စး ထီၣ် လၢ ၁၉၄၈ နံၣ် လါ ယ နုၤ အါ ရံၤ လွံၢ် သီ ဂီၤ ခီ လွံၢ် နၢ် ရံၣ် ၂၂ မံး နံး ၂၃ စဲး ကီး အ နံၤ ကီၢ် ပ ယီၤ မၤ န့ၢ် တၢ် သ ဘျ့ လၢ အဲ က လံး အ အိၣ် န့ၣ် ပှၤ က ညီ ခိၣ် နၢ် တ ဖၣ် ကျဲး စၢး ဂဲၤ လိာ် ၀ဲ လၢ က ညီ အ ကီၢ် သ ဘျ့ အ ဂီၢ် လီၤ. ဘၣ် ဆၣ် တ ဒိး န့ၢ် ၀ဲ ဒၣ် ဘၣ်. အ မဲာ် ညါ ဘၣ် လုၢ် ထီၣ် ကွံာ် အ သး သ မူ အါ ဂၤ လံ ဘၣ် ဆၣ် ပှၤ တ ပာ် ပ နီၢ် အ ၀ဲ သ့ၣ် ဒ် မုၢ် နံၤ ဒိၣ် မုၢ် နံၤ ထီ က အိၣ် လၢ အ ဂီၢ် ဒံး ဘၣ် န့ၣ် လီၤ.မ့ မ့ၢ် တ ခီ ခီ ဖျီ လၢ က ညီ ဖိ တ ဖၣ် ဟး ဂုၤ ဟး ဂီၤ ၀ဲ ဒၣ် လၢ ဒုၣ် ဒါ အါ မး ခီ ဖျိ လၢ တၢ် ဂ့ၢ် အ က လုာ် က လုာ် အ ဃိ စး ထီၣ် က့ၤ ဖဲ ၁၉၄၉ နံၣ် လါ ယ နူၤ အါ ရံၤ ၃၁ သီ အ နံၤ န့ၣ် က ညီ ဖိ တ ဖၣ် ဒ် သိး က ဒီ သ ဒၢ က့ၤ အ ပှၤ ထံ ဖိ ကီၢ် ဖိ ဒီး ဒ် သိး က ဂုာ် န့ၢ် က့ၤ တၢ် သ ဘျ့ အ ဂီၢ် အ ၀ဲ သ့ၣ် စး ထီၣ် ဒုး ကဲ ထီၣ် ၀ဲ တၢ် ပၢၢ် ဆၢ မုၢ် နံၤ န့ၣ် လီၤ. ဖဲ န့ၣ် ဒုၣ် ဒါ သ့ၣ် တ ဖၣ် ဖုး ဘၣ် အ သး လၢ က ညီ တၢ် ပၢၢ် ဆၢ အိၣ် ထီၣ် လံ န့ၣ် လီၤ.
ဘၣ် ဆၣ် မ့ မ့ၢ် က ညီ ဖိ တ ဖၣ် တ ခီ တ ဆိ က မိၣ် တၢ် လၢ အ ထီ ဘၣ် , မ့ မ့ၢ် တ ခီ ဆိ က မိၣ် လၢ က ဒီ သ ဒၢ က့ၤ အ ပှၤ ထံ ဖိ ကီၢ် ဖိ ဒီး ဒ် သိး က ဂုာ် န့ၢ် က့ၤ အ ထံ အ ကီၢ် အ ဂီၢ် လီၤ. ဖဲ န့ၣ် ဒုၣ် ဒါ သ့ၣ် တ ဖၣ် ဒ် သိး က မၤ လီၤ မၢ် ကွံာ် က ညီ တၢ် ပၢၢ် ဆၢ အ ဂီၢ် အ ၀ဲ သ့ၣ် ကိး ၀ဲ တၢ် အိၣ် ဖှိၣ် ဒ် သိး က မၤ တၢ် မုာ် တၢ် ခုၣ် လၢ ကီၢ် ပ ယီၤ ဒီ ဘ့ၣ် အ ဂီၢ် လီၤ. ဖဲ န့ၣ် ကီၢ် စဲၣ် ခိၣ် နၢ် လၢ ကီၢ် ပ ယီၤ ဒီ ဘ့ၣ် တ ဖၣ် လဲၤ ထီၣ် ၀ဲ တၢ် အိၣ် ဖှိၣ် ဒီး ဖဲ ( ဖ ဆ ပ လ ) ခိၣ် နၢ် တ ဖၣ် က တိၤ လီၤ တၢ် အ ခါ ဖျါ လၢ အ လီၤ ဂာ် တၢ် ပာ် လီၤ စု က ၀ဲၤ အ ဃိ ခိၣ် နၢ် လၢ အ လဲၤ ထီၣ် တၢ် အိၣ် ဖှိၣ် တ ဖၣ် တတူၢ် လိာ် ၀ဲ တၢ် ဆၢ တဲာ် လၢ တၢ် အိၣ် ဖှိၣ် အ ၀ဲ အံၤ အ ပူၤ ဘၣ် , မ့ မ့ၢ် တ ခီ အ ၀ဲ သ့ၣ် က့ၤ က ဒါ က့ၤ တ ဂၤ ဆူ အ တၢ် လီၢ် တၢ် ကျဲ တ ဖၣ် လီၤ.
ဖဲ န့ၣ် ပ ကီၢ် ခိၣ် စီၤ ဘး အူ ကၠံ တ ခီ က့ၤ ၀ဲ ဆူ က ညီ ကီၢ် ဒီး က့ၤ စံး ဘၣ် ၀ဲ အ ပှၤ တၢ် ပၢၢ် ဆၢ ဖိ ဒ် အ ၀ဲ လဲၤ ထီၣ် တၢ် အိၣ် ဖှိၣ် တၢ် ပာ်ဖျါ အ သိး လီၤ.ဖဲ န့ၣ် ပှၤ ပၢၢ်ဆၢ တၢ် ဖိ တ ဖၣ် တ တူၢ် လိာ် ၀ဲ တၢ် က တိၤ တ ဖၣ် န့ၣ် ဘၣ် ဒီး ပှၤ ပၢၢ် ဆၢ တၢ် ဖိ တ ဖၣ် တဲ ဆၢ က့ၤ ၀ဲ လၢ ပ မ့ၢ် ဘၣ် ဒုး ပ က ဒုး မ့ မ့ၢ် တၢ် ပာ် လီၤ စု က ၀ဲၤ အ ဂ့ၢ် န့ၣ် ပ တ တူၢ် လိာ် ဘၣ်. ဖဲ န့ၣ် ဒီး ပှၤ ပၢၢ် ဆၢ တၢ် ဖိ တ ဖၣ် က တိၤ ထီၣ် တၢ် လီၤ ဂာ်ဒ် ပှၤ ဒူ ပှၤ ဃိၤ အ တၢ် က တိၤ အ သိး အ ဃိ ပ ကီၢ် ခိၣ် တ ခီ အ သး မုာ် ၀ဲ ဒိၣ် မး လၢ အ နၢ် ဟူ ဘၣ် တၢ် က တိၤ အ ၀ဲ အံၤ န့ၣ် လီၤ.
ဖဲ န့ၣ် အ ၀ဲ အိၣ် ဖှိၣ် လၢ လီၢ် ခၢၣ် သး ၀ံၤ အ ၀ဲ ကလဲၤ အိၣ် ဖှိၣ် က ဒီး ၀ဲ လၢ ဖၣ် ပူၣ်သ ၀ီ ဒီး တဲ က ဒီး က့ၤ ၀ဲ ပှၤ သိၣ် ဒူ ဖိ လၢ အ အိၣ် ဖဲ န့ၣ် တ ဖၣ် ဒီး ပှၤ ဒူ ဖိ သ ၀ီ ဖိ လၢ အိၣ် ဖဲ န့ၣ် တ ဖၣ် လၢ အ ၀ဲ လဲၤ အိၣ် ဖှိၣ် တၢ် ဂ့ၢ် တၢ် ကျိၤ ၀ံၤ ဒီး မး လိာ် စ့ၢ် ကီး ၀ဲ အ တၢ် က တိၤ လုၢ် ဒိၣ် ပှ့ၤ ဒိၣ် တ ဖၣ် ဒ် သိး အ ပှၤ သိၣ် ဒူ ဒီး ပှၤ သ ၀ီ ဖိ တ ဖၣ် အ သး က ဆူၣ် လၢ တၢ် ကိး က ပၤ ဒဲး အ ဂီၢ် န့ၣ် လီၤ. ဖဲ အ ၀ဲ တဲ တၢ် ဖဲ ဖၣ် ပူၣ် သ ၀ီ ခီ ဖျိ လၢ အ ၀ဲ ဖး မုၢ် နံၤ မုၢ် သီ လၢ က ဘၣ် လဲၤ အိၣ် ဖှိၣ် လၢ ထံ ကီၢ် တၢ် သ ဘျ့ အ ဂီၢ် ဘၣ် အ ဃိ အ ၀ဲ လဲၤ လီၤ က ဒီး ၀ဲ ဆူ ကီး တ ရံး တ က ပၤ ဒ် သိး က ဃ့ တၢ် သ ဘျ့ တုၤ လၢ အ န့ၢ် တ စု န့ၣ် လီၤ.
ဖဲ အ ၀ဲ လဲၤ လီၤ တၢ် တ ဘျီ န့ၣ် ဘၣ် လၢ တၢ် စူၤ ခါ အ ဆၢ က တီၢ် အ ဃိ ဖဲ အ ၀ဲ လဲၤ လီၤ တုၤ ၀ဲ ဖဲ ထိၣ် ကီး ကိ သ ၀ီ အ ခါ တၢ် စူၤ ဒိၣ် ဒိၣ် က လဲာ် ဒီး ထံ ကျိ တ ဖၣ် ယွၤ လီၤ ၀ဲ ဒိၣ် မး အ ဃိ ပှၤ ဒူ ဖိ သ ၀ီ ဖိ တ ဖၣ် သ ဂၢၢ် မၤ လၤ က ပီၤ အ ၀ဲ မ့ၢ် ဒ် သိး အ ၀ဲ က အိၣ် ဘှံး ဖဲ သ ၀ီ အ ၀ဲ န့ၣ် လီၤ. ဘၣ် ဆၣ် အ ၀ဲ သ့ၣ် တ ခီ တ အိၣ် ဘှံး ၀ဲ ဘၣ် ဒီး ပာ်လီၤ အ သး လၢ က လဲၤ အိၣ် ဘှံး ဒံး ဆူ သ ၀ီ လၢ ညါ တ ဖျၢၣ် လီၤ. ဘၣ် ဆၣ် ဖဲ လၢ အ ၀ဲ သ့ၣ် လဲၤ လီၤ တုၤ ဖဲ ထိၣ် ကီး ကိ သ ၀ီ ခံ လီၤ စံာ် ပျီ ဖီ လာ် န့ၣ် မ့ၢ် လၢ ထံ ကျိ ဒိၣ် ဒီး ဆဲး လဲၤ က ဒီး ၀ဲ တ သ့ လၢၤ ဘၣ် အ ဃိ က မံ ဆိ ၀ဲ ဖဲ စံာ် ပျီ ဘၣ် သး ဒဲ တ ဖျၢၣ် အ ပူၤ န့ၣ် လီၤ.
ဖဲ အ ၀ဲ သ့ၣ် မံ ၀ဲ ဖဲ န့ၣ် အ ခါ ထံ ခွါ သ ၀ီ ဖိ တ ဂၤ လၢ အ မံၤ မ့ၢ် ၀ဲ စီၤ မီၢ် အဲ လဲၤ တဲ ဘၣ် ၀ဲ ဒုၣ် ဒါ လၢ အ အိၣ် လၢ န ဘူ တန့ခၠါ တ ဖၣ် လၢ ပ ကီၢ် ခိၣ် အ ဂ့ၢ် န့ၣ် ၀ံၤ ဒီး ဒုၣ် ဒါ သ့ၣ် တ ဖၣ် ဟဲ က ၀ီၤ ခး ၀ဲ ဒၣ် ပ ကီၢ် ခိၣ် ဒီး အ သ ကိး တ ဖၣ် လၢ မုၢ် နၤ ခီ ဒီး အ ၀ဲ သ့ၣ် ခီၣ် ဆၢ ဒုၣ် ဒါ တ နၢၤ ဘၣ် အ ဃိ အ ၀ဲ သ့ၣ် တ ဖၣ် ဘၣ် လုၢ် ထီၣ် ကွံာ် ၀ဲ အ သး သ မူ လၢ မုၢ် နၤ ခီ တ ချုး မုၢ် ဆ့ၣ် ၀ါ ဒံး ဘၣ် န့ၣ် လီၤ. ဖဲ မုၢ် ၀ါ ထီၣ် လါ အီ ကူာ် ၁၂ သီ ၁၉၅၀ နံၣ် န့ၣ် ပှၤ လၢ အ အိၣ် ဘူး ဖဲ န့ၣ် တ ဖၣ် လဲၤ ကွၢ် ၀ဲ ဒီး တ ထံၣ် က့ၤ ကီၢ် ခိၣ် အ စိၣ်လၢၤ ဘၣ် အ ဃိ ဆၢ ၀ဲ ဒၣ် တၢ် က စီၣ် လၢ တၢ် လီၢ် ကိး တီၤ ဒ် သိး က ဃု က့ၤ ပ ကီၢ် ခိၣ် အ စိၣ်န့ၣ် လီၤ.
ဖဲ န့ၣ် တၢ် ဃု ၀ဲ လၢ တ နံၣ် အ တီၢ် ပူၤ တၢ် တ ထံၣ် အီၤ ဘၣ် အ ဃိ စး ထီၣ် ဖဲ ၁၉၅၁ နံၣ် လါ အီ ကူာ် ၁၂ သီ အ နံၤ န့ၣ် က ညီ ခိၣ် နၢ် တ ဖၣ် ပာ်ပ နီၢ် က့ၤ ၀ဲ ဒၣ် လၢ က ညီ ပှၤ ဒူ ပှၤ ဃိၤ မုၢ် နံၤ အ ဃိ ဘၣ် တၢ် ပာ်ကဲ အီၤ လၢ က ညီ ဒီ က လုာ် လၢ က ညီ အိၣ် တၢ် လီၢ် ကိး တီၤ မၤ လၢ က ပီၤ သ ကိး ၀ဲ ဒၣ် န့ၣ် လီၤ. အ ဃိ ဖဲ တၢ် ပၢၢ် ဆၢ အ ၀ဲ န့ၣ် ၀ံၤ န့ၣ် တ ပာ် ၀ံၤ ၀ဲ ဒံး ဘၣ် ဒီး လဲၤ က ဒီး ဒံး ၀ဲ တနံၣ် ဘၣ် တ နံၣ် တုၤ လီၤ လၢ ခဲ အံၤ တၢ် တ သး ပ့ၤ နီၣ် အီၤ ဒံး ဘၣ်. ပ မ့ၢ် ဘၣ် တဲ လၢ အ နံၣ် ဃု ဆံ တ နံၣ် ထီၣ် ဘး ဘၣ် ဆၣ် ပ ထံၣ် ဘၣ် ဒံး ပှၤ ဒူ ပှၤ ဃိၤ တ ဖၣ် အိၣ် ဒံး ၀ဲ လၢ ပ ပှၤ က လုာ် က ညီ ဖိ တ ဖၣ် အ ကျါ ဒံး အ ဃိ ပှၤ ဒူ ပှၤ ဃိၤ အ မုၢ် နံၤ အံၤ တ စိၤ ပ သး အံၤ ပ သး ပ့ၤ နီၣ် အီၤ တ သ့ ဘၣ် န့ၣ် လီၤ.
စီၤ မူ က ပီၤ
၀ါ ခး က ညီ ကၠိ ဖိ ပှာ် ဘျးစဲကရုၢ်
အူ ပၠၣ်
http://www.ksngkaren.org/2012/08/blog-post_5288.html
Thai Baht Converter
Post a Comment
ပှၤတဂၤလၢ်လၢ် မ့ၢ်အဲၣ်ဒိးဟ့ၣ်၀ဲ ခီမဲၣ်မ့ၢ်ဂ့ၤ ကွဲးပဲာ်ထံနီၤဖးတၢ်တမံၤမံၤလၢ တၢ်ဂ့ၢ်တခါအံၤအဖီခိၣ် မ့ၢ်ဂ့ၤ ဟ့ၣ်ခီမဲၣ် ဒီး ပဲာ်ထံနီၤဖးသ့လီၤ. လၢနဂီၢ် ခီမဲၣ်လီၢ် လီၤဟိအိၣ်ထီဘိဒီးတူၢ်လိာ်နတၢ် ပဲာ်ထံနီၤဖးဒီး တၢ်ဟ့ၣ်ကူၣ်တဖၣ်လီၤ.