ်, ပဖံပဖုတစိၤဘၣ်တစိၤ, လၢယူၣ်တရၣ်စီၤပၤ ဖးဒိၣ်အတၢ်အံး တၢ်ကွၢ်အဖီလာ်လီၤ. ဘၣ်တဘၣ်ယစိၤအံၤ ကမ့ၢ် ပှၤကညီအတၢ်ပၢလၢခံကတၢၢ် အစိၤ လီၤသၢၣ်. တၢ်ထံတၢ်တီကစၢ်တဂၤ ထံၣ်ဝဲလၢ အတြကၢးဟ့ၣ်ယၤ စၢၤသွဲၣ်နီတဂၤဘၣ်. ပအၢၣ်လီၤ တၢ်ထံတၢ်တီကစၢ် အတၢ်သုးတၢ်ကျဲၤအံၤလၢ တၢ်သးမုာ်အပူၤလီၤ. ပနာ်လၢ ကီၢ်ယူၣ်တရၣ်အစီၤပၤ တစိၤ ဒီးတစိၤ ဃုာ်ဒီးအတၢ်ပၢတၢ်ြပး ကကွၢ်ထွဲက့ၤပပှၤကလုာ်အခံ လၢတၢ်သးအိၣ်လၢလၢပှဲၤပှဲၤဒ် ပှၤယူၣ် တရၣ်ဖိ အဒူၣ်ဖးဒိၣ်တဒူၣ် အသိးန့ၣ်လီၤ.

“တနံၣ်ညါအံၤ ထံဖိကီၢ်ဖိတဖၣ် အတၢ်အိၣ်ဆူၣ်အိၣ်ချ့ဂ့ၤဒိၣ်မးလီၤ. မ့တမ့ၢ်ဘၣ်လၢ တၢ်ညၣ်ဂိၢ်ဒီး တၢ်လိၤသး အတၢ်ဆါအိၣ်ဘၣ်လၢ ကစၢၢ်ခိၣ်ကလိကျါဘၣ်န့ၣ်ဒီး တၢ်ဆါဖးဒိၣ်လၢ အဘၣ်ကူဘၣ်ဂာ် ချ့ဒီး မၤသံကွံာ်ပှၤအါအါဂီၢ်ဂီၢ်န့ၣ် တမၤတံာ်တာ်ပှၤစ့ၢ်ကီးဘၣ်. တၢ်အံၤဟဲလၢ တၢ်ထံတၢ်တီကစၢ်အဘျုး အဖှိၣ်တမံၤ, ဒီး လၢနပၢ် စီၤပၤသးပှၢ် အတၢ်သုးတၢ်ကျဲၤလၢ တၢ်ကဆဲန့ၢ်ပှၤထံဖိကီၢ်ဖိတဖၣ်လၢ ကီၢ်မုၢ်နုာ် အကသံၣ်ြတီဃာ်တၢ်ဆါ, ဖျ့း, လၢၢ်, တၢ်ဟၢဖၢလူ ဒီးတၢ်လိၤကိၢ်ဖးဒိၣ်, ကသံၣ်ဖီၣ်ထံတဖၣ်အဃိလီၤ.

“ကၠိဧိၤကီၣ်ဧိၤ ဘၣ်တၢ်ရၤလီၤလံအီၤ သကုၤဒူပူၤသဝီပူၤခဲလၢာ်ဃၣ်ဃၣ်လံ. အိၣ်တီၢ်ထဲကစၢၢ်ခိၣ်ဒူသဝီတနီၤ လၢအစှၤန့ၢ်ဒံး ၅၀ မျးကယၤန့ၣ်လီၤ. တယံာ်ဘၣ်ဒီး ပနာ်လၢသဝီအိၣ်တ့ၢ်တဖၣ် အံၤစ့ၢ်ကီး ကတူၢ်လိာ်ပဒိၣ်တီၤဖုၣ်ကၠိတဖၣ်လီၤ.

“တၢ်ဖံးအီၣ်မၤအီၣ် ဘုဟုဒီး သ့ၣ်ပှၢ်တဖၣ် ဂုၤထီၣ်ပသီထီၣ်ဂၤမး, ဟီၣ်ခိၣ်သီ အ့ကၢၢ် တကလီၢ်ဘျဲၣ် ဘၣ်တၢ်မၤလီၤပျီလံအီၤဒီး သူၣ်လံအီလၢဘုလံ. ပဟ့ၣ်လီၤအခွဲးလၢ ကီၢ်မုၢ်နုာ်သ့ၣ်ခီပနံၣ် အသီခံခီပနံၣ် ကဟဲအိးထီၣ်တၢ်မၤအသီကဝီၤတဖၣ်လၢ ကီၢ်ဆၣ်, ဆၣ်ကဆီတခီလံ. ပဒိၣ်အတၢ်ခိတၢ်သွဲအါထီၣ် တ့ၢ်လံ အါန့ၢ်မဟိတနံၣ် အမျးကယၤတဆံလီၤ. ဒီးကီၢ်ဆၣ်လၢၢ်ဟ့တၢ်ပၢ စံၣ်ညီၣ်တ့ၢ်လံဝဲလၢ တၢ်ခိတၢ်သွဲ အတၢ်အါထီၣ်အံၤ နဲစီၤပၤဖိခွါသးဘိဧၢ, နကဝံသးစူၤတိၢ်လိာ်ဘၣ်အီၤလၢ စီၤပၤအဂီၢ်ဒ် ပတၢ်မၤစၢၤလီၤဃုာ်သကိး ပပှၤထံဖိကီၢ်ဖိလၢ ကီၢ်ရ့ၣ်ကံၢ်မဲ တခီလၢ တၢ်သၣ်ဝံၤလီၤဒိ ဟဲဘၣ်အီၤန့ၣ်တက့ၢ်လီၤ.

“မ်ပစီၤပၤ အသးအိၣ်ကၢအိၣ်ခိးတက့ၢ်.
မ်စီၤပၤဖိခွါ အသးအိၣ်ကၢအိၣ်ခိးတက့ၢ်.”

ြဖၣ်သူဝါအတၢ်ကတိၤလၢခံကတၢၢ်အံၤ မ့ၢ်တၢ်ပနီၣ်လၢ ကမျၢၢ်တဖၣ် ကကိးသြတီထီၣ်ဝဲ အဂီၢ်လီၤ. ပှၤခဲလၢာ်ကိးပသူထီၣ်တၢ်, “မ်ပစီၤပၤ အသးအိၣ်ကၢအိၣ်ခိးတက့ၢ်. မ်ပစီၤပၤဖိခွါ အသးအိၣ်ကၢအိၣ်ခိး တက့ၢ်.” န့ၣ်သီၣ် ကညီၢ်မး, ဝံၤဒီး တုၤတၢ်အိၣ်ဘှ့ၣ်တစု စီၤပၤဖိခွါဂဲၤထၢၣ်လၢ လီၢ်ပစိာ်ထူအလိၤ, ယူာ်ထီၣ်စုခံခီ ဖီၣ်ဃာ်လိာ်စုလၣ်လၢတၢ်ဖီခိၣ် ဒ်တၢ်နူးဆဲး စံးဘျုးက့ၤ ကမျၢၢ်လၢ အတၢ်ဆၢဂ့ၤဆၢဝါအပၢ် စီၤပၤ ဒီးအီၤအဃိန့ၣ်လီၤ. ဝံၤအဝဲကွၢ်တရံးဃီၤတၢ်ဆူ တူၢ်ဒိၣ်မုၣ်ကီၤဒိၣ်ခွါအိၣ်လၢ အလီၢ်ခံခဲလၢာ်အအိၣ်ဝံၤ, သကုးလီၤခိၣ်တစဲးဝံၤ, ကတိၤဆၢက့ၤ ြဖၣ်သူဝါ အတၢ်ကတိၤ, (ပကွဲးဖျါသ့ထဲတနီၤဧိၤ) ဒ်အံၤလီၤ.

“ကီၢ်၀ၢၣ်နၢၣ် ြဖၣ်သူဝါ, တူၢ်ဒိၣ်မုၣ်ကီၤဒိၣ်ခွါ, ဒီးကီၢ်ဆၣ်လၢၢ်ဟ့ ကမျၢၢ်သ့ၣ်သုဧၢ, လၢယပၢ်အဂီၢ်ဒီး ကီၢ်ယူၣ်တရၣ်တၢ်ပၢခၢၣ်စးအသိးန့ၣ်, ယစံးဘျုးက့ၤသုဒိၣ်မးလၢ သုမၤလၤကပီၤယၤဒီး တူၢ်လိာ်မုာ်ယၤ လၢတဂီၤအံၤ န့ၣ်လီၤ.ယကစံးဘၣ်တဲဘၣ်က့ၤယပၢ်လၢ သုတၢ်သူၣ်တီသးရၤဒီး သုတၢ်ဆၢဂ့ၤဆၢဝါ ပှၤအံၤခဲလၢာ်လီၤ.

“ယသးအုးဒိၣ်မးလၢ ြဖၣ်သူဝါ အစၢၤပိာ်ခွါ တအိၣ်လၢ ကထီၣ်က့ၤအလီၢ် နီတဂၤဘၣ်အဃိန့ၣ်လီၤ. သုနာ်န့ၢ်ပှၤကသ့ကစီဒီလၢ ပကကွၢ်ထံကွၢ်ဆးက့ၤ တၢ်ဂ့ၢ်အံၤဒီး သုးကျဲၤက့ၤအီၤလၢ ကျဲအဂ့ၤကတၢၢ် တဘိန့ၣ်သၢၣ်. ယသးအိၣ်ပာ်ဖျါထီၣ်လၢ ယပၢ်ဒီး တၢ်ပၢတၢ်ြပးလၢ ဘီကီာ်တခီ ကွၢ်ဟုၣ်ကွၢ်စုး ြဖၣ်သူဝါ အတၢ်မၤဖဲအံၤထီဘိ, လၢတၢ်သးခုတၢ်သးမံအပူၤန့ၣ်ဒီး ယပၢ်ဟ့ၣ်လီၤ ထူကဘျၣ် ကဆီဝါ အဂီၤတဒု လၢအမ့ၢ် “ကဆီဝါကစၢ်” အလီၢ်အလၤန့ၣ်လၢ ယဘၣ်လဲၤဘျးလီၤအီၤလၢ ြဖၣ်သူဝါအကိာ်လိၤခဲအံၤ န့ၣ်လီၤ. ကမျၢၢ်တနီၤ ကသ့ၣ်ညါတ့ၢ်လံဝဲလၢ တၢ်ပနီၣ်အံၤမ့ၢ် တၢ်ပနီၣ်အထီကတၢၢ် လၢကီၢ်ယူၣ်တရၣ် ဒီဘ့ၣ် အံၤအပူၤ ဒီးပှၤလၢအဒိးန့ၢ်တ့ၢ်လံအီၤ တပှဲၤထီၣ်ဒံးဒၣ်လဲာ် အဂၤတဆံဘၣ်လီၤ. (ကမျၢၢ်ဒဲပိၢ်ဖးမး အစု)

စီၤပၤဖိ ကိးထီၣ်ြဖၣ်သူဝါလီၤ. အဝဲဟဲချံးခီၣ်တီၤလီၤဝဲလၢ စီၤပၤဖိအမဲာ်ညါ, ဝံၤစီၤပၤဖိအိးထီၣ် တလါဖိ ဘၣ်တၢ်မၤအီၤလၢကဆီမဲတဖျၢၣ် ထုးထီၣ်ထူကဘျၣ်အံၤ လၢအဘၣ်တၢ်စၢလီၤစဲၤအီၤလၢ တၢ်ကံးညာ် ကပုာ်အလိၤ ဒီးလဲၤဃီၤဘျးလီၤဝဲလၢ ြဖၣ်သူဝါ အကိာ်လိၤလီၤ. ြဖၣ်သူဝါဂဲၤထၢၣ်က့ၤဒီး စီၤပၤဖိ ဖိးဃီၤ အစုထွဲ ဟံးစုတူၢ်လိာ်အီၤလီၤ. ကမျၢၢ်ဒဲကဒီးစု ပိၢ်ဖးမးတဘီလီၤ.

“ယသးခုအါမးလၢ ယနၢ်ဟူဘၣ် တၢ်ကစီၣ်အမုာ်မး တမံၤလၢ ပှၤကီၢ်ရ့ၣ်လၢၢ်ဟ့တဖၣ် တူၢ်လိာ်ပတၢ်သုးတၢ်ကျဲၤ ဘၣ်ဃးတၢ်ဆဲး ကီၢ်မုၢ်နုာ် အကသံၣ်ဆဲးတဖၣ်အဃိ, တၢ်ဆူးတၢ်ဆါလီၤပျံၤ, ဘၣ်ကူသ့ဒီး ညီနုၢ်စိာ်ကွံာ်တ့ၢ်လံ သးသမူလုၢ်ဒိၣ်ပှ့ၤဒိၣ်အါဖျၢၣ်တဖၣ် ဘၣ်တၢ်ဒုးစှၤလီၤကွံာ်အီၤ အါမးန့ၣ်လီၤ. ပပာ်ပသး မ့ၢ်လဲၢ်ဒီး ပတြကၢးကွၢ်တလီၤ ပှၤမုၢ်နုာ်ဖိတဖၣ် ဒီးပဒ့ၣ်ဟးဆှဲး အတၢ်သ့တၢ်ဘၣ်ဒီး အတၢ်သုးတၢ်ကျဲၤ တဖၣ်န့ၣ်လီၤ. ပမၤလိတၢ်အလီၢ်အိၣ်အါမံၤဒီး ြကၢးပမၤလိန့ၢ်အီၤလၢ တၢ်သးခုအပူၤ တခီလီၤ. ကီၢ်မုၢ်နုာ်တဖၣ် အတၢ်လဲၤထီၣ်လဲၤထီအဂ့ၢ် ဟဲဘၣ်တဘၣ် ကအိၣ်အါမံၤယၢာ်, ဘၣ်ဆၣ်အဂ့ၢ်ခိၣ်ဆၢၣ်တနီၤ န့ၣ် မ့ၢ်ဒၣ်တၢ်မၤကဆှဲကဆှီနီၢ်ခိ, ပလီၢ်ပဒီပသးလၢ တၢ်အိၣ်ဆူၣ်အိၣ်ချ့ဒီး တၢ်ဂုာ်လဲၤဆူညါ, တၢ်ဂုာ် မၤလိနၢ်ပၢၢ်သး ဆူညါတဖၣ်န့ၣ်လီၤ.

“ယသးခုလၢ တၢ်အိၣ်ဆူၣ်အိၣ်ချ့ဂ့ၤထီၣ်အမဲာ်ညါ, ပတၢ်သုးတၢ်ကျဲၤဘၣ်ဃး တၢ်မၤလိမၤဒိးအကၠိတဖၣ် လဲၤထီၣ်ဝဲန့ၣ်လီၤ. ပတြကၢးသးမံဘၣ်. မ့မ့ၢ် ဂုာ်လဲၤဆူညါ ကွ့ၢ်ကွ့ၢ် တုၤကီၢ်ယူၣ်တရၣ် ဒီဘ့ၣ်ညါ ထူးတီၤဝဲအါအါလၢ တၢ်အိၣ်ဆူၣ်အိၣ်ချ့ ဒီးတၢ်သ့တၢ်ဘၣ်ခီဖျိ တၢ်မၤလိလံာ်န့ၣ်လီၤ. ယနာ်လၢသုဝဲ ပှၤကီၢ်ရ့ၣ်လၢၢ်ဟ့ဖိတဖၣ် ကလဲၤလၢညါ ဘၣ်ဃးတၢ်ခံမံၤအံၤ ခီဖျိသုကီၢ်ရ့ၣ်ခိၣ် ဒီးအတၢ်ပၢတၢ်ြပး အတၢ်အံးထွဲ ကွၢ်ထွဲ သုအဃိန့ၣ်လီၤ.

“ပကီၢ်အံၤဘၣ်ဆိၣ်ဂ့ၤ မးဝဲလၢ ဟီၣ်ခိၣ်ညၣ်ထ့ၣ်လၢ တၢ်မၤဘုဟုအဂီၢ်, ဒီးလၢသ့ၣ်ပှၢ်တဖၣ်လၢ အလုၢ်ဒိၣ် ပှ့ၤဒိၣ်မးဝဲန့ၣ်လီၤ. ပအိၣ်ဒၣ်ပတၢ်တသ့ဘၣ်. ပဘၣ်ထွဲလိာ်သးဒီး ထံကီၢ်အဂၤတဖၣ်လီၤ. အဝဲသ့ၣ်လိၣ် ပဘုဒီး ပသ့ၣ်ပဟံၣ်တဖၣ်ဒီး ပလိၣ်ဘၣ်အဝဲသ့ၣ် အတၢ်ဖိတၢ်လံၤအါမံၤန့ၣ်လီၤ. ပလဲလိာ်တၢ်တဖၣ်အံၤ ယၢ်ခီယၢ်ခီန့ၣ်လီၤ. တၢ်လဲၤထီၣ်လဲၤထီဘၣ်ဃး တၢ်ဖံးအီၣ်မၤအီၣ်လၢ သုကီၢ်ရ့ၣ်ခိၣ် ပာ်ဖျါတ့ၢ်လံဝဲတဖၣ် မၤမုာ်ယၤဒိၣ်မးလီၤ. ဒီးယသးခုတူၢ်လိာ်သုတၢ်ဟ့ၣ်မၤစၢၤ လီၤကီၢ်ကံၢ်မဲလၢ အဘၣ်နးဘၣ်ဖှီၣ်မးဝဲတဘ့ၣ် လၢတၢ်သၣ်ဝံၤလီၤဒိဘၣ်အီၤန့ၣ်လီၤ. ယဆၢဒိၣ်မးလၢ ကီၢ်ရ့ၣ်အဂၤတဖၣ်အံၤ ကထံၣ်သုတၢ် သးကညီၤ တၢ်အဒိဂ့ၤတဲာ်ဘၣ်အံၤဒီး ပျဲသးအဂ့ၤအံၤ ဘၣ်ကူဘၣ်ဂာ်အီၤန့ၣ်လီၤ.

“ယသးအုးမးလၢယဟဲ အိၣ်သကိးသုတဘျီအံၤ, ချုးထဲစှၤနၣ်ရံၣ်ဧိၤလီၤ. ယဘၣ်လဲၤဆူ ကီၢ်ကံၢ်မဲလၢ အချ့လီၤ. ယဆၢဟဲအိၣ်သကိးဘၣ်ဒံးသု ခဲအံၤခဲအံၤလီၤ. ဘၣ်မုာ်သုဝဲ တက့ၢ်.”

ကမျၢၢ်ကိးသြတီထီၣ် ကဒီးဒ်လၢညါအသိးဝံၤ, ြဖၣ်သူဝါ ဃ့စီၤပၤဖိ အခွဲးလၢ တၢ်ကစးထီၣ် တၢ်ဟ့ၣ်နီၤလီၤ ခိၣ်ဖးတဖၣ် အဂီၢ်လီၤ. ဒီးတၢ်စးထီၣ် ဟ့ၣ်နီၤလီၤအီၤလီၤ.

ြဖၣ်သူဝါကိးထီၣ် ပှၤန့ၢ်ဘၣ်ခိၣ်ဖး တဂၤဘၣ်တဂၤအမံၤ, မံၤအနီၢ်ကစၢ်အံၤ ဟဲဆူစီၤပၤဖိ မဲာ်ညါ တီၤလီၤခီၣ် ယူာ်ဃီၤစု, တူၢ်လိာ်ခိၣ်ဖး, ဂဲၤဆၢထၢၣ်, သကုးလီၤခိၣ်ဝံၤ ဃၣ်ကဒါက့ၤဒီး က့ၤလီၤကဒါက့ၤ, ဝံၤမံၤကစၢ် အဂၤတဂၤ ဟဲမၤကဒီးဝဲဒ်န့ၣ်အသိးလီၤ.

ပှၤလၢအန့ၢ်ဘၣ်ခိၣ်ဖးအခီၣ်ထံး တဂၤမ့ၢ်ဒၣ် စကီၤစီၤဝါလီၤ. ပသိၣ်ဖိစီၤက့ၣ် ထံၣ်အပၢ် ဘၣ်တၢ်မၤလၤ ကပီၤအီၤအံၤ ဒီးအသးမုာ်သးခုမးဒီး မဲာ်ထံသါကဟဲြပံာ်ထီၣ်မးဝဲ လၢတၢ်သးခုအဃိလီၤ.

တၢ်ဟ့ၣ်နီၤလီၤ ခိၣ်ဖးဝံၤ ဒီးတၢ်သုးတၢ်ကျဲၤလၢခံကတၢၢ် မ့ၢ်ဝဲဒၣ် တၢ်ဒုးနဲၣ် သုးမုၢ်အတၢ်ဟူးတၢ်ဂဲၤန့ၣ်လီၤ. ကီၢ်ယူၣ်တရၣ်ဟံးန့ၢ်တၢ်သိၣ်လိဘၣ်ဃး လၢသုးတခီလၢ ကီၢ်ြဖၣ်စ့ၣ်လီၤ. ဒီးသုးမုၢ်တခီ ဘၣ်တၢ် သိၣ်လိအီၤဒ် ြဖၣ်စ့ၣ်သုးအသိးလီၤ. သုးတကထိနီၤဖးလိာ်အသး အဖုတဆံ, တကယၤတဖု, စိာ်ကျိ ဃုာ်ဒီးကျိအဘီခိၣ်စူလၢ စိးနါ စံၣ်ရဲၣ်လီၤသး ဖးထီခံဂ့ၢ်ခံဂ့ၢ်, တဂ့ၢ်ယဲၢ်ဆံ, ဘၣ်တၢ်ဆှၢအီၤလၢ သုးတကယၤအခိၣ် စိာ်နးလၢ အဖီၣ်ဆၢထၢၣ်ဝဲ လိၤလိၤနါစ့ၤမဲာ်ညါ, ဟးဘျၢယုၢ်ကလာ် တဖုဘၣ်တဖု လဲၤခီဖျိ ကွံာ် စီၤပၤဖိအိၣ် ပျဲၢ်စီၢ်လီၤ.

ဘဲအူထီၣ်တၢ်သးဝံၣ်လၢ သုးကခါခီၣ်ဟးဝဲ အဂီၢ်လီၤ. စီၤပၤဖိဆၢထၢၣ်ဘျၢဘျၢ ရှိၣ်တနိၣ် ဖဲပျဲၢ်စီၢ်ဖိ အိၣ်လၢ နီၣ်တယၣ်တၢၣ်ခီၣ်ထံးလီၤ.

အဆိကတၢၢ်သုးဒီကထိအခိၣ်, ဒိးကသ့ၣ်ဝါတဒု ဟဲခီဖျိ စီၤပၤဖိမဲာ်ညါ, အိၣ်ဒီးခိၣ်သလုးကဖူၣ်မး ဒီး ထိၣ်ကီၤလၤအူးဆူၣ်, ယူာ်ထီၣ်နးလၢ ဖံဘၣ်ခိၣ် ဘူးကတုၤဃီၤ နီၣ်တယၣ်သၢကါ, တရံးဃီၤမဲာ်ဆူ စီၤပၤဖိ အိၣ်, ဒီး ဝံၣ်ဃီၤနးဆူ နါစ့ၤမဲာ်ညါ ဒီးဟံးဃာ်ဂၢၢ်အီၤတုၤ အလဲၤပူၤနီၣ်တယၣ်သၢကါ, ဝံၣ်တရံးက့ၤ အခိၣ်ဆူ တၢ်မဲာ်ညါ, ဝံၣ်လီၤက့ၤနးဆူ ဖံဘၣ်ထွဲ ဖီခိၣ်ဒီးလဲၤ ဆူညါဒ် ဘဲကလုၢ်ဟ့ၣ်တၢ်ဆၢကတီၢ် အသိးလီၤ.

ဝံၤသုးတကယၤအခိၣ် စိာ်ဒီးနးလၢဖံဘၣ်ခိၣ်, လၢလီၢ်ခံတခီ သုးတကယၤခံကျိၤ, တကျိၤယဲၢ်ဆံ ရဲၣ်လီၤသး လိၤလိၤစီၤပၤဖိမဲာ်ညါဆူ ဘးတခီ ဘျၢတလၢၤ စိာ်ကျိလၢဖံဘၣ်စ့ၣ်လိၤ အိၣ်ဒီးကျိနး စူခိၣ်, ဟးဘၣ် ဆၢကတီၢ်ဒ် ဘဲအသီၣ်အသိး လဲၤခီဖျိကဒီးနီၣ်တယၣ်, သုးတကယၤအခိၣ် ဟ့ၣ်တၢ်ယူးယီၣ် စီၤပၤဖိလၢ နးဒ် သုးတကထိအခိၣ်အသိး, ဘၣ်ဆၣ် ကိးဩီထီၣ်ဝဲ တဘျီဃီ “ကွၢ်စုထွဲ” ဒီးသုးတကယၤဒီဖု ဝံၣ်ဃီၤခိၣ် ကွၢ်ဃီၤစီၤပၤဖိ, သုးတကယၤခိၣ်လဲၤပူၤတစဲးဝံၤ ကိးဩီထီၣ်ကဒီး ဝံၣ်လီၤက့ၤနးဆူ ဖံဘၣ်ထွဲခိၣ်, “ကွၢ်ဆူညါ” ဒီးခိၣ်ခဲလၢာ် ဝံၣ်ဃီၤက့ၤသး ြပူးကလာ်ဒီး လဲၤဆူညါလီၤ.

သုးအဖုတဆံလဲၤခီဖျိ စီၤပၤဖိတဖုဘၣ်တဖု, ဒီးဟ့ၣ်တၢ်ယူးယီၣ်အီၤ, ဒီးစီၤပၤဖိဟ့ၣ်ဆၢတၢ်ယူးယီၣ် က့ၤအီၤပှီၢ်ပှီၢ်ဒီး လၢခံကတၢၢ်, သုးတကထိအခိၣ်ခံဂၤတဂၤ, ထဲတဂၤဧိၤ, ဟဲခီဖျိ ဟ့ၣ်တၢ်ယူးယီၣ်စီၤပၤဖိ, ဒိးကသ့ၣ်ဝါ အဂၤတဒုန့ၣ်လီၤ. အဝဲအံၤမၤကတၢၢ်ကွံာ် တၢ်မၤတဂီၤန့ၣ်လီၤ.

ဘဲအူထီၣ်က့ၤကဒီး ကီၢ်ယူၣ်တရၣ် ပှၤကလုာ်အတၢ်သးဝံၣ်ဖဲ ပှၤကိးဂၤဒဲး ထုးထီၣ်ကွံာ်အခိၣ်သလုး ဒီးဆုးလီၤခိၣ် အခါ, စီၤပၤဖိခွါတခီ ဟ့ၣ်တၢ်ယူးယီၣ်ဆူ ယူၣ်တရၣ်နီၣ်တယၣ်န့ၣ်လီၤ. တၢ်သးဝံၣ်ကတၢၢ်, ပှၤဝံၣ်ထီၣ်က့ၤပှၤခိၣ်, ကၢၢ် ထီၣ်က့ၤခိၣ်သလုးလီၤ. ြဖၣ်သူဝါလဲၤဆှၢလီၤက့ၤ စီၤပၤဖိဆူ ကဆီဝါ ဟဲအိၣ်ခိး ချံးလီၤပာ်စၢၤခီၣ်အလီၢ်, စီၤပၤဖိဒိးထီၣ်က့ၤကဆီဝါ, ပဒိၣ်တဖၣ် ဒိးပိာ်ထွဲအခံလၢ ကဆီသူလီၤ. ဒီးလဲၤသကိးဝဲဆူ ြဖၣ်သူဝါအနီဖဲ စီၤပၤဖိအီၣ်သကိး ဂီၤတၢ်အီၣ်ဒီး ကီၢ်ရ့ၣ်ခိၣ်ဒီး ပဒိၣ်ပပှၢ်တဖၣ်, တၢၣ်ပီၣ်သကိး ထံဂ့ၢ်ကီၢ်ဂ့ၢ်တစိၢ်ဝံၤ ဘၣ်တၢ်ဆှၢလီၤက့ၤအီၤဆူ လ့ၣ်မ့ၣ်သန့လီၤ. အဝဲဟံးစုကွၢ်မဲာ် ြဖၣ်သူဝါ ဒီးပဒိၣ်ခဲလၢာ်ဝံၤ, ဒိးထီၣ်က့ၤလ့ၣ်မ့ၣ်ဝံၤ လဲၤကဒီးတၢ်ဆူညါဆူ ကီၢ်ကံၢ်မဲန့ၣ်လီၤ.

တဟါညါအံၤ, လၢြဖၣ်သူဝါ အနီပူၤပှၤခဲလၢာ် ကတိၤတၢၣ်ပီၣ်လိာ်က့ၤဒၣ် တၢ်ဘၣ်ဃး တၢ်မၤအသး တဘျီအံၤန့ၣ်လီၤ. ပှၤတဂၤကတိၤ တဲဝဲတမံၤ တဂၤစံးဝဲတမၠိ, ပှဲၤမးဒီး တၢ်နံၤကဝဲၢ်ပျီၢ်ကဒီန့ၣ်လီၤ.

မ့မ့ၢ်ပသိၣ်ခွါဖိစီၤက့ၣ်တဂၤ အိၣ်ဆ့ၣ်နီၤဖဲ စပွဲတဖျၢၣ် အသရ့ၤဖဲ တၢ်ပာ်လီၤကွၢ်ကီ ြဖၣ်သူဝါ အထူကဘျၣ် “ကဆီဝါကစၢ်” ဒီးအပၢ်အထူကဘျၣ် ဒီးကျိတရံးဃုပူၤန့ၣ်လီၤ. ထူကဘျၣ်ခံဘ့ၣ်အံၤ ကွၢ်ဝဲဝံၤ ပာ် လီၤက့ၤဝဲလီၤ. မ့မ့ၢ်ကျိတရံးတဆိ မၤဂဲၤအသးဒိၣ်မးလီၤ. ဖီၣ်ထီၣ်ဝဲ, ဘိးကၢ်ဝဲအကိာ်, ဘိးစဲဘူးက့ၤဝဲ ခွဲးလိာ်ကွဲဝဲ, မၤဒၣ်ဝဲဒ်အံၤ ပှီၢ်ပှီၢ်လီၤ.

အဖါတံၢ်ဟဲလၢအချၢတခီ, ကွၢ်အမၤတၢ်အံၤ, နံၤကမှံထီၣ်ဒီးစံး, “စီၤက့ၣ်ဧါ, စီၤက့ၣ်ဧါ, ဆူမဲာ်ညါခံလါ ဒီး နကန့ၢ်ဘၣ်နကျိကဆီလီၤသၢၣ်. ကိၢ်တဂ့ၤထ့ၣ်ဧၢ.” “နလဲၤကွၢ်တၢ်တဘျီအံၤ ပၠီၣ်ကစီဒီဧါ.”
“ပၠီၣ်ဒိၣ်မးလီၤ ဖါတံၢ်ဧၢ, ထဲတမံၤလီၤ. ယခီၣ်ဖံးဃံးယခီၣ်ဒီး ယခီၣ်မုၢ်တဖၣ် ကိၢ်အူကိၢ်ကဖးမး တဘီ ကညီးဘၣ်သးလီၤ.”
“အၢၣ်နၤ, သုဝဲစံာ်ဖးလဲၢ် ပှၤပှၢ်လၢ်ကျါဖိ သုတဒိးညီနုၢ်ခီၣ်ဖံး တၢ်ကမၤစဲဃဲၤသး ဒ်န့ၣ်လီၤသၢၣ်.”

ဆဲးဖးဆူအကူာ် ၄

ဟံးန့ၢ်က့ၤအီၤလၢ ကိၣ်မၤနၤလၢ တနံၤဘၣ်တနံၤအဂီၢ် ထံွၣ်မဲၢ်က့ၣ်ဘျၢထီၣ် တၢ်ဃဲၤပူ အပူၤ