ကူးဘၣ်က့ၤတၢ်လၢအဖှံဝဲ (ထွံၣ်မဲၢ်က့ၣ်… ဘျၢထီၣ် အကူာ် ၂)

စကီၤစီၤဝါအယီာ်ဖး, စီၤဘျဲၣ်ဒီးပျဲၢ်အဂၤခံဂၤ လဲၤတၢ်လၢကဆီခံဒု ဟးထီၣ်လၢဖးဖီမုၢ်ဘျဲၣ် ဒီးလဲၤဝဲ ချ့ချ့ပ့ၢ်ပ့ၢ်မးလီၤ. ကဆီလၢအဒိးဝဲ ခံဒုမ့ၢ် ကဆီဖါန့ဖိခံဒုလိာ်, ကစီၤထီၣ်နွံပ့ၣ်ဘျဲၣ်, ဘၣ်ဖဲဂံၢ်ဘါဂ့ၤ ပ့ၢ်ချ့မး အခါလီၤ. ပှၤနီၣ်ကဆီတဖၣ်အဲၣ်အကဆီ, နၢ်ပၢၢ်အဂ့ၢ်ဂ့ၤမးဒီး လဲၤလၢကျဲဒီဘိညါ တၢ်တံာ်တၢ်ဘီကျီၣ် တအိၣ်ဝဲနီတမံၤဘၣ်. ကဆီခီလီဖိတဖၣ် သီၣ်ြက့ၣ်ြကိၣ်ဒၣ် ကျဲဒီဘိညါဒီး တုၤမုၢ်ဆ့ၣ်ဝါထီၣ် အဝဲဟးထီၣ် ကွံာ်လၢ ပှၢ်လၢခံကတၢၢ်တပှၢ်အပူၤ ခီဂာ်ထံကျိဖိတဘိဝံၤ ထံၣ်စိဃီၤဝ့ၢ်လၢၢ်ဟ့ အမ့ၣ်အူကပီၤလၢ တၢ်အယံၤ, ဖဲပှၤပိာ်မုၣ်တနီၤ ဂဲၤထၢၣ်ဆုဘု, တနီၤဖီမ့ၤဒီး တနီၤကၠီၣ်ယိၤကိၣ် တဖၣ်လၢ ကလဲၤဆါဝဲလၢ ဖၠါပူၤ န့ၣ်လီၤ. စကီၤစီၤဝါ ကတိၤတၢ်ဒီးစီၤဘျဲၣ်ဒီးစံး, “ဒ့ဧၢ်နၤ, ယပာ်တီၢ်ယကျိခးကဆီတဆိ ယဆိကမိၣ်က့ၤ မ့ၢ်ကကဲထီၣ်တၢ်လ့ပစီလၢ နဖိဒိၣ်ခွါစီၤက့ၣ်အဂီၢ်ကးဧါ. တနံၤညါအံၤ မ့ၢ်ကးလၢမုၢ်ဃုနံၤ ကၠိပျၢ်ကးနဲာ်.”

စီၤဘျဲၣ်အဲၣ်ဒိၣ် အဖိဒိၣ်ခွါ စီၤက့ၣ်တဂၤအံၤလီၤဆီလီၤ. အဝဲသိၣ်လိဝဲ တၢ်ဘၣ်ဃးတၢ်ကွၢ်ကဆီ, တၢ်လဲၤဟးလၢပှၢ်ခိၣ်ပှၢ်ပူၤ, တၢ်ကွၢ်နီၣ်ကွၢ်ဃါတၢ်လီၢ်တၢ်ကျဲ, တၢ်ဆဲးတၢ်ခးအဂ့ၢ်အါမးလီၤ. ကၠိမ့ၢ်ပျၢ်ဒီး နဃုစီၤက့ၣ်လၢဟံၣ်တဘၣ်ဘၣ်. လီာ်ဒၣ်သးလၢ ထံခံကွာ်စိးဖဲ ပှၤလဲၤပျၢ်လီၤကဆီတဖၣ် လၢတၢ်အီၣ် ဂ့ၤဝဲ အလီၢ်တဖၣ်န့ၣ်လီၤ. တၢ်မုာ်ဘၣ်စီၤက့ၣ်အဒိၣ်ကတၢၢ် န့ၣ်မ့ၢ်ဒၣ်တၢ်ဒိကနၣ် ပှၤနီၢ်ဒိၣ်တဖၣ်စံၣ်ဃဲၤလိာ်သး တၢ်ဆဲးတၢ်ခးအဂီၢ်, ကလဲၤပိာ်ပှၤခးဆၣ်ဖိကီၢ်ဖိအခံ, တၢ်ဃုအီၣ်ညၣ်လံၣ်ညၣ်ပဲာ် တဖၣ်လၢတခွဲ, လၢပှာ်မ့တမ့ၢ် ပှၤလူၢ်အီၣ်အီၤလၢသ့ၣ်ထုး, မၤမူၤမၤသံ အီၤဝံၤ လူၤဖီၣ်က့ၤအီၤ ဖဲအဟဲထီၣ်ဖီသံဝဲ န့ၣ်လီၤ. အဝဲခုမး ဘၣ်ဃးတၢ်ဒ်အံၤသိးတဖၣ်, ဒီးခုဖီမ့ၤတ့ၤကသူလၢ ပှၢ်ခိၣ်ပှၢ်ပူၤဒီး ယံာ်ထီၣ်ယံာ်ထီၣ် အတၢ်နူၤပၢၢ်နၢ်ပၢၢ် ပှၢ်အဂ့ၢ်, ဆၣ်ဖိကီၢ်ဖိအဂ့ၢ်, သ့ၣ်ဂ့ၢ်၀ၣ်ဂ့ၢ် န့ၣ် လၢပှဲၤဃၣ်ဃၣ်ထဲပှၤသးပှၢ် တဂၤလီၤ.

စီၤဘျဲၣ်စံးဆၢအယီာ်ဖး, “အါဝဲၢ်ဧၢ, စီၤက့ၣ်အံၤလုၣ်ဘီဘိ ထီၣ်ဒီး ဟးပိာ်ယခံအဘျီအါလံလၢ ပှၢ်ခိၣ်ပှၢ်ပူၤ လံ. ယဆိမိၣ်နစးထီၣ်နာ်န့ၢ်အီၤလၢ တၢ်ဖီၣ်ကျိကသ့ကီးလံဘဲၣ်. ပှၤဖါအံၤ ယသိၣ်လိတ့ၢ်လံအီၤဘၣ်ဃး တၢ်ဟးလၢပှၢ်ပူၤအဂ့ၢ်, တၢ်ပလီၣ်ပဒီသးဘၣ်ဃးတၢ်ဆဲးတၢ်ခးအဂ့ၢ်ဒီး ယတယာ်သ့မး တစဲးလံဘဲၣ်.”

“အၢၣ်, စီၤဘျဲၣ်ဧၢ, မ့နၤဒီးနဖိဒိၣ်စီၤက့ၣ် ခံဂၤဒု မ့ၢ်စံးထွံၣ်ဒီး အမဲၢ်လီၤ. သုပိာ်လိာ်သုခံစဲဘူးတဘီ, နတဲတၢ်န့ၣ် ယနာ်သ့ကီးလီၤ. ဘၣ်ဆၣ်ယသးအိၣ်သိၣ် ဒူဖိသဝီဖိတဖၣ်လၢ တၢ်ဒိကနၣ် ပှၤခိၣ်ပှၤနၢ်ကလုၢ် ကထါန့ၣ် မ့ၢ်တၢ်တမံၤ လၢအကမၤဒိၣ်ထီၣ်ပှၤလီၤ. ဒီးယဖိခွါဒၣ်ယဲ မ့ၢ်တဒိကနၣ်ယကလုၢ်ဒီး ပှၤဂၤ သါကဒိကနၣ်က့ၤ ယၤလၢကျဲမတၤတဘိန့ၣ်လဲၣ်. ပှၤပာ်လီၤယၤစကီၤလီၤ. ဒီးယနီၢ်ကစၢ် ယဘၣ်ဒိကနၣ် အါဖၢ (ကီၢ်ရ့ၣ်ခိၣ်) ဒီးပဒိၣ်လၢထးတဖၣ် အကလုၢ်လီၤ. ယမၤသ့ၣ်လၢကီၤလၤသထ့တဖၣ်ဒီး ယဘၣ်ဒိ ကနၣ်အကလုၢ်လီၤ. ပပှၤသဝီဖိဒီး ယပှၤဟံၣ်ဖိ ဃီဖိ ဒၣ်ယဲမ့ၢ်တဒိကနၣ် ယကလုၢ်ဒီး လဲၤထီၣ်ဆူညါ တသ့ဘၣ်ဒီး ယတသးအိၣ်ကဲစ့ၢ်ကီး စကီၤလၢၤဘၣ်သၢၣ်, ဒ့ဧါ.”

“အါဝဲၢ်ဧၢ, ယဖိဒိၣ်ခွါန့ၣ်ယအၢၣ်လီၤနၤလၢအမ့ၢ်စဲဃဲၤ ပှၤခိၣ်ကိၤတဂၤလီၤ. တၢ်လၢအအဲၣ်ဒိးမၤဝဲန့ၣ် နြတီအီၤလၢကျဲတန့ၢ်နီတဘိဘၣ်.”
“အၢၣ်, စီၤဘျဲၣ်ဧၢ, ယထံၣ်တၢ်ခိၣ်ကိၤတမံၤအံၤအဃိ ယဘၣ်ယိၣ်တၢ်လၢအဂီၢ်လီၤ. နသ့ၣ်နီၣ်ကစီဒီသၢၣ်. အဝဲဒီးစီၤလါဟုၣ်ခးကျိ, လဲၤခးန့ၢ်တကျာ်ခီၣ်ဖါတံၢ်တဒုဝံၤ ယဘၣ်ပနၤအီၤလၢဂ့ၢ်ဖျ့န့ၣ်, အံၤ ပဟဲ တၢ်အလီၢ်ခံ မ့ၢ်ဟုၣ်ခးကဒီးကျိအံၤ ယကဘၣ်စံၣ်ညီၣ်အီၤဆါန့ၢ်အလီၢ်ကးလီၤ.”

ပှၤဒီဒိၣ်ခံဂၤအံၤလဲၤတၢ် ကတိၤလိာ်သးလၢကျဲဒီဘိ ဘၣ်ဃးဒၣ်စီၤက့ၣ်အဂ့ၢ် တုၤအတုၤဝ့ၢ်လၢၢ်ဟ့ အသရ့ၤလီၤ. ဖဲအံၤစံၣ်လီၤဝဲလၢကဆီလိၤ, မၢပှၤနီၣ်ကဆီခံဂၤ ကွၢ်တ့ၢ်ကဆီဝံၤ လဲၤနုာ်ဆူဝ့ၢ်ပူၤဒီးလဲၤဆူ ဝ့ၢ်ပဒိၣ်ြဖၣ်သူဝါ အနီန့ၣ်လီၤ.

ဝ့ၢ်လၢၢ်ဟ့အံၤ အိၣ်ဒၣ်လၢထံကျိလၢၢ်ဟ့နံၤ, ဒီးစံၣ်ရဲၣ်လီၤသးဖးထီ လၢဆၣ်ကဆီဆူမဲလၢ်ကၢ် တခီဒ်ယိၤ ညီနုၢ် ဆီဝ့ၢ်ဆီသဝီအသိး န့ၣ်လီၤ. ဟံၣ်တဖၣ်တလီၤဆီဒီး ပယီၤဟံၣ်လၢ ကီၢ်ပယီၤတခီကဲၣ်ဆိးဘၣ်. မ့ၢ်သ့ၣ်ပီကီၢ်, ပှၤဘှီဟံၣ်လၢသ့ၣ်, ဒါလၢသ့ၣ်, ဒူၣ်လၢသ့ၣ်, ဟံၣ်ခိၣ်တခီဒုးလၢသ့ၣ်လၣ်ထၢလၣ်, ပှၤကဲဒိၣ်တဖၣ် ဒုးလၢပှာ်, မ့တမ့ၢ်သ့ၣ်ဘၣ်ခီလီၤ. တၢ်လီၤဆီတမံၤမ့ၢ် ဟံၣ်ခိၣ်တဖၣ် လီၤဘံနးတစဲးလီၤ.

ဝ့ၢ်လၢၢ်ဟ့မ့ၢ် ကီၢ်ဝနၢၣ် ပၢကီၢ်ရ့ၣ်တရ့ၣ်အဝ့ၢ်ခိၣ်, တီၤထီကၠိအိၣ်တဖျၢၣ်, ဒီးတီၤခၢၣ်သးဒီးတီၤဖုၣ်ကၠိ တခီအိၣ်ဝဲအါမးလီၤ. ကီၢ်ယူၣ်တရၣ် ပဒိၣ်ပပှၢ်တဖၣ်သ့ၣ်ညါ တၢ်မၤလိမၤဒိးအဘျုးဒီး ရၤလီၤအီၤ တသ့ဖဲ အသ့လီၤ. ကျဲးစၢးဒုးအိၣ်ထီၣ် တီၤဖုၣ်ကၠိလၢ ပှၤကလုာ်ခဲလၢာ်ကျါလၢ ဒူသဝီတဖၣ်အပူၤလီၤ.

ဝ့ၢ်လၢၢ်ဟ့ အိၣ်လၢလ့ၣ်မ့ၣ်အူကျဲလိၤ လဲၤဆူဝ့ၢ်ခိၣ်မိၢ်ပှၢ် ဘီကီာ် လိၤဒီး, ထံကျိလၢၢ်ဟ့မ့ၢ် ထံကျိယွၤဆူၣ်မး တဘိလၢတၢ် ထိၣ်ထွံလီၤသ့ၣ်ပဟံၣ်အါမးတဘိဆူ ဘီကီာ်တခီန့ၣ်လီၤ. ကိၤလၤမၤသ့ၣ်ခီပနံၣ်တဖၣ် ဟဲမၤတၢ်ဖဲကီၢ်ပူၤအံၤဒီး ဝ့ၢ်အံၤမ့ၢ်ဝ့ၢ်လဲၤထီၣ်လဲၤထီတဖျၢၣ်ကစီဒီလီၤ.

ကီၢ်ဝနၢၣ် မ့ၢ်ဝဲပှၤပှိၢ်ဖိ ြဖၣ်သူဝါ လီၤ. အဝဲဘၣ်တၢ်ပာ်လီၤအီၤလၢ ယူၣ်တရၣ်စီၤပၤတဂၤ မ့ၢ်လၢ အတၢ်လီၤစၢၤအဃိ, ဒ်ပစံးတၢ်အသိးမ့ၢ်ဝဲ ဒၣ်ကီၢ်ဝနၢၣ် တစိၤဘၣ်တစိၤအဖိခွါဝဲၢ်ကိန့ၣ်လီၤ. ြဖၣ်သူဝါဘါ စီၤကီတမးဒီး အမါအိၣ်ခံဂၤ, ပှိၢ်မုၣ်တဂၤဒီး စှီၤမုၣ်တဂၤ လၢအမ့ၢ်နီၢ်ဆၣ်ဖီ, စကီၤစီၤဝါ အပုၢ်ပိာ်မုၣ်န့ၣ်လီၤ. အမါခံဂၤလိာ် သးပှၢ်ဒီးတူာ်ဖိဝဲဒီး, ြဖၣ်သူဝါအံၤ အဲၣ်ဒိၣ် အဖိဒိၣ်ခွါစီၤက့ၣ် အဒိၣ်ကတၢၢ် န့ၣ်လီၤ. မ့ၢ်အိၣ် မၤလိာ်စီၤက့ၣ်တဘျီတဘျီ ဒီးမုာ်လၤထံၣ်ဘၣ်အဖိဒိၣ်အံၤ အဒိၣ်ကတၢၢ်လီၤ. စီၤက့ၣ်တခီ ဘၣ်လဲၤအဃိ လဲၤဝဲလီၤ. အိၣ်လၢခူပူၤဝ့ၢ်ပူၤ တမုာ်ဘၣ်လၤဘၣ်အီၤဘၣ်. တၢ်ကတံာ်ဘၣ်အီၤ, သူတသ့ သါတသ့ဘၣ်အီၤဘၣ်.

စကီၤစီၤဝါဒီးစီၤဘျဲၣ် လဲၤတၢ်လၢကျဲဒီး ဘၣ်သဂၢၢ်ဒီး ပှၤသ့ၣ်ညါသ့ၣ်ခီးအီၤ အါမးလီၤ. လဲၤတုၤလၢ နီအပဲြတီမိၢ်ပှၢ် ဒီးပှၤသုးဖိအိၣ်ခိးတၢ်ဖဲန့ၣ်တဂၤ သ့ၣ်ညါအီၤညီကဒၣ်, အိးထီၣ်န့ၢ်အီၤြတဲၤဒီး ပျဲနုာ်အီၤလီၤ.

ြဖၣ်သူဝါ ပၢၢ်ထီၣ်ပျၢ်မဲာ်ပျၢ်နါ ဝံၤအီလာ်ဖးထံဝံၤ, အီမိာ်အီၣ်သဘျုၣ်လၣ်အဖၢ, ထံၣ်ဃီၤအဝဲၢ်ပှၢ်စကီၤ စီၤဝါ, ဒီး၀ၢ်ဃီၤအစု မၢအတၢ်ဟဲဆ့ၣ်နီၤလၢအဃၢၤ, မၢတၢ်ခ့တၢ်ပှၤတဂၤ ဟဲစိာ်လာ်ဖးထံကိအသီ တဖျၢၣ်ဒီး သံကွၢ် တဘီလၢစီၤက့ၣ်အဂ့ၢ်လီၤ. “စီၤက့ၣ်အိၣ်ဆူၣ်ဝး, စီၤဝါ, ခဲငါတနံၣ် အဝဲကဖျိယဲၢ်တီၤလၢ စံာ်ဖးလဲၢ်ကၠိဝံၤ, မၢအဟဲမၤလိတၢ်လၢ လၢၢ်ဟ့ပဒိၣ်ကၠိဘီၣ်.”

စီၤဝါစံးဆၢအီၤ, “ြဖၣ် (ကစၢ်) ဧၢ, နဖိဒိၣ်အိၣ်ဆူၣ်ဂ့ၤမးဒီး ပပှၤဒူဖိသဝီဖိခဲလၢာ်အိၣ်ဆူၣ် စ့ၢ်ကီးလီၤ.” ပိၣ်သကိးတၢ်တယံာ်ဒီး နီၢ်ဆၣ်ဖီဟဲနူးဆဲး အဝဲၢ်ဝံၤ သံကွၢ်ကဒီးဒၣ် စီၤက့ၣ်အဂ့ၢ်လီၤ. စီၤဝါစံးဆၢ အပုၢ်အတၢ် ဝံၤ, လုၣ်ထံလုၣ်နိဝံၤ အီၣ်ဂီၤတၢ်အီၣ်လီၤ.

ြဖၣ်သူဝါ ဒီမါ၀ၤ မၢအမံသကိးတနၤသနာ်က့ အဝဲဂ့ၢ်လိာ်ဝဲ, စံးဝဲ သါလဲၤဆူ သ့ၣ်ခီပနံၣ်မဲန့ကၠၢၣ် အအိၣ်ဝံၤ သါကက့ၤလိၤဆူဟံၣ်တခီန့ၣ်လီၤ. ဘၣ်ဆၣ်အၢၣ်လီၤဝဲလၢ စီၤက့ၣ်မ့ၢ်ဖျိယဲၢ်တီၤလၢ စံာ်ဖးလဲၢ်ကၠိဒီး ကဟဲပာ်အီၤလၢ မုၢ်ဂၢ်ဖါတံၢ် ခံဂၤအံၤအအိၣ် လၢကမၤလိတၢ်ဆူညါအဂီၢ်န့ၣ်လီၤ.

အီၣ်မ့ၤအီထံဝံၤ စကီၤစီၤဝါ ဒီး စီၤဘျဲၣ် လဲၤဆူသ့ၣ်ခီပန့ၣ်အရူလီၤ. မဲန့ကၠၢၣ်ခိၣ်ကျၢၢ်ထံၣ်အီၤ တဘီ ကိးနုာ်အီၤဆူ အဒၢးပူၤ ဟ့ၣ်ဆ့ၣ်နီၤအီၤလၢ လီၢ်ဆ့ၣ်နီၤ, ဟ့ၣ်ဒုးအီအီၤလၢ မိာ်ထူဒီး ဒိဒၢလွဲဖိ တဖျၢၣ်လီၤ. ဝဲၤဒၢးခိၣ်ဟဲနုာ်လီၤဒီးသံကွၢ်, “ကစၢ်လိၣ်ဘၣ်တၢ်မနုၤတမံၤလဲၣ်.”
“ဟဲစိာ်စကီၤစီၤဝါ အသ့ၣ်အစ့ အတၢ်ကွဲးနီၣ် ချ့ချ့မီၣ်.”
ဝဲၤဒၢးခိၣ်က့ၤဟါမၢ်တစိၢ်ဖိ ဟဲက့ၤစိာ်ဃုာ်တၢ်ကွဲးနီၣ် မိၢ်ပှၢ်တဘ့ၣ်, အိးထီၣ်ဝဲဖဲကဘျံးပၤ အိၣ်လၢစီၤဝါ အမံၤဖီလာ်လီၤ. မဲန့ကၠၢၣ်ကွၢ်တၢ်ကွဲးနီၣ် အတၢ်ပာ်ဖှိၣ်လၢမဲၣ်ဂီၤ လၢလံာ်ကဘျံးပၤခီၣ်ထံးဒီး ဝံၢ်ထီၣ်အခိၣ်ဒီး သံကွၢ်စီၤဝါ, “စကီၤဧၢ, မငါကၢာ်ဒီနံၣ်ညါ နကူာ်လီၤဒီးဆှၢန့ၢ်ယၤသ့ၣ် ခဲလၢာ် အတၣ် လီၤ ၂၅၀ဝ တမ့ၢ်ဧါ.”

စီၤဝါကွၢ်က့ၤအတၢ်ကွဲးနီၣ်ဒၣ်ဝဲလၢအစုပူၤဒီး အၢၣ်လီၤလၢအမ့ၢ်ဝဲန့ၣ်လီၤ. မဲန့ကၠၢၣ်စံးကဒီး, “နၤဒီးယၤ ပဘၣ်အၢၣ်လီၤလိာ်သး မ့ၢ်လၢယကဟ့ၣ်နၤ သ့ၣ်တတၣ်အဖီခိၣ် စ့ ၁၅ ဘးတမ့ၢ်ဘၣ်ဧါ.”
စီၤဝါအၢၣ်လီၤတၢ်အံၤဒီး မဲန့ကၠၢၣ်စံးကဒီး “မ့မ့ၢ်ဒ်န့ၣ်ဒီး စ့ခဲလၢာ်လၢယဘၣ်ဟ့ၣ်နၤခဲအံၤ မ့ၢ်ဝဲစ့ ၃၇၅၀၀ ဘးတမ့ၢ်ဧါ.”
စီၤဝါကွၢ်လီၤကဒီးအတၢ်ကွဲးနီၣ်ဒီးစံးဆၢတၢ်, “တမ့ၢ်ဘၣ်, ယဟဲထုးထီၣ်ပာ်စ့လၢ ယပှၤမၤတၢ်ဖိအဂီၢ်ဖဲ လါယူၤ ၁၅ သီ နံၤန့ၣ် စ့ ၇၅၀၀ ဘးလံ. နဘၣ်ဟ့ၣ်ဒၣ်ယၤစ့ ၃၀၀၀၀ ဘးဧိၤလီၤ.”
မဲန့ကၠၢၣ်သံကွၢ်ဝဲၤဒၢးခိၣ်, ဒီးအဝဲတခီ၀ာ်ခိၣ်၀ာ်နၢ်ဒီးစံး “ကစၢ်ဧၢ, ယတသ့ၣ်ညါထွဲဘၣ်ဃး စီၤဝါဟံးန့ၢ်စ့ ၇၅၀၀ ဘးအံၤဘၣ်.”
တၢ်ကီဘၣ်မဲန့ကၠၢၣ်, “ဘၣ်တဘၣ်ဒ်အံၤတခီ, တဘျီအဝဲန့ၣ်ဘၣ်လၢ ဝဲၤလီၢ်ကးတံၢ်သးအနံၤ အဃိ ယလဲၤဆူ နဟံၣ်, ဒီးနထုးထီၣ်ညီယၤလၢ နစ့အိၣ်ဖဲနဟံၣ်န့ၣ်, ယသါကဟ့ၣ်နၤရံၤစံးဘၣ်ဆၣ် နစံးလၢ အတွးတအိၣ်ဘၣ်, နကကွဲးနီၣ်က့ၤဒၣ်နဲလၢ ခံတခီလီၤ.”

တၢ်ဒ်အံၤတမၤအသးနီတဘျီဒီး ပှၤကီၤလၤဖိမၤ ပနံၣ်တၢ်ကၤ အတၢ်မၤတဖၣ်ဘၣ်. မဲန့ကၠၢၣ် သ့ၣ်နီၣ် ထီၣ်က့ၤစဲဃဲၤ သးလၢတၢ်လၢစီၤဝါစံးဘၣ်အီၤအံၤ ဒီးနံၤထီၣ်ဝဲမးဟၢၣ်ဟၢၣ်လီၤ. ကၠီၣ်တဲၣ်ဝဲၤဒၢးခိၣ်တခီ ကမၢကမၣ်မး မဲာ်ချံတကျိၣ်တဘီလီၤ. စံးဝဲ, “ကီၤလၤတဂၤ နာ်န့ၢ်မး ပှၤကညီတဂၤအံၤလဲၣ်. ပှၤကညီ တဂၤအံၤတခီ ပှၤနာ်န့ၢ်အီၤသ့စဲဃဲၤလီၤမးလဲၣ်.”

မဲန့ကၠၢၣ်ဂဲၤထၢၣ် ဟဲဃီၤဆူစီၤဝါအအိၣ်, ပှီၢ်ဝဲအဖံထံခိၣ် “ပာ်ပာ်” ခံဘီသၢဘီဝံၤ မၢဝဲၤဒၢးခိၣ် ဟဲထုးထီၣ်စ့ ၃၀၀၀၀ ဘးလီၤ. ဝံၤစံးဘၣ်စီၤဝါ, “တနံၣ်ညါအံၤ ပခီပနံၣ်အတၢ်မၤ လဲၤတၢ်ဂ့ၤမးဒီး ယန့ၢ်ဘၣ်တၢ် ကလုၢ်လၢထးလၢ ယကဘၣ်နီၤလီၤတၢ်ဟ့ၣ် (Bonus) အမျးတဆံလီၤ. လၢနဂီၢ်တၢ်အံၤကလီၤလၢဝဲစ့ ၃၇၅၀ ဘးလီၤ.”

စီၤဝါသုးကျဲၤက့ၤတၢ်လၢ နံၣ်လီၢ်လံၤအဂီၢ်ဝံၤ, အၢၣ်လီၤလိာ်သးလၢ နံၣ်သီအဂီၢ်ကဒီးလီၤ. မဲန့ကၠၢၣ် မၢဝဲၤဒၢးခိၣ်ကိးန့ၢ် ကူၣ်လံၣ်တဖၣ်လၢ ကလဲၤယိးဆှၢန့ၢ် စီၤဝါအစ့ခဲလၢာ် ၃၃၇၅၀ ဘးဝံၤ, နူးဆဲးအီၤလၢ တၢ်သူၣ်အိၣ်သးအိၣ်အပူၤ ဝံၤလီၤဖးလိာ်သးလီၤ.

စီၤဝါက့ၤဝီၣ်အါဖၢအရူ အိၣ်သကိးနူးဆဲးအီၤ, ဟ့ၣ်ထီၣ်အရံၣ်ဖီးဖဲ အလီၢ်အိၣ်တဖၣ်ဝံၤ, နူးဆဲး အါဖၢဝံၤ ဃၣ်ဃီၤက့ၤအခိၣ် သါကဟးထီၣ် ကွံာ်လၢဒၢးပူၤလီၤ. ပဒိၣ်တဂၤကိးကဒါက့ၤအီၤဒီးစံး, “စကီၤဧၢ, လၢယတၢ်ပၢအပူၤ စကီၤလၢအတၢ်မၤဂ့ၤကတၢၢ် အကျါမ့ၢ်ဒၣ်နၤလီၤ. ယကွဲးဖျါထီၣ်နဂ့ၢ်ဒီးခဲအံၤ လံာ်ဟဲက့ၤ လီၤလၢထးခီ တခီလၢ တၢ်ကဘၣ်ဟ့ၣ်လၤကပီၤနၤ လၢထူကဘျၣ်တဘ့ၣ်လီၤတယၢၢ် ၁၀ ထ့းကီၣ် ဃုာ်ဒီးကျိတရံးဃုပူၤတဆိလီၤ. ယစံးဘျုးနၤလၢနမၤနတၢ်မၤ ဂ့ၤဂ့ၤကလဲာ် လၢတၢ်သူၣ်တီသးရၤ အဃိလီၤ. ခဲကၢာ်မုၢ်နံၤမုၢ်သီမ့ၢ်ဘၣ်ဒီး ယကဘိးဘၣ်နၤ, လၢနကဟဲဟံးက့ၤခိၣ်ဖးတဖၣ်အံၤ န့ၣ်လီၤ.”

စကီၤစီၤဝါစံးဘျုးက့ၤအါဖၢဝံၤ ဟးထီၣ်လၢအအိၣ် က့ၤက့ၤဆူဝ့ၢ်ချၢဖဲ အပျဲၢ်ဒီး ကဆီတဖၣ် အိၣ်ခိးအီၤ န့ၣ်လီၤ. က့ၤတုၤဖဲန့ၣ်, ဟ့ၣ်လီၤကူၣ်လံၣ်ယိးစ့ထၢၣ်တဖၣ် (ခါဖဲန့ၣ်ပှၤသူထဲစ့နီၢ်လီၤ) အဘူးအလဲဝံၤ, တီၣ်ထီၣ်စ့ထၢၣ်တဖၣ်လၢ ကဆီစုာ်ထၢၣ်အပူၤဝံၤ ကပၢ်ဂီၤက့ၤခိၣ်ဆူ စံာ်ဖးလဲၢ်တခီ နီၣ်ထီၣ်ကဆီဖါ ခံဒု ဟၢၣ်ဟၢၣ်ဒီး ဟးထီၣ်က့ၤဆူ ဟံၣ်လၢတၢ်သးခုအပူၤလီၤ.

ဒ်ညီနုၢ်အသိး ဆၣ်ဖိကီၢ်ဖိတဖၣ် မ့ၢ်ဘၣ်က့ၤဆူဟံၣ်တခီ ခါဝဲချ့န့ၢ်ဒံးဖဲ အဟးထီၣ်ဝဲလၢဟံၣ်န့ၣ်လီၤ. ကဆီဖါန့ခံဒု သ့ၣ်ညါလၢဘၣ်က့ၤဆူဟံၣ် တလိၣ်ပှၤနီၣ်အီၤခံဂၤ ဒိအီၤဃါအီၤဒၣ်လဲာ်ဘၣ်. က့ၤခါမးဝဲ ဆွဲးဆွဲးလီၤ.

စီၤက့ၣ်ဒီးအသိးဖါလါတခီ တသ့ၣ်ညါလၢစကီၤစီၤဝါ ကဟဲက့ၤတုၤတဟါဃီန့ၣ်ဘၣ်. ညီနုၢ်စကီၤမ့ၢ် လဲၤလီၤဆူဝ့ၢ်လၢၢ်ဟ့တခီ မံသကိးညီနုၢ်ြဖၣ်သူဝါတနံၤခံနံၤလီၤ. ဆိမိၣ်ဒၣ်ဝဲ တၢ်ကမၤအသးဒ်အံၤန့ၣ်ဒီး အတၢ်ကမၣ်လၢအမ့ၢ် တၢ်တဒိကနၣ်အပၢ်အကလုၢ် ဘၣ်ဃးကျိကဆီတဆိအံၤန့ၣ် ပာ်ခူသူၣ်ဝဲကဘံၣ် ကစီဒီလီၤ.

သိၣ်ဖိခံဂၤအံၤဟဲက့ၤယိးလါဖံးဖါတံၢ်အခိၣ်, အကံၣ်ဒုၣ်ညၣ်ဒီး ကျိတဆိ ဖဲအခီၣ်ထံးတခီ ဖှံဘၣ်အီၤ ကစီဒီလီၤ. ဘၣ်ဆၣ်ယံာ်ထီၣ်ဒီး ဃၢထီၣ်ဝဲဒီး ဘၣ်ပာ်လီၤအတၢ်ယိးအံၤ တဘျီဘၣ်တဘျီလၢ ကအိၣ်ဘှံး ဝဲ အဂီၢ်လီၤ. မုၢ်ခုၣ်လီၤဘၣ်ဟါလွံၢ်နၣ်ရံၣ်မး ဟးထီၣ်ဘၣ်လၢပှၢ်ပူၤ တုၤဃီၤဝဲလၢပျီသရ့ၤ န့ၣ်လီၤ. ဘၣ်ယိၣ်လၢ တၢ်ကခံးန့ၢ်အီၤ တကူၣ်သ့ၣ်အဃိ ထွဲမးစီးစီး, ကပၢၤဒိၣ်ကနိယွၤမးတဘီလီၤ.

“စီၤလါဧၢ, ခွါဖါတံၢ်စီၤဘျဲၣ်ဟဲက့ၤမ့ၢ်တုၤဘီၣ် မၢအပျၤန့ၢ်နၤလၢ နတၢ်ခိၣ်အံၤ, ပှၤမၤမ့ၢ်တသ့ကဟးဂီၤ န့ၢ်နၤ, နဘျးလီၤက့ၤအီၤ ပကွၢ်တဂ့ၤလၢၤဘၣ်. တၢ်ခိၣ်ဃံလၢခွါဖါတံၢ် ြဖၣ်သူဝါအဟံၣ်လၢ လၢၢ်ဟ့တဖၣ် ခွါဖါတံၢ်စီၤဘျဲၣ် ပျၤန့ၢ်အီၤခဲလၢာ်လီၤ. နလဲၤဟးတဘျီဒီးယၤ နထံၣ်ဘၣ်စီဒီနဲၣ်. နကွၢ်တဂ့ၤဘၣ်နၤဧဲၣ်”

“ဂ့ၤနဲၣ်နၤဧၢ, ယကမၢဖါတံၢ်စီၤဘျဲၣ်ပျၤန့ၢ်ယၤလီၤ.”
ဟဲက့ၤဟဲက့ၤ ကတိၤသကိးတၢ်ဒ်အံၤဒီး မုၢ်ဘူးကလီၤနုာ် တုၤဃီၤက့ၤစံာ်ဖးလဲၢ်လီၤ. စီၤက့ၣ်လဲၤယိးဆှၢစၢၤ လါဖံးခိၣ်ဆူ စီၤလါအဟံၣ်လီၤ. လဲၤတုၤဖဲန့ၣ် စီၤလါအမိၢ်နီၢ်ဘီတဂၤ ဟဲဃ့ၢ်ထီၣ်လၢ ဟံၣ်ပူၤတခီ ဒီးကတိၤထီၣ်တၢ်တလၢတၢ်ပျံၤတၢ်ဖုးအပူၤတခီ ဒီးစံး, “စီၤလါ, စီၤက့ၣ်ဧၢ, မ့ၢ်တၢ်တဘီအံၤ တၢ်ကီလၢာ်လံသၢၣ်, စကီၤစီၤဝါဟဲက့ၤတုၤ တထံၣ်က့ၤအကျိ, သုခံဂၤလိာ်သုလီၤမၢ်လၢသဝီပူၤ, စကီၤဒွးဝဲ တဘျီဃီလၢ သုလဲၤဟုးခးကဒီးလံကျိလံ. အသးဒိၣ်ရီးတဘီလီၤ. တၢ်အံၤတၢ်ကီမးလဲၣ်, သုဘၣ်ဖျ့လၢညါ တဘျီလံ. သုတတိၢ်သုသးမးလဲၣ်.”

စီၤလါဒုပျံၤတၢ် အသးလီၤကတုၤမးဝဲလီၤ. မ့မ့ၢ်စီၤက့ၣ်တဂၤ တဒ်န့ၣ်ဘၣ်, တသီၣ်တသဲဘၣ်. ပာ်တ့ၢ်န့ၢ် စီၤလါအမိၢ်လၢ လါဖံးညၣ်တ၀ာ်, စိာ်ထီၣ်ဝဲတ၀ာ်, ယိးထီၣ်ကျိဒီးက့ၤဟံၣ်ဒၢၣ်ဒၢၣ်လီၤ. ပာ်လီၤအသး, ယမၤတၢ်ကမၣ်ဘူၣ်, ယကတူၢ်က့ၤယတၢ်ကမၣ်အဘူးအလဲ မုာ်မုာ်ကီးသၢၣ်. တသ့ၣ်နီၣ်ထီၣ်က့ၤ ဆူတီၣ်ဖံး လၢအကအီၣ်လီၤဝဲဒီး မၤတီၣ်အဖံးဖဲ အပၢ်ကတီၢ်အီၤ အခါန့ၣ်လၢၤဘၣ်. တၢ်စံၣ်ညီၣ်လၢ ယကဘၣ်တူၢ် ယဲန့ၣ် ယကတူၢ်ဝံၤကွံာ်ချ့ချ့တခီသၢၣ်. ပာ်လီၤသးကျၢၤမုဆှုဒ်န့ၣ်ဒီး က့ၤဆူဟံၣ် မဲာ်ဆူၣ်တလီၤပီာ် နီတစဲးဘၣ်.

က့ၤဝဲလၢဟံၣ်လီၢ်ခံ, ပာ်လီၤအတၢ်ညၣ်ဝံၤ, က့ၤကဒီးဆူဟံၣ်မဲာ်ညါ, ဖဲအမိၢ်နီၢ်ထူ အပၢ်ဒီး အဖါတံၢ် စီၤဘျဲၣ်သၢဂၤ ဆ့ၣ်နီၤဝဲန့ၣ်လီၤ. အမိၢ်ဒီးအဖါတံၢ်ခံဂၤ ကွၢ်ဃီၤအီၤဒီး တစံးတၢ်နီတမံၤဘၣ်. မ့မ့ၢ် အပၢ်တခီ ထုထီၣ်အကလုၢ်ဒီးစံးဝဲ, “စီၤက့ၣ်, လဲၤထူးက့ၤကျိစီစီ, ပာ်က့ၤလၢအလီၢ်ဝံၤ, ဟဲဃီၤဆူယအိၣ်ချ့ချ့တက့ၢ်.”

စီၤက့ၣ်တသီၣ်တသဲဘၣ်. ထူးစီကွံာ်အပၢ်အကျိဂ့ၤဂ့ၤလီၤ. အဝဲအဲၣ်ကျိ, အဲၣ်ထူးကျိ, ဒီးထူးမးဝဲလီၤတံၢ်လီၤဆဲး, တုၤကျိအပူၤကြတ့ၣ်ဆှံမး, ဒီးကျိအချၢတခီစ့ၢ်ကီး စီဝဲမူာ်မူာ်နီၢ်နီၢ် တစုန့ၣ်လီၤ. လဲၤပာ်က့ၤကျိလၢ အပၢ်မံဒၢးခိၣ်ထးဝံၤ, ဟဲက့ၤဆူအပၢ်အအိၣ်ဒီးစံး, “ပၢ်ဧၢ, ယထူးကျိဝံၤဒီး ပာ်က့ၤအီၤလၢအလီၢ် ဝံၤလံ.”

“စီၤက့ၣ်ဧၢ, နသ့ၣ်နီၣ်ယစံးနၤလၢ နမ့ၢ်လဲၤဟုၣ်ခးကဒီးကျိ ကဆီအံၤ ယကမၤနၤဒ်လဲၣ် န့ၣ်ဧါ.”
“မ့ၢ်, ယသ့ၣ်နီၣ်ကစီဒီပၢ်ဧၢ, နစံးလၢနသါကဖျ့ယၤလၢ ဂ့ၢ်ဖျ့တီၢ်ပနၢ် အဘီယဲၢ်ဆံဘၣ်.”
“စီၤက့ၣ်ဧၢ, ပှၤသဝီဖိနာ်န့ၢ်ယၤ ဒီးပာ်ထီၣ်ယၤလၢစကီၤလီၤ. ဒ်စကီၤအသိး ယဘၣ်အိၣ်လၢ တၢ်ဒိကနၣ် ပဒိၣ်လၢထး တဖၣ်အကလုၢ် လၢတၢ်ဂ့ၤအဂီၢ်လီၤ. ယမုၢ်လၢ်လၢ ဒ်ယဒိကနၣ်တၢ်အသိး, ယပှၤဒူဖိသဝီဖိ ဒီး ယဖိယလံၤယဟံၣ်ဖိဃီဖိ တဖၣ်ကဒိကနၣ်တၢ်လီၤ. သဝီဖိတဖၣ် မ့ၢ်ထံၣ်ဝဲလၢ ယဖိခွါဒၣ်ယဲ တသ့ဒိ ကနၣ်အပၢ်အကလုၢ် ဒီးကစံးဒ်လဲၣ်.”

စီၤဝါဂဲၤထၢၣ် ဖီၣ်ထီၣ်ကၠ့ၣ်လူတီၢ်ပနၢ် အိၣ်ဖဲအဃၢၤတဘိ, စၢထီၣ်စီၤက့ၣ်အစုလၢ ကျူလၢတၢ်ဖီခိၣ်ဒီး, ပနၤမးစီၤက့ၣ်ဖဲအခံတဲၣ်ပါ, ဒီးအခီၣ်ဒုၣ်တဖၣ်ချါချါချါချါလီၤ. မ့ၢ်ပှၤသးဆးဒီး တနါစိၤတီၢ် ဖိသၣ်လၢ အချၢဃံ လၢကမၤဘၣ်ဒိ အပသိၣ်အသူၣ်အသး အဂီၢ်န့ၣ်ဘၣ်.

စီၤက့ၣ်တခီ အ့ၣ်တံၢ်ဃာ်အခၣ်ဃံဒီး တသီၣ်တသဲနီတဘီဘၣ်. ဖျီၣ်ခံလီၤလူာ်ဘၣ်အသး, ခံတဲၣ်ပါဂီၤထီၣ် ပနူၤထီၣ်, ယံာ်ယံာ် ဖံးခီတဲာ်ပိၢ်ဖး ဘၣ်မးအသး သွံၣ်ထီၣ်ပီၤယုၤတဘီလီၤ.

အဖါတံၢ်စီၤဘျဲၣ် ကွၢ်အဖိဒိၣ် ဘၣ်တၢ်စံၣ်ညီၣ်ဆါမးဒ်အံၤ, ကွၢ်တမုာ်တကဲလၢၤ ဒီးစံၣ်လီၤက့ၤဆူ အဟံၣ်လီၤ. မိၢ်တဂၤတခီ ဟီၣ်မဲာ်ထံပုာ်ထီၣ် ယွၤလီၤသါသကုးဘၣ်မးသးလီၤ. ပၢ်တခီ တီၢ်ဖိစုလီၤဘှံး မးဒီး တုၤအတီၢ်ဝဲ ပှဲၤအဘီယဲၢ်ဆံတစု, ပာ်လီၤက့ၤဂ့ၢ်ဖျ့, ဃ့ၣ်လီၤက့ၤစီၤက့ၣ်အစုဒီး, ဆ့ၣ်နီၤက့ၤသါကူၢ်နံ ကူၢ်နံလီၤ.

တၢ်စံၣ်ညီၣ်အံၤ ဆါကဲၣ်ဆိးလၢ ဖိသၣ် လုၢ်ဘီဘိထီၣ်သီတဂၤ အံၤအဂီၢ်အဃိ, တုၤအပၢ်ပျၢ်လီၤက့ၤ အီၤတစု, အဝဲလီၤဃံၤမး ြပူးကလာ်လၢ သ့ၣ်ဘၣ်ခိၣ်လီၤ. မိၢ်တဂၤဂဲၤထၢၣ်ဖိးဟုထီၣ်က့ၤအီၤ, လဲၤမိၤအီၤဆူ တၢ်လီၢ်ခံ သ့ကွံာ်အပူၤလီၢ်တဖၣ်ဝံၤ စံၣ်ကၠီက့ၤအီၤလၢသယီ, ဝံၤပုာ်မံလီၤက့ၤအီၤလီၤ. ခံဆါအဃိ ဘၣ်မံလီၤအီထီလာ် ဝဲဒၣ်လီၤ.

နီၢ်ထူဒိထီၣ်ထံချီသပၢၤ, လဲၤလီၤဆူတၢ်ဖီလာ်, လဲၤခူၣ်န့ၢ်သဲးယ့, မံးတလီၣ်ဒီးသယီဒ့တဖၣ်, ဟဲက့ၤ ဂံာ်ဘျဲးဝဲ, ဘိၣ်ထီၣ်ဝဲခံဘိၣ်ဝံၤ, ပာ်ထီၣ်ကိၢ်သွးဝဲလၢ ထံချီသပၢၤခိၣ်, လၢအဘိၣ်ဘံထီၣ်ဝဲဒီးတၢ်ကံးညာ်တဘ့ၣ် န့ၣ်လီၤ. အပုၢ်သဒါစီၤဘျဲၣ်ဟဲက့ၤကဒါက့ၤ, မၤစၢၤအီၤဒီး ပှၤဒီပုၢ်ဝဲၢ်ခံဂၤ အံၤက့ၤနုာ်စိာ် သပၢၤဆူ စီၤက့ၣ်မံဒၢးဒီး သၣ်ထိးက့ၤအပူၤလီၢ်တဖၣ်လီၤ.

“ဟ့းဖါတံၢ်, နသါလဲၤကွၢ်ဒီၣ်လီၤစါ လါဖံးကံၣ်ဒုၣ် လၢယဟဲက့ၤတီၣ်ထီၣ်လၢခူလိၤန့ၣ်တဘီ, ယမၤက့ၤတဝါဘၣ်, မ့ဝံၤဘီၣ်ဖါတံၢ်ဧၢ, နသါလဲၤမၤစၢၤ စါ စသိၣ်စီၤလါတဘီ, အလါဖံးခိၣ်တဖျၣ်န့ၣ် ဘၢၣ်ဝဲ မ့ၢ်တသ့ ကဟးဂီၤကွံာ်ဒီး အနၢၤပကွၢ်က့ၤအီၤတသ့လၢၤဘၣ်.

စီၤဘျဲၣ်တကတိၤတၢ်ဘၣ်, သးကညီၤအဖိဒိၣ် ဒီးအဲၣ်ဒိးမၤမုာ် အသးလီၤ. လဲၤကစုဒုဆူ ဖၣ်ကပူၤဘျီၣ်, ဒီၣ်လီၤက့ၤလါဖံးကံၣ်ဒုၣ်ညၣ်, ဖီထီၣ်က့ၤဝဲတနီၤ, စံၢ်ဆၢဝဲတနီၤ လၢကလိဃ့ဝဲလၢ ခံတနံၤအဂီၢ် န့ၣ်လီၤ. မၤတၢ်ဝံၤဒီး လဲၤကဒီးဆူစီၤလါအဟံၣ် ဒီးဘၢၣ်စၢၤ ဝဲလၢလါဖံးဖါတံၢ်အခိၣ်န့ၣ်လီၤ. ဘၢၣ်လီၤဝဲ တယံာ်တမီၢ်ဘၣ်ဒီး ထံၣ်န့ၢ်ကျိစၢၢ်သၣ် ပ့ၣ်လံးအံၤ ဒီးသ့ၣ်ညါဝဲတဘျီဃီလၢ အမ့ၢ်ကျိသၣ်လၢ ပှၤဘှီခးအီၤ လၢကၠီၣ်တဲၣ်ကျိလၢပျၢၤ, ကျိဆဲးဖှီးညီ (တံၤလီၤ) န့ၣ်လီၤ. အဝဲသံကွၢ်စီၤလါ, “သုလဲၤခးလါဖံးဖါတံၢ်အံၤ ဖဲပှၢ်မတၤလဲၣ်.”

စီၤလါစံးဘၣ်အီၤလၢတၢ်ခး တဘျီအံၤ အဂ့ၢ်ခဲလၢာ်ဒီး သ့ၣ်ညါဝဲလၢ လါဖံးဖါတံၢ်လၢ စီၤက့ၣ်ခးအံၤ မ့ၢ်ဒၣ်တဒုဃီဒီး လါဖံးလၢစီၤချ့လဲၤခးဒီး ခွဲးသံကွံာ်စီၤချ့လၢ အပူၤကွံာ်ခံနံၣ်လီၤ. စီၤဘျဲၣ်အသးမုာ်မးလၢ အဖိဒိၣ်လုၣ်ဘီဘိတဂၤ တိၢ်န့ၢ်ဖံးဃာ်မး အတၢ်သိၣ်လိမၤယုၤဘၣ်ဃး တၢ်ခးဆၣ်ဖိကီၢ်ဖိတဖၣ်, ဒီးတၢ်လီၤပျံၤအလီၢ် ဆၣ်ဖိကီၢ်ဖိလၢ အဒူတဒု လၢပှၤနီၢ်ဒိၣ် ပှၤပ့ၢ်ပှၤချ့ စီၤချ့ မၤအီၤတန့ၢ်ဘၣ်အံၤ သံကွံာ်လံလၢ အဖိဒိၣ်အစုပူၤန့ၣ်လီၤ.

စီၤလါတခီတုၤအသ့ၣ်ညါ မးဝဲလၢ လါဖံးတဒုဃီအံၤ မၤသံတ့ၢ်လံ မူးဆိဖးဒိၣ် စီၤချ့ဒီး ကနိးဘၣ်မး အသး တစိၢ်ညါလီၤ. ဘၣ်ဆၣ်တၢ်ပျံၤဃါဃုာ်စ့ၢ်ကီး အသးဒီး တၢ်ပာ်ကဖၢသးလၢ လါဖံးအံၤသံကွံာ်ဝဲလၢ အသိၣ်စီၤက့ၣ် အစုဒီး အဝဲလဲၤပိာ်ဃုာ်ဘၣ် စီၤက့ၣ်အခံအဃိန့ၣ်လီၤ.

စီၤလါသ့ၣ်နီၣ်က့ၤအသး လၢစီၤက့ၣ်ဒီးသံကွၢ်, “ဖါတံၢ်ဧၢ, စီၤက့ၣ်အပၢ်မၤအီၤဒ်လဲၣ်.”
“အၢၣ် ပှၤဖါန့ၣ် အပၢ်လာ်ပကံးအီၤ လၢပနၢ်ဂ့ၢ်ဖျ့ အဘီယဲၢ်ဆံ လီၤကဘုးလီၤကလဲ မၤသးဒ် ပှၤတီၢ်ညၣ်လၣ် အသိးလီၤ. ဖဲယဟဲအခါ အမိၢ်ဘၣ်စံၣ်ထိးအီၤအဖၢလီၤ.”
“ဖါတံၢ်ဧၢ, စကီၤဝါ သါကတီၢ်ယၤစ့ၢ်ကီးဧါ.”
“တဲတသ့ဘၣ်ထ့ၣ်ဧၢ, ဖါတံၢ်မ့မ့ၢ်နၤ, ဖါတံၢ်ကလဲၤဃ့ကညးက့ၤအီၤ ချ့ချ့တခီလီၤ. ဘၣ်တဘၣ် တီၢ်စီၤက့ၣ်အံၤဝံၤ အသးကမုာ်ထီၣ်က့ၤ ကီးတစဲးလံဘဲၣ်.”

လၢတၢ်ဖျံးတၢ်ဖုးအပူၤ စီၤလါလဲၤဆူစကီၤအဟံၣ်, ဒီးလဲၤဃီၤဆူစကီၤ အိၣ်ဆ့ၣ်နီၤဝဲအလီၢ် ကစုဒုဒီးစံး, “ဖါတံၢ်ဧၢ, ယဟဲလၢနကစံၣ်ညီၣ်ယၤ စ့ၢ်ကီးလီၤ. ယတဒိကနၣ်ဘၣ် နကလုၢ်ဒီး လဲၤပိာ်ဘၣ်စီၤက့ၣ်အခံ လီၤ. ကွၢ်ဖဲနကမၤယၤဒီး ယကခီၣ်လီၤ.”

စီၤလါအတၢ်ဆီၣ်လီၤအသးအံၤ မၤကပုာ်အါထီၣ် ကဒီးစကီၤအသး လီၤ. တီၢ်အဖိခွါလၢ တီၢ်ဒီး အတၢ်သးဒိၣ် စၢ်လီၤက့ၤလၢာ်ဃၣ်ဃၣ်ကီးလံ. အဝဲသံကွၢ်သံဒိး စီၤလါလၢ တၢ်လဲၤခးလါဖံးတဒုအံၤ အဂ့ၢ်လီၤ. စီၤလါတခီတဲပၠးအီၤ, အူးထီၣ်စီၤက့ၣ်ဒ်ယံာ်ဒ် ဂ့ၤဒီး ပၢ်တဂၤအံၤ တုၤအသ့ၣ်ညါလၢ အဖိခးန့ၢ် လါဖံးအဒူ မးတဒုလၢ အခွဲးသံတ့ၢ်လံ စီၤချ့တဘီ, နံၤခူသူၣ်လၢ အသးပူၤလီၤ. ပာ်ကဖၢခူသူၣ်မးအသးလၢ တၢ်အံၤ အဃိလီၤ. တၢ်သးဖျိးစီကွံာ်ဖ့ကလ့ဒီးစံးက့ၤစီၤလါ, “နမ့ၢ်အၢၣ်လီၤနဲလၢနတမၤကဒီးလၢၤဘၣ်ဒီး ယတတီၢ်နၤလၢၤဘၣ်.” စီၤလါအၢၣ်လီၤအီၤချ့သဒံးဝံၤ ဟးထီၣ်ကွံာ်, လဲၤနုာ်ဆူ စီၤက့ၣ်မံဒၢးပူၤ, သါကလဲၤမၤစၢၤ သၣ်ထိးက့ၤ အသကိးအံၤလီၤ.

စီၤက့ၣ်၀ၢ်ဃီၤအစုဆူစီၤလါအအိၣ်, ဒီးစီၤလါလဲၤဃီၤဆူအမံသရ့ၤလီၤ. စီၤလါ ဖံးစၢၤမၤစၢၤစကီၤမုၣ် နီၢ်ထူ လၢတၢ်သၣ်ထိးက့ၤ သိၣ်တဂၤအံၤအခါ, စံးဘၣ်စီၤက့ၣ်လၢ အဖါတံၢ်စီၤဘျဲၣ်ထံၣ်န့ၢ်ကျိသၣ်လၢ တၢ်ခိၣ်ကုပူၤ ဒီးသ့ၣ်ညါဝဲလၢ လါဖံးလၢ စီၤက့ၣ်ခးန့ၢ်အံၤ, တဒုဃီဒၣ်ဒီး တၢ်လၢအခွဲးသံစီၤချ့န့ၣ်လီၤ. စီၤက့ၣ်နံၤကမှံထီၣ်ဒီး သးပ့ၤနီၣ်ကွံာ် မးခံဆါ တစိၢ်ညါလီၤ.

“ဟ့းစီၤလါ, ဟးတဲဘၣ်ပှၤသဝီဖိလၢ ကလဲၤကါအီၣ်လါဖံးညၣ်ဘီၣ်. ခဲအံၤမ့ၢ်တၢ်ဂိၢ်ခါဒီး တအုၣ်ဒံးဘၣ်. သုမ့ၢ်လဲၤလၢဂီၤထၢၣ်သၢဒီး မုၢ်ထူၣ်သုဟဲက့ၤ ကတုၤသၢၣ်.”
စီၤလါဒ်ညီနုၢ်အသိး စူၢ်စီၤက့ၣ်အကလုၢ်ဒီး ဟးတဲဘၣ်ပှၤသဝီဖိလၢ တၢ်အံၤလီၤ. မုၢ်ဆ့ၣ်ထီၣ်တနံၤ ပှၤအါဂၤပိာ်ထီၣ်စီၤလါအခံ ဒီးစိာ်ဒီးဃဲာ်ဂၤဘ့ၣ်ဂၤဘ့ၣ်လီၤ. မုၢ်ထူၣ်တခီ ဟဲက့ၤပၢၢ်ထီၣ် ဝံဒီးလါဖံးညၣ် တဂၤတဝံတဝံ, လၢဝံမးလီၤ.

တနံၤညါန့ၣ် ပှၤစံာ်ဖးလဲၢ်ဖိတဖၣ် အီၣ်ဘၣ်လါဖံးညၣ်ကသူ ကိးဟံၣ်ဒဲးဃၣ်ဃၣ်လီၤ. ပှၤခဲလၢာ်သ့ၣ်ညါ တၢ်ဂ့ၢ်ခဲလၢာ်ဒီး ပြတၢၤကၢ်ကိာ်မး စီၤက့ၣ်လၢ အခးသံလါဖံးဖါတံၢ်တဒုအံၤ လၢတၢ်ခူသူၣ်အပူၤန့ၣ်လီၤ. နၢ်ဟူစ့ၢ်ကီးဝဲလၢ စီၤက့ၣ်ဘၣ်တီၢ်ဆါထဲအံၤထဲနုၤ သနာ်က့ တကအုကစွါနီတဘီဘၣ် န့ၣ်ဒီး တစီးမး အနိးတကူၣ်သ့ၣ်လီၤ.

ဆဲးဖးဆူအကူာ် ၃

ဟံးန့ၢ်က့ၤအီၤလၢ ကိၣ်မၤနၤလၢ တနံၤဘၣ်တနံၤအဂီၢ် ထံွၣ်မဲၢ်က့ၣ်ဘျၢထီၣ် တၢ်ဃဲၤပူ အပူၤ